Showing posts with label sex. Show all posts
Showing posts with label sex. Show all posts

Monday, December 13, 2021

ఈనాడు - సంపాదకీయం శృంగార కళాశాల రచన- కర్లపాలెం హనుమంతరావు ( ఈనాడు - ప్రచురితం- 11-03-2012 )

ఈనాడు - సంపాదకీయం 

శృంగార కళాశాల 


రచన- కర్లపాలెం హనుమంతరావు 

( ఈనాడు - ప్రచురితం- 11-03-2012 ) 



సభ్యసమాజం దృష్టిలో శృంగారమంటే, నాలుగ్గోడల నడుమ మూడో కంటపడకుండా స్త్రీ పురుషులిద్దరి మధ్య మాత్రమే సాగే ముద్దుము చ్చట. శృంగారానికి అనువైన రసాయనిక తతంగం శారీరకంగా జరగ కపోతే ఎనభైనాలుగు లక్షల జీవకోటిలో ఒక్కటీ మిగలదు. ' బ్రహ్మ కును బ్రహ్మయైన నారాయణుండు/ మొదలుగా సర్వజీవ సమూహ మునకు/ బ్రప్రధానంబు శృంగార రసము గాదె' అంటారు పానుగం టివారు కంఠాభరణంలో. భరతుడి కోరికమీద కైశికీవృత్తి నాట్య ప్రయోగానికని శృంగారాంగనలను సృష్టించింది సాక్షాత్తు ఆ బ్రహ్మదే వుడే. తనకు ప్రదక్షిణ చేస్తున్న తిలోత్తమ అందచందాలు చూసి తల తిప్పుకోలేకే దక్షిణామూర్తి చతుర్ముఖుడయ్యాడని ఒక చమత్కారం. వేయికళ్లతో అనుక్షణం ఊర్వశివంటి అందాలరాశుల ఒంపుసొంపులు చూసే దేవేంద్రుడు సైతం అహల్యమీద కోరిక చంపుకోలేక తిప్పల పాలయ్యాడు! శ్రీరామచంద్రుడు సీతారమణుడు. గోదాదేవి కొప్పులో ముడిచి ఇచ్చిన పూలతో తప్ప అభిషేకాన్ని ఒప్పుకోలేదు శ్రీరంగనాథుడు . ముద్దుపళనివారి మాధవుడైతే రాధికాదేవి శృంగార యౌవన క్షీరాబ్ధి నడుమ 'నజుడొనర్చిన మోహన యంత్రము' లాగ ఎపుడెపుడు కలియతిరుగుదామా అని కలవరించాడు. శృంగారకేళిలో సంతృప్తి చెందితే యజ్ఞం చేసినంత పుణ్యం- అంటుంది బృహదారణ్యకోపని షత్తు. నూరేళ్లు సంసారం చేసినా ఏ పూటకాపూట మరో రోజుకు ఆగమని కండు మహాముని అంతటివాడే ప్రమోచను ప్రాధేయపడ్డాడు (విష్ణుపురాణం). సర్వసంగపరిత్యాగులనే అంతలా అల్లాడించిన ఉల్లాస  వ్యాసంగం మామూలు మానవుల కాలు నిలవనిస్తుందా!


