Showing posts with label Crime. Show all posts
Showing posts with label Crime. Show all posts

Sunday, December 12, 2021

ఆ'పరేషాన్ ' - చిన్న కథ - కర్లపాలెం హనుమంతరావు

 

 

మా కొలీగ్ సుబ్బారావు తనకు వంట్లో బావోలేదని ఆసుపత్రికి వెళుతుంటే నేనూ తోడు వెళ్ళా.

బైట బోలెడంత క్యూ. గంటకయినా లోపలికి పోవడం అనుమానమే. ఆఫీసుకి టైమయిపోతుందని నేను కంగారు పడుతుంటే కారిడార్లలో గుర్నాథం కనిపించాడు. నన్ను గుర్తుపట్టి పలకరించాడు.

గుర్నాథం హైస్కూల్లో నా క్లాస్ మేట్. చాలా ఏళ్ళతరువాత అనుకోకుండా ఇక్కడ కలిసాడు. నేను వచ్చిన పని కనుక్కొని చనువుగా 'డాక్టరుగారు నాకు బాగా తెలుసులేరా! నువ్వెళ్ళు! మీ ఫ్రెండు పని నేను చూస్తాలే!' అన్నాడు.

 

ఆ సాయంత్రం సుబ్బారావు గుర్నాథాన్ని ఒహటే పొగడటం! 'మీ ఫ్రెండుకి మా చెడ్డ ఇన్ఫ్లుయన్సుందండీ! చకప్పులూ అవీ చకచకా చేయించేసాడు. రిపోర్టులు తీసుకొని తనే వస్తానన్నాడు' అన్నాడు సంబరంగా.

గుర్నాథం స్కూలురోజుల్లో యావరేజి. వెనుక బెంచీలో కూర్చోని ఎప్పుడూ ఏవేవో పెన్నులు రిపేరు చేస్తుండేవాడు. వాడి సంచీలో పుస్తకాలు అన్నీ ఉన్నా లేకపోయినా.. రకరకాల కలం కేపులు, పాళీలు, నిబ్బులు, సిరాబుడ్డి, చెత్తగుడ్డపీలికలు మాత్రం నిండుగా ఉండేవి. మూడుపైసలకు కేపు, రెండు పైసలకు నిబ్బు, పైసాకి పాళీ.. పెన్నుమొత్తమయితే అణా.. అలా అమ్మేవాడు పాత కలాలని. అణాలు, పైసలు చలామణిలో ఉండే జమానాలేండి అది. అప్పట్లో ఇప్పట్లా బాల్ పెన్నులు కాకుండా సిరా నింపుకొని రాసుకొనే రకం కలాలు వాడకంలో ఉండేవి. మా మాస్టార్లుకూడా ఈ గుర్నాథం బుట్టలో పడుతుండేవాళ్ళు! అవసరం వచ్చినప్పుడు వాడు వాళ్ళకీ పేనాలు ఉచితంగా తయారు చేసిస్తుండేవాడు.  అందుకని ఏమనేవాళ్ళు కాదు.

పదో తరగతి పరీక్షలు రాసే రోజుల్లో సమాధాన పత్రాలు తారుమారు చేసాడని డిబారు చేసారు వాణ్ణి. ఆ తరువాత ఇదిగో ఇప్పుడే.. మళ్ళీ దర్శనం!

గుర్నాథం తెచ్చిన రిపోర్టులు చూసి గుండె ఆగిపోయినంత పనయింది  సుబ్బారావుకి. కిడ్నీలో ప్రాబ్లమున్నట్లు తేలింది. 'ఆపరేషన్ అవసరమంటున్నాడు డాక్టర్' అన్నాడు గుర్నాథం తాపీగా.

కిడ్నీ ట్రాన్సప్లాంటేషనంటే మాటలా? దానికి ముందు డయాలసిస్. డయాలసిస్ అంటే లక్షల్లో వ్యవహారం. ముందు డోనర్ దొరకడమే గగనం. కిడ్నీదాత బంధువు కాకపోతే ఆథరైజేషన్ కమిటీ అప్రూవల్ అవసరం. అదంత తేలికగా తెమిలే వ్యవహారం కాదు. అన్నింటికన్నా ముఖ్యంగా డాక్టర్లు రిస్కు తీసుకోవడానికి బాగా జంకుతున్నారు. మరీ ఈ మధ్య ఈ కిడ్నీ కేసుల చుట్టూతా గవర్నమెంటు నిఘా  పెరిగిన తరువాత.

'కేసులవుతాయేమోనని భయం. అవన్నీ నేను చూసుకొంటాగాని.. మనీ సంగతిమాత్రం మీరు చూసుకోండి' అని అభయమిచ్చాడు గుర్నాథం.

'ఎంతవుతుందేమిటీ?'  సుబ్బారావు సందేహం.

'సుమారు నాలుగయిదు లక్షలు'

'అమ్మో! గవర్నమెంటు ఉద్యోగినికూడా కాదు. ఎక్కణ్ణుంచి తవ్వి తేవాలీ అంత డబ్బు?' అంటూ సుబ్బారావు గుండెలు బాదుకొన్నాడు. '

'ఇదింకా చీపండీ! లివరయితే ఏడు లక్షలు. హార్టు, లంగ్సు ఆపరేషనయితే అంతకు రెట్టింపు. కంటిగుడ్డుకు వాడే కార్నియానే ఐదు లక్షలు పోస్తేగాని దొరకడంలేదు మార్కెట్లో'

రైతుబజారులో కూరగాయల దరవరల్లాగా ఏకరువు పెడుతున్నాడు గుర్నాథం.

'చూస్తూ చూస్తూ వంట్లోని పార్టుల్ని ఎవరమ్ముకొంటార్రా? ఏదో సినిమాల్లో అలా చూపిస్తుంటారుగానీ' అన్నాను నేను అక్కడికీ నమ్మకం కుదరక.

'పేదరికం ఎంత పనయినా చేయిస్తుంది బాబూ! మెదడు చచ్చిపోయినా గుండె కొట్టుకొంటుంటే చాలు.. ఇలా చాలా అవయవాలని తీసి హాయిగా వాడుకోవచ్చు. ఇవాళా రేపూ ఆ వ్యాపారం బాగా ఊపందుకొందికూడా మిత్రమా! పేపర్లలో వచ్చేవే వార్తలు కావురా బాబూ! వాటికి వెనకాల సమాంతరంగా అంతకుమించిన ప్రపంచం పరుగెడుతోంది' అన్నాడు గుర్నాథం.

'ఎంత అన్యాయం!' గుండెలమీద చెయ్యివేసుకొన్నాడు సుబ్బారావు తబ్బుబ్బయిపోతూ.

'ఇందులో అన్యాయం ప్రసక్తేముంది?అవసరం అలాంటిది. ఇంద్రుడు వజ్రాయుధంకోసం దధీచి పక్కటెముకలు లాగేసుకోలా? కవచకుండాలలనికూడా దానం చేసిన కర్ణుడికథ మనకు కొత్తా? డబ్బు పడేస్తే లివర్లయినా ఫ్లవర్లలో పెట్టి ఇస్తున్నారు సార్ ఈ కాలంలో! గుండెకాయలు బెండకాయల్లా, కంటిగుడ్లు కోడిగుడ్లలా మారకం జరిగిపోతున్నాయి. యూరప్ లాంటి డెవలప్డ్ కంట్రీసులో అయితే ఏకంగా 'యునైటెడ్ నెట్ వర్క్ ఫర్ ఆర్గాన్స్ సేల్' అని భారీ నెట్ వర్కే నడుస్తోంది బ్రహ్మాండంగా’.

'చట్టం చూస్తూ వూరుకొంటుందా?!’

'ఎందుకూరుకొంటుంది సార్? తనపని తాను చేసుకు పోతుంటుంది. నెట్ వర్కూ తనపని తాను చేసుకు పోతుంటుంది. ఇక్కడిలాగానేఒకరి పనిలో ఇంకోరు జోక్యం చేసుకోకుండా డబ్బుమూట చూసుకొంటుంది'

గుర్నాథం చెప్పిందాంట్లో అతిశయోక్తేమీ లేదనే అనిపిస్తోంది. డబ్బుకు చట్టం చుట్టం కానిది ఎక్కడలేండి?! ప్రాణంతీపిముందు ఎన్ని ధర్మపన్నాలైనా చేదుగానే ఉంటాయికదా!

'మీరు ఆలోచించుకొని కబురు చేయండి!.. వస్తా!' అని విజిటింగ్ కార్డొకటి ఇచ్చి కాఫీతాగి వెళ్ళిపోయాడు గుర్నాథం.

 

సుబ్బారావుగారింట్లో రెండు రోజులు ఒహటే మల్లగుల్లాలు. పాపం! సుబ్బారావు గవర్నమెంటు ఉద్యోగైనా కాదు.. కనీసం ఖర్చులైన్నా రాబట్టుకోడానికి. ఇంట్లోని బంగారం, ఊరి బైట అప్పుడెప్పుడో కొనుక్కున్నస్థలం అమ్మైనా సరే .. ఆపరేషన్ చేయించుకోవాల్సిందేనని పట్టుపటుకు కూర్చొంది సుబ్బారావుభార్య. 

గుర్నథాన్ని పిలిపించి పరిస్థితి వివరించాం. ‘ఉన్నంతే ఇవ్వండి. మిగతా సర్దుబాట్లేవన్నా ఉంటే చూసుకోడానికి నేనున్నాగా!’ అంటూ అభయహస్తం ఇచ్చాడు.  

డోనర్ని చూపించమన్నాడు సుబ్బారావు. అన్నంరాజు అనే అతన్ని కలవమని అదేదో అనాథ శరణాలయం చిరునామా ఇచ్చాడు గుర్నాథం.

గుర్నాథం మనుషులమని నమ్మకం కుదిరాక  సగం రేటుకే బేరం కుదురుస్తానని ఉత్సాహం చూపించాడా అన్నంరాజు.

డోనర్ని మాత్రం ఇప్పుడే చూపించకూడదంట! 'లోపాయికారీ వ్యవహారాలు  కదండీ ఇవన్నీ! పదేళ్ళబట్టీ ఈ వ్యాపారంలో ఉన్నాను. నన్ను మీరు నమ్మాలి' అన్నాడు అన్నంరాజు. నమ్మకమాత్రం చేసేదేముంది గనక?

సగం పైకం ముందే గుంజుకొన్నాడు అన్నంరాజు.

'డాక్టరుగారు ఆపరేషన్ డేట్ ఇచ్చిందాకా కిడ్నీకి రెంట్ కడుతుండాలి. నెలకు నాలుగువేలు. డోనరు కిడ్నీని వేరేవారికి అమ్ముకోకుండా ఆపటానికి, ఆరోగ్యంగా ఉంచుకోవడానికి.. ఆ మాత్రం భరించక తప్పదు. ఆఫ్ట్రాల్ ఆపరేషన్ అయిన తరువాత  ఆ కిడ్నీ మనదే అవుతుంది కదండీ చివరికి?' అని ఆ పెద్దమనిషి లా పాయింటూ!

డాక్టరుగారి డేట్ మూడు నెలలకుగాని దొరకలేదు. అంత బిజీట ఆయన! ఈ మూడు నెలలు క్రమం తప్పకుండా డయాలసిస్ తప్పటంలేదు సుబ్బారావుకి.

