వెంకప్ప.. అను నేను..( సరదాకే ) - కర్లపాలెం హనుమంతరావు

1. వెంకప్పగారు అబ్బల కాలం బట్టీ దిబ్బలగూడెం  ప్రజాప్రతినిధులు. అధికారం ఆయనకు విషంతో సమానం. ఆ విషం వేరెవరో పుచ్చుకొని ప్రాణాల మీదకు తెచ్చుకోకూడదన్నది ఆయన సిద్ధాంతం. తన ధన మాన ప్రాణాలు రిస్కులో పెట్టుకొనైనా కొన్ని తరాల బట్టి ఆ విషాన్ని అందుకనే తాను పళ్లబిగువునైనా పుచ్చుకొనేది. ఈ దఫా ఎన్నికల్లో పార్టీ అధిష్ఠానం  ఆయన్నా  కష్టం నుంచి విముక్తి చేయదల్చింది.  విషం లేకుండా ఒక్క క్షణమైనా ఊపిరాడదు వెంకప్పగారికి. కాలకూటం పార్టీతో అందుకే లోపాయికారీ మంతనాలు నడిపిస్తున్నది. ఒక్కటే మెలిక. నియోజకవర్గ మెజార్టీ ఓటర్ల ‘ఓ.కే’ తీర్మానం తేవాలి. వెంకప్పగారీ మధనలో ఉన్నప్పుడే వార్ రూమ్ తలుపులు ధడేల్మని తెరుచుకున్నాయి.
2. ఎదురుగా అల్లుడుగారు. మొహమైనా కనిపించకుండా పూల దండలతో పక్కన అమ్మాయి. ‘పూలలో పెట్టుకు పూజించుకుంటాన’న్నది  అల్లుడుగారి పెళ్లినాటి  ప్రమాణం! ఎంత మాట నిలకడ్! అపర శ్రీరామచంద్రుడు! 
3. "సారీ.. మాజీ మామాజీ! మీ బేబీకి ఆల్రడీ గుడ్ బై చెప్పేసాన్, దిసీజ్ మై న్యూ బీబీ!’ అల్లుడి బాంబుకు వెంకప్పగారికి తన్నుకొచ్చింది బి.పి! పిచ్చి కోపంతో  రెచ్చిపోతో. ‘కట్నం కింద పది కోట్లు అచ్చుకుంటినిరా పాపీ! కుంటి సాకులొద్దు! పచ్చి మోసం చెయ్యద్దు!’ 
4. పకాల్మని నవ్వి అల్లుడబ్బి అన్నాడూ ‘అప్పనంగా కుమ్మరించావా మామా కట్నం  సొమ్ము? గుమ్మటంలా ఉంది నీ కూతురు వెంకప్పా! ఆమెతో ఆర్నెల్ల సంసారమే  మా గొప్ప!’
5. ’పెళ్లప్పటి ‘నాతి చరామి’ మాటేమిట్రా? పదిమంది ముందు అప్పుడలా కూసి ఇప్పుడింత కుట్రా?’ 
6. ‘ధర్మపన్నాలా వెంకప్పంకుల్? నమ్మి ఓటేసిన దిబ్బలగూడేనికి తమరిచ్చిన హామీల మాటేమిటో మరి?’ 
7. నోరెళ్లబెట్టేసారు ప్రజాప్రతినిధులు వెంకప్పగారు!
8. …
9.  
10.  ‘చింతాకాతా చిత చింతకాతా.. చింతకాతా చిత చింతాకాతా.. చిన్..’
11. సెల్ఫోన్ రింగుటోన్ బొంగురుపోతోంది. పోలీస్టేషన్నుంచీ కాల్. ‘సార్! ఈ గాడిద కొడుకు మీ కొడుకేనా?’ స్టేషనాఫీసరు చిందులు.
12. ‘ఏ గాడిదో తెలిస్తేనే గదయ్యా నా కొడుకో కాదో తేలిచచ్చేదీ!’ వెంకప్పగారి కౌంటర్.
13. ‘మీ ఫొటోనే చూపిస్తుండు! వీడి బుద్ధుల్ని బట్టీ నమ్మబుద్ధేస్తోంది. గోడ దూకుతూ పట్టుబడ్డాడు కదా సార్ మరీ!’ లైన్లోకొచ్చి సుపుత్రుడిచ్చిన సమాచారం విని వెంకప్పగారి మైండ్ కంప్లీట్ గా  బ్లాంకయింది. అబ్బగారు అడ్డమైన గడ్డీ మేసి గడించిందంతా  అబ్బాయిగారు ధారాళంగా పేకాటకి ధారపోసారు! ధారపోసేందుకింకేమీ మిగలక క్లబ్బుగోడ దూకేస్తో పట్టుబడ్డారు. ‘తండ్రిగారేమో ఓట్ల కోసం ప్రామిస్ మాటలా! సన్ను గారేమో  నోట్ల కోసం ప్రాంసరీ నోటులా!’ పోలీసోడి సెటైర్లకు వళ్లు మండింది గౌరవనీయులు వెంకప్పగారికి. ‘వీడు రాసిచ్చాడు సరే సామీ! దమ్మిడీక్కొరగాని మా గాడిదతో మనీ డీలింగ్స్   నడిపే వాళ్ల మాటేమిటంట మరి?’ 
14. ‘నోట్లు గిలికే టైముకి నోట్లో వేలెట్టినా కొరకని బుజ్జిపాపాయిని కాదు డాడీ. కాలేజీ ధరఖాస్తన్న భ్రమలో  నువ్వు దస్తఖతులు గిలికింది  దాన వినిమయ విక్రయాది సర్వ హక్కుల్తో నీ  స్థిర చరాస్తి యావత్తూ నాకు ధారాదత్తమయే స్టాంప్పేపర్లో!’ 
15. వెంకప్పగారి కళ్లల్లో ధారాపాతంగా నీళ్లు.  
16. ‘కన్న తండ్రినిరా! నాకే వెన్నుపోటా?’ 
17. ‘వెన్నతో నువ్వు పెట్టించింది ఈ విద్యనే కదా నాన్నారూ! దిబ్బలగూడెం పబ్లిక్కు  నిన్నడిగే మాట నువ్వు నన్నడగడం  నాట్ గుడ్ టేస్ట్!’ 
18. కొడుక్కొట్టిన దెబ్బకు పాపం కూలబడ్డారు వెంకప్పగారు!
19. ...  
20. ‘ఇప్పటికైనా నిజం కక్కకపోతే నా బతుక్కిక నిష్కృతి లేదండీ!" వెక్కి వెక్కి ఏడుస్తోంది పక్కనే పక్కలో  ధర్మపత్ని .
21. ‘నీ బతుక్కంత నిష్కృతిలేని ఆ నిజం ఏమిటి సావిత్రీ?’  ‘నా కడుపున పడ్డ బిడ్డల్లో ఒకరు.. ఒకరు.. మీ రక్తం పంచుకు పుట్టలేదేమోనని అనుమానంగా ఉందండీ! భగవంతుడా! ఏ ఆడదానికీ రాకూడదురా ఇంత పెద్ద కష్టం’  
22. ‘ఎవరే ఆ ఒక్కరూ? ఇంత దౌర్భాగ్యంలో కూడా  మళ్లీ సస్పెన్సా.. నా ఖర్మం కాకపోతే!’ 
23. ‘ఏమోనండీ! ఎంత గింజుకున్నా గుర్తుకు రావడంలా. ఎవరితో కాలు జారినప్పుడు ఈ పొరపాటు జరిగిపోయిందో!’. 
24. ‘షష్టిపూర్తి తరువాతటే ఈ నిప్పుమూటను నా గుప్పేట్లో పెట్టేది పాపిష్టీ!’ 
25. సావిత్రీదేవి తిరగబడింది.‘తప్పంతా నాదేనంటే ఓప్పుకోను సుమండీ! పెళ్లిచూపుల కొచ్చినప్పుడు మాంగారిదే పార్టీ అన్న విచారణే గానీ కట్టుకునేదాని కడుపు వంకోసారైనా చూసారా తమరు? లొసుగంతా మీదే!’
26. ‘తాళి కట్టిన దౌర్భాగ్యుణ్ని.. మరీ ఇంత భారీగానా దగాచేయడం?’
27. ‘సారీ! మీ దిబ్బలగూడెం దగా ముందు నాది చీమతలంత. ఎన్నికైనాక తమరు దివిని సరాసరి దిబ్బలగూడెం మీదకే దింపేస్తానంటిరి కదా!   మంచి పదవులొస్తాయని ఇప్పుడు గోడలు దూకేస్తుంటిరి. ఎవరు స్వామీ పదహారణాల తుంటరి?’ ధర్మపత్ని దెబ్బకు ధడాల్మని కిందపడ్డారు  వెంకప్పగారు. నిద్ర తేలిపోయింది. 
28. పోతే పోయింది పాడు నిద్ర..  తానిప్పటి దాకా కన్నది కేవలం పీడకలేనని తేలిపోయింది. మనసు తేలికయిపోయింది.
29. …
30.  
31. ‘తేలికవడానికి కారణం పీడకల నుంచి బైటపడ్డం కాదప్పా!  పీడాకారపు  దేహం నుంచి  బైటకు దూకిపడ్డం! పద.. పద! నరకమో.. స్వర్గమో .. తేల్చుకుందువుగాని ముందు!’ 
32. తానిప్పుడున్నది వేరే వేరే లోకాలకెళ్లే కూడలి  దగ్గరా! యముడి సర్వెంట్లూ.. దేవేంద్రుడి ఏజెంట్లూ,, చెరో సైడూ! తన బదులు కోసమే ఎదురుచూస్తున్నాడు చిత్రగుప్తుడు! గయ్యిమని లేచాడు వెంకప్పగారు తాను చచ్చానన్న సత్యం హరాయించుకోలేని కచ్చ ‘ఎవర్రా మీరంతా? అడగా పెట్టకుండా లాక్కొస్తార్రా! లాగిచ్చి కొడతా! లాకోర్ట్లకెళతా!’ 
33. ‘షటప్ యువర్ మౌత్! దీసీజ్ ఆల్సో యమ్ దర్మరాజాస్  కోర్ట్!’ చిత్రగుప్తుడింకా పెద్దగా షౌటింగ్! ‘ఇదేం మీ భూలోకం బాపతు ఎన్నికల సభ కాదప్పా.. ఏదంటే  అది కూసేసెయ్యడానికీ! నువ్వే నీ చావుని నోరారా కోరి తెచ్చుకొంటివిరా మూర్ఖా! మొన్నటి ఎన్నికల్లో గెలిచి చట్టసభకెళ్లిన  మొట్టమొదట్రోజు మొదటగా ఏం చేసావో గుర్తుందా నీకింకా?’   
34. ‘ప్రజాప్రతినిధిగా పదవీ  ప్రమాణ స్వీకరణ. గోడదూకుడు వీర వేంకట వెంకప్ప అను నేను దిబ్బలగూడెం నియోజకవర్గ ప్రజల ఆంకాక్షల మేరకు నిస్వార్థంగా కర్తవ్యం  నిర్వహిస్తానని, నా ప్రజల యొక్క  హక్కులకు భంగంకలుగనీయనని,  భయ రాగ ద్వేషాలకు అతీతంగా భారత రాజ్యాంగానికి లోబడి పనిచేస్తాన’ని దైవసాక్షిగా ప్రమాణం చేసాను చిత్రగుప్తా! అది తప్పా?’ 
35. ‘అదిగో! ఆ అతే నీ చావుకొచ్చింది వెంకప్పా! దైవసాక్షిగా చేసిందయ్యా నీ పదవీ స్వీకార ప్రమాణం. ఉల్లంఘిస్తే దైవధిక్కారం కిందే లెక్క! చూస్తూ కూర్చోడానికి దేవుడేమన్నా మీ ప్రధాని తాలూకూ తాలుసరుకా? స్వార్థమే కదా నీ గోడ దూకుడు నిర్ణయం  వెనకున్న  పరమార్థం? దేవుడి ముందు చేసిన ప్రమాణప్పా! దాన్ని ధిక్కరించిన మరుక్షణమే రాజకీయంగా మా మృతుల చిట్టాలోకెక్కేసినట్లే! లెక్క ప్రకారం ఫోర్ ట్వంటీ గాళ్లను నేరుగా నరకంలోనే శాశ్వతంగా తొక్కేయాలి. అక్కడా  నీలాంటి దిక్కుమాలిన సరుకే కిక్కిరిసిపోతోంది.  నువ్ లక్కీ వెంకప్పా! యమధర్మరాజుగారు  ప్రక్షాళన పథకం  ప్రారంభించిన మొదట్రోరోజే మా  కళ్లబడ్డావ్!  సో నీకో ఛాయిస్ ఛాన్స్! స్వర్గమో.. నరకమో.. తొందరగా  తేల్చుకో! అవతల నీ లాంటి గోడ దూకుడు పాపులు బోలెడంతమంది క్యూలో పాపం  పడిగాపులు పడుతున్నారు’
36. వెంకప్పగారు  కోరిందే తడవుగా స్వర్గధామం ద్వారాలు బార్లా తెరుచుకున్నాయి.
37. …
38.  కడుపులో దేవుతోంది  దేవనగరం తీరు.
39. ‘స్వర్గధామం కూడా ఇంత బురదమయమా?’
40. ‘బురదేంటప్పా? పూజాదికాలక్కూడా వాడే మంచితీర్థం ఇదే మాకు! బురదంటే అదీ’ వీధులెంటపడి పెడబొబ్బలు పెడుతో పరుగులెత్తే కొన్ని వింత ఆకారాలని   చూపిస్తూ అన్నాడు దైవదూత.  
41. ‘కీచడ్ తో   క్రీడా వినోదాలూ?!’
42. ‘క్రీడలు కాదప్పా! గోడలు దూకే నీ బోటి భడవాయిలకు శుద్ధి కార్యక్రమం. స్వర్గమని ఊరిస్తే తప్ప రారు కదర్రా మీరు!  పద.. పద! నీ వంతు వచ్చే దాకా ఆ ముళ్ల కుర్చీ మీద నిశ్చింతగా పొర్లుదువుగానీ!’ కుర్చీ మీదకు తోసేసాడా దైవదూత. ‘కెవ్వు’ మన్నాడు వెంకప్పగారు. ఏ వైపు నుంచొచ్చి పడిందో.. అంగిట్లో ఇంత  మందాన బురద కళ్లె! 
43. మింగాలో కక్కాలో తెలీని వెంకప్పగారి చెవిలో మరో రొద ‘ఎదుటి వాళ్ల మీద  బురదజల్లడం.. భలే సరదా కదరా మీ నేతలందరికీ! ముందుకు పదా! అసలు మజా ఇంకా మొదలే కాలేదప్పా!’
44. ‘స్వర్గమంటే ఇంత నరకమా? ముందే చెప్పాలి కదా స్వామీ? తమరు చేసేది మాత్రం పచ్చిమోసం కాదా?’ ఉగ్గబట్టలేక  బిగ్గరాగా అరిచేసాడు వెంకప్పగారు! 
45. అప్పుడు పలికింది దైవవాణి ‘ఇప్పుడు  తెలిసొచ్చిందా మోసమంటే  ఏమిటో  వెంకప్ప మానవా! నీ  నియోజకవర్గ ప్రజానీకం ప్రతీక్షణం  పడే క్షోభ ఇంతకు పదింతలు. కొత్త బంగారు లోకం సృష్టించిపారేస్తామని వాగ్దానాలు కుమ్మి గద్దెనెక్కారయ్యా తమరంతా..  గుర్తుందా గత ఎన్నికల ఫార్సు? గెలిచిన మరుక్షణం నుంచే జనం గోలే మరిచారు.  స్వర్గధామం అంటూ ఊరించిన లోకం నరకాన్ని మించి హింస పెడుతుంటే ఆ బాధ  ఎంతలా సలుపుతుందో స్వానుభవంలో తెలుసుకుంటావనే  నిన్నిక్కడ దాకా రప్పించింది వెంకప్పా! తత్వం ఇప్పటికైనా తెలకెక్కినట్లేనా?’ 
46. తలొంచుకున్నారు గోడ దూకుడు వెంకప్పగారు. కంటి నిండా నీరు!
47. ‘ఇదంతా పశ్చాత్తాపమేనని నమ్మమంటావా? ప్రాయశ్చిత్తానికింకో అవకాశం ఇమ్మంటావా? నిన్నే కాదు నీ పార్టీ గుర్తును చూసీ ఎన్నుకున్న జనమూ ఉన్నారప్పా నీ నియోజకవర్గం నిండా! జనమంతా నిజంగా నిన్ను తమ ప్రతినిధిగా భావించుకునేలా  నీ సేవలుండాలి ఇహ నుంచి! బుద్ధికా ప్రచారం చేసుకో! ఎన్నికైతే నిజమైన ప్రజాసేవ చేసుకో.. పో!’ 
48. రెండు చేతులూ జోడించి తలాడించేసాడు వెంకప్పగారు.
49. ***
50. ( కౌముది - ప్రచురితం ) 
51.  