ఛాందోగ్యోపనిషత్ పేర్కొన్న అష్టాదశ విద్యలలోని  దేవజన విద్యా విభాగంలో శృంగారం ఒక ప్రధాన అంగం. కరుణశ్రీ భావించినట్లు 'ఏ ప్రేమ మహిమచే ధారుణి చక్రము ఇరుసు లేకుండగనే తిరుగుచు న్నదో- ఆ మహాప్రేమకు ప్రేరణ శృంగారమే. నిగనిగని మోముపై నెరులు గెలకుల చెదర/ పగలైన దాక చెలి పవళించెను' అంటూ అన్న మయ్య అమ్మ శృంగార సౌందర్యాన్ని వర్ణించి తరిస్తే- 'మగువ తన కేశికా మందిరము వెడలే/ వగకాడ మా కంచి వరద తెలతెలవారెన నుచు' అంటూ క్షేత్రయ్య అయ్య సుమ సురతి బడలికలను తరచితరచి వర్ణించి తరించాడు. వివిధ దేవాలయాలమీద నేటికీ  కనిపించే మిథునశిల్పాలు ఒకనాటి తరానికి ఉద్దేశించిన కామశాస్త్ర కుడ్య పాఠాలు- అని తాపీ ధర్మారావు వంటి పరిశోధకుల వాదం. ఉత్తర భారతంలో హోలీ యువ సమూహాలు నేటికీ ఆడుకునే 'రంగుల క్రీడ' ఒకనాటి కామదేవుడి ఆరాధనోత్సవాల అవశేషమే. మొహంజొదారో తవ్వకాలలో  బయల్పడిన పుష్కరిణి సరస సల్లాపాల కోసం బ్రహ్మ కల్పించిన సరోవరమే అంటూ సశాస్త్రీయంగా రుజువు చేసిన డి.డి. కోశాంబివి వట్టి మాటలని కొట్టి పారేయలేం. శృంగారం బంగారం లాగా మెరుగులీనుతుంటేనే కదా ఏ యువజంటకైనా కళ!  పనిపాటలవేళ శ్రమ తెలియకుండా జానపదులు ఆలపించే పదాల నిండా శృంగార సుమ పరిమళాలు గుప్పుమంటుంటాయి. గోపికా స్త్రీల జలక్రీడలనుంచి గోంగూర పాటలదాకా- జీవితం ఎంత వైవిధ్యమో జానపదుల లొల్లాయి పలుకులూ అంత వైవిధ్యమంటారు డాక్టర్ బిరుదురాజు రామరాజు. సరస రసానికి దేశ కాలాలు ఏముంటాయి?  'మనసు' పుట్టినప్పుడే మనిషికి 'మనసు పుట్టడం' మొదలయింది .


శేషం వెంకటపతి- ' శశాంక విజయం'లో తర్క, శబ్ద, యోగ, సాంఖ్య, మోక్ష, ద్వైత, అద్వైత సిద్ధాంతాలన్నింటినీ కామకళకు జోడించి కనువిందు చేశాడు. 'ఏను నీవని పైకొనుటేను ద్వైతం- ఇరువురొకటైన అద్వైతమిద్ధరిత్రి' అంటూ సిద్ధాంతీకరిస్తే ఎంతటి సిద్ధులకైనా తొలినాటి ముద్దుముచ్చట్లు మదిలో మెదిలి పులకింతలు పుట్టక మానవు . మదన భావమంటే అంత తీపి బాధ మరి! నండూరివారి నాయుడుబావ మధనపడిపో యినట్లు- 'మందో మాకో యెట్టి మరిగించినట్లుంటుందా ఇది. గుండె గొంతుకలో కొట్లాడుతుంటే... వల్లకుందామంటే... గౌరీవల్లభుడి వల్లే కాలేదు మరి . కొనకళ్లవారి 'బంగారి' భామ- 'దారంటపోయే మామ కాలిధూళిగా  మారి రాలిపోయినా చాలు బతుకు పండిపోతుంది' అనుకుం టుంది. వలపు పెంకితనానికి యెంకి, నాయుడుబావ అనే భేదభావ మేమిటి? పానుగంటివారు చూడామణిలో చెప్పినట్లు ' ప్రకృతి నెట జూడు శృంగార రసమె, సర్వ/ సృష్టికి బ్రధాన సూత్రము' సరస రసమే! మొదటి కుళోత్తుంగుడు యుద్ధరంగంలో అంతఃపుర చెలులు నిద్రలో అతడి చిలిపి చేష్టలను తలచుకొనేవారు. మేలుకొని ఆ ' వెడద చన్నుల మీది ఆ విదియ చంద్రుల' కోసం తడుముకొనేవారు! అంత చిత్తచాంచల్యం శృంగారానిది. అదను తప్పినా, అదుపు తప్పినా అది చేసే బతుకు బీభత్సానికి పాండురంగ మాహాత్మ్యం నిగమశర్మే ప్రథమ ఉదాహరణ. అందుకే శృంగార కళను ఓ శాస్త్రంగా అభ్యసిం చవలసి ఉందని కామసూత్రాలను క్రీస్తు శకారంభం నాటికే వాత్సాయనుడు క్రోడీకరించి పెట్టాడు. పడకగది ముద్దుముచ్చట్లు అచ్చంగా ఆ పడుచు జంట గుప్తజ్ఞానమే కావచ్చు.  కానీ తెలియనివి, తెలుసుకోవాల్సినవీ, అడగలేనివీ, బిడియంవల్ల అడగనివీ, ఎవరిని అడగాలో తెలియనివీ బోలెడన్ని సందేహాలు... దేహధర్మం గురించి. అందుకే పండంటి సంసారానికి అత్యంత అవసరమైన ప్రేమబంధంతో శృంగారబంధాన్ని ముడివేయాలన్న సదుద్దేశంతో మరియా థాంప్సన్ శృంగార పాఠశాల ఏర్పాటుకు సిద్ధపడ్డారు. వియన్నాలోనే కాదు, భూమ్మీదే అది తొలిశృం గార కళాశాల. హింసాత్మక ప్రేమస్థానే ఆత్మీయానురాగాలను అది పెంపొందిస్తుందంటే- అందుకు అభ్యంతర పెట్టాల్సింది ఏముంటుంది? చట్టానికి, సభ్యతకు లొంగి ఉన్నంతకాలం శృంగారానికి స్వాగతం పలకవలసిందే!