 

సుబ్బారావీ మధ్య చిత్రంగా మాట్లాడటం మొదలుపెట్టాడు. 'ప్రతీ మనిషికి కనీసం నాలుగు కిడ్నీలైనా ఉండాలి. అలాగే ఆరేడు జతల చేతులు, పది జతల కాళ్ళు, నాలుగైదు జోళ్ళ చెవులు, కళ్ళు, రెండు మూడు ముక్కులు, వందనాలికలు, నాలుగయిదు  గుండెలుకూడా ఉంటే బావుంటుంది.' ఇలా సాగుతోంది సుబ్బారావు ధోరణి.

రెండు చేతులుంటేనే మనిషిచేసే ఆగం తట్టుకోలేక పోతోంది లోకం. ఇహ పదులు.. ఇరవైలు మొలుచుకొస్తే జరిగే ఆగడాలని ఊహించగలమా?!

'ఒక్క తలకే  ఇంత లావున తిరుగుతోంది మీకు! పదేసుంటే ఇహ పట్టుకోగలమా తమర్నీ.. తమ తి.క్కనీ! ' అని శాపనార్థాలకు దిగింది సుబ్బారావుగారి శ్రీమతి. భర్త పిచ్చిమాటలు  విని విని పాపం ఎంతగా విసిగిపోయిందో ఆ ఇల్లాలు!

'ఇందులో తిక్కేముందే పిచ్చిదానా! శివుడికి మూడు కళ్ళు లేవూ? విష్ణుమూర్తికి నాలుగు చేతులు, బ్రహ్మదేవుడికి నాలుగు ముఖాలు, రావణాసురుడికి పది తలకాయలు, కార్తవీర్యుడికి వెయ్యి చేతులు, దేవేంద్రుడికి వెయ్యి కళ్ళు!  దేవుళ్లందరికీ అన్నేసి అవయవాలుండగా లేనిది మానవులకు అందులో కనీసం సగమైనా ఉండాలని కోరుకోవడం తిక్కా?!'

ఒక అవయవం పాడైనా మరోటి పనికొస్తుందని కాబోలు సుబ్బారావు ఆశ. 'ఈసారి దేముడు కనబడితేమాత్రం రకానికో జత స్పేరుగా ఇవ్వమని పట్టుబట్టడం ఖాయం' అంటో సుబ్బారావు కన్నీళ్ళు పెట్టుకుంటుంటే మనసంతా దేవినట్లయిపోయింది.

 

ఎలాగైతేనేం.. సుబ్బారావుకి ఆపరేషన్ అయిపోయింది.

మూడో రోజు గుర్నాథం పేరు వార్తాపత్రికల్లో వచ్చింది ప్రముఖంగా ఫొటోలతో సహా. ఏ టీవీ ఛానల్లో చూసినా ఆ రోజంతా ఆ మహానుభావుణ్ణి గురించిన సమాచారమే!

మానవ శరీరావయవావలను అమ్మే వ్యవహారంలో చాలా అవకతవకలు జరుగుతున్నాయని ఓ ప్రముఖ వార్తాపత్రిక వివరాలతోసహా వరుస కథనాలను ప్రచురించడం మొదలుపెట్టింది. ఈ గోల్ మాల్ మొత్తంలో గుర్నాథానిదీ ఓ ప్రధాన పాత్ర!

అరెస్టు చేయడానికని వెళ్ళిన పోలీసులు అతగాడు గుండెనొప్పి వచ్చిందన్నాడని కోర్టు ఆదేశాలమీద నిమ్సు ఆసుపత్రిలో చేర్చి బైట పహరా కాస్తున్నారు.

నేర పరిశోధక బృందం అన్నంరాజు అనాథ శరణాలయంమీద ఆకస్మిక దాడి చేసినప్పుడు బోలెడన్ని అవయవాలు అమ్మకానికి సిద్ధంగా ఉన్నవి బైటపడ్డాయని వార్త! కిడ్నీలు, లివర్లు, కళ్ళు.. వంట్లో అమ్ముకోవడానికి వీలున్న ఏ అవయవాన్నైనా సరే చెట్టుమీదనుంచి కాయలు కోసిచ్చినట్లు కోసిచ్చే ఏర్పాట్లు ఆ అనాథ శరణాలయంలో  జరుగుతున్నాయిట! అందుకు అనుగుణంగా అక్కడ  పెరుగుతున్న అనాథ బాలబాలికలను చూసి  నోరు వెళ్లబెట్టడం నేర పరిశోధక బృందం వంతయిందట!

కూరగాయలే సరిగ్గా దొరకని ఈ కరువురోజుల్లో అంతంత మందని  సేకరించి పెంచడమంటే మాటలా?!

ఆ ముక్కే ఎవరో పనిలేని చానెల్ వాళ్ళడిగితే ఆసుపత్రి శయ్యమీద విలాసంగా శయనించిన గుర్నాథంగారు చిద్విలాసంగా నవ్వి వినయపూర్వకంగా ఇచ్చిన సమాదానం

'అంతా ఆ పై వాడి దయ. ఆపైన సర్కారు పెద్దల సహకారం'

అన్నంరాజు అనాథశరణాలయంలోని పసిపిల్లలు తరుచుగా చనిపోతున్నారన్న విషయం అప్పుడు బైటపడింది! అనుమాన నివృత్తికోసం ముందురోజు పోయిన పిల్లలిద్దరి బాడీలను రీపోస్టుమార్టమ్ చేయిస్తే.. వచ్చిన రిజల్టు ‘షాకింగ్’!

 

బాడీల్లో చాలా పార్టులు మిస్సింగు!

ఉదయంబట్టీ వరసబెట్టి వస్తున్న ఆ వార్తల్ని చూసి చూసి సుబ్బారావు ఇంట్లో కళ్ళు తిరిగి పడిపోయాడు! మళ్లా ఆసుపత్రిలో అడ్మిట్ చేయాల్సొచ్చింది మాకు అర్జంటుగా!

ఎందుకైనా మంచిదని సుబ్బారావుబాడీని ఫుల్ స్కానింగు చేయించాం.  మా అనుమానం నిజమే అయింది. సుబ్బారావు వంట్లోని కిడ్నీలు మాయం!

గుర్నాథం రికమెండ్ చేసిన డాక్టరు  ఆపరేషన్ చేసింది- సుబ్బారావు కిడ్నీజబ్బు మాయం చేయడానికి కాదు. మంచి కిడ్నీని మాయం చేయడానికని ఆలస్యంగా తెలిసింది!

కిడ్నీధర కనీసం నాలుగయిదు లక్షలకు తక్కువ  పలికని రోజుల్లో .. నాలుగో వంతుకే ఆపరేషన్ చేయిస్తానని గుర్నాథం ఆఫరిచ్చినప్పుడే  అన్నిరకాలుగా ఆలోచించుకొని ఉండాల్సింది మేం!

'ఎలాగూ పోయే శాల్తీనేగదా అని ఆయన మంచి కిడ్నీని మా ఆపరేషన్ ఖర్చులకింద రాబట్టుకొన్నాం.. వ్యాపార ధర్మంగా! అదీ తప్పే?!' అంటూ బుకాయింపులకి దిగాడు బైలునుంచి  L బైటికొచ్చిన పిదప అతికష్టంమీద సెల్లో దొరికినప్పుడు గుర్నాథం!


( సూర్య  -దిన పత్రిక ప్రచురణ ) 

***

-కర్లపాలెం హనుమంతరావు

14 మార్చి 2021 

బోథెల్ ; యూ ఎస్ ఎ 





ఆధునిక మారీచులు -కర్లపాలెం హనుమంతరావు

 

ఆధునిక మారీచులు

-కర్లపాలెం హనుమంతరావు

‘ర- కారం ముందుడే అక్షరాలన్నీ నన్ను భయకంపితుణ్ణి చేస్తున్నాయిప్పడు. రత్నాలు, రథాలు.. అయినా సరే భయమే భయం! శూర్పణఖ  కారణంగా నీకు రాముడు మీద కొత్తగా పగ  పుట్టుకొచ్చింది. తన కారణంగానే నా తోబుట్టువు ఖరుడు చచ్చినమాట గుర్తుతెచ్చుకో రాజా! రాముడు రాక్షస జాతి మొత్తానికి అంతకుడు. అందులో పిసరంతైనా అనుమానం లేదు. వాడి దెబ్బ రుచిచూసిన వాడిని కాబట్టే నిన్ను ఇంతగా హెచ్చరిండం.  అప్రమత్తంగా ఉండు. లేకపోని కక్షలతో నువ్వే కాదు నీ బంధు కోటి సర్వం భూమ్మీద లేకుండా చేసుకోకు!’ అంటూ మారీచుడు మంచి మాటలు నాలుగు చెప్పబోయినా రావణాసురుడి చెవికి ఎక్కాయి కాదు! చావు మూడినవాడు ప్రాణౌషధాన్నీ దగ్గరకు రానివ్వడు! మారీచుడీ మాటలు చెవినపెట్టకుంటే పాయ, వెటకారాలకు దిగాడు సహాయం అడుక్కోడానికి వచ్చిన రావణబ్రహ్మ.

‘ఈ అయుక్తార్థాలు ఎప్పట్నుంచి మారీచా? ఊసర క్షేత్రంలో విత్తులా నీ మాటలు నా మనసువులో నాటవు. ఇహ పండే మాట ఎక్కడ? అయినా,  పాపశీలుడు, మూర్ఖుడు పైపెచ్చు తుఛ్చ మానవ జాతికి చెందిన రాముడితో నేరుగా తలపడ్డం  నా స్థాయికి తలవంపులు. కాబట్టే నిన్నిట్లా దేబిరించడం.  అయినా ఆడదాని మాట కోసం మిత్రుల్ని, తల్లిదండ్రుల్ని గాలికొదిలి మన ఆడవుల్లొ కొచ్చి పడ్డ ఆ  ధూర్తుడి మీదనా ఈ స్తోత్రాలు, దందకాలు? నీ సోదరుడి చావుతో ఆవరించిన నైరాశ్యం వల్లనుకుంటా పిరికితనం. ఎంత హాస్యాస్పదం! స్వంత ప్రాణాలకన్నా కట్టుకున్న ఆడదాని మానం ముఖ్యం ముఖ్యమనుకునే  అనాగరికుఏమిటి.. విడ్డూరం  కాకపోతే! ఇదిగో మారీచా! ఒక మాట చెబుతున్నా.. సావధానం వినుకో! సీతాపహరణం జరిగి తీరుతుంది. అదీ నీ సమక్షంలోనే. ఇంద్రాది దేవతలు ఆడ్డొచ్చినా  ఆగే కార్యం కాదిది. మంచీ చెడూ చెప్పడానికి నీకున్న అర్హత నీకుంటే ఉండొచ్చు! నీ పని నీవు చేసేశావు. ఇహ నా పని మొదలయ్యే మార్గం మాత్రమే చర్చించడం  నీ విధి.’ అని హూంకరించాడు రావణాసురుడు. 

తెలివైన దాసుడు రాజు దగ్గర మొండికి తిరగడం చావు స్వయంగా కొనితెచ్చుకోవడమే! రాజుకు రుచించని పక్షంలో సున్నితంగా చెప్పే ప్రయత్నం చేసుకోవచ్చు. మంచి మాటయినా సరే తలబిరుసుగా  చెబితే మొదటికే బెడిసికొడుతుంది. మారీచుడి దుస్థితే ప్రస్తుతం ఏ.పి ప్రభుత్వంలోని అధికారుల  సంకట స్థితి.