ఏప్రియల్ ఫూల్స్ -కర్లపాలెం హనుమంతరావు

 

ఏప్రియల్ ఫూల్స్

-కర్లపాలెం హనుమంతరావు 

 

గతంలో అమాంతం లాక్ డౌన్ విధించేసిన తరువాత ఎదురైన చేదు అనుభవాలు ఇప్పుడు మన ఛాతీ వీరుడిని వెనక్కు లాగినట్లున్నాయ్.. మొన్న మంగళవారం టీవీలో జనం ప్రతినిధిగా  వచ్చి నూట పాతిక కోట్ల మంది నెత్తిన  ఒకేసారి ఎత్తి పోసిన చెత్తలో ఏరుకుంటే పనికొచ్చే పీస్ ఒక్కటంటే ఒక్కటే.. లాక్ డౌన్ లు.. గీక్ డౌన్ లు ప్రస్తుతానికి జాన్తానై..   అంటూ జనతాకిచ్చిన ఊరట! 

 

కోవిడ్ వైరస్ రెండో దఫా ఉధృతాన్ని ఆర్థికంగా గానీ, మరో పద్ధతిలో గానీ  తట్టుకునే ప్రణాళిక మన ప్రధానిగారి దగ్గరేదీ ప్రస్తుతానికి  లేదు. ఉన్న ఎత్తుగడల్లా ఎట్టి పరిస్థితుల్లోనూ ప్రభుత్వం ఈ సారి ఈ కరోనా బండరాయిని   గుండెల మీద పెట్టుకోకూడదనే. ప్లస్ ఈ నష్టంలో నుంచి కూడా కాస్తో కూస్తో పొలిటికల్ మైలేజీ పిండుకోవాలనీ! ఇంతోటి గొప్ప సందేశం జాతి చెవిలో ఊదడానికి ఎన్ని డొంక తిరుగుళ్లో.. ఎప్పట్లానే! కొంపలు తగలడుతుంటే ఫైరింజన్ డ్రైవర్ ‘ఎవరి చెంబుతో వాళ్ళు నీళ్లు తెచ్చేసుకుని సుబ్బరంగా  నిప్పునార్పేసుకోవచ్చ’ని  తీరిగ్గా తీర్మానం చేసినట్లన్నమాట!  గారడీ కబుర్లతో ఫీట్స్ చేసేందుకు  మన ప్రధాని ఎవరడీ.. ఆల్ రడీనే కదా!

 ఒకళ్ల నుంచి ఒకళ్ళ పాకే అంటురోగాన్ని ఎవరికి వాళ్ళుగా, ఏ ఇంటికి ఆ ఇల్లుగా, ఏ పేటకు ఆ పేటగా, ఏ ఊరుకు ఆ ఊరుగా.. చివరికి ఏ రాష్ట్రానికి ఆ రాష్ట్రంగా మటుమాయం చేసేసుకోడానికి మాయమంత్రాలను మాత్రమే ఇహ జనం నమ్ముకోవాలని ప్రధానిగారి మన్ కీ బాత్ సూచన! మా నాయనమ్మ తద్దినానికి సెలవిమ్మని అడిగితే .. ఇప్పుడు కుదరదయ్యా!.. వచ్చే వారం పెట్టుకో నిక్షేపంగా!' అని సలహా ఇచ్చిన బాసు చందం!

లక్షలాది శాల్తీలు ఇక్కడ కరోనా కమ్ముకొని లేచిపోతుంటే.. వల్లకాళ్లు కూడా వీళ్లను కడుపులో దాచుకోడం మా వల్లకాదని కన్నీళ్ళు పెట్టుకుంటుంటే.. ఎప్పుడో మే ఒకటికి కుర్ర్రకారందరికి టీకాలు ఇప్పిచ్చేస్తానని హామీ! మబ్బులో నీళ్లు చూపిస్తే.. చెంబులట్టుకుని నిలబడ్తారని జనం మీద ప్రధానికి బోలెడంత విశ్వాసం. గత చరిత్ర దగా కూడా అట్లాగే ఉంది గదా మరి! 

 తీసుకున్న టీకానే పని చేస్తుందో లేదో తెలీక తికమకగా ఉంది గదా  ఇక్కడంతా.  జనం కరోనా రోగంతో బాల్చీ తన్నేస్తుంటే.. ఇంకేదో పక్కనొచ్చే బుల్లి రోగాల పేర్లు గిలికి  వాటితో పోయారని నివేదికలిచ్చే తమాషాలకు తెరలేపాయి చాలా రాష్ట్రాలు! ఎవరికి వాళ్ళు అప్రమత్తంగా లేకపోతే మళ్లీ లాక్ - డౌనే అని ప్రధానిగారు చిన్నబళ్లో అయ్యవారులా బెదిరించడం వింటుంటే .. జనాలకు కొత్తనుమానాలు కూడా మొదలయిపోయాయ్.. ‘లాక్ డౌన్ ముందస్తు నివారణా చర్యా? ముషీరాబాద్ సెంట్రల్ జైలు టైపు శిక్షా?’ ఆవటా అని! రాబోయే రోజులు మరింత దారుణంగా ఉంటాయనికి బెదరించడానికా 'అచ్ఛే దిన ఆనే వాలా హైఁ' మార్క్ ప్రధానిగారు పనిమాలా రాత్రిపూట  ప్రసంగాలు! నిష్క్రియాపరత్వం ఎంత పెద్ద దురభిమానగణాలున్నా సరే దెబ్బ కొట్టితీరుతుంది. అమెరికన్ ట్రంపే అందుకు మన ముందున్న లేటెస్ట్ ఉదాహరణ!

కరోనా క్రిమి  ఎన్నికల కమీషన్ కాదు, క్రిమినల్ బ్యూరో ఇన్వెస్టిగేషన్ అంతకన్నా కాదు.. గదమాయిస్తే గమ్మున చెప్పిన వాళ్లని  మాత్రమే గమ్ములా తగులుకోడానికి కనీసం కొలీజియమ్ లో  దూరి ఏ సిజెఐ పోస్టుకో వెయిటింగులో ఉన్న  చెట్టు కింది ప్లీడరైనా కాదు.  