రచన- కర్లపాలెం హనుమంతరావు 

( ఈనాడు - ప్రచురితం- 11-03-2012 ) 

Thursday, September 3, 2015

స్త్రీ సూక్తం- ఓ సరదా గల్పిక


'న స్త్రీ స్వాతంత్ర్య మర్హతి' అన్నవాణ్ణి ముందు ఇస్త్రీ చేసెయ్యాలి' అంది మా కసిగా మా శ్రీమతి ఇస్త్రీ చేస్తూ. చలంగారి పుస్తకమో.. రంగనాయకమ్మగారి నవలారాజమో మళ్లీ తిరగేసినట్లుంది! ముందావిడగారిని చల్లబరచడం నాకు చాలా ముఖ్యం.
'మొన్నా మధ్యే గదుటోయ్ మన ఏ ఆర్ రెహ్మాన్ ఆస్కారందుకొంటూ 'మాఁ! తుఝే సలామ్' అన్నాడూ! మన మెగాస్టార్ చిరంజీవీ పార్టీపెట్టిన రోజూ తల్లిని ఎన్నోసార్లు తలుచుకొన్నాడు.  మనగడ్డమీద ఆడాళ్లకి దక్కే మంచీ మర్యాదా ప్రపంచంలో మరెక్కడా దొరకవు.. దొరసానిగారికా సంగతి తెలుసో లేదో!'
'వంకాయ పులుసు! మర్యాదా! మన్నా! పబ్బుల్లో వెంటబడి మరీ మా ఆడపిల్లలకు బడితెపూజలు చేస్తున్నారు కదండీ మీ మగమహారాజులు!  ‘లజ్జ’ పుస్తకంరాసిందని పాపం ఆ బంగ్లాదేశు ఆడమనిషిని ఎన్ని పడతిట్టారు. ! పడేసి కొట్టనుకూడా కొట్టబోయారేమో ప్రెస్ క్లబ్బులో! ప్రేమించలేదన్న పాపలమీద పాపం యాసిడ్ బాటిలు ఎత్తి పోస్తారా! పార్కులో తిరిగే పిల్లకాయలకు బలవంతంగా పెళ్ళిళ్ళు చేస్తారా! పుట్టేది ఆడనలుసని పసిగడితే బలవంతంగానైనా  సరే నలిపేక్షేడందుకు సిద్ధమా!  అదనపు కట్నం తేవడం ఆగితే  బహిరంగంగానే గ్యాసుబండకు బలా? పరమ కిరాతకులండీ బాబు మీ మగజాతి సమస్తం’
'అదేంటోయ్! ‘ఆలయాన వెలసిన ఆ దేవుని రీతీ.. ఇల్లాలే ఈ జగతికి జీవనజ్యోతీ' అన్న పాటరాసినాయన మా మగాడేగా! 'కంటే కూతుర్నే కనాలి' .. ‘పెళ్లాం చెబితే వినాలి' అంటూ బోలెడన్ని ఫిమేల్ ఓరియంటెండు మూవీలు తీసినవాళ్లేమన్నా ఆడాళ్ళా! ‘ఎక్కడ స్త్రీలు సంచరిస్తారో అక్కడ మాత్రమే దేవతలు సంచరిస్తా’రని కదా మన పెద్దల నీతిబోధ!’