‘పంచ రూపాణి రాజానో ధారయంతి అమిత ఓజసః | అగ్నేః ఇంద్రస్య సోమస్య యమస్య వరుణస్య చ / ఔష్ణ్యం తథా విక్రమం చ సౌమ్యం దణ్డం ప్రసన్నతాం |ధారయంతి మహాతామ్నో రాజానః క్షణదాచర /తస్మాత్ సర్వాసు అవస్థాసు మాన్యాః పూజ్యాః చ పార్థివాః /త్వం తు ధర్మం అవిజ్ఞాయ కేవలం మోహం ఆశ్రితః ‘

రాజు అంటే అగ్మి, ఇంద్రుడు, చంద్రుడు, వరుణుడు, యముడు.. ఈ ఐదు  రూపాలు కలగలుపు. కాబట్టే అతగాడిలో ఉష్ణం, వీరత్వం, సౌమ్యత, ప్రసాద లక్షణం, దండించే గుణం- సందర్భాలను బట్టి ప్రసారమవుతాయి. రాజులు అన్ని వేళలా పూజనీయులు అవడానికి అదే కారణం. నువ్వు ఆ ధర్మం తెలిసీ అతిక్రమించి మాట్లాడావు. నీలోని మోహమే అందుకు ప్రధాన కారణం.’  అభ్యర్థించడానికి  వచ్చానన్న చులకనా?  రాజుతో పరుషంగా మాట్లాడడం తగని పని. సరే, ఈ దఫాకు మనసులో ఉంచుకోకుండా నీ తప్పును క్షమించేస్తున్నా. బంగారు లేడిగా మారు. వంటి మీద వెండి మచ్చలుండాలి. అడవిలో రామాశ్రమం చుట్టూతా తచ్చాడుతుండు. సీత కంటబడ్డం ప్రధానం. ఆడవాళ్లకు బంగారం మీదుండే కాంక్ష నార బట్టల సీతనైనా కుదురుగా ఉండనీయదు. పెళ్లాం కోరింది కాదనకూడదనే పనికిమాలిన జాతి పురుషుడు రాముడు. నీ వెంట పడకతప్పదు. నువ్వు ఆ మూర్ఖుణ్ణి  ఆశ్రమానికి చాలా దూరం తీసుకు వెళ్ళు చాలు. ఆనక సందు చూసుకుని 'హాసీతే లక్ష్మణే త్యేవం రామ వాక్యనురూపకం' అని అరుపుల్లంకించుకో మారీచా! సీత ప్రచోదనం వల్ల లక్ష్మణుడికీ రాముడు వెళ్ళిన దారి వెంటనే వెతుక్కుంటూ పోకతప్పదు. ఇంద్రుడు శచీదేవిని త్తుకొచ్చినట్లు  ఒంటరి ఆడదానిని ఎత్తుకొచ్చే ప్రతాపం అప్పుడు నేను చూపిస్తా!ఈ కార్యం చేసి పెట్టినందుకు నీ కష్టం ఊరికే ఉంచుకోల్, అర్థరాజ్యం ముట్ట చెబుతానని మాట ఇస్తున్నా. ఆ తరువాత నువ్వు దాన్ని ఏలుకుంటావో, ఏట్లో కలుపుకుంటావో .. నీ ఇష్టం' అంటూ రావణాసురుడు ఇప్పటి మన పాలకులు కొద్దిమందికి మల్లేనే ఊదరగొట్టేస్తాడు.

కైలాసగిరిని ఎత్తి కుదేసిన ఘనుడై ఉండీ రావణాసురుడు ఒక ఒంటరి మానవ స్త్రీని ఎత్తుకొచ్చేందుకు ఇంత కథ ఎందుకు నడిపించినట్లు? అంటే ఒకటే సమాధానం! పోయేకాలాన్ని మరింత ముందుకు తెచ్చుకోడం కోసమే!

పోనీ ఎత్తుకొచ్చిన సీత ఏమైనా ఆ రాక్షస రాజుకు లొంగి వచ్చిందా? తప్పు చేసిన ఆ తుచ్ఛుడు తుదకు మొదట్లో మారీచుదు చెప్పిన  చావుదెబ్బ రుచి చూడనే చూశాడు. అయ్యో పాపం అనాల్సిన అవసరమేమీ లేదు కానీ, మంచి మాటలు చెప్పగలిగిన స్థితిలో ఉండీ చెప్పలేక చివరికి అన్యాయంగా చావు మీదకు తెచుకున్న మారీచుడి గురించే వ్యథంతా!

 ‘మారీచ వధ’ ఎన్నిసార్లు పారాయణం చేసి ఉంటారో మన ఏపిలోని  అయ్యేయెస్సులు, ఐపీఎస్సులు! అయినా బుద్ధి రావడం లేదు. ఆధునిక మారీచులను గురించే బాధంతా!

-కర్లపాలెం హనుమంతరావు

21 -05 -2021

 

నేరాలు - శిక్షలు- కర్లపాలెం హనుమంతరావు


 

నేరం అంటే తప్పు. అపరాధం. సంఘ ప్రయోజనానికివ్యక్తి భద్రతకు ఉమ్మడిగా కొన్ని నీతి నియమాలు ఏర్పాటు చేసుకునే పద్ధతి  అన్ని కాలాలలోనూ ఉంది. ఆ కట్టుబాట్లను కాదని ప్రవర్తిస్తే సమాజం మొత్తానికే ముందు ముందు ముప్పు ఏర్పడే అవకాశం కద్దు. ఆ ప్రమాదం నివారించడం  కోసం గాను  'శిక్ష'లు ఏర్పడ్డాయి.  తప్పు చేసినవారిని దారిలో పెట్టడమే ప్రధానంగా 'శిక్షలుముఖ్య ఉద్దేశంగా ఉంటుంది. కొన్ని  సరిదిద్దుకోలేని పెను తప్పిదాలకు పెద్ద పెద్ద శిక్షలూ కద్దు. ఈ శిక్షలు నిర్ణయించే అధికారం గతంలో రుషులకు ఉండడం గమనించవచ్చు. మహితాత్ములు నిర్ణయించిన  శిక్షలు అమలు  చేసే బాధ్యత సాధారణంగా రాజ్యం శాంతిభద్రతలను  సురక్షితంగా పర్వవేక్షించడమే ధర్మంగా గల పాలకులకు ధఖలై ఉండేది.   ఆన్నికాలాలలోనే కాకుండా అన్ని లోకాలలలో కూడా  నేరాలు చేయడంవాటికి తగ్గట్లు  శిక్షలు విధించి అమలు చేయబడడం గమనించవచ్చు. 

 

తెలుగువాళ్ళు పవిత్రంగా భావించే భాగవతంలో ఉపాఖ్యానల ద్వారా ఈ కొన్ని శిక్షలు.. అవి అమలు జరిగిన తీరు  స్థాలీపులాకన్యాయంగా పరిశీలించడమే ఈ చిన్నవ్యాసం ఉద్దేశం.

భాగవతంలో శిక్షలు ప్రధానంగా మూడు రూపాలలో కనిపిస్తాయి. స్వయంగా విధించుకునేవివేరేవారు విధించి అమలుచేసేవిశిక్షలు పడినా ఎన్నటికీ అమలుకాకుండా నిలబడిపోయినవీ.

సతీదేవి ప్రాణత్యాగం స్వయం శిక్షకు ఉదాహరణ. తండ్రి దక్షుడు యాగం చేసే సందర్భంలో అల్లుడైన రుద్రుడికి ఆహ్వానం అందదు. అయినా అతని భార్య దాక్షాయణి, 'పిలవని పేరంటానికి వెళితే అవమానాలు ఎదురయే అవకాశం ఉంద'ని భర్త హెచ్చరించినా 'తండ్రి ఇంటిలోని సంబరాలు తనయలు చూడాలి గదా! 'సర్వదిక్కులవారు కదిలి వెళ్ళే  యాగానికి  తానూ వెళ్లితీరాల'న్న మంకుపట్టుతో సహచరుడి తోడు లేకుండానే తరలివెళ్లింది. ఫలితం తీరని అవమానం. 'జలంబు ఆచమనంబు చేసి శుచియై మౌనంబు ధరియించిజితాసనయై భూమియందాసీనయగుచు యోగమార్గంబులో' చివరికి  ఆమె చేసిన శరీర త్యాగం భర్త ఆనతి మీరిన నేరానికి స్వయంగా విధించుకున్న శిక్ష. దేవుళ్లకు ఈగోలుఅలకలుకలతలు,దుఃఖాంతమైన కథలు ఉండటం అదొక వింత.

ఇకఇతరులు విధించే శిక్షల వ్యవహారానికొస్తే దేవతలురాక్షసులుమనుషులుమునీశ్వరులు  ఎవరు విధించే శిక్షలు వాళ్లవే.  

చిత్రకేతువు అనే విద్యధరాధిపతి ధర్మ సభలో ఈశ్వరుడి కౌగిట్లో ఉన్న గౌరిని చూసి ఆడవాళ్లు సభలలో నడుచుకొనే తీరు మీద చర్చపెట్టేశాడు. శివుడు చిరునవ్వుతో పోనిచ్చినా గౌరీదేవి గొప్ప అవమానం జరిగినట్లు క్రుద్ధురాలైంది. 'ఎగ్గుపల్కిన పాపాత్ముడెల్ల భంగి/దండనార్హుండు గాకెటు తలగగలడు'(6 -496)అని భావించింది. ఫలితం 'పాపపుస్వరూపమైన రాక్షసయోనిలో పుట్ట'మని శపించింది. తన కంటే అధికులను తప్పు పడితే నేరమని గౌరమ్మ  భావం. ఇంకెవరూ ఆ పని చెయ్యకుండా భయపడేందుకు చిత్రకేతువుకు అంతలావు శిక్ష. 

విష్ణుద్వేషులైన రాక్షస జాతిలో పద్దస్తమానం హరినామ జపం పారాయణం చేసే పసికొడుకును ప్రారంభంలొ చదువు సాములకు పెట్టి దారికి తెచ్చుకోవాలని చూశాడు రాక్షసరాజు హిరణ్యకశిపుడు. విష్ణుమాయ నుంచి బైట పడకపోగా తనకే నీతిపన్నాలు చెప్పడంలో రాటుదేలిన ప్రహ్లాదుణ్ని 'ముంచితి వార్ధులం గదల- మొత్తితి శైల తటంబులందు ద్రొ/బ్బించితి శస్త్రరాణి  పొడి- పించితి మీద విభేంద్రపంక్తిద్రొ/క్కించితి ధిక్కరించితి శ-పించితి ఘోరదవాగ్నులందు ద్రో/యించితి పెక్కు పాట్లనల-యించితి చావడిదేమి చిత్రమో!అన్న పద్యంలో రాక్షసరాజే  చెప్పుకున్నట్లు ఒకటిరెండు కాదు వరస బెట్టి శిక్షల మీద శిక్షలు విధించేశాడు. 

కంసమహారాజు బాలకృష్ణుణ్ణి వెదికి మరీ శిక్షలు విధించడం మానవమాత్రులు విధించే శిక్షలు ఎంత విచిత్రమైన పద్ధతుల్లో ఉంటాయో అర్థమవుంది. వత్సాసురబకాసుర,  అఘాసుర ధేనుకాసురల్లాంటి దుష్టరాక్షసులను  ఒకళ్ల తరువాత ఒకళ్ళను చంపమని పంపటానికి కృష్ణుడు చేసిన తప్పిదాలేమీ లేవు. తనకు ప్రాణాపాయం ఉందని కంసుడు తలపెట్టిన  దుష్కృత్యాలు ఇవన్నీ!