ఏక మొత్తంగా కేంద్రమంతా మందీ మార్బలంతో దిగొచ్చేసి ఏదో ఘనకార్యం చేసేస్తుందని ఎంత వెర్రివెంగళ్ళప్పా ఇప్పుడున్న గడ్డుపరిస్థితుల్లో  కలలో కూడా అనుకోడు. కానీ, కనీసం తన వంతు మార్గదర్శక పాత్రయినా కొంత పోషిస్తుందని ఆశగా ఎదురుచూస్తాడు. చూశాడు కూడా. కానీ, ఏమయింది? వెరీ శాడ్!  ఉత్తుత్తి పెత్తనానికైనా ఉత్తరకుమారుడి మించి వణికిపోతోంది జనం తననే ఏకపక్షంగా ఎన్నుకున్నారని నిత్యం డబ్బాలు కొట్టుకునే ప్రగల్భాల ప్రభుత్వం.

 

ప్రధాని హోదాలో మోదీ వచ్చి చెప్పాడనా దేశంలోని స్వచ్ఛంద సేవా సంస్థలు చాలా బాధితులకు తమ స్థాయికి తగ్గ సేవలు నిస్వార్థంగా అందిస్తున్నది! బైటి శక్తుల   చురుకుపాలు ఎక్కువయే కొద్దీ .. జనాలెనుకున్న ప్రభుత్వాలకే నామర్దా.. ప్రభుత్వాల కార్యాచరణలోనే ఎక్కడో లూప్ హోల్సున్నాయని  బైటపడిపోడానికి! 

ఇప్పుడున్న ఆక్సిజన్ , టీకా మందు కరువు పరిస్థితులకే దిక్కులు చూసే కేంద్ర ప్రభుత్వం మే ఒకటి నుంచి మొదలయ్యే  తాకిడికి ఎట్లా తట్టుకుంటుందో మరి.. ఆ తామాషా కూడా చూడాల్సిందే! ఆరోగ్యశాఖ పెద్దలకు ఆక్స్ ఫర్ద్  పట్టభద్రులైనా సరే.. వట్టి దద్దమ్మలు! ప్రయివేట్ రంగ  ఉత్పత్తులపై  కొద్ది కాలమైనా  పూర్తి నియంత్రణ తీసుకుంటే బోలెడన్ని సమస్యలు పరిష్కారమైపోతాయ్! కానీ బాధ్యతలు జనాలెనుకున్న మన ప్రభుత్వాలకు ఎప్పుడూ భారమే!  గుర్రం గుడ్డిదైనా సరే.. దాని మెడకో  కాడేసి  తామే సర్వం భరాయిస్తున్నట్లు ఫోజులివ్వడానికి మాత్రం రడీ మన ప్రభుత్వ సర్వెంట్లు!

మేటర్ ట్రాక్ తప్పక ముందే మళ్లీ మన ప్రదాని ప్రసంగం దగ్గరికొచ్చేద్దాం.  సగం రాష్ట్రాలకు ఉచితమని ఊరిస్తున్నా అ ఎరలన్నీ  సర్కారీ పెద్దల అనుకూలతల వరకే! ఆ తరువాత అంతా స్టాప్! కరోనా టీకా ఉత్పత్తు మరింత వేగంగా పెంచాలన్న ఉద్దేశంతో.  ప్రయివేటు రంగాలకు నాలుగున్నర వేల కోట్లు సాయమందిస్తోంది కేంద్రం. రాష్ట్ర్రాల దగ్గరి కొచ్చేసరికి  మాత్రం మొండి చెయ్యి చూపిస్తోంది! సరుకు డబ్బిచ్చి కొనుక్కోవాలనడంలోనే   కేంద్ర పెద్దల దుర్బుద్ధి బయటపడ్డంలే! అర్థికంగా బలమైన రాష్ట్రాలు సొంతంగా ఉచిత టీకాల కార్యక్రమం విజయవంతం చేసుకుంటే.. అనేక ఇతరేతర కారణాల వల్ల కొన్ని   రాష్ట్రాల మీద వత్తిడి పెరుగుతుంది. (18 ఏళ్లు దాటిన ప్రతి ఒక్కరికీ ఉచిత వ్యాక్సిన్‌లంటూ యుపి ప్రకటించించేసింది అప్పుడే!) అగ్గిపుల్ల వెలిగించి వెన్నముద్దను కరగద్దని గద్దించినట్లుంది కత. రాష్ట్రాల మధ్య చిచ్చు పెట్టి పార్టీపరంగా లబ్దిపొందే వ్యూహం అవసరమా ఇంత సంక్షోభ సమయంలో కూడా!

వ్యాక్సిన్ల కొరత, టీకా కేంద్రాల మూసివేత, తెరిచున్న చోటా ఏ సామాజిక దూరాల పాటింపులు పట్టని జనం రద్దీ! ఇట్లాంటి పరిస్థితి అమెరికాలో అయినా ఉండేదే! కానీ.. ముందుస్తు రిజిస్ట్రేషన్ అనే  తెలివైన చిన్న ప్రక్రియను కచ్చితంగా పాటించడంతో ఏ చిక్కూ లేకుండా వ్యవహారం సాగిపోతోంది. ఏ వ్యూహాలు లేకుండా పథకాలు ప్రారంభించి బొక్కబోర్లాపడ్డంలో మన ప్రభుత్వానిదే నిజం చెప్పాలంటే ప్రపంచ రికార్ద్!

ప్రభువులిచ్చిన పాత ఉచిత టీకా హామీ గాలిలో కలిసిపోయింది.  టీకా ధర పెంచడం పైనే ప్రస్తుతమంతటా రచ్చ! 'ఉచితం'అన్నప్పుడే ప్రయివేట్ ఆసుపత్రులు  రూ. 500 వరకూ కుమ్మేశాయి. ఇహపై సర్కారు దవాఖావాఖానాలలోనూ  ఆ నల్లలక్ష్మీ దేవి చిందులు మొదలు కాబోలు! హిట్ వెన్ ఇటీజ్ హాట్ అన్న సూక్తిని ఇట్లా కూడా వాడుకుంటారా?!అవునులేండి! ఏప్రియల్ ఒకటి నాడే జనమంతా ఫూల్స్ అవాలనే రూల్ ఎక్కడా లేదుగా!

-కర్లపాలెం హనుమంతరావు

22 -04 -2021

ధూమకేతువు చెప్పే నీతిపాఠం -కర్లపాలెం హనుమంతరావు

దేవుళ్ళు తాము చంపిన రాక్షసుల పేర్లు బిరుదులుగా తగిలించుకోడం సరదా కోసం కాదు. పూజించే భక్తులను రాక్షసత్వంతో ప్రవర్తించవద్దని హెచ్చరించడం కోసం. వినాయకుడిని 'ధూమకేతవే నమః' అని కీర్తించడంలో కూడా ఇట్లాంటి ఓ గట్టి హెచ్చరికే దాగివుంది.చెడ్డపనులు చేస్తే మళ్లీ రాక్షస ప్రవృత్తితో జన్మ ఎత్తాల్సొస్తుందనే బెదురు  గతంలో బాగా ఉండేది. కానీ అట్లా ఎత్తిన జన్మలో కూడా  కొన్నైనా మంచి పనులు  చేస్తే ఈ  దుర్జన్మ పీడా వగదిదుతుందన్న  ఊరటా పురాణేతిహాసాల తాలూకు కథలలో కనిపిస్తుంటుంది.  ఈ సందర్భంగానే ధూమాసురుడు అనే దుర్మార్గుడిని గురించి కొంత చెప్పడం.

పుట్టింది రాక్షస జాతిలోనే అయినా ధూమాసురుడు వేదాలను మొత్తం కంఠోపాఠం చేశాడు. చదివిన చదువుకు.. నడిచే తీరుకు బొత్తిగా సంబంధం ఉండదనడానికి ఈ దుర్మార్గుడి దుష్ప్రవర్తనే సరైన దృష్టాంతం. శివుడికి భక్తుడు అయివుండీ భృగువుతో సంవాదం చేసే పాటి పాండిత్యం సాధించినా రజోగుణం ప్రబలినప్పుడు మాత్రం యుద్ధాలు చేయాలని, దేవతలనే వాళ్ళు ఎక్కడున్నా వెదికి మరీ చీల్చి చెండాడాలని అణుచుకోలేనంత కుతిగా ఉండేది అతగాడికి. అట్లాంటి తీటలు తీరడం కోసం జైత్రయాత్రలు చేయడం, దేవతలను చెండుకు తినడం రాక్షస జాతికి సహజమే అయినా, దేదేవతలకు మాత్రం  పద్దాకా ఏదో ఓ రాక్షసాధముడి కారణంగా ప్రాణాలు అరచేతిలో పెట్టుకుని తిరగాల్సిన పరిస్థితి.

ధూమాసురుడి దెబ్బకు తట్టుకోలేక ఎప్పట్లానే శివుడిని ఆశ్రయిస్తే, ఆయనా ఎప్పట్లానే ఆశ్రితులను కాపాడే పని పెద్దకొడుకు వినాయకుడికి పురమాయించాడు.

తండ్రి ఆజ్ఞ! తప్పుతుందా! ఏం చేద్దామా అని బొజ్జ గణపతయ్య బుర్ర బద్దలు చేసుకొనే సమయంలో తరుణోపాయంగా మాధవుడు అనే బ్రాహ్మడి కుటుంబం తాలూకు తంటా ఒకటి తెలియవచ్చింది. సంతానవతి కాని  కారణాన  మాదవుడు  భార్య సుముదను  వదిలేస్తానని తరచూ బెదిరిస్తుంటాడు. ఆమెకు మరో దారి లేక నారాయణుడిని ఆశ్రయించడం, ఆ సందు చూసుకుని వినాయకుడు ఆమె గర్భంలో జొరబడ్డం జరిగిపోతుంది.

యుద్ధానికని  బయలుదేరే  ధూమాసురుణ్ణి ఈసారి ఆకాశవాణి గట్టిగానే హచ్చరిస్తుంది. 'చావు మూడే రోజు దగ్గర్లోనే ఉంది. ఇట్లా  సుముదమ్మ కడుపులో జీవం పోసుకొంటోంది' ఆవటా అని. ఎంత రాక్షసుడికైతే మాత్రం ఎదుటి వాళ్లను ఏడిపించి చంపడం సరదా గానీ, స్వయంగా  చావును కావులించుకోవడానికి సరదా ఎందుకు పుడుతుంది? అందరికి మల్లేనే ఆ రాక్షసుడూ మృత్యుభయంతో యుద్ధాలు గిద్ధాలు కట్టిపెట్టి ఇంచక్కా దక్కిన రాజ్యాన్ని చక్కగా   'రామరాజ్యం' మోడల్లో 'ధూమాసుర రాజ్యం' గా సుప్రసిద్ధం చేద్దామని సిద్ధమయిపోయాడు.   అందుక్కారణం అతగాడి కొలువులో కనీసం ధర్ముడు అనే ఒక్క మంచి మంత్రైనా ఉండి రాజుకు హితబోధ చేయడం. తతిమ్మా కొలువు కూటానికి ఇది మహా కంటకంగా మారింది. ధర్ముడు లేని సందు చూసుకొని ధూమాసురుణ్ని రెచ్చగొట్టేస్తారు.