'సడి! ఆ దేవుళ్ల సంగతే చెప్పాలింక! ఒక దేవుడు కట్టుకొన్నామనే కట్టుబట్టలతో అడవులకు తోలేసాడు! మరో దేవుడు ఆడాళ్ల స్నానాల రేవులో దూరి బట్టలు దాచేసాడు! ఎంతమంది ఆడాళ్ళ మెళ్లల్లో తాళిబొట్ల పేరుతో ఉరితాడు బిగిస్తే అంత గొప్ప మగవాడికి! అప్పు తీర్చుకోడానికి ఆలిని తాకట్టు పెట్టిన సత్యహరిశ్చంద్రుడు గొప్ప ప్రభువా! మగాడికి ముక్కోటి దేవతలేనండీ! ఆడదాని ప్రాణంమీదకు అదనంగా మరో దేవుడు.. పతిదేవుడు! ఆడదంటే వాడి దృష్టిలో ఇంటికి దాసి. పంటికి  చిప్సు.  పక్కకి రంభ! ఆడదెలా మసలుకోవాలో శతకాలు చెప్పిన పెద్దమనుషులు మగాడికే నిబంధనలు  విధించలేదెందుకో!'
'ఎందుకూ?'
'తల్లో పూలు పెట్టుకొంటానని తల్లో గుజ్జులేని ఫూలుననుకోవద్దు మిస్టర్ హబ్బీ! జడలు అల్లుకొన్నంత మాత్రాన జడపదార్థంలాగా ఇక్కడెవరూ పడి  లేరు! చట్టసభల్లో మీ మగఎంపీలు చేసే రభస మాకర్థం కాదనుకోవద్దు! మా జుట్లు ముడేసుకొంటూ పోతే భూగోళం మూడు సార్లు చుట్టిరావచ్చు. ఐదొందలు పైచిలుకు ఉండే హస్తిన సభలో  ఆడంగులు ఐదుపదులుకూడా కనిపించరెందుచేతో! ఆకాశంలో సగమని తెగ  ఉబ్బేస్తారేగాని భూమ్మీదరంగుళమైనా  చోటిస్తున్నారూ! మూడోవంతుకోసం చట్టసభలో బిల్లు పెట్టినప్పట్లో  మీ పురుషపుంగవులు చేసిన  ఆ యాగీ పేరేంటో! ఇరవైయ్యొకటో శతాబ్దంట! నవనాగరీకం ముదిరిపోతున్నదట! అక్కడ అడవుల్లో ఆడాళ్ళు వంటిమీద జాకెట్టేసుకొనే హక్కుకోసం ఇప్పటికీ పోరాడుతునే ఉన్నారు! రేకేట్లో ఆడాళ్లని చంద్రమండలంమీదకి పంపిస్తున్నారా!అలా చెప్పుకొని  చంకలు గుద్దుకొంటే సరిపోతుందా! స్త్రీహింసకు తెగబడే దేశాల జాబితాలో   మేరా భారత్ మహాన్ ది వందో నెంబరని తాజా నివేదికలెలా ఘోషిస్తున్నాయయ్యా వింటున్నావా మహానుభావా!'
'ఇంటిపని మానేసి ఇలాంటి కాకిలెక్కలు తీస్తూ కూర్చున్నావా?'
'నేనింట్లో ఒక్కరోజు చేసేచాకిరీకి  మూడుగాడిదలు వారంరోజులపాటు విరామం లేకుండా చేసినా సమానం కాదు. మీరాఫీసులో పేనేసుకొని కునుకుతీస్తూ  చేసేపని ప్రకారం చూసుకొన్నా నా జీతం ఈ ఇంటి విలువకు రెట్టింపుంటుంది. నీళ్ళకోసం, రేషనుకోసం, పిల్లల బళ్లకోసం రోజూ నేను నడిచే దూరానికి రథంముగ్గేసుకొని పోతే ఎవరెస్టు  శిఖరం రెండుసార్లు ఎక్కి దిగి రావచ్చు!'
నిజం చెప్పద్దూ.. నాకూ రోషం వచ్చేసింది. ఆపకుండా ఆవిడగారు అదేపనిగా వదిలే వోల్గా మార్కు డైలాగులకిఏ మగాడికైనా మరి కాలదా చెప్పండి!
