అల్లుడు గారి గిల్లుడు కహాని- ఆంధ్ర ప్రభ 'సుత్తి.. మెత్తంగా' కాలమ్

ద్రుపదుణ్ని చూస్తే జాలేస్తుంది!  కూతురు ఒహటే. అయినా ఐదు దశమ గ్రహాలు! మామల కోణం కదా! అందుకే మరి అల్లుళ్ల మీదీ వ్యంగ్య బాణాలు!

గిల్లకుండా చల్లకుండలా అత్తారింట ఓ మొత్తన  మెత్తంగా పడుంటే అల్లుడెలా ‘అలుగర్ర’ అవుతాడయ్యా?  ముల్లుకర్ర ఆచారం తు.. చ తప్పకుండా పాటింస్తున్నందుకేనా   దేవుళ్ళలాంటి  అల్లుళ్ల మీదిన్ని  'థూఁ' లు.. ఛాఁ'లు!

అక్షింతలేసే వరకు ఎస్వీఆరంత గాంభీర్యం. అలక పాన్పు దగ్గర మాత్రం గుండెపోటొచ్చి దగ్గే  గుమ్మడి వ్యవహారం!  ఆడపిల్లంటేనే నట్టింటి సిరి మా లచ్చిమి కదా! ఆ సిరికే.. ఇంకొంచెం కొసరుగా ..ఒహటో.. రెండో .. రెండు  పంటల భూములు! ఆచారం తప్పలేకేగా అల్లుళ్లలా అదనపు కట్నాలకు  వేధించడం? ఆ మాత్రానికే వరకట్నం వంకతో అల్లుళ్లనలా వేదించేయడవేఁ?  

వరుడూ సాక్షాత్తూ శ్రీమన్నారాయణుడేగా? ఆ హరి హారతి పళ్లెంలో చిల్లర కిందో  చెవర్లెస్ కారోటి కానుగ్గా పారేస్తే మాంగారి సొమ్మేమైనా తరుక్కు పోతుందా? ఆకస్మిక  దాడులప్పుడు అల్లుళ్ల మీదకు మల్లే ఐ. టి, ఇ.డి ల మీదలా  దుమ్మెత్తి పోసే దమ్ముందా మాంగార్లూ?

సన్-ఇన్-లాస్ అంటే సన్నాసులేం కాదు. అగాధంలాంటి సంసారంలోకి  దూకి ఈదే  దుస్సాహసులు.  ఉరికంబం ఎక్కే ముందు నరహంతుకుడైనా సరే..  ఆఖరి కోరిగ్గా సన్నీ లియోస్ ని  చూడాలనుకొంటాడా లేదా! ఆ అవుట్-లాస్ కన్నా సన్-ఇన్-లాస్ ఎందులోనయ్యా లోకానికి లోకువా? 

విలువైన స్వేఛ్చా స్వాతంత్ర్యాలను సైతం ఫణంగా పెట్టాడన్న సింపతీ లేదు.. దాం దుంప తెగ! తృణంగానో ఫణంగానో అల్లుడి టేస్టుకు తగ్గట్లో  లేటెస్టు  సెల్లో.. బైకో..  కొనివ్వాలా వద్దా? అడగందే పెట్టంది  'మామ్' మాత్రమే! పిల్లనిచ్చిన మాంగారు అడక్కుండానే  అడుగులకు మడుగులొత్తాలి నిజానికి! సనిన్లా ఏవఁన్నా సన్నాఫ్ కుబేరుడా స్వామీ?  మాంగార్ని కాకుంటే మాల్యాగార్నా కట్నంకోసం   వేధించేది?

పిల్లకు వచ్చే సంబంధమేమో సంపూర్ణేష్ బాబులా ఛస్తే ఉండకూడదు! బుద్ధిలో బిల్స్ గేట్సు, నడతలో సత్య  నాదెళ్ల, ఆస్తుల్లో అంబానీ, జాబుల్లో సుందర్ పిచాయ్! ఊహలకేమీ ‘ఊహూఁ’  ఆకాశం కూడా అడ్డు రాకూడదు   కానీ.. ఆ తాహతుకు తగ్గట్లు తూగమంటే మాత్రం  కాణీ బోణీ కాని చింతపండు కొట్టోడి దివాలా పోజు!

కాళ్లు కడిగే ముహూర్తం ఖాయమైన్నాడే కన్నీళ్లు కార్చే శక్తి  కూడగట్టుకోవాలి! అల్లుడంటే  పిల్లతండ్రికి పుస్తె కట్టని మొగుడండీ! పిలదానికి  అప్పగింతలు పెట్టినప్పుడే  మాంగారి  కప్పం కథలు మొదలయినట్లు!

కాశీయాత్రకని బైల్దేరిన సన్నాసిని.. పిల్లనిస్తామని  బెల్లించి మరీ పిటల మీద  కుదేస్తిరి! పాంకోళ్లో పక్కన పారేసినందుకైనా ఓ కోళ్ళ ఫారం  ఓపెన్ చేయించాలి కదా! గొడుగో మూల  గిరాటేసినందుకైతే గిరాకీ తగ్గని రాజధాని ప్లాటోటి రాసివ్వాలి! నానో  బుల్లి కారడిగినా సరే  'నోఁ.. నోఁ' అంటేనే  అల్లుళ్లంతా  మాంగార్లమీదంతలా ఫైరయ్యేది!

పెళ్లంటేనే ముద్దూ ముచ్చట్లట! మంచి మాట. అల్లుళ్లది ముద్దూ.. మామలది