అటు ధర్ముడు ఇటు దుర్మార్గులైన తతిమ్మా మంత్రులు.. దోళాంళనల మధ్య ఊగిసలాడే ధూమాసురిడి వికారాలకు అమృతంలా అనిపించే సలహా ఎవరిస్తారో తెలీదు కానీ.. ఇస్తారు. ఆ వికృత  ఆలోచన కార్యరూపమే సుమద కడుపులో ఎదిగే వినాయకుణ్ణి సంపూర్ణాకారం తీసుకోక ముందే సఫా చేసేయడం.

ధూమకాసురుడి ప్రయత్నం వృథా అయిందని, ఆ  దుర్మార్గుడే వినాయకుడి చేతిలో చివరికి ఖతమయ్యాడని వేరే చెప్పక్కర్లేదు కానీ, ఇక్కడ చెప్పవలసిన అసలు ముఖ్యమైన మాట మరోటి ఉంది.  చరిత్ర ఎటూ మనకు పట్టదు.  కనీసం మనం నెత్తికెత్తుకొని నిత్యం పూజించే పురాణాలు, ఇతిహాసాలలో కనిపించే ఈ తరహా నీతికథలనయినా  మన సో కాల్డ్ ప్రజానేతలు  సమయ సందర్భాలను బట్టి ఖాతరు చేస్తుంటే ఎన్నుకునే సమయంలో ప్రజలు పెట్టుకున్న నమ్మకం వమ్ముకాకపోను.  ఇప్పుడు జరుగుతున్న 'రఘు రామరాజు  కారాగార  కఠిన దండన' కథా కమామిషు వింటుంటే మంచి పాలకులు మనకు ఇక సంప్రాప్తించే యోగం ఉందా' అని బాధేస్తుంది. 

మనుషుల .. ముఖ్యంగా రాజకీయాలలో నలిగే పెద్దమనుషుల మతిమరుపు  రోగం బాగా ఎరిక కాబట్టేపాపం వినాయకుడు దుర్మార్గుడైన ధూమాసురుడిని మళ్లీ కనిపించకుండా శిక్షించినా..  తన పేరులో అతగాడి   పేరు దూర్చుకుని 'ధూమకేతువు'ను అని కూడా  గుర్తు చేయడానికి పదే పదే ప్రయత్నిస్తున్నాడు. పాలకుల పెడబుద్ధులు సరిచేయడం భగవంతుడి తరమైనా అవుతుందా? చూద్దాం!

- కర్లపాలెం హనుమంతరావు

12 -06 -2021

మహమ్మారి కరోనా విస్తరణకు - మన లెక్కలేనితనమే కారణమా! -కర్లపాలెం హనుమంతరావు

 

 

రష్యా అధినేత కృశ్చేవ్ ఓసారి ఇండియా వచ్చినప్పుడు స్వాగత వచనాలు పలికి తోడుకుని తెస్తున్నాడుట అప్పటి మన దేశ ప్రధాని జవహర్ లాల్ నెహ్రూ. మార్గమధ్యంలో  ఓ పౌరుడు తన ట్రేడ్ మార్క్ చెంబుతో పొదల్లో దూరడం చూసి కృశ్చేవ్ ఆసక్తి కొద్దీ అతగాడు అంత పరగడుపునే పొదల చాటుకెళ్లి చేసే మహాకార్యమేంట’ని అడిగితే, వివరాలు కనుక్కొచ్చిన మనిషి తెచ్చిన సమాచారం దేశం శుచి శుభ్రతలకు సంబంధించిందవడంతో చెప్పలేక చెప్పి చాచాజీ తలొంచుకున్నాడుట. మరి కొంతకాలం తరువాత అదే సన్నివేశం మాస్కోలో కాకతాళీయంగా జరిగటంతో  చాచాజీకీ బదులు తీర్చుకునే అవకాశం వచ్చింది. 'చెంబు చేత పట్టుకుని పొదల చాటుకు జనం పరుగెత్తే దృశ్యాలకు తమ దేశమూ కొదవేంపోలేదూ!' అన్నట్లు నవ్వితే తలతీసినట్లనిపించిందీ సారి  కృశ్చేవ్ కి. ఆ అనాగరికుడిని పట్టి తెమ్మని ఆయనిచ్చిన ఆదేశం మేరకు.. వెళ్లి వచ్చిన మనిషి 'ఆతగాడి పలుకును బట్టి ఇండియన’ని చెప్పడంతో చాచాజీకీ మరో మారు తలవంచుకునే పరిస్థితి తప్పింది కాదు'అని కుశ్వంత్ సింగ్ ఓ సందర్బంలో చెప్పిన పిట్టకథ ఇప్పుడు గుర్తుకొస్తోంది. భారతీయులను అవమానించే ఈ తరహా చెత్త కథలు  కట్టుకథలని ప్రత్యేకంగా చెప్పనక్కర్లేదు.  కానీ.. అలవాట్ల వరకు భారతీయుల వెకిలి చేష్టలను చక్కగా వెలిబుచ్చేవని మాత్రం ఒప్పుకోక తప్పదు.

మారుతున్న కాలంలో ఇప్పుడు ఏ భారతీయుడూ విదేశీ గడ్డ మీద ఆ విధంగా ప్రవర్తించడంలేదు. ‘ఏ దేశమేగినా ఎందు కాలిడినా ఏ పీఠమెక్కినా ఎవ్వరేమనినా పొగడరా నీతల్లి భూమి భారతిని నిలుపరా నీ జాతి నిండు గౌరవము' అన్నట్లు మాతృభూమి వళ్ళు పులకరించేలా ఎంతో ఒద్దికైన ప్రవర్తనతో పదిమంది మధ్యనా ఆదర్శవంతంగా నడుచుకుంటున్నాడు. కానీ.. చిత్రంగా ఆ బుద్ధిమంతుడే కన్నభూమి పై కాలు పెట్టిన తొలిక్షణం నుంచి  మళ్లా లోపలున్న ‘ఒరిజనల్’ని బైటికి తీసేస్తున్నాడు! పాత దురలవాట్లను శాయశక్తులా పాటిస్తున్నాడు! రోడ్లను  యధా తధంగా ఉమ్ముతో పావనం  చేయడం నుంచి కుండీ ఎదుటే ఉండినా  చెత్త అందులో పడకుండా శాయశక్తులా శ్రద్ధవహించడం వగైరా.. వగైరా వరకు.. ఏది చట్టమో అంతా తెలిసినట్లే.. పంతంగా వాటిని ఉల్లంఘించే పాత అలవాట్లనే సాధన చేస్తున్నాడు! అందువల్లనే పై తరహా చిల్లర కథలకు అంత  విస్తృతమైన   ప్రచారం!

క్రమశిక్షణారాహిత్య కార్యకలాపాలలో సుశిక్షణేదో పొందినట్లు మనం మరీ అంత విపరీతంగా ప్రవర్తించడం ఎందుకు! ప్రస్తుతం దేశంలో జరిగే కరోనా విలయ తాండవంలో  ఈ అపరిశుభ్రతే కదా ముఖ్య కారణం!

మొదటి దశలో ఎంతో శ్రద్ధగా ధరించిన మొహం తొడుగులు రెండో దశలో ఎందుకు నామర్దాగా మారినట్లు! ప్రారంభంలో వైద్యులు చెప్పుకొచ్చిన సామాజిక దూరం వంటి జాగ్రత్తలన్నీ నియమబద్ధంగా పాటించిన మనమే తదనంతర దశలో  ఏం ఘనకార్యం సాధించామని  పూర్తిగా గాలికి వదిలేసినట్లు! పెళ్లిళ్లు, ఉత్సవాలు వంటి సామూహిక కార్యక్రమాలకూ ‘సై’ అనేందుకు ఏ వైద్యం మనల్ని కరోనా మహమ్మారి నుంచి పూర్తిగా విముక్తి చేసేసిందని! ఇంటికొకరు పిట్టల్లా రాలుతున్న కరోనా దేశంలో   హరిద్వారా కుంభమేళా, అయిదు రాష్ట్రాల ఎన్నికల మేళా చూసి ప్రపంచం నోరెళ్లబెట్టేస్తోంది. కనిపించే రోగగ్రస్తులకు ఎన్నో రెట్లు కనిపించని రోగవాహకులుగా ఉన్న  దుర్భర పరిస్థితులకు కారణాలేమిటో కనుక్కునే ప్రయత్నాలు ఏ కోశానా కనిపించడం లేదు ఇప్పటికీ! మన అపరిశుభ్రతే మనకు తీరని శాపం అని  సామాన్యుల నచ్చచెప్పేందుకు ఇంకే బ్రహ్మదేవుడు దిగిరావాలో!

పరిశుభ్రతకు సంబంధించిన చట్టాలు లేక కాదు. ఉన్నవాటినైనా కఠినంగా అమలుచేసే చింతన లేదనే ఈ చింతంతా! అపరాథ  రుసుం పైసల్లోఉండటంతో ‘ఆఁ! చెల్లించేస్తే పోలా!’ అన్న తుస్కార ధోరణే తప్ప సంస్కార కోణంలో ఆలోచించే గుణం తరతరానికి తరిగిపోతూ రావడమే కరోనా తరహా మహమ్మారులకు మన మీది ప్రేమ దినదినాభివృద్ధి చెందడం.

నిజం నిష్ఠురంగానే ఉంటుంది. ద్విచక్రవాహన చోదకులు ఎంత మంది శిరస్త్రాణాలు ధరిస్తున్నది? ధరించనివాళ్ళ మీదయినా నమోదయ్యే కేసులు ఎన్ని? ఎరుపంటే ఏదో జడుపున్నట్లు  ఆ రంగు లైట్ కంటపడగానే ఆగాల్సింది పోయి  వాయువేగంతో పారిపోయే వాహనాలే జాస్తీ మన దేశంలో ఎంత  బిజీ రోడ్ల మీదయినా! ‘ఒన్ వే’ అంటూ  నియమం ఓటి  ఉన్నా ‘జానే దేవ్’ అనే సజ్జే గజ గజానికీ ఈ దేశంలో! మూగజంతువు మీద నుంచి బండి నడుపుతూ పట్టుపడితే అపరాధ రుసుం కేవలం 50 రూపాయలా! కబేళాకు గొడ్డును అమ్మేందుకు ఆరోగ్యంగా ఉండే కాలును పుటిక్కున  విరిచేస్తున్నాడు త్రాష్టుడు! జబ్బు పడ్డ గొడ్డును పోషించడం ఖర్చుతో కూడిన వ్యవహారమయితే.. అదే కబేళాకు అమ్మేస్తే ఝంఝాటం వదలడంతో పాటు అదనంగా అంతో ఇంతో ధన లక్ష్మీదేవి సుప్రసన్నం!

సింగపూర్ లో ట్రాఫిక్ ఉల్లంఘనకు శిక్ష వెయ్యి డాలర్లు. చెల్లించలేని పక్షంలో జైలు శిక్షలు. అదే ఇండియాలోనో! గుప్పెడు రూకలతో చూపిస్తే అంతా గుప్.. చుప్! అవినీతిని గురించీ, న్యాయ విచారణల తీరును గురించి ఎంత తక్కువ చెబితే అంత మన్నన.