'ఇందిరాగాంధీని ప్రధాని చేసింది మేమే! ఖబడ్దార్! మథర్ తెరిస్సా మాదగ్గరికొచ్చిన తరువాతే సెయింటయింది!తెలుసుకో!  అటు అనీబిసెంటు, విజయలక్ష్మీ పండిట్టూ, సరోజినీదేవి నాయుణ్ణుంచీ ఇటు సోనియాగాంధీ, జయలలిత, మాయావతి, మమతా బెనర్జీదాకా అంతా  ముఖ్యులూ, ముఖ్యమంత్రులూ అయింది మా మగవాళ్ల జమానాల్లోనే మ్యాడమ్ జీ! అరబ్బు దేశాల్లో మొన్న మొన్నటిదాకా ఆడోళ్లకి ఓటుహక్కే నిల్లు. ఏకంగా రాష్ట్రపతులు, సభాపతులు అయిపోతున్నారు మన దగ్గర'
'హుఁ! రాష్ట్ర'పతి', సభా'పతి'! రాష్ట్రమాత, సభామాత అనొచ్చుగా! అక్కడే మీ మగాళ్ళ ధాష్ఠీకం బైటపట్టంలేదూ! మాతృభాష అంటూ భేషజాలు పోతుంటారు! మాతృస్వామ్యం  అంటేమాత్రం మండిపడుతుంటారు!  మగబుద్ధి! ఆడదేమన్నా అబలా? మగాళ్లటూ అటూ ఇటూ వాయించే తబలా?'
'ఆడదంటే అలుసైతే.. రైళ్ళల్లో ప్రత్యేక బోగీలు, బస్సులు,  బస్సుల్లో స్పెషల్ సీట్లు, సినిమాహాళ్లల్లో కూల్ కూల్ క్యూలు, టీవీలో సీరియళ్ళు.. పండగలొస్తే భారీ డిస్కౌంట్లు.. అన్నీ మీకే ఎందుకు పెట్టిస్తాం తల్లీ?'
'మరుగుదొడ్లు, మంగళసూత్రాలతో అభివృద్ధంతా ఐపోయినట్లేనా మై డియర్ హబ్బీ? ఇపటికీ చాలా గుళ్లల్లో ఆడాళ్లకి ప్రవేశం నిషిద్ధం! నూటికి ఎనభై పై చిలుకుమంది ఆండాళ్లు  మగాళ్లపంజరాల్లో చిలకలే! ఆడదానికే ఇంటెపేరు ఎందుకు మారాలో కాస్త సెలవిస్తారా? ఆడబిడ్డలే గాజులు ఎందుకు వేసుకోవాలి? మా బూబమ్మలే మొహాలకి ముసుగులు ఎందుకు తొడగాలి? పసుపు కుంకుమలు పంచడం.. మగవాడొక అవమానంగా ఎందుకు భావించాలంట్! ఆడదంటే అలుసవబట్టేకదా బహిరంగంగా అలా తొడలు బాదుకొనేది! మీసాలలా మెలివేసేది! భాష ఉన్నది  ‘అమ్మా.. అక్క’లమీదలా అవసరమున్నా లేకపోయినా దుష్టప్రయోగాలు చేయడానికా? పురుష సూక్తం, స్త్రీసూక్తం ఒకేలా ఎందుకు లేవో ఓ సారేమన్నా  వివరిస్తారా బావా! దేవతల పేర్లు  పెట్టుకోడంవరకే.. ఆడపిల్లలు దేవతామూర్తులు! మగాడు ప్లస్సూ..  ఆడపిల్ల మైనస్సా! ఏ సామాజికసూత్రం ప్రకారం బాబూ ఈ కూడికలు.. తీసివేతలు! ఎంత ఒబామా అయినా ఒక ఆడది తొమ్మిదేసి నెలలు నొప్పులుపడి కంటేనేగా అమెరికాకు అధినేత కాగలిగింది! ప్రేమ పిచ్చిది..  