సనకసనందాదులు జయవిజయులకు ఇచ్చిన దండనలు మునులు ఆచరించే శిక్షల జాబితాలోకి వస్తాయి. వైకుంఠ ద్వారాలకు పహరా పనిలో ఉండే జయవిజయులు స్వామి దర్శనార్థ వచ్చేవారి వివరాల  జోలికి  పోకుండా మొండిగా అడ్డుపడుతున్నందుకు పడ్డ ఆ శిక్ష. విఐపి ల ఆఫీసులకు కాపలాలు కాసే డవాలా బంట్రోతులదే సగం పెత్తనంగా సాగుతున్న ఈ కాలంలో జయవిజయుల ఉదంతానికి సమకాలీన ప్రాధాన్యత కద్దు. గేటుకు కాపలా కాసే వాళ్లు అగంతుల పట్ల అప్రమత్తంగా ఉండడం ఎంత అవసరమో తెలియజేసే కథ. 

అరాచక పాలన ద్వారా తోటి వాళ్లందరినీ పిల్లలాట కింద హింస పెట్టే వేనుడి కథ అయితే ఇప్పటి కాలానికి ఎంతో మందికి నిజానికి గుణపాఠం కావాల్సుంది. విజ్ఞులు ఎంత చెప్పినాఎన్ని విధాల నచ్చచెప్పినా నీచబుద్ధి వదలని ఆ పాలకుడు చివరకు ఆ మునుల చేతనే శిక్షకు గురవుతాడు. 

శిక్షించే విధనాలు చాలా రకాలు. 'బావా! రమ్మని బరనగవు నగుచువీనిం బట్టి బంధించి గడ్డంబును/మీసంబునుం దలయును   గొరిగి విరూపిం '(10 -146) చేసిన రుక్మిణీవల్లభుడి రుక్మి శిక్షావిధానం కాయక విధానం. ఇప్పుడూ మళ్లా అమల్లోకి వస్తే ఎన్ని పరువు హత్యలు తగ్గి సమాజం ఆరోగ్యవంతంగా తయారవుతుందో .. ఊహించదం కష్టం.

కానీ దురదృష్ణ కొద్ది.. కొన్ని సందర్భాలలో తప్పు ఒకరు చేస్తే.. శిక్ష వేరేవాళ్లకు పడడం ఇప్పట్లా భాగవత కాలంలోనూ కద్దు. చిత్రకేతువు అనే రాజు అంగిరసుడు అనే ఋషి ప్రసాదించిన సంతానఫలం కృతద్యుతి అనే భార్య ఒక్క  దానికే ఇవ్వడం సాటి సవతులలో అసూయను రగలాడినికి కారణం అవుతుంది. కృతద్యుతి  కడుపున కాసిన ఆ కాయ మీదనే మహారాజు ధ్యాసంతా. కడుపు రగిలిన సవతులు పసిబిడ్డకు విషమిచ్చి చంపేస్తారు. మహారాజు పక్షపాత నేరానికి పాపంపుణ్యం ఎరుగని పసిబిడ్డ ప్రాణాంతకైన శిక్షను అనుభవించడం ఘోరాతిఘోరం. పాలకులకు నిష్పక్షపాత బుద్ధి లేని పక్షంలో అమాయకులు అన్యాయంగా ఎట్లా శిక్షలకు గురువుతారో.. ఈ కాలంలోనూ అన్ని ప్రాంతాలలో వీపు చరిచి చెప్పేటంత ఘోరమైన సంఘటనలు జరుగుతున్నాయ్! 

బలి చక్రవర్తి రాజ్యభ్రష్టత్వం  ప్రహ్లాదుడి వాచా దండన ఫలితం.  రాజ్యపాలన కొచ్చిన తరువాత రాక్షసలోకంలో మంచి మార్పులు సంభవించి లక్షీదేవి తన పరివారంతో సహా బలి చక్రవర్తి రాజ్యంలో మాకాం వేయడం నచ్చని దేవతలు అదితిని ప్రార్థిస్తే ఆమె విష్ణువుని ఈ సంకటం నుంచి కాపాడమని కోరుకున్నది. బలిని పాతాళానికు పంపితే గాని రాక్షసులు తిరిగి రాక్షసులుగా మారి లక్ష్మీ పరివారం వైకుంఠం చేరదని గ్రహించిన విష్ణువు అదితి గర్భలో ప్ర్రవేశిస్తాడు. అనుమానంతో  చేసిన విచారణల  మూలకంగా జరిగింది తెలుసుకుని కర్తవ్యబోధనకు ఆశ్రయించిన మీదట జరిగిందంతా చెప్పి విష్ణువుకు లొంగిపొమని ప్రహ్లాదుడు బలికి హితవు చెపుతాడు. రాక్షసులను తిరిగి దుర్మార్గులుగా మార్చుకుంటానన్న బలి మాటలకు కోపించిన ప్రహ్లాదుడు శపించిన మీదటనే బలి  రాజ్యభ్రష్టత్వం  కథ కొనసాగింది. ప్రహ్లాదుడు బలికి విధించిన శిక్ష 'వాచా దండనఅయితే బలి చేసిన నేరం హిరణ్యకశిపుడి వంటి వారి చరిత్ర వినీ గుణపాఠాలు నేర్చుకోకపోవడం. 

ఎంతటి మహామహుమహులైనా ఎప్పుడో ఓకసారి తప్పుదారిలో నడిచి శిక్షలు అనుభవిస్తారన్న దానికి త్రిలోకాధిపతి కథే ఉదాహరణ.  తన కనుసన్నలలో ఉండే పుష్కలావర్త మేఘాలను ఎడతెరిపి లేకుండా కురిసి రేపల్లె వాడలను ముంచెత్తమని అజ్ఞాపిస్తాడో సందర్భంలొ అహంకరించి. అలకకు కారణం కృష్ణుడి పలుకులు విని తనకు ఏటేటా జరిపే వేడుకలు జరపకపోవడం. మేఘాల వర్షాలకు జడివానలు కురిసినా గోపాలబాలుడు గోవర్థన గిరిని చిటికెన వేలుతో పైకెత్తి పట్టుకొని ఆ ఛత్రఛాయల కింద లోకాలను కాపాడాడు. తన తప్పు తెలిసి వచ్చిన ఇంద్రుడు నా వంటి వెర్రివారిని/ శ్రీ వల్లభ! నీవు శాస్తి చేసితి వేనిం/గావరము మాని పెద్దల/త్రోవల జరుగుదురు బుద్ధి తోడుత నీశా!(10 -937) అని సాగిల పడ్డాడు ,  

- కర్లపాలెం హనుమంతరావు 

 

 

చిదంబర రహస్యం – కథానిక -కర్లపాలెం హనుమంతరావు ( ఆంధ్రభూమి డిసెంబర్,4 2008 ప్రచురితం)

 


'నిజం చెప్పండి! డాక్టర్ల దగ్గర రోగంలానే, డిటెక్టివ్ల దగ్గర నిజం దాస్తే నష్టం.' అన్నాడు ప్రైవేట్ డిటెక్టివ్ చిదంబరం ధర్మతేజ  తటపటాయింపు తగ్గించే నిమిత్తం స్టేట్ ఎక్స్ప్రెస్ టిన్ అతని ముందుకు తోసి..  తానోటి వెలిగించి.

'నో.. థేంక్స్!' అంటూ నోరు విప్పాడప్పుడు ధర్మతేజ.

చెబుతోన్నంత సేపూ అతగాని మొహం కందగడ్డే. ఆఖర్లో అన్నాడూ 'ఇలా చెప్పడం గుండెలు కోసినట్లుంది. అంతగా ప్రేమిస్తున్నా ఆమెని. అందుకే ముందు నిజమో కాదో తేలాలి'

'నిజమని తేల్తే?'

'చంపుకోడవేఁ. ముందు తననీ.. ఆనక నన్ను నేను' అన్నాడు ఠకీమని. వెంటనే  తమాయించుకుని 'మీ ఫీజెంతో చెప్పండి ముందు!'  అనడిగాడు టాపిక మారుస్తూ.

'ఫిఫ్టీ పర్సెంట్ ఇప్పుడివ్వండి! బేలెన్స్ టూ పాయింట్ ఫైవ్  లేక్స్ .. ఒన్స్ కేస్ ఈజ్ క్లోజ్డ్'

సైన్ చేసిన చెక్ అందిస్తూ 'మళ్లీ ఎప్పుడు కనిపించాలి'  

లేచి నిలబడుతూ అడిగాడు ధర్మతేజ..

'డే ఆఫ్టర్ టుమారో! ఈవెనింగ్.. ఎగ్జాట్లీ.. బై సిక్స్ వో క్లాక్.  మా ఇంట్లో కలుద్దాం. 'బిఫోర్ దట్.. ' అంటూ ధర్మతేజతో కలసి బైటికి నడిచాడు చిదంబరం.

'యూవార్ వెల్కం. బట్.. తనకివేమీ తెలీకూడదు' విజిటింగ్ కార్డిచ్చి ముందుకు కదిలిపోయాడు ధర్మతేజ.

 

హైదరాబాద్ అమీర్ పేట్ లో 'ఫ్లై డాడీ' ఎయిర్ లైన్స్  ఏజెన్సీ యజమాని ధర్మతేజ. వెరీ బిజీ అండ్ సక్సెస్ ఫుల్ బిజినెస్ పర్శన్. భార్య శకుంతలంటే ఏడో ప్రాణం. ఆరో ప్రాణం వాళ్ళిద్దరి మూడేళ్ల పాప.

హద్దులు మీరిన పొసెసివ్ నెస్ అనుమానాలకు తావిస్తుందంటాడు ఫ్రాయిడ్. మూవీ-యాక్టింగ్ కోర్సులో ట్రయినింగయ్యేందుకని వచ్చిన బాబాయి కొడుకు భరత్ వైపుకు భార్య చూపు మళ్లినట్లు ధర్మతేజ అనుమానం.

బెడ్ రూంలో దిండు కింద అతగాడి అండర్-వేర్ కనిపించినప్పట్నుంచి ఆ మధన. బైటపడి అడిగేందుకు సంస్కారం అడ్డు! కడుపులో దాచుకునేందుకు ప్రేమ ఒప్పదు.

'అనుమానం అంటూ మొదలయ్యాక జరిగేవన్నీఅది బలపడేలానే  ఉంటాయిలే.. సహజం. 'ఇలాంటి సంకటాలొచ్చినప్పుడే మనకు నిజాలు తేలాలంటే నిఖార్సైన  డిటెక్టివ్  అవసరం' అంటూ కథంతా విన్న క్లోజ్ కాలేజ్‍మేట్ శశిధర్ మిత్రుడికి చిదంబరాన్ని సూచించాడు.

---

కేస్ విషయాలన్నీ డిక్టేటేషన్లో నోట్సుగా రాసుకుంటూ పి.ఏ మిస్ రోజా అడిగింది 'బాస్.. మీరీ మిస్టరీని ఎట్లా ఛేదించబోతున్నట్లో?'

'మామూలే! ఉందిగా మన 'మిషన్ ఫ్రాంక్' తంత్రం!' అన్నాడు చిదంబరం చిర్నవ్వులు చిందిస్తూ.

'మనమీ తంత్రం మీద మరీ ఎక్కువ డిపెండవుతున్నామని నా  అనుమానం బాస్! మొన్నంటిదంటే అదో అనెడ్యుకేటెడ్ మిడిల్ క్లాస్ కపుల్ కేస్..'