రోడ్డు నిబంధనలు తెలుసుకుని, నేర్చుకుని కష్టపడి  పరీక్ష ఉత్తీర్ణమవకుండానే  కొంత సొమ్ము మనది కాదనుకుంటే డ్రైవింగ్ లైసెన్స్ ఇంటికే బెంజి కారులో వచ్చేసే వ్యవస్థలో మనం బతుకుతున్నది. మందు కొట్టి బండి నడిపినంత మాత్రాన గ్యారంటీగా పోలీసు కేసు బుక్కవాలనుందా ఇక్కడ? కేరాఫ్ ఫుట్ పాత్ గాడి  పీకల మీద నుంచి గాడీ నడిపేసుకెళ్ళిన బేఫర్వా  హీరోగాడే సేఫ్ గా మూవీలు చేసుకునే దేశంలో చట్టం తన పని తాను చేసుకుపోతుందంటే ఎవడికి తోచిన అర్థం చెప్పుకుంటున్నాడు మరి.  సాంకేతిక కారణాలనేవి సైంధవుడి సోదరుడికి మల్లే   అడ్డుపడకుంటే  ఈ దేశపు  చట్టసభలను నింపే శాల్తీల పడకలన్నీ నిజానికి సెంట్రల్ జైళ్లలో ఉంటాయి. పగటి కలలో అయినా ఆ మాత్రం  సంస్కరణలను ఊహించుకుంటే పిచ్చాసుపత్రిలో బెడ్ సిద్ధం చేసే దుస్థితి. తోటకూర నాటి నుంచే విచ్చలవిడితనం ఇచ్చే సుఖాలు మరిగిన సంతు ఎదిగొచ్చే కొద్దీ ఎంత అసాంఘిక జంతువుగా మారుతుందో చెప్పాలంటే మరో  థగ్గుల చరిత్ర తిరగరాసినంత తంతవుతుంది.  

'ఇచ్చట మల మూత్రములు విసర్జించ రాదు' అన్న హెచ్చరికలు ఇక్కడ దర్శనమిచ్చినన్ని బహుశా ప్రపంచంలో మరే ఇతర దేశంలోనూ కనిపించవు. నడిరోడ్డు పక్కన మగవాళ్లు ప్యాంటు జిప్పులు నిస్సిగ్గుగా తీసే జగుప్సాకరమైన సన్నివేశాలకూ ఈ పవిత్ర దేశమే ప్రథమ స్థానం.  

1936 ప్రాంతంలో ఇండియన్ నేషనల్ కాంగ్రెస్ కు అనుబంధంగా ఆల్ ఇండియా స్టూడెంట్ ఫెడరేషనంటూ ఓటి ఏర్పడి  గాంధీజీ అప్పటి అవసరాలకని ఇచ్చిన 'పౌరుల సహాయ నిరాకరణ' ఉద్యమానికి ఊతంగా విద్యార్థులను బళ్ల నుంచి బయటికి వచ్చేయమంది. గురువుల బోధనలను ధిక్కరించినవాడే అప్పట్లో గొప్ప దేశభక్తుడుగా గుర్తిస్తానంది! బ్రిటిష్ ప్రభుత్వ కార్యకలాపాలు స్తంభించేలా సమాచార, రవాణా, పాలనా సౌకర్యాలు సర్వస్వానికి ఆటంకాలు కల్పించడాలవంటివి ఏళ్ల పర్యంతం ఉద్యమ స్ఫూర్తితో కొనసాగించిన సంస్కృతి ఈ దేశానిది.  స్వాతంత్ర్యం వచ్చినా తుచ్ఛ రాజకీయాలలో అదే నీచ సహాయ నిరాకరణ ధోరణులు! పుట్టుకొస్తున్న కొత్త తరాలకు  నియమ నిబంధనల పట్ల  ఉండవలసిన స్థాయిలో బాధ్యతాయుతమైన భయభక్తుల కొదవ అందుకేనేమో అనిపిస్తున్నదిప్పుడు! రాజకీయ పక్షాలే స్వలాభాపేక్ష నిమిత్తం విద్యుత్ వగైరా బిల్లులు చల్లించవద్దని, బ్యాంకు రుణాలను నిర్భయంగా  ఎగవేయమని,  పాఠశాలలకు వెళ్లి ఫలానా విద్యలు చదవరాదని,  రాస్తాలను దిగ్బంధనం  చేసెయ్యాలని, బస్సులు పై రాళ్లు రువ్వాలని, రైలు పట్టాలు పీకెయ్యాలని, ప్ర్రభుత్వ అస్తులు ధ్వంసం చేసి మరీ ఉద్యమ స్ఫూర్తి ప్రదర్శించాలని ప్రోత్సహిస్తున్నప్పుడు సామాన్య పౌరుడికి ఏది ఎప్పుడు ఎవరి మాట ఏ మోతాదులో ఆచరించవలసిన అగత్యం ఉందో ఎట్లా అవగాహనకొచ్చేది?

భారతీయులు అమితంగా ఆరాధించే ఆరాధ్య గ్రంథం భగవద్గీత కర్మయోగమే విశిష్ఠమైన వ్యక్తులు ఏమి చేస్తారో చూసి తతిమ్మా ప్రపంచం దాన్నే అనుసరిస్తుందని   'యద్యదాచరతి శ్రేష్ఠః తత్త దేవేతరో జనః ।స యత్ప్రమాణం కురుతే లోకస్తదనువర్తతే' శ్లోకంలో చెప్పింది కదా! మన నేతాశ్రీలకు గీతలు, రామాయణాలు చదివే పాటి తీరిక ఉండదు.  కాబట్టే  చట్టాలు చేసిన తమ చేతులతోనే ఆ చట్టాలను నిర్భయంగా చట్టుబండలు చేసేస్తున్నారు! భారీ సభలు రోడ్డు కడ్డంగా పెట్టి చెవులు దిబ్బళ్లుపడేలా నినాదాలు చేయించే నాయకులను నుంచి సామాన్యుడేం నేర్చుకోవచ్చు? డ్యూటీలో ఉండే ఉద్యోగులను తిట్టడం, కొట్టడం మాత్రమే నాయకత్వానికి ముఖ్య ల్క్షణంగా భావించే నేతలున్న దేశంలో  పౌరుడు మంచి మార్గాన్ని ఏ మూల నుంచి ఎంచుకోవాలి?

పర్యవసానం ఏదైనా కానీ, చివరికి ఇవాళ మొత్తంగా పడకేసింది సామాజిక ఆరోగ్యం.. దానికి ఏ ఆసుపత్రుల్లో పడక దొరకని దుస్థితి. ఊపిరాడని పరిశుభ్రత.. దానికీ ఆక్సిజన్ కరువంటున్న అస్తవ్యస్త వ్యవస్థ పరిస్థితి!  

 

-కర్లపాలెం హనుమతరావు

25 -04 -2021

గొరిల్లా గుండె బాదుడు చప్పుళ్లు -కర్లపాలెం హనుమంతరావు

 

భావికాలజ్ఞానాన్ని ఇంగ్లీషులో చెబితే వీజీగా అర్థమవుతుందనుకుంటే ‘విజన్’  అనుకోండి.. సర్దుకుపోవచ్చు. ఇదివరకు  జరిగిన సంగతులను ఇప్పటికీ గుర్తుంచుకుని  వాటి అనుభవాలు పాఠాలుగా భవిష్యత్ అవసరాలకు తగ్గట్లు ఇప్పటి నడత మార్చుకునే పద్ధతి. బుద్ధిమంతులు చేసే దిద్దుబాటు చర్య.

టు ఎర్ ఈజ్ హ్యూమన్– అన్నారు కదా అని పద్దాకా తప్పులు జరిగినా ఇబ్బందే. సరిదిద్ద రాని పొరపాట్లు జరిగితే చరిత్ర  చెడుగా గుర్తుంచుకుంటుంది. కాలానికి ఎవరి మీదా ప్రత్యేకంగా  గౌరవం ఉండదు.

 

జరగబోయే ఘటనల గురించి అందరికీ ఒకే తీరున సంకేతాలందడం రివాజు. అర్థమయిన బుద్ధిజీవులు పద్ధతి మార్చుకుని కాలం మీద తమ ముద్ర వేస్తారు. అర్థంకాని బుద్ధిహీనులు అట్లాగే అనామకంగా కాలగర్భంలో కలిసిపోతారు. 

 

భావికాల జ్ఞానలేమి కలిగించే నష్టం ఏ రేంజిలో ఉంటుందో చెప్పేందుకు  అడాల్ఫ్ హిట్లర్ చరిత్ర ఓ పాఠం. తమను తాము స్థాయి మించి  ప్రేమించుకునే ఆ నియంత వంటి వాళ్లకు హితవు చెప్పేవాళ్ళు ఎంత సన్నిహితులైనా సరే  శత్రువులయిపోతారు. గిట్టనివాళ్ల మీద కక్షతో కొంతమంది దుష్ప్రర్తనకు తెగబడితే, సంభవం కాని లక్ష్యాలు పెట్టుకుని సమకాలీన పరిణామాల పట్ల శ్రద్ధ పెట్టనితనం వల్ల మరికొంత మంది అల్లరిపాలవుతారు.   ఈ రెండు రకాల పాలకులనూ మనం సమకాలీన వ్యవస్థలోనే గమనించవచ్చు.

 

హిట్లరు మనసులో నిరంతరం ఒకటే ఊహ తిరుగుతుండేది.  ప్రపంచం ఓ ముద్దయితే.. అది తన అంగిట్లో మాత్రమే పడవలసిన ఖాద్యపదార్థమని. అతగాడి భావిజ్ఞాన  లేమి ప్రపంచానికి తెచ్చిపెట్టిన మొదటి ప్రపంచ యుద్ధ వినాశనం అందరికీ తెసిసిందే. అసంభవమైన ఆ లక్ష్యం సాధించే ప్రక్రియలో సమకాలీన సమాజం ప్రదర్శించే  పరిణామాల పట్ల  అలక్ష్యమే హిట్లర్ సర్వనాశనానికి ప్రధాన కారణం. మనిషి నైజంలోని ఈ తరహా కనిపించని గుడ్డితనం (inattentional blindness)  కొత్త శతాబ్దం మొదటి ఏడాదిలో ఒకానొక అమెరికన్ విశ్వవిద్యాలయ పరిశోధకులు ప్రపంచానికి ప్రదర్శించి చూపించారు. 

 

ఓ బాస్కెట్ బాల్ మ్యాచ్ ను  తెరపై చూపిస్తూ బంతి ఎన్ని సార్లు చేతులు మారిందో కచ్చితమైన లెక్క చెప్పాలని విద్యార్థులకు పోటీ పెట్టి,  ఆట మధ్యలో అప్పుడప్పుడూ ఓ గొరిల్లా  కన్రెప్పపాటు సమయంలో  గుండెలు బాదుకునే దృశ్యం కూడా ప్రదర్శించారు. బంతి చేతులు మారడం మీద మాత్రమే ధ్యాస పెట్టిన చాలా మంది  విద్యార్థులకు గొరిల్లా గుండెలు బాదుకునే దృశ్యమే దృష్టిపథంలోకి రాలేదు. 

 

వాస్తవ ప్రపంచంలో ఈ తరహా పొరపాటు చేసినందు వల్లనే మోటరోలా సెల్ ఫోన్స్ కంపెనీ ఖాతాదారుల మార్కెట్ ని చేజేతులా నోకియాకు  జారవిడుచుకుంది.  ధ్యాసంతా అప్పటికి ఉన్న ఖాతాదారులను సంతృప్తి పరచడం మీద మాత్రమే  లగ్నం చేయడంతో ఖాతాదారుల్లోని 'గొరిల్లా గుండె బాదుడు చప్పుళ్ళు' గమనించే అవకాశం లేకుండాపోయింది. నోకియాదీ అదే మిస్టేక్.  సాంకేతిక నైపుణ్యాల పరంగా కూడా భావి కాలంలో జరగబోయే పెనుమార్పులను  ఊహించాలన్న జ్ఞానం లేకపోవడంతో మార్కెట్ ఆనేక చిన్న ధారాదత్తం చేసింది.