కనక ప్రేమించే ఆడదీ పిచ్చిదయిపోతుందా! ఆడది ప్రాణంపెడితే ప్రాణాలు తీసే యమధర్మరాజుతోనైనా పోరాడి మరీ నిలబడుతుంది. ప్రాణం విసిగిస్తే కాఫీలో ఇంత విషమైనా కలిపిచ్చేసి  పీడా వదిలింఉకొంటుంది.   మగాడు తోడుగా ఉంటే నీడగా ఉండేందుకు ఆమె ఎప్పుడూ సిద్ధమే! చిలకలకొలికుంటేనే   ఏ ఇల్లైనా  చిలకలువాలిన చెట్టులా  కళకళలాడేది! చప్పట్లు కొడితే చిలకలు ఎగిరిపోతాయేమోగానీ.. ఎన్నిక్కట్లు వచ్చినా చిలకలకొలికిమాత్రం చెలికాడి చెయ్యివిడిచి పోదు!' అంది శ్రీమతి ఆవేశంగా!
ఓడిపోఆయాను ఆమె వాదన ముందు.
'ఇంతకీ ఈ ఉపన్యాసమంతా ఇప్పుడెందుకో కాస్త సెలవిస్తారా మ్యాడమ్ గారూ!' అనడిగేసా.
'అంతర్జాతీయ మహిళా దినోత్సవమండీ బాబూ ఇవాళ. చూసారా.. ఆసంగతీ తమరికి గుర్తుకు రాలేదు! సగానికి పైగానే మా  ఆడఓట్లున్నా మాకు ఇన్నేసి పాట్లు!’
 ‘ఆ మాట నేనొప్పుకోను! ఒక పార్టీ పావలావడ్డీ అంటూ వలవేస్తుంటే మరోపార్టీ ఉచిత నజరానాల జాబితా వల్లె వేస్తుంది.  ఇసుక దగ్గర్నుంచి బంగారందాకా అన్నింటిలో ఆడదానినే అందలాలెక్కించేది అన్ని పార్టీలు’ అన్నాను అసూయ పట్టాలేక.
‘రూపాయిక్కిలో బియ్యమొక వంక. .గుండిగలకొద్దీ గుడుంబా మరో వంక! ఏ  ఆడది ఏ సాధికారత సాధించడానికి అడిగిందో ఈ మందుతాయిలాలు! ఠీవీ అయిన బతుక్కి కావాల్సింది ఉచిత టీవీలూ.. రుబ్బుడు పొత్రాలు కాదండీ బాబూ! మీ   మగాళ్ళు అడుగడుగునా అల్లే  మాయదారి బుట్టల్లో  పడకుండా  ఉండే అప్రమత్తత!
'వావ్! మహిళా దినోత్సవ శుభసందర్భంలో మా మహారాణిగారికే కానుక సమర్పంచమని  ఆజ్ఞ' అన్నాను నాటకీయంగా!
'ఇవాళా రేపూ వంట చేయమని ఆజ్ఞ' అనేసింది ఫక్కుమని నవ్వి  నా చేతిలోని వార్తాపత్రిక తను లాగేసుకొంటూ!
-కర్లపాలెం హనుమంతరావు
***
(07-03-2009నాటి 'ఈనాడు' సంపాదకీయపుటలో ప్రచురితం)
  

'

మతాల స్వరూపాలు కొడవటిగంటి రోహిణీప్రసాద్, 08-09-2010

  మతాల   స్వరూపాలు కొడవటిగంటి   రోహిణీప్రసాద్ ,  08-09-2010  మతభావనలు ,  మనిషికీ   నరవానరానికి   తేడాలు   తలెత్తినప్పటినుంచీ   మొదలైనవిగానే ...