‘ముందు నీ డౌట్ క్లియర్ చెయ్యడం ముఖ్యం!’ అంటూ రోజా  గ్లాసెస్  అందుకుని  స్పైక్స్ మీద  సమ్‌-థింగ్ నాన్-స్టికీ ఆయింట్ మెంట్ లాంటిదేదో పూసి  పెట్టుకోమని తిరిగిచ్చేశాడు చిదంబరం.

జోడు పెట్టుకున్న రోజాకు కొద్ది క్షణాల్లోనే కళ్ళు రెండూ తేలిపోతున్నట్లో ఫీలింగ్ మొదలయింది!

చిదంబరం జస్ట్ ఓ మూడే మూడు ప్రశ్నలు   వేసి జోడు తీసేయించాడామె చేత.

'స్పైక్సు క్లీన్ చేసుకో ఆనక!' అంటూ రోజా చెప్పగా తాను విన్నది రిపీట్ చేసి 'యామై రైట్?' అనడిగాడు మిస్టీరికల్ గా నవ్వుతూ చిదంబరం.

రోజా సిగ్గుపడి తల తిప్పుకుంది.

---

నెక్స్ట్ డే సండే! ఈవెనింగ్  చిదంబరం ఇంటికి ధర్మతేజ దంపతులు, భరత్ తో సహా కలసి వచ్చారు. మిస్ రోజా ఆ సమయంలో అక్కడే ఉంది ఏదో టైపింగ్ వర్క్ ఎడిట్ చేసుకుంటో.

చిదంబరం బ్యాచిలరే ఇంకా. 

పార్టీ మధ్యలో చిదంబరం ధర్మతేజనో సైడుకు తీసుకెళ్లాడు.  'మిషన్ ఫ్రాంక్' ఆపరేషన్  గురించి వివరిస్తుంటే ధర్మతేజకు ఇదంతా 'ట్రాష్' అనిపించింది. ఆ మాటే అన్నాడు కూడా.

'మీ నమ్మకం కోసం మీ మీదే ప్రయోగించి చూపిస్తానోసారి.. ఇఫ్ యూ పర్మిట్ మీ!' అన్నాడు చిదంబరం.

ధర్మతేజ తలాడించాడంతో. 'మిషన్ ఫ్రాంక్' ఆపరేషన్ యథావిధిగా రోజా మీదకు మల్లేనే ఓ ఐదు నిమిషాలు ఆపరేట్ చేసి అనంతరం  చిదంబరం చిలిపిగా  'సార్! తమరూ తక్కువేం తినలేదుగా మరి..!' అంటూ  ధర్మతేజ ముఖతః తాను విన్న సమాచారం కొంత తిరిగి వినిపించాడు.

ఖంగు తిన్నా.. వెంటనే తెప్పరిల్లి అన్నాడు ధర్మతేజ డిఫెన్సివ్ గా 'దెన్ ఐ వజ్ ఇన్  యన్ ఎడొల్సెంట్ స్టేజ్..! శకుంతల పరిచయం తరువాత నా సర్వస్వం తనే!  పాప మీద ఒట్టు'

'ఓకే సార్! వై షుడై హేవ్ ఎనీ బిజినెస్ విత్ ఆల్ దీజ్ యువర్ థింగ్స్! ఇదైనా  జస్ట్ ..మీకు ఈ  మిషన్ ఫ్రాంక్ ఆపరేషన్ మీదున్న  అపోహలన్నీ తొలగిద్దామనే!' అన్నాడు చిదంబరం తన బిజినెస్ మార్క్ చిర్నవ్వులు చిందిస్తూ.

'ఇప్పుడైనా మీకు నమ్మకం కుదిరిందనుకుంటా?' అని అతగాడు అడిగినప్పుడు తలాడించక తప్పలేదు ధర్మతేజకు.

'గుడ్! ఇదే ట్రిక్ ఇప్పుడు మీ భరత్ మీదా ప్రయోగిద్దాం! అతగాడి నోటి నుంచి వచ్చే మాటలే నా ఇన్వెస్టిగేషన్ అఫిషియల్ రిపోర్ట్ సర్! ఈ మేటర్ వివరించడం కోసమే మిమ్మల్నీ పై అంతస్తు దాకా  తీసుకొచ్చింది' అంటూ ధర్మతేజతో సహా కిందికి దిగి వచ్చేశాడు చిదంబరం.

ముందు అనుకున్న ప్లాన్ ప్రకారమే శకుంతలనీ, పాపనీ ఇల్లు చూపించే నిమిత్తం లోపలికి తీసుకెళ్లివుంది మిస్ రోజా. భరత్ ఒక్కడే  టీ.వీ చూస్తున్నాడు. అప్పుడే లోపలికొచ్చిన చిదంబరాన్ని, ధర్మతేజను చూసి తన కళ్లజోడు టీ పాయ్ మీద పెట్టి వాష్-రూం లోకి వెళ్లాడు 'జస్ట్ టూ మినిట్స్ ప్లీజ్' అంటూ భరత్.

భరత్ తిరిగొచ్చే లోగా ఆపరేషన్ ఫ్రాంక్ సీన్ కు సెటప్పంతా  సిద్ధం చేసుంచాడు చిదంబరం.

 తిరిగొచ్చి జోడు తగిలించుకున్న భరత్ ఒక్కరనిముషంలోనే విచిత్రంగా బిహేవ్ చెయ్యడంతో ధర్మతేజకు నమ్మకం కుదిరింది. 'ఇతగాని మైండ్  ఇప్పుడు పూర్తిగా మన అధీనంలోనే ఉంది మిష్టర్ ధర్మతేజా!  డైరెక్టుగా మీ మనసులోని శంకలన్నిటినీ మిరే అడిగి తీర్చుకోండి' అన్నాడు చిదంబరం.

ధర్మతేజను వేధించే సందేహానికి  భరత్ ఇచ్చిన సంజాయిషీ   'శకుంతల నాకు సిస్టర్తో సమానం. తనక్కూడా నాలానే  మూవీలంటే మహా పిచ్చి. బ్రదర్ కేమో అవంటే అస్సలు పడదు.  సినిమా కబుర్ల కోసమని పాపం  నాతో భేటీలకు తపించేది వదినమ్మ. అంతకు మించి.. పాపం.. సిస్టరిన్లాకి మనసులో ఎవరి మీదెలాంటి  పర్శనల్ ఇంట్రెస్టూ లేదు. అట్లా ఆలోచించడమే మహా పాతకం!'

'అద్సరేరా! మరా  బెడ్ రూంలో పిల్లో కింద నీ డర్టీ ఇన్-సైడ్ థింగ్? దాని  మేటరేంటి బేఁ? ముందది తేల్చి చావు!' 

కంట్రోల్ తప్పుతున్న ధర్మతేజను చిదంబరం  నిలవరించే ప్రయత్నం చేస్తున్నా.. భరత్ లో మాత్రం ఏ వికారం లేదు.  అంతే ప్రశాంతంగా జవాబులివ్వడం చూస్తే 'మిషన్ ఫ్రాంక్' పనిచేసే తీరుకు రివ్యూస్ లో ఫైవ్ స్టార్ రేటింగ్ ఇవ్వక తప్పదెవరైనా.

ఆఖరు ప్రశ్నగా ధర్మతేజను ఇన్నాళ్లు సలిపేస్తోన్న    దిక్కుమాలిన సందేహానికీ భరత్ ఎంతో కూల్ గా ఇచ్చిన  సమాదానం

 'పడగ్గదిలో మేం పిచ్చాపాటీలో ఉండంగా బొద్దింకోటి హఠాత్తుగా నా స్మాల్ నిక్కర్లోకి దూరిందన్నయ్యా! చిన్నప్పట్నుంచి నాకు బొద్దింకలంటే చచ్చే భయం. నా చిందులు అవీ చూళ్ళేక పాపం వదినమ్మే చొరవ చేసి నిక్కర్లన్నీ కిందకి లాగేసింది. ఇంతలోనే ఇంట్లోకి  మీ సడెన్ ఎంట్రీ.  ఆ కంగార్లో ఏది పికప్ చేసుకున్నానో, ఏది అక్కడ వదిలేశానో ఐడియా లేదు.   అందులో ఏదో ఒకటి మీ పిల్లో కిందకు వెళ్లిందనుకుంటా! అన్నెససరీ డౌట్సన్నింటికీ  అది కారణం అవుతుందేమోనన్న వదినమ్మ భయం వల్లే ఇప్పుడీ  అల్లరంతా!  అన్నం పెట్టి ఆశ్రయమిచ్చే అన్నపూర్ణమ్మ వదిన. ఎవరా దృష్టితో చూసినా రౌరవాది నరకాలు పట్టిపోక తప్పదు!' అంటూ కుమిలిపోయే భరత్ ను చివరికి ధర్మతేజే దగ్గరకు తిసుకుని అనునయించాల్సిన  పరిస్థితి వచ్చిపడింది. 

'మిషన్ ఫ్రాంక్' ఇన్ఫ్లుయెన్స్ మనిషి మైండ్ మీదుండేది జస్ట్ ఫస్ట్ ఫైవ్ మినిట్సేనని చిదంబరం ముందుగానే   చెప్పుండడం వల్ల  భరత్ ఆ బేడ్ మూడ్ నుంచి   బైటికి రావడం ధర్మతేజలో మళ్లీ ఏ డౌట్సుకూ కారణం కాలేదు. అతని అన్ని డౌట్సూ పర్మినెంట్ గా క్లియరవడంతో శకుంతల, పాప రోజాతో తిరిగొచ్చేసరికి వాతావరణం సాధారణ స్థితికొచ్చేసింది. అందరూ నవ్వుతూ పార్టీ పూర్తిచేసుకుని ఆనందంగా  ఇళ్లకు వెళ్లే వేళకు సమయం రాత్రి పన్నెండు దాటింది.

---

నెక్ట్స్ డే శకుంతల దర్మతేజ ఆఫీసుకొచ్చి చేతులు పెట్టుకుని కన్నీళ్లుపెట్టుకుంది 'నా కాపురం నిలబెట్టారన్నయ్యా! మీ రుణం ఎన్ని జన్మలెత్తినా తీర్చుకోలేనిది' అంటూ.

'మీరు  రుణపడి వుండాల్సింది నాకు కాదు మ్యాడమ్! మీ మూడేళ్ల  పాపకు. బంగారు బొమ్మలా ఉన్న  ఆ చిన్నారి తల్లికి అమ్మానాన్నా లేకుండా చేసేందుకు నా మనసొప్పింది కాదు. ఎట్లాగూ అన్నయ్యా అన్నారు కాబట్టి, సోదర భావంతో ఓ చిన్ని సలహా! మీరన్నట్లు ధర్మతేజ మ్యారేజ్ కి ముందు ఏమైనా చెస్తే చేసుండచ్చేమో! ఒన్స్ హి సా యూ.. హి హాజ్ సీన్ ఎవ్రీథింగ్ ఇన్ యూ ఓన్లీ! ఆ వైపు నుంచి కూడా నేను ఇన్వెస్టిగేట్ చేసి చెబుతున్న మాట తల్లీ ఇది! హి ఈజ్ లవింగ్ యూ మోర్ దేన్ హి హిమ్ సెల్ఫ్! పగలు, ప్రతీకారాలు బయటి లోకానికి. పగలూ రాత్రి ఒకే చూరు కింద ఒకరికి ఒకరుగా బతికే భార్యాభర్తలకు కాదు. దయచేసి ఇహ ముందైనా కన్నబిడ్డ కోసం  కట్టుకున్న భార్యాభర్తలు మీరు   కట్టు నుంచి విడిపోకండి! ధర్మతేజకైనా ఇదే చెబుదును కానీ.. ఆ అవసరం లేదిప్పుడు.  అమ్మానాన్నల కలహాలతో కన్నపిల్లల జీవితాలు ఎంతలా కల్లోలమవుతాయో అనుభవించిన ఓ అనాధబాలుడిగా మీకు ఇదే నేనిచ్చే  సలహా' అన్నాడు డిటెక్టివ్ చిదంబరం.

---    

మర్నాడు ధర్మతేజ ఇచ్చిన బేలెన్స్ ఎమౌంట్ చిదంబరం బ్యాంక్ ఎకౌంటులో జమ చేస్తూ రోజా అడిగింది 'బాస్! నాకింకా నమ్మబుద్ధవడంలేదు! నిజంగా ఇదంతా   'మిషన్ ఫ్రాంక్' తాలుకూ మిరకలేనంటారా? ఏళ్ల బట్టి మనుషులు గుండెల్లో అదిమిపట్టుంచుకున్న నిజాలను వెలికి తీసే స్ప్రేలు ఉన్నాయంటారా?'

'లేవు  రోజా! ఉండే అవకాశాలు కూడా లేవు' చిద్విలాసంగా నవ్వాడు  చిదంబరం.

నోరెళ్లబెట్టింది మిస్ రోజా. 'మరి నా నుంచి, మిస్టర్ భరత్ నుంచి ఫ్యాక్ట్స్ అలా ఎలా  రాబట్టారు బాస్?'

'ధర్మతేజ నుంచి కూడా రాబట్టాను మేడమ్ రోజాగారూ! మీ దాకా ఆ సంగతి ఇంకా రానీయలేదంతే! నిన్న మనాఫీసులో నువ్వు బైటపెట్టినట్లు నేను చెప్పిన విషయాలేవీ నిజానికి  నువ్వు నిజంగా బైటపెట్టినవి కాదు. కేసు తీసుకున్న వెంటనే నేనొక్కణ్ణే వెళ్ళి ముందు మిసెస్ ధర్మతేజను వంటరిగా కలసి  గట్టిగా నిలదీసిన విషయం ఎవరికీ తెలీదు. ఆమె కన్ఫెషవుతూ కారణంగా చెప్పుకొచ్చిన ధర్మతేజ ప్రీ మేరీడ్ లైఫ్ లోని రిలేషన్స్ గ్రంథంలో ఓ ఛాప్టర్  తమది కూడా ఉంది మ్యాడమ్ గారూ! ఆ  సమాచారమే నీ విషయంలో, ధర్మతేజ విషయంలో నాకు కలిసొచ్చిన పాయింట్స్! ఇక .. భరత్ ధర్మతేజ ముందు చదివిందీ జస్ట్ ఓ స్టేట్ మెంట్ మాత్రమే.  నా కౌన్సిలింగ్ తరువాత తప్పు తెలుసుకున్న భరత్ అది  సరిదిద్దుకొనే క్రమంలో  నేను ప్రిపేర్ చేసిచ్చిన స్క్రిప్ట్ అది ' చిద్విలాసంగా నవ్వుతూ అన్నాడు చిదంబరం.

'ఐ యామ్ సారీ' అని మిస్ రోజా తలొంచుకొన్నప్పుడు 'ఇట్సాల్ రైట్ మిస్ రోజాగారూ! నౌ యూ ఆర్ ఏ వెరీ గుడ్ గర్ల్. మాకా నమ్మకం పూర్తిగా ఉంది. దట్స్ వై ఈ లైక్ యూ సో మచ్ !' అంటూ రోజా చేయి తన చేతిల్లోకి తీసుకుని సున్నితంగా ఓ స్వీట్ కిస్ ఇస్తూ చిలిపిగా నవ్వేశాడు డిటెక్టివ్ చిదంబరం.

-కర్లపాలెం హనుమంతరావు

(ఆంధ్రభూమి వారపత్రిక డిసెంబర్, 4 2008 లో ప్రచురితం)


Sunday, May 6, 2018

మాల్యా! మా జైళ్లే భేషయ్యా!- సరదా వ్యాఖ్య



భారతదేశంలోని జైళ్ల పరిస్థితి బాగోలేదని.. తనను అక్కడికి పంపించవద్దని విజయ్ మాల్యాజీ లండన్ న్యాయస్థానంలో మొరపెట్టుకున్నట్లొక తాజా వార్త. భారతదేశంలో జైలు జీవితం ఎంత మజాగా ఉంటుందో  తెలీకే శ్రీవారి ఈ కొత్త మెలిక?
విజయ్ జీ  సంఘంలో మహా గొప్ప గుర్తింపుగల పెద్దమనిషి. ప్రపంచవ్యాప్తంగా మాల్యాజీ మాటకుండే విలువ అమూల్యం. భారతీయ కారాగారాల మీద శ్రీవారలా  కారాలూ మిరియాలూ నూరడం  భావ్యం కాదు.  అందుకే ఈ చిన్న విన్నపం!
మహా మహా రాజశ్రీ విజయ్ మాల్యాజీ!
ప్రస్తుతం  కర్ణాటకలో హోరాహోరీ ఎన్నికలు జరుగుతున్నాయి. అక్కడ ఇప్పుడు ప్రతీ ఒక్క ఓటూ అమూల్యమే. గత రెండు దఫాలుగా తమరు కర్నాటక రాష్ట్రం తరుఫు  నుంచే ‘పెద్ద’ల సభకు ఎన్నికైన ప్రతినిధులు! తమ వంటి పెద్దల కీలకమైన ఓటు ఒక్కటి తగ్గినా మన దేశ ప్రజాస్వామ్య వ్యవస్థకి పెద్ద లోటు.  ఎన్నికల గడువు లోపే తమరు ఈ దేశం గడ్డ మీదకు మళ్లీ కాలు మోపి తమ అమూల్యమైన ఓటును సద్వినియోగ పరుచుకోమని  వినతి. మన దేశంలోని జైళ్లు జేబుదొంగలకు చుక్కలు చూపిస్తాయేమో గానీ.. తమ బోటి బ్యాంకు బొక్కింగులకు, లిక్కరు కింగులకు పక్కలు పరుస్తాయి!  
మన దేశీయ కారాగారాల   వైభోగం తమబోటి పెద్దలకు పెద్దగా విడమరచి చెప్పాలా! బడా  నేరస్తులకు  అత్యంత సురక్షితమైన స్థలాలు మన జైలు గోడలే! ఉన్నత వర్గాల నుంచి విచ్చేసే గౌరవనీయమైన నేరస్తులకు కారాగారాలలో కల్పించే ప్రత్యేక సౌకర్యాలను గూర్చి  మన మీడియానే వీడియోలతో సహా  ప్రపంచానికి ఎన్నోసార్లు  చాటి చెప్పింది. వాటినన్నింటినీ  వట్టి కల్పిత కథనాలుగా మేం కొట్టి పారేసిన మాట నిజమే. ఆయా ప్రకటనలను ఆట్టే పట్టించుకోవద్దని మనవి.  వట్టేసి చెబుతున్నాం! మన దేశ కారాగారాలు  తమబోటి ఘరానా వ్యక్తులకు స్వర్గధామాలు. మా బందిఖనాలలో అందించే ప్రత్యేక సౌకర్యాలన్నీ అధికారికంగా ఇక్కడ పొందుపరచడం ఇబ్బందికరం. ఒక్కసారి తమరే  విచ్చేసి  పర్యవేక్షించ ప్రార్థన. తమరి   లండన్ ఐదు నక్షత్రాల వసతి గృహాలైనా వట్టి 'డన్ జన్’ లుగా భావించకుంటే ఒట్టు.
తాజాగా తమిళనాడు బ్రాండ్ వి.వి.వి..పి మ్యాడమ్ శశికళమ్మగారికి కర్ణాటక కారాగారవాస అదృష్టం తన్నుకొచ్చింది. ఆ దేవేరికి జరుగుతున్న  రాణీమర్యాదలే మా కారాగార అధికారుల నిబద్ధతకు తిరుగులేని నిదర్శనం.
ఆ మధ్య రెండు తెలుగు రాష్ట్రాల కారాగారాలలో ప్రముఖ   రాజకీయ నేతలు.. వారి వందిమాగదులు  మేం కల్పించిన ప్రత్యేక సౌకర్యాలన్నెంటినో తనివి తీరా  అనుభవించారు చాన్నాళ్ళు. ఛానళ్ల కళ్లబడకుండా ఎన్ని అవస్థలైనా పడి  పెద్దలను సంతోషపెట్టడమే ప్రధమ కర్తవ్యంగా మేం భావిస్తాం! మీ  మహారాజా మర్యాదలకు మాదీ గ్యారంటీ మాల్యాజీ! వారానికోసారి మా వారంట్లూ, వాటిని మళ్లీ మళ్లీ మీరు తిప్పి కొట్టడాలూ.. ప్రతిపక్షాలతో బొప్పికట్టేటట్లు మాకు తలంట్లు.. ఇవన్నీ అవసరమా? ఒక్క శనివారం  తమరు  మన చట్టానికి చిక్కి చుట్టపు చూపుగా మా కారాగారాలకి విచ్చేయండి.. చాలు.. విజయ్ జీ! మళ్లీ సోమవారానికల్లా   మీకు బెయిలు తెప్పించే పూచీ మాదీ.   మూడ్రోజులూ మేం మీకిచ్చే అతిధి మర్యాదలకు తమరే మూడ్ మార్చుకొని మళ్లీ మళ్లీ మా ఊచల వెనక్కే వచ్చేయాలని ఉవ్వీళ్లూరడం   ఖాయం.  
ఒక్క రాజకీయ నేతాశ్రీలకే మా ప్రత్యేక సౌకర్యాలన్న భయాలొద్దు! మీ బోటి బ్యాంకులూటీ బిగ్ పర్శనాల్టీలకు అంతకు మించిన రాజభోగాలు.. గ్యారంటీ! దొరలైతే చాలు .. ఎన్ని దొంగపన్లకు పట్టుబడి జైలుకొచ్చినా పొర్లుదండాలు పెట్టి మరీ సేవించుకోవడం మా అదృష్టంగా భావిస్తాం మాల్యాజీ! 'అతిధి దేవో భవ'అన్న భారతీయుల సత్సాంప్రదాయం అత్యంత నిబద్ధతతో అమలు చేసే ప్రభుత్వ శాఖలు ఏమైనా  ఇంకా మిగులుంటే.. అందులో మా కారాగారశాఖవారిదే మొదటి స్థానం. 
ముంబయి అల్లర్ల కేసులో పట్టుబడి జైలుకొచ్చిన కసబ్ కహానీ దొరవారి చెవులకు సోకినట్లు లేదు. కిలో రెండొందలు పెట్టినా దొరకని ‘శ్వాన్’ బ్రాండ్ బాసుమతితో మాత్రమే రోజూ బిర్యాని వండి పెట్టేవాళ్లం. ముక్క లేందే ముద్ద దిగదని ఆ ముష్కరుడు  మొండికేస్తే మేమే తలకింతని వేసుకొని టన్నులకొద్దీ మటన్లు, చికెన్లు వండి  వార్చాం.   చింకిచాపల మీద కునికే చిల్లరగాళ్లకే ఇంతలా సేవలు అందించగా లేంది.. బంగారు కోడి పెట్టలు.. తమరి వంటి శృంగార పురుషులకు ఏ తరహా పవ్వళింపు సేవలు కావాలో  మాకు తెలీదా? కంగారు పడకుండా ఒక్కసారి విధాయకంగా అయినా మన దేశ చట్టానికి లొంగిపోండి. మా కారాగారాలకు దయచేయండి మహాప్రభో!
మీకు అప్పులిచ్చిన ఆ బ్యాంకులోళ్లెవరూ మీ బ్యారెక్సు వైపు కన్నెత్తైనా చూడకుండా కాచి కాపాడే  పూచీ మాదీ! తమరి  క్రికెట్టాటల షెడ్యూళ్లేవీ   చెదిరి పోకుండా మీ కోర్టు కేసులన్నీ రీషెడ్యూలు చేయించే డ్యూటీ  మన సర్కారు పెద్దవకీళ్లు మహా సంబరంగా స్వికరించేందుకు సిద్ధం.. సరా సార్జీ!
అనొచ్చో లేదో.. తెలీదు కానీ..  ఇప్పుడిక్కడి న్యాయస్థానాలలోనూ నేరం తూచే  పని మరీ తమరు వణికిపోయేటంత  తిన్నగా ఏమీ సాగడం లేదు! కేసుల సాగతీతకు మీరు అక్కడ లండన్లోనే ఉండి అవస్తలు పడనక్కర్లేదు. ఆసారాం బాపూలాంటి ఆధ్యాత్మిక బాబాలకే అప్పుడెప్పుడో చీకట్లో చేసిన పెద్ద తప్పుకు ఇప్పటిగ్గానీ శిక్ష పడలేదు. అదీ మరీ అంత పెద్ద ఉరి శిక్షేమీ కాదు. నెంబర్ వన్ బాలీవుడ్ హీరోలకే  శిక్షలు పడ్డం లేదు ఇప్పుడిక్కడ మాల్యాజీ! ఆఫ్ట్రాల్ తొమ్మిది వేల కోట్లు .. అదీ జనం సొమ్మే కదా దొరగారు బొక్కిందీ! బోనులో నిలబెడతారని అంతలా భయపడ్డమెందుకు? గమ్మునుండటం మీ వంటి గుండెలు తీసిన బంట్లకు శోభనివ్వదు. తమిళ తంబి ఏ. రాజాలా తమరూ ఇక్కడి ‘లా’ పాయింట్లతోనే ఎదురు తిరగబడరూ? మన చట్టాల్ని చితక్కొట్టేందుకైనా తమరు తిన్నగా ఈ దేశంలోకొచ్చి తీరాలి! తొండి ఆట ఆడేందుకైనా తమరు  తొందరగా దయచేయండి మాల్యాజీ! మీ మీద ఈగైనా వాలకుండా  మా జైళ్ల శాఖలన్నీ వేయి కళ్లతో  కాపు కాసేందుకు రడీ!
రెండుసార్లు రాజ్యసభ సభ్యులయి ఉండీ ఎన్నికల్లో ఓటేయకుంటే  జనం ఏమనుకుంటారూ?   
మన దేశంలో కారాగారాల కండిషన్లేవీ బావో లేవని మాత్రం కోర్టుకెక్కకండి మహాప్రభో! బావోదు! వి.వి.వి.ఐ.పిలకు ఎర్రతివాచీలు పరుస్తాం మేం! మా మాట బూటకమనుకుంటే  మీరే నేరుగా ప్రముఖ నేరస్తులు.. సీజనల్ ప్రిజనర్ గౌరవనీయులు శ్రీమాన్ లాలూ ప్రసాద్ యాదవ్ గారిని సంప్రదించవచ్చు!  ఏళ్ల తరబడి జైల్లో మహారాజ వైభోగాలను నిరాటంకంగా అనుభవించిన గనుల పెద్దలతో అయినా  లైను కలుపండి!  దిగులుగా జైళ్ల కెళ్లి హుషారుగా  ఊరేగుతూ తిరిగొచ్చిన వి.వి.వి..పి ల చిరునామాలు తమరి కర్నాటక అభ్యర్థుల జాబితాలోనే తట్టల కొద్దీ దొరుకుతాయ్  మాల్యాజీ! ఏ బడా నేరస్తుడినడిగినా మన జైళ్ల మర్యాదలకు జై కొట్టడం ఖాయం.
ఓటేసేందుకు  వీల్లేకుండా పోయిందని తమరిలా  వాపోయే కన్నా ఒక్కసారి దేశంలోకి దొగబడి సరెండరై చూడండి.  జైలుకెళ్లొచ్చిన వాళ్లకే జనంలో చచ్చేటంత  డిమాండ్. హాస్యానికని అంటున్నారేమో తమరు.. మన జైళ్ల పరిస్థితులేం బావోలేవని! జైళ్లంటే పెద్దమనుషులకి అత్తారిళ్లంత సౌకర్యవంతంగా ఉంచాలన్నది మా పాలసీ మాల్యాజీ!
ఒకే ఒక్కసారి మా జైళ్లకు విచ్చేసి ఓ పూట మా ఆతిధ్యం స్వికరించమని మనవి! జన్మంతా జైళ్లల్లోనే గడిపేయాలన్నంత కమ్మంగా ఉంటాయి మా  చందన తాంబూలాది  అతిధి సత్కారాలు!   
ఇట్లు
తమరి  విదేయుడు
పేరు బైటకు చెప్పకోలేని అనధికార కారాగారాధికారి
అనధికార జైలు పర్యవేక్షకుడు
***
-కర్లపాలెం హనుమంతరావు




Wednesday, February 1, 2017

ఫొటో ఆల్బమ్- విపులలో నా కథ



ఆ రోజు వర్కింగ్ డే. ఇంట్లో ఎవరూ లేరు. ఆయనా, పిల్లాడూ డ్యూటీల కెళ్లారు. పనమ్మాయి పని ముగించుకొని వెళ్ళేసరికి పదకొండు గంటలు దాటింది. స్నానం చేసి రిలాక్సుడ్ గా టి.వి చూస్తూ కూర్చోనున్నాను. బైట గేటు తీసిన అలికిడి. ఒక పెద్దాయన.. సుమారు అరవై.. అరవై ఐదేళ్లుంటాయేమో.. గేటు తీసుకుని లోపలికి వచ్చి పద్ధతిగా చెప్పులు ఓ మూల విడిచి వరండాలో ఉన్న పేము కుర్చీలో కూలబడి ముఖానికి పట్టిన చెమటను తుడుచుకొంటున్నాడు.
ఎప్పుడూ చూసిన మొహంలా లేదు. 'ఎవరు కావాలండీ?' అనడిగాను బైటికొచ్చి.
'రామ్మోహనరావుగారు ఉన్నారామ్మా?' అనడిగాయన చేతిసంచీ ఓ పక్కకు పెట్టుకొంటూ. ఆ పేరుగల వాళ్లెవ్వరూ మా ఇంట్లోనే కాదు.. మా చుట్టుపక్కలకూడా  లేరు. ఆ మాటే చెప్పాను.
'అయ్యో! ఇది మోహనరావుగారిల్లన్నారే!' అని గొణుక్కుంటూ లేచి నిలబడ్డారాయన. 'పాపం' అనిపించింది. మా నాన్న వయసుంటుంది ఆయనకు.
చెప్పులు వేసుకుంటూ అడక్కుండానే చెప్పుకొచ్చాడాయన. 'రామ్మోహనరావంటే మా అల్లుడేనమ్మా! ఇక్కడే ఎక్కడో ఆంధ్రాబ్యాంకులో చేస్తున్నాడాయన. బ్రాంచి పేరు గుర్తుకు రావడం లేదు. ఎప్పుడూ ఒక్కడినే రాలేదు. ఎప్పుడు వచ్చినా అమ్మాయి పక్కనే ఉండేది. నారాయణాద్రికి వస్తున్నానని చెప్పానమ్మా! అల్లుడుగారిని పంపిస్తానంది. ఎందుకు రాలేదో?' అనుకుంటూ బైలుదేరాడాయన.
'పక్క బజారులో ఆంధ్రాబ్యాంకుంది బాబాయిగారూ! అదేమో చూడండి!' అన్నాను గేటుదాకా బైటికి వచ్చి దారి చూపిస్తూ. ఆయన వీధి మలుపు తిరిగిందాకా చూసి లోపలికొచ్చేసాను. పెము కుర్చీ పక్కన పెట్టిన చేతిసంచీ అలాగే ఉంది, 'అయ్యో' అనుకుంటూ సంచీ తీసుకొని మళ్లా వీధిలోకి పరుగెత్తాను. కానీ అప్పటికే పెద్దాయన వీధి దాటినట్లున్నారు. రోడ్డు నిర్మానుష్యంగా ఉంది.
ఇక చేసేదేం లేక ఆ సంచీని లోపలికే తెచ్చి ఓ మూల పెట్టేసాను.. మళ్లా వస్తే ఇవ్వచ్చులే అని.
ఆ పూటకి ఎవరూ రాలేదు.
మావారు సంచీని చూసి అడిగితే వివరంగా అంతా చెప్పాను. 'ఎవర్ని బడితే వాళ్లని అలా లోపలికి రానిచ్చేయడవేఁనా? అసలే రోజులు బాగో లేవు. ముందా సంచీ తీసవతల పారేయ్!' అని కూకలేసారు. ప్రద్దానికీ క్లాసు పీకటం ఆయనకో అలవాటు.
మా అబ్బాయయితే ఒహటే ఆట పట్టించడం.. 'తాతగారిచ్చిన గిఫ్టులు చెరి సహం షేర్ చేసుకొందాం మమ్మీ!' అంటూ.
రెండో రోజూ బ్యాగుకోసం ఎవరూ రాకపోయేసరికి నాకూ అనుమానం మొదలయింది. 'ఇదంతా కావాలని ఎవరో చేస్తున్న అల్లరి కాదు గదా!' అనిపించింది. వీధి చివరిదాకా వెళ్లి ఆంధ్రాబ్యాంకులో అడుగుదామని వెళ్ళాను ఆ మర్నాడు. ఇదివరకు బ్యాంకు ఉండేచోట ఇప్పుడేదో కన్ స్ట్రక్షన్ నడుస్తోంది. 'బ్యాంకు క్రాస్ రోడ్డుమీదకు షిఫ్ట్ చేశారు కదమ్మా!' అన్నాడు అక్కడే ఉన్న మేస్త్రీ. ఇంటికొచ్చి అనుమాన నివృత్తికోసం అసలు బ్యాగులో ఏముందో చూద్దామని బైటికి తీసాను.
ముసలివాళ్ల బ్యాగుల్లో ఏవుంటాయి? రెండు పంచలు.. లాల్చీలు.. కళ్లజోడు.. మందుల డబ్బా.. ప్లాస్టిక్ రేపర్లో చుట్టున పేస్టూ.. బ్రష్షూ.. సోపు.  భగవద్గీత పుస్తకం. పుస్తకం మధ్యలో ఏదో పెళ్ళి ఫొటో. కొత్త దంపతులాల్గున్నారు, చూడముచ్చటగా ఉంది జంట. ముసలాయన కూతురు.. అల్లుడు కాబోలు!
స్కూలు పిల్లల సైన్సు రికార్డు సైజులో ఒక పెళ్లి ఫొటో ఆల్బమ్ కూడా ఉంది. పెళ్లి కూతురు ఫొటోలోని అమ్మాయే కానీ.. పెళ్లికొడుకు పొటోలోని అబ్బాయి కాదు!
న్యూస్ పేపర్తో చూట్టి రబ్బరు బ్యేండ్లేసిన ఇంకో కట్టకూడా కనిపించింది. ఎందుకులే మనకీ పాడు గోల అనిపించింది. ఎక్కడి వస్తువులు అక్కడ యథాతధంగా సర్దేసి బ్యాగును స్టోర్రూం అటకమీద పెట్టించేసాను.. ఎవరన్నా వచ్చి అడిగితే ఇవ్వచ్చులే అని ఆలోచన,
ఆ రోజు ఆదివారం, మా వారికి చికెన్ కంపల్సరీగా ఉండాల్సిందే. నిద్ర లేవంగానే మహా సంబరంగా బజారుకు బైలుదేరారు.
ఆయన చెప్పులేసుకుంటుంటే.. మటన్ షాప్ పక్కనే ఉన్న ఆంధ్రాబ్యాంకు గుర్తుకొచ్చింది. 'వీలయితే ముసలాయన్ను బేగు తీసుకు వెళ్లమని చెప్పి రండి' అని హెచ్చరించానీయన్ని.
ధుమధుమలాడుతూ వెళ్లిన మనిషి తీరిగ్గా తిరిగొచ్చి 'బ్యాంకు మూసుంది. నెంబర్ తెచ్చాను చూసుకో!' అంటూ సెల్లో స్టోర్ చేసుకొచ్చిన నెంబరొకటి నా మొహాన కొట్టారు. అదీ సెల్ నెంబరే!
మధ్యాహ్నం ఆ నెంబరుకి కాల్ చేస్తే 'హలో!' అంది ఓ మగ గొంతు. 'సార్! మీరు ఆంధ్రా బ్యాంకు రామ్మోహనరావుగారేనా?' అనడిగాను.
'యెస్! వ్హాట్ కెన్ ఐ డూ ఫర్ యూ?'
'విషయం వివరించడానికి చాలా తంటాలు పడాల్సొచ్చింది. అంతా విని చివర్లో 'మీరేమంటున్నారో నాకర్థం కావడంలేదు మ్యాడమ్! మా మామగారు పోయి రెండేళ్లయిందే!' అన్నారు. లైన్ కట్ అయింది. మళ్లో కాల్ చేసినా రెస్పాన్ లేదెంత సేపటికీ. ఇంకీ విషయం ఇంతటితో 'ది ఎండ్' అయిందని అర్థమయి పోయింది నాకు.
మూడు రోజుల తరువాత మధ్యాహ్నం పన్నెండు గంటల పాంతంలో లాండు లైనుకి ఓ ఆడమనిషి కాల్ చేసింది. 'ఆదివారం మధ్యాహ్నం మావారి సెల్ కి ఈ నెంబర్నించీ కాల్ వచ్చింది. ఎవరో తెలుసుకోవచ్చా?' వినయంగానే ఉందా గొంతు.
'ముందు మీరెవరో చెప్పండి!' అనడిగాను నేను.
'ఆంధ్రాబ్యాంక్ రామ్మోహనరావుగారి వైఫ్ నండీ! మీతో కాస్త మాట్లాడ వచ్చా మేడమ్?'
'మాట్లాడండీ!'
'ఇలా ఫోన్లో కాదు. మీకు అభ్యంతరం లేదంటే ఒకసారి మీ ఇంటికి వస్తాను'
'రండి!' అంటూ ఇంటి అడ్రసు చెప్పాను.
అరగంటలో ఆటోలో వచ్చింది. గేటు తీసుకొని లోపలికి వస్తుంటేనే గుర్తు పట్టాను.. ఆమె ఆ ఫొటోలోని అమ్మాయే! కాకపోతే కాస్త వయసు పెరిగి వళ్లు చేసింది. కూర్చోమన్నాను.
బిడియంగా కూర్చుంది. 'ఇంట్లో ఎవరూ లేరా?' అని అడిగింది చుట్టూ చూస్తూ.
'లేరు' అన్నాను.
రిలీఫ్ ఫీలయింది. స్తిమితంగా 'మీరు మావారితో మాట్లాడిందంతా విన్నాను మేడమ్! బ్యాగు ఇంకా ఇక్కడే ఉందా?' అనడిగింది.
'సంచీ తెచ్చిచ్చి 'అన్నీ  ఉన్నాయో లేదో ఒకసారి చూసుకోండి!' అన్నాను. బ్యాగందుకుంది కానీ.. లోపలేమున్నాయో చూసుకోలేదు. 'చాలా థేంక్సండీ!' అంటూ బైలుదేరింది హడావుడిగా.
'మంచిదమ్మా! నాన్నగారు బాగున్నారు కదా?'అనడిగాను చెప్పులేసుకుంటున్న ఆమెను చూసి.
'ఆయన మా నాన్నగారు కాదు మ్యాడమ్. మా ఊరాయన. ఈ ఆల్బమూ, డబ్బూ ఇచ్చి వెళదామని వచ్చాడు. రావాలంటే మా ఇంటికే రావచ్చు. కావాలనే ఇవి మీ ఇంట్లో వదిలేసినట్లున్నాడు'
'అదేందీ?!'  అనరిచాను ఒక్కసారి షాకయినట్లు.  ఆ సంచీలో కేషున్నట్లు నాకిప్పటిదాకా తెలీనే తెలీదు!
వెళ్లే ఆ అమ్మాయి వెనక్కి తిరిగి వచ్చింది. 'ఇదంతా మీకు చెప్పకూడదో.. లేదో.. నాకు తెలీదు. మా అమ్మలాగా ఉన్నారు. చెప్పకబోతే బావుండదు. ఆయన మా ఊరి పెద్దబ్బాయిగారు. పెద్ద ఫొటో స్టూడియో ఉండేది వాళ్లకు. మా ఊళ్లో ఎక్కడ ఏ ఫంక్షను జరిగినా వీళ్లే ఫొటోలు.. వీడియోలు తీసేవాళ్లు. వీళ్లబ్బాయి ఇంటర్లో నా క్లాస్ మేట్. మంచివాడు కాదు. నా వెంటబడి వేధించేవాడు. ఒకసారి క్లాక్ టవర్ దగ్గర చెప్పుతో కొట్టాను కూడా. అది కడుపులో పెట్టుకున్నాడు. మా ఫ్రెండు పెళ్లికి వీళ్లే ఫొటోలు.. వీడియోలు తీసారు. దాని ప్లేసులో నా బొమ్మలు పెట్టి సి.డి.లు తయారు చేసాడు. రెండు లక్షలివ్వకపోతే బైటపెడతానని అల్లరి పెట్టేవాడు. మా నాన్నగారు మామూలు బడిపంతులు. నా పెళ్లికే నాలుగు లక్షలుదాకా ఖర్చయిందా రోజుల్లో. ఇంకో ఇద్దరు చెల్లెళ్లున్నారు. ఆ దిగులుతోనే హార్టెటాకొచ్చి పోయారు' అని ఎడుస్తోందా అమ్మాయి.
ఎలా ఓదార్చాలో అర్థం కాలేదు. పాపం.. ఎంతకాలంనుంచీ కడుపులో దాచుకుందో!
తనే తమాయించుకొని వెళ్లడానికి లేస్తూ అంది 'అప్పట్లో మా నాన్నగారి పెన్షష్ నుంచీ ఒక లక్ష ఇచ్చి సి.డి తీసుకున్నాం ఆంటీ! కానీ ఇలాంటిదే ఇంకో ఆల్బంకూడా తయారు చేసాడని తెలీదు. తరువాత ఆ అబ్బాయి ఇలాంటివే ఏవో గొడవల్లో ఇరుక్కుని చచ్చిపోయాడు. పాపం.. పెద్దబ్బాయిగారికి ఇతనొక్కడే కొడుకు. పెద్దాయన బాగా డిప్రెషన్లోకి వెళ్లిపోయాడు. స్టూడియో వేరే వాళ్లకి అమ్మేశాడు. కొన్నాయనకు స్టాకు అప్పగించే టైంలో ఈ ఆల్బం బైటపడిందట. కొడుకు చేసిన నిర్వాకం అప్పటిదాకా ఆయనకూ తెలీదు. తెలిసి చాలా బాధపడ్డాడుట. ఈ ఫోటోలు.. ఇవీ ఇంకెవరైనా చూస్తే ప్రమాదమని నేరుగా నాకే ఇచ్చేద్దామని వచ్చాడు. ఇంటికొస్తే రెండు మూడు సార్లు మావారే కనిపించారుట. ఆయనకివ్వలేక మీ ఇంట్లో వదిలేసి పోయాడీ సారి'
'మధ్యలో మా ఇల్లు పిక్చర్లోకెలా వచ్చిందీ?! మా ఇంట్లో ఇవ్వాలని ఎందుకనిపించిందీ?!' అనడిగాను ఆశ్చర్యంగా.
'అంకుల్ ఏవో కథలూ అవీ పత్రికలు రాస్తారుట కదా! పోయిన నెల్లో మీ ఇంటి అడ్రసు ఏదో పత్రికలో చూసారుట! మా ఇంటికి మీ ఇల్లు దగ్గరనే కావాలని ఈ బ్యేగు మీ ఇంట్లో వదిలేసి పోయాడాయన.'
'పెద్దబ్బాయిగారి భార్య నిన్న కాల్ చేసి  ఈ ఫొటోలు.. డబ్బూ ఇలా మీ ఇంట్లో ఉన్నాయి. తెచ్చుకొని ఫొటోలు కాల్చేయమ్మా!' అని చెప్పింది మేడమ్! ఈ లక్ష అప్పట్లో మేము వాళ్లబ్బాయికి ఇచ్చింది. మధ్యలో మీకు ట్రబులిచ్చాం. సారీ!' అని లేచిందామె.
'ఫర్వాలేదులేమ్మా! నా కూతురులాంటి దానివి. ఇందులో మేం చేసింది మాత్రం ఏముంది? పెద్దదాన్ని కనుక ఒక సలహా చెబుతాను. ఈ ఫొటోలను ఇక్కడే తగలేసి పోతే నీకు మంచిది' అన్నాను.
ఆ అల్బం మా ఇంట్లోనే బూడిద చేసి డబ్బుతీసుకొని పోయే ఆమెని ఇంకో ధర్మసందేహం అడిగాను. 'ఇంతకీ ఆ పెద్దాయన ఇప్పుడెలా ఉన్నాడో! ఆయన్ని చూస్తుంటే మా నాన్నగారే గుర్తుకొచ్చారు.. పాపం'
'ఇక్కడికొచ్చిన మర్నాడే ఆయన మంచం పట్టి మూడ్రోజుల కిందటే పోయాడు ఆంటీ! ఆల్రెడీ కేన్సర్ పేషెంట్. ఈ తిరుగుడికీ దానికీ జాండీస్ వచ్చిందన్నారు.' అని వెళ్లిపోయిందా అమ్మాయి. పెద్దాయన సంచీని మాత్రం ఇక్కడే వదిలేసింది.
ఆ బ్యేగుని పారెయబుద్ధి కాలేదు నాకు. అటకమీద పెట్టేసాను. ఆ సంచీని చూసినప్పుడల్లా ఫొటోలు.. డబ్బే కాదు.. ఒక మంచిమనిషి మనస్తత్వం గుర్తుకొస్తుంటాయి.

-కర్లపాలెం హనుమంతరావు

(విపుల- ఏప్రియల్- 2010 సంచికలో ప్రచురితం)






మతాల స్వరూపాలు కొడవటిగంటి రోహిణీప్రసాద్, 08-09-2010

  మతాల   స్వరూపాలు కొడవటిగంటి   రోహిణీప్రసాద్ ,  08-09-2010  మతభావనలు ,  మనిషికీ   నరవానరానికి   తేడాలు   తలెత్తినప్పటినుంచీ   మొదలైనవిగానే ...