 

ఇక చరిత్రలోకి తొంగి చూస్తే ఇట్లాంటి ఉదాహరణలు  ఎన్నైనా చెప్పుకోవచ్చు. క్రీ.శ 1217 ప్రాంతంలో సమర్ఖండ్ లోని ప్రాంతాలెన్నింటినో కైవసం చేసుకున్న అల్లావుద్దీన్-2 ప్రపంచం తనని 'బాద్ షా'గా గుర్తించాలని ఆశపడ్డాడు. బాగ్దాద్ అధినేత ఖలీఫా ససేమిరా అనేసరికి అల్లావుద్దీన్ అహం దెబ్బ తినేసింది. ఆ కక్ష కడుపులో పెట్టుకుని వాణిజ్య సంబంధాల కోసం పదే పదే ప్రయత్నించిన చెంగిజ్ ఖాన్ ను ఎన్నో సార్లు అవమానించాడు అల్లావుద్దీన్. అక్కడికీ డిప్లొమసీ బాగా వంటబట్టిన  చెంగిజ్ ఖాన్ అవమానలన్నిటినీ దిగమింగుకుని రాయబేరానికో ముగ్గురు మధ్యవర్తులను పంపిస్తే, భవిష్యత్తులో ఏం జరగనుందో ఊహించలేని అల్లావుద్దీన్  ఆ ముగ్గురినీ రాజనీతికి విరుద్ధంగా ఉరితీయించాడు. సహనం కోల్పోయిన చెంగిజ్ ఖాన్ అల్లావుద్దీన్ స్వాధీనంలోని నగరాలెన్నిటినో నేల మట్టం చేసిందాకా నిద్రపోనేలేదు. 

 

పాలకుల వ్యక్తిగత అహంకారానికి లక్షలాది మంది అమాయకుల ప్రాణాలు ఆ విధంగా బలికావడం చూసిన తరువాతా  భవిష్యత్తులో జరగబోయే పరిణామాలను ఊహించకుండా పగ, ప్రతీకారం తీర్చుకోవడమే ప్రధానమనుకుంటే పాలకులకు ఏ గతి పడుతుందో పాఠాల్లా నేర్పేటందుకు బోలెడన్ని సంఘటనలు ఇట్లాంటివే చరిత్ర నిండా కనిపిస్తాయ్!

 

కనిపించని గుడ్డితనం (భావికాలజ్ఞాన లేమి)తో బాధపడే పాలకులు.. ఎవరూ ఏమీ చేయలేరు అనే అహంకారం పెంచుకోవడం పొరపాటు. మారిన కాలంలో ప్రజాస్వామ్యం వ్యవస్థ అధికార మార్పిడి అంతిమ శక్తి సామాన్యుడి చేతిలో పెట్టిన తరువాతా రాజరికాలలో మాదిరి ఇష్టారాజ్యంగా పాలకులు ప్రవర్తిస్తే హిట్లర్ కు,    అల్లావుద్దీన్-2 లకు పట్టిన గతే పట్టడం ఖాయం.

 

పాలకుడు అనేవాడు ప్రజలలో కనిపించకుండా నిరంతరం సాగే

'గొరిల్లా గుండె బాదుడు చప్పుళ్లు' తప్పకుండా వింటుండాల్సిందే!

-కర్లపాలెం హనుమంతరావు

-24 -04 -2021

 

మారని తలరాతలు- ఈనాడు – వ్యంగ్యం - కర్లపాలెం హనుమంతరావు

 

 

మా నేత మారాడ్రా!

నమ్మచ్చా!

నిజవైఁ న పరివర్తనకు ఇరవైనాలుగ్గంటలే ఎక్కువ

మరి.. పూటగడవక ముందే నిండు సభలో ఈ గజడదబలు.. ?

అర్థం కాలా!

గ- అంటే గలభా. జ- అంటే జగడం. డ- అంటే డబ్బా కొట్టింగ్. ద- అంటే దబదబా బల్లల చరుపులు. ఇహ ‘బ’ అంటే..

బడబడా వాగడమేగా!  నీలాగా.. ఇలాగా! తెలీకడుగుతా! మేం మారడం అంత అబ్బురమా.. అపురూపమా? ఒపీనియన్ అంటే  వంటి మీది బనియన్ వంటిదే గదరా శుంఠా! అమావాస్యకో పౌర్ణానికో ఓ సారన్నా అది మారకపొతే బాడీ కుళ్లు కంపు కొట్టదా? ఊసరవెళ్ళి సృష్టి రహస్యమేంటంటావ్? మా పాలిటిక్సోళ్లకు పాఠాలు నేర్పే పంతులు.! క్షణానికో రంగది మార్చేదే రాజకీయాలోళ్లని చూసి నేర్చుకోమని. అయినా మార్పూ మంచిదే.. చంద్రుడి మీది మరకలాగా!

ఆ మారేదేదో అసతోమా సత్ గమయా.. మోడల్లో  ఉండాలి భయ్యా! వెల్తుర్నుంచి మరింత అంధకారంలోకి తోసే మార్పూ మార్పేనా? గతంలో రష్యా మారింది జార్ చక్రవర్తుల నియంతృత్వ పెత్తనం నుంచి. చైనా మారింది పీడించే రాజుల చీనా నుంచి ప్రజల చీనాగా! నిన్న గాక మొన్న నేపాల్ మారింది! మెడ్రాస్ చెన్నైగా, బొంబాయ్ ముంబాయ్ గా.. ఇట్లా ఎన్ని మారడంలా?

 'ఛేంజ్' స్లోగన్ ఒబామాను ఏ రేంజ్ కు ఎగరేసిందో అది చెప్పూ!

ఓ బాబు మాడు మొహం మీద చిర్నవ్వు పులుముకుంటే, మరో  సాబు మార్పనే ముక్క పట్టుకుని పార్టీ పెట్టుంటే .. ఏంటంట బెనిఫిట్ ప్రజానీకానికి? ఇప్పుడదే ‘మార్పు’  వంక పెట్టుకునేసి గోడలు దూకేస్తున్నారు బడా బడా ప్రజాప్రతినిధులు చెడామడా! జనం నమ్మి ఓటిచ్చి చట్టసభకు పమ్మించిన రంగుల్ను కూడా మార్చేసుకుని! హుఁ..

నీ కుళ్ళేడుపులకేంలే! ఈ పుల్లిరిపు మాటలు లోకాన్నే మాత్రం మార్చకుండా అపలేవబ్బీ! రూపాయిక్కిలో బియ్యం దొరుకుతుందిప్పుడు. అయినా దెప్పుళ్లే!ఆ మార్పు  కనిపించదు నీకు!

కందిపప్పూ రోజుకో రకంగా మారుతోందిగా. మరి దాం సంగతో? 'సత్యాలు' మారిపోతున్నాయ్. నిందితులే అప్రూవర్లుగా మారిపోతున్నారు. ఆసుపత్రుల్లో బిడ్డల మార్పేమన్నా ఆగుతుందా? కిడ్నీల దొంగ మార్పిడో? ఇప్పుడదే ఓ పేద్ధ  కార్పొరేటెడ్ వ్యాపారం! మీ పెద్దాయన చెప్పాడని పెద్ద పెద్ద అధికారులే మారిపోతున్నార్..

 

కూల్.. కూల్! నీ ఎనుగు జ్ఞాపక శక్తి కూలా! ఎప్పటి మార్పుల్నో మనసులో పెట్టుకుని మమ్మల్నిప్పుడు దులపరించడవాఁ? మా హయాం మార్పుల్ని గూర్చి కొద్దిగా మెచ్చుకోలు మాటలైనా ఊడిపడవు కాబోలు! కొత్త నోట్లను తెచ్చాం పాత నోట్ల చోట్లో. ఆయోగ్ సంస్థల్లాంటివి కొత్తవి కట్టుకుపోయేటన్ని నెత్తికి తెచ్చిపెట్టాం..! బ్యాంకుల్లో మార్పులు.. చట్టాల్లో మార్పులు.. అసలు చట్టాలు చెయ్యడంలోనే మౌలికంగా మార్పులు! మనసుండి చావాలే గానీ  మేం తెచ్చిన మార్పులు మూల మూలలా కనిపిస్తానే ఉంటాయ్!

ఎందుక్కనిపించడం లేదన్నా! నోట్లు రద్దయినా దొంగనోట్లు  మారుతూనే ఉన్నాయించక్కా ఇప్పటికీనూ! ధరలు రోజుకో రకంగా మారే కథిహ సరే సరేనూ! ఓటర్ల జాబితాలో పేర్లు అదేంటో తమాషాగా తెల్లారేసరికల్లా మారుతూనే ఉంటయ్! ఇసుక బంగారంగా మారుతున్న కతలు ఇహ విసుగూ విరామం లేకుండా నడుస్తూనే ఉండె!

పుటం పెట్టినా నీ వెటకారపు ధోరణి మారదురా బాబో! నీ కోసం కాకపోయినా జనాల్ని మా వేపుకు మార్చుకునేందుకు చెబుతున్నా! మార్పనేదే లేకపోతే మనిషింకా నీకు మల్లేనే కోతిలా గెంతుతూనే ఉండేవాడిప్పడికీ. బోయ వాల్మీకిగా మారకపోయుంటే మనకు రామాయణమనే ఉద్గ్రంధం  రాజకీయాలు చేసుకునేందుకు దొరికేదేనా! విభీషణు రాములోరి పక్షం మారడమే రావణాసురుడి అంతానికి అసలు కారణం. మారడం చేతరాకే హరిశ్చంద్రుడు కూడా మీ బాబోరికి మల్లే అష్టకష్టాలు పడింది.. పెట్టింది.

మాట మాటకూ మాట మార్చే రావుల  సంగచ్చెప్పూ! మేం మెదలకుండా ఊరుకునుంటే.. ఇహ  సాధువేషంలో దూరబట్టే రావణాసురుడికా సీతమ్మ తల్లి సులువుగా దొరికిందని బుకాయించను కూడా బుకయిస్తావ్! అర్థిక మాంద్యం వల్ల జనాలు ఉద్యోగాలు మారుతున్నారు. ఆ సంగతి మరి మిరు నోరెత్తి బైటకు చెప్పరు.  మైకేల్ జాక్సన్లు వంటి రంగు మర్చుకుంటేనో, వాస్తు ప్రకారం వంటింటి ఫ్లాట్ ఫాం దిశ మార్చుకుంటేనో సామాన్య జనానికి వరిగి వళ్లో పడేదేముందంట? నీ వీలును బట్టి సెక్సు మార్చుకోడానికి, పాత్రను బట్టి బాడీ షేపు మార్చడానికీనా రాజకీయాలలోకే రావడం! వందేమాతరం వరస మారిందనో, అమెరికా రిటనోడి యాస మారిందనో వంక బెట్టి నీ సొంత లాభం కోసం మారడమే ప్రజాప్రతినిధిగా జనానికి నువ్వు చేసే అతిపెద్ద ద్రోహం.

 

నీ ముసుగులో గుద్దులాట చూస్తుంటే ముద్దేస్తుందబ్బీ! మా నేత దినదినం గొప్పవాడిగా మార్పు చెందడం చూళ్లేకే ఈ కుళ్లు ఏడుపులన్నీ.. ‘మార్పు’ను అడ్డమేసుకుని'

 

'నీ గొప్ప నీ దగ్గరే ఉంచుకోఅన్నాయ్.. నాకు నో అబ్జెక్షన్. సముద్రం గొప్పదైతే ఎవరికిరా గ్రేట్? నీళ్లు ఉప్పన. గడ్డిపోచనైనా తనలో నిలకడగా ఉండనీయదు. జీవంతో లోపలికి లాగేసుకోడం.. నిర్జీవంగా ఒడ్డుకు విసిరేసేఎయ్యడం.  గుక్కెడు తాగే మంచితీర్థ మిచ్చే బావి కోసమే జనమెప్పుడైనా అలమటించేది. 'జనంతో మంచి సంబంధాలుంటే నడకలో, నడతలో వినయం .. విని సవరించుకొనే మంచి గుణం, మాటల్లో మార్దవం  ఉంటాయి' అని ఉపన్యాసాలు దంచాడుగా  మరి మన అధినేత!.. మరిప్పుడు..

నిన్నింకా మా పార్టీ వేపుకు మార్చుకునే ట్రయల్స్ శుద్ధ వేస్ట్. నువ్వు మారవురా బాబో! మన టీ.వీ సీరియల్స్, సినిమా కతలు, రోడ్ల బాపతే..

‘జనం తలరాత’ అని మాత్రం అని అనవు కదా! మరి మారంది మీరా.. మేమా? హ్హా.. హ్హా..హ్హా!

-కర్లపాలెం హనుమంతరావు

(ఈనాడు దినపత్రిక సంపాదకీయ పుట 01 -08 -2009 - 'మారేవి.. మారనివి' శీర్షిక పేరుతో ప్రచురితం)

 

 

 

 

 

 

 

 

 

శ్రమకు తగ్గ ఫలం - వ్యంగ్యం ఈనాడు -కర్లపాలెం హనుమంతరావు

 

ప్రపంచంలోనే అతి పెద్ద ప్రజాస్వామ్యం. దేశంలోనీ నూట పాతిక పై చిలుకు కోట్ల జనాభాకు ముష్టి ఏడొందల తొంభై మూడు మంది మాత్రమేనా ప్రతినిధులం! మా కన్నా తక్కువ స్థాయి పనోళ్లకి మాకు మించిన జీతభత్తేలా? మా గౌరవనీయులైన ప్రజాప్రతినిధుల  మానమర్యాదలు నిలబందుకైనా  వాళ్ల కన్నా కనీసం ఓ రూపాయన్నా ఎక్కువ జీతంగా దక్కాల్సిందే! .. ఎవరు బాబూ నువ్వు? ఎందుకు నీకా నవ్వు?

గుర్తుపట్టవులే? నీ అంతరాత్మను కద! ఎన్నికల సంఘానికి నువ్వు సమర్పించిన దొంగలెక్కల ప్రకారం చూసుకున్నా.. నీ ఒక్క పూట ఆదాయం .. ఈ దేశంలోని తెల్లకార్డువాడి ఏడాదాయనికి వందరెట్లెక్కువ! అందుకే నవ్వాగలా! ఫ్రీ బంగళా, ఉచితంగా ఫోన్ కాల్సు, నియోజకవర్గంలో తిరిగినా తిరక్కున్నా మీరు ఆఫీసు సాదర ఖర్చులకన్చెప్పి  ఏవేవో బిల్లులు పుట్టించి ఇంకెంత బొక్కుతున్నారో..  కాగ్ వాడికే నోరాడని పరిస్థితి. ఇహ విమాన ప్రయాణాలని, రైల్లో బంధుబలగానిక్కూడా ఫస్ట్ క్లాస్ సదుపాయాలని.. అవీ ఇవీ మీరు నొక్కేవన్నీ చూపిస్తూ సర్కారు బొక్కసానికి ఏటా ఎంతో కొంత బొక్కేస్తూనే ఉంటివి! ఇంకా చాల్చావడం లేదంటూ తెల్లారంగానే ఈ కొత్త ఆగమేంటి సోదరా? ఈ కరవు, కరోనాల కష్టకాలంలో  అసలు నీకు దక్కుతున్నదే ఎక్కువని లెక్కలు చెబుతున్నాయ్! మన్లో మన మాట.. అసలుకి మీకు జీతభత్యాలెందుకు  పెంచాలి? ఒక్క కారణం చెప్పు.. నవ్వకుండా నోరు మూసుకుంటా!

ఒక్కటి కాదు.. వంద చెబుతా.. వినే ఓపిక మరి తగ్గకుండా ఉండాలి నీకే! ఈ ప్రజాప్రతినిధి వృత్తిలోకి రాక మునుపు నా సంపాదన ఎంతో నీకూ తెలుసని నాకూ తెలుసు.  మామూళ్లు, సెటిల్మెంట్లు, రింగులు గట్రా నేరుగా చేసుకునే సౌకర్యం గతంలోలా ఇప్పుడుండదుగా మరి! పనోళ్లకు సిమెంటు ఫ్యాక్టరీలున్నా పట్టించుకోని పబ్లిక్.. అదేంటో మేం ఇసుమంత ఇసుక దందాకు ప్రలోభ పడ్డా.. అదేందో మహా విసుగుదల చూపిస్తూంది! కాబట్టే ప్రభుత్వ వైద్యులకు మల్లే మాకూ నాన్ ప్రాక్టీస్ ఎలవన్సులాంటిదేదైనా భారీగా ఉండాలని డిమాండ్. ఏం తప్పా?

పాయింటేనబ్బీ!

చేంతాడంత మా ఆదాయాల లిస్టు చదవడమే నీకింట్రెస్టు.  మా ఖర్చుల పట్టికేనేడన్నా  పట్టించుకున్నావా అన్నా?  సర్కారు మార్కు ముష్టి ముగ్గురు సెక్యూరిటీ మా అక్కరకేం సరిపోతుంది చెప్పు! కాలు బైటపెడితే ఎంత హంగూ ఆర్భాటం  కావాలి గౌరవనీయులైన ప్రజాప్రతినిధులన్న తరువాత! పెట్రోలు రేట్లు రేకెట్ల వేగంతో పోటీ పడుతున్నట్లు పబ్లిక్కే పడతిడుక్కుంటుంటిరి. సెక్యూరిటీలో ఒక్కోరికేమన్నా రెడ్ ఫెరారే కారేమన్నా కోరుకున్నామా? అక్కడికీ,  ప్రయివేట్ సైన్యం పాట్లేవో సొంతంగానే పడుతుంటిమిప్పడి దాకా! బుల్లెట్ ఫ్రూఫ్ కార్లు, బాంబులు, బుల్లెట్లకయ్యే ఖర్చులు ఎంతని అచ్చుకోము సామీ ఈ కరవుకాలంలో! అన్నీ బైటికి చెప్పుకునే ఖర్చులే ఉంటాయా చెప్పు ప్రజా ప్రాతినిథ్యమనే తద్దినానికి తయారైం తరువాత. ఎన్నికల ప్రహసానాల మర్మం నీకూ  తెలుసు. ఎన్నెన్ని రకాల వత్తిళ్లయితే 'బూత్ గండాల' నుండి బైట పడ్డం!

 

నిజవేఁ! ఇది వరకు మాదిరి ఏదో ఓ సందు చూసుకొని సర్కారు భూముల మీద జెండాలు పాతేసే సీన్లు .. పాపం  సన్నిగిల్లాలాయ మీ ప్రజాప్రతినిధుల కిప్పుడు! దేవుడి సొమ్ము దేవుడికే తెలీకుండా మాయమైపోతుండె! ఇహ మీ వాటా కొచ్చే దెంత..  చిటికెడు బూడిద.. సింగిల్ చెవిలో పూవు!

 

ప్రభుత్వాలేమన్నా స్థిరంగా ఉండుంటే, ఆ నిబ్బరం  వేరు .. మన వాటా మన పరమయిందాకా, ఏ కేంటీంలో చాయ్ తాగుతూనో, లాబీల్లో కులాసా చేస్తూనో గడిపేయచ్చు. ఎప్పుడు ఏ బిల్లు మోషన్ కొచ్చి కొంప ముంచుతుందో.. కాల్ సెంటర్ గార్ల్ కన్నా మెలుకువ తప్పనిసరయిందిప్పటి ప్రజాప్రతినిధికి. మరి  ఆ మేరకైనా జీతభత్యాలలో మాకు  మెరకా పల్లం సరిచేయాల్నా వద్దా? లాభదాయక పదవుల్లో ఉండద్దని రూలు పెట్టగానే సరా!  ఆ వారా మాకు జరిగే నష్టం పరిహరించే  లెక్కలు  మాత్రం  చూసుకోవాలా.. లేదా? ఆ  లెక్కన చూసుకుంటే మేమిప్పుడు అడిగే  ఐదురెట్ల హెచ్చింపు పులుసులో ముక్క. అదేందో! ప్రజాప్రతినిధి అంతరాత్మవయి వుండీ పద్దాకా జనం తర్ఫున  పీకులాడే రోగం నీకు!  బొత్తిగా అప్రజాస్వామికం నీ వ్యవహారం!

 

సారీ బ్రో! నువ్వింతగా ఒప్పించిం తరువాత కూడా   మైండ్ సెట్ మారకపోతే నేనీ పోస్టుకే వేస్ట్.  మీ జీతభత్యాల పెంపు ఐదేంటీ.. ఇంకో అయిదు రెట్లు ఎక్కువున్నా  తక్కువే సుమా!

 

థేంక్స్ అంతరాత్మా! ఇప్పడికైనా దార్లో  పడ్డావ్!

 

కానైతే నాదీ ఓ చిన్న విన్నపం బ్రదర్! జీతానికి తగ్గట్లు పనీ పాటా ఉండటం సహజన్యాయం. అరవై ఏళ్ల కిందట ఏటా అరవై ఎనిమిది బిల్లులు పాసయేవి చట్టసభల్లో. ఇప్పుడో?   సంవత్సరానికి యాబై ఆమోదమయేందుకే అస్సులు.. బుస్సులు! అవీ చర్చలేవీ లేకుండానే చట్టాలైపోయే పరిస్థితులు! చట్టసభల్లో మీ ప్రజాప్రతినిధుల హాజరు మరీ చిన్నబళ్లల్లో బుడతల హాజరు కన్నా హీనంగా ఉందని జనం బెంగ.

 

అయితే ఏంటంటావ్?

 

ఎకౌంటబలిటీనే బట్టే ఎక్కౌంట్స్   సరిచేయాలంటాను. గంటకు ఇంతని హాజరు భత్యం  ఉండాలి. హాజరుపట్టీ ప్రకారమే జీతాల పట్టి తయారవ్వాలి. వాకౌట్ చేసిన రోజున  జీతం మొత్తం కట్! సభాపతి లేకుండా మాట్లాడిన పక్షంలో పదానికింతని పెనాల్టీ విధించాలి. మార్షల్స్ బలవంతంగా మోసుకుపోయే సందర్భాలలో  కిలోకింతని బాడీ బరువును బట్టి రుసుం విధించడం అవసరం. ఫలహారశాలల్లో  అనుమతి మేరకు లాగించడం వరకు ఓకే.  అదనపు మేతకు మాత్రం అధికంగా వసూలుచేసి తీరాలి. రాజకీయాల్లోకి రాక ముందూ.. వచ్చిం తరువాత ఉండే ఆదాయాలలోని వ్యత్యాసాన్ని బట్టి శిస్తులు వసూలు చేసే కొత్త విధానం తీసుకొస్తే మీ ప్రజాప్రతినిథుల నెలసరి జీతభత్యాలు ఎనిమిది లక్షలేంటి.. పద్దెనిమిది లక్షల మీద ఒక్క రూపాయి పెంచుకున్నా ఆక్షేపించేందుకు లేదు.  దట్సిట్!

 

సడి! నీ లెక్కన ఇక మాకంటూ మిగిలేదేముంది.. ఆ ఒఖ్క రూపాయి తప్ప!

 

-కర్లపాలెం హనుమంతరావు

(ఈనాడు సంపాదకీయ పుట వ్యంగ్యం - తారీఖు నమోదు కాలేదు)

 

 

 

 

 

 

 

 

 

 

!

 

 

 

 

 

 

శ్రీరాములవారికి సాయము కావలెనా?-ఈనాడు వ్యంగ్యం – -కర్లపాలెం హనుమంతరావు (ఈనాడు దినపత్రిక సంపాదకీయ పుట వ్యంగ్యం 28 -04 -2008)

 

 

'వనవాసానంతరం శ్రీరామచంద్రుని పట్టాభిషేకం అట్టహాసంగా జరుగుతోంది. అటూ ఇటూ తమ్ముళ్లు, వెనక వాలి కొడుకు, పక్కన సీతమ్మ, పాదాల చెంత హనుమంతయ్య- రవివర్మ బొమ్మంత అందంగా ఉన్న ఆ వింతను చూసి అంతా ఆనందిస్తూంటే, అసుంటా దూరంగా నిలబడ్డ సౌమిత్రి మాత్రం ఈ వంకో సారి చూసి వింతగా నవ్వుకున్నాడో రెప్పపాటు..

'ఎందుకు తాతయ్యా?' అనడిగాడు చిన్నా.

'చెబ్తా! ముందీ 'డాండ డడాండ డాండ..' పద్యం అప్పచెప్పు!' అన్నాడు రాంకోటి బాబాయ్.

ఆయనో రిటిర్డ్ తెలుగు టీచర్. ఇంట్లో మనవడికి రామాయణం చెబుతున్నాడు గాని, బైటెంత భారతం జరుగుతోందో ఆ పెద్దాయనకు తెలీదు.

'నాసావాళ్లు ఆకాశం నుంచి తీసిన ఈ ఫొటోలు చుశావా బాబాయ్.. అసలు రామసేతువనేదే లేదంటున్నారే!'అని రెచ్చగొట్టా.

'నీరజాక్షి కొరకై నీరథి దాటిన నీ కీర్తిని విన్నానురా' అన్నాడు గదరా త్యాగయ్య. మరి వారధి లేకపోవడమేంటీ! వెధవ డౌట్లు!'

'విన్నాను అన్నాడు గానీ కన్నాను అన్లేదుగా! ఆ కట్ట.. మనుషులు మట్టి పోసి కట్టిందని పురావస్తు సర్వే జనాల పరిశోధనల్లో కూడా తేలింది బాబాయ్!'

'ఆ సర్వే జనాలెవరో కానీ సుఖినోభవన్తు. మనుషుల కట్టయివుంటే మన పంజగుట్ట ఫ్లై ఓవర్లా ఎప్పుడో కూలుండేవి గదరా! దైవ నిర్మితం. కాబట్టే పర్మినెంటుగా అట్లా పడుంది పిచ్చోడా! 'కదలేవాడు రాముడు గాడే' అన్నాడు త్యాగయ్య. రామయ్యే ఆ గాడ్.. ముందది తెలుసుకో!'

'రాముడేంఈ గాడ్ కాడు.. హి వాజ్ జస్ట్ అ రూలర్ అంటున్నారు బాబాయ్.. ఇంకా ఆ వార్తున్న పేపరు చదివే దాకా నువ్వొచ్చినట్లు లేదు'

''రామ.. రామ! పరంధాముడే పురుషోత్తముళ్లా అవతరించాడ్రా బడుద్ధాయ్! మీకర్థమై అఘోరించినట్లు లేదు'

చిన్నాగాడు ఊరుకుంటాడా!చిచ్చర పిడుగు! మధ్యలో దూరిపోయి 'తాతయ్యా! మరి రావుఁ డు దేవుఁ డైతే అన్ని సినిమా కష్టాలెందుకు పడ్డం! ఈ అంకుల్సంతా 'ఉన్నావా.. అసలున్నావా' అని అక్కినేని తాతయ్యలా నిలదీస్తుంటే నీ పూజ గది నుంచి బైటికొచ్చి వీళ్ల బ్యాండ్ బజాయించెయ్యచ్చు గదా బాగా?'

'భడవాఖానా! ఆ పుణ్యమూర్తేమన్నా ఫ్రీడం ఫైటర్రా? పింఛన్ కాసుల కోసం ఇంకా బతికే ఉన్నట్లు పత్రాలు పుట్టించుకు తిరగడానికి? ప్చ్! బొత్తిగా లౌక్యమెరగని దేవుడయిపోయాడు! వారధి శంకుస్థాపన్నాడన్నా ఓ రాయి శిలాఫలకంలా పాతించేసుంటే ఇప్పుడిన్ని శంకలకు ఆస్కారం ఉండేదే కాదు. కనీసం ఇందిరమ్మలా పథకాలన్నిటికీ తన నామధేయం పెట్టించుకునుంటే సరిపోయుడేది.. ఈ చిరునామాలవీ నిరూపించుకునే తల్నొప్పులు తప్పుండేవి! నాలుగైదు కాలనాళికలు ఏ రామేశ్వరం, భద్రాద్రిల్లోనో పాతేసుంటే 'ఉన్నాడో .. లేడో భద్రాద్రి యందు' అంటూ అస్తమానం ఆ రాందాసుకు తాతలాగా సందేహపడేవాళ్లందరికీ సమాధానం దొరికేది. రావణాసురుడే బెటర్రా బుజ్జిగా! మనోల మందమనస్తత్వం ముందే తెలిసి తన వారసుల్ను సందు సందునా వదిలిపోయాడు. ఇప్పుడీ పిచ్చ రచ్చంతా ఆ రావణాసురుడి వారసుల అల్లరే! ఏ గామా కంపెనీకో లాభాలార్జించే దొడ్డి దారి స్కామనుకో.. ఈ నసంతా!'

'నువ్వు మరీ బాబాయ్! దారి కడ్డంగా పడున్న ఆ రాళ్ల గుట్టల్ని కొట్టేసేస్తే రవాణా సమయం ఆదా అవుతుంది కదా! దూర భారాలు తగ్గి ధనం, ఇంధనం కూడా మిగులుతుందంటున్నారు ఆర్థికవేత్తలు. అయినా. లేని రాముడు కట్టని గుడిని కొట్టేస్తే నీకేం కష్టాలొచ్చిపడతాయో నా కర్థం కాడంలే బాబాయ్.. నువ్వూరికే రొష్టుపడ్డం తప్పించి'

'సునామీలొస్తే జనాలన్యాయంగా చస్తార్రా సన్నాసీ! జీవజాలం నశిస్తుంది. తీరప్రాంతం తలకిందులవుతుంది. ఉగ్రవాదులు ఈ వైపు నుంచి కూడా విరుచుకుపడతారు. పెట్టని కోటల్లాగున్న హిమాలయాలు అడ్డంగా ఉన్నాయని కూల్చేసి ప్లాట్లేసి అమ్ముకుంటామన్నట్లుందబ్బీ నీ పెడవాదన! దేవుళ్ల నివాసాలుండేవి అక్కడేరా!వాళ్లూరుకుంటార్రా! బోధివృక్షం వట్టి చెట్టేగా! మరి కొట్టేసి కట్టెల కింద అమ్ముకోమను చూద్దాం! దేహశుద్ధయిపోతుంది శుద్ధంగా. రావుఁడు లేడంటున్న రాక్షసులను ఇతర మతాల దేవుళ్ల జోలికి వెళ్లమను.. తాట తీస్తారు. తారక రామయ్యొక్కడేనట్రా ఈ తాటక వంశవారసులందరికీ తేరగా దొరికిందీ!' బాబాయ్ అంతెత్తున లేవడం అదే మొదటిసారి నాకు తెలిసి.

మూడ్ మార్చక తప్పేట్లు లేదు. 'చిన్నాగాడికి ఇందాకేదో పాఠం చెబుతుంటివిగా! సినిమా గుమ్మడి మాదిరి మూడీగా ఉండే లక్ష్మణస్వామికి అన్న పట్టాభిషేకం టైంలో అంత చేటున ఎందుకు నవ్వొచ్చినట్లో? చెప్పు బాబాయ్.. నాక్కూడా వినాలనుంది' అనడిగా,

'నేన్చెప్తానంకుల్!' అంటూ మధ్యలో దూరాడు చిన్నాగాడు. 'త్రేతాయుగం కాబట్టి ఈ రాముడికి రెండో సాటి దేవుదు లేడంటూ గడ కట్టి మరీ భేరికల్తో డాండ డడాండ డాండంటూ నినదాలు భూమ్యాకాశాలు దద్దరిల్లేటట్లు చేసుకోడమే గానీ, రాబోయే కలికాలంలో మత్త వేదండాలెక్కి మరీ 'అసలుకి దాశరథీ లేడు.. గీశరథీ లేడు; అతగాడు కట్టించినట్లు పుట్టించిన వారథులసలే లేవం'టూ ఇంతకు మించి గగ్గోళ్ళు బైల్దారతాయని వీళ్ళకెవళ్లకీ తెలీడంలేదు.. పాపం' అని ఆ వెటకారపు నవ్వు.! కదా తాతయ్యా?'

'ఎవర్రా అట్లా గగ్గోళ్లు పెట్టేదీ?' అగ్గిరావుఁడైపోయాడింకోసారి పెద్దాయన.

'ఇంకెవరూ? దక్షిణాన కరుణానిధి తరహా బ్యాచీ.. ఉత్తరాన.. '

'భడవా! బాగా ముదిరిపోయాడ్రా వీడూ.. ' అంటూ అడ్డొచ్చాడు అప్పుడే ఊడిపడ్డ వాడి డాడీ!

బెదిరి పెద్దాయన పూజగదిలోకి తారుకున్నాడు కొడుకు రాకతో.

'అయినా నాన్నకూ.. చిన్నాకూ ఈ వయస్సుల్లోనుట్రా ఈ రామకీయాలూ గట్రా?! ఒక కుంకకింకా బొడ్డూడనేలేదు. ఇంకోరికిక కింద పడ్డ పైగుడ్డ అందుకునే ఓపిక్స్ రాబోదు! అవతల రోడ్డు వైడెన్ కోసమని రామాలయాన్ని లేపేయాలని కోర్టుల్లో కేసేసినోళ్లే.. తీర్పు తమ వైపు రావాలని అదే గుళ్లో అర్చన చేయించేస్తున్నారు! దేశమంతా ఎంతంత తింగరోళ్లతో నిండుందో నీకు తెల్దా? రామకీయాలంటే.. అధికారం కోసం పొలిటికల్ పార్టీలోళ్ళు చేసుకునే రాజకీయాలు. మన ప్రజారాముళ్ల నా విషయంలో అప్రమత్తం చేయాల్సిందిపోయి.. ఇంట్లో ఏందిరా నువ్వూ ఈ పిచ్చి పిచ్చి టీవీ టైపు చర్చలు!' అంటూ నాకే పెట్టాడు ఇంత గడ్డి చివరకు మా అన్న.

నిజవేఁ! శ్రీరాములవారి సాయము కావలెను అని ప్రతి పనికి ముందు రాసుకునే మానవులం .. శ్రీరాములవారికి సాయంపోడానికి ఎంత సాహసం! శ్రీరాములవారికి మన సాయము కావలెనా? అనిపించింది నాకూ చివరకు.

-కర్లపాలెం హనుమంతరావు

(ఈనాడు దినపత్రిక సంపాదకీయ పుట వ్యంగ్యం 28 -04 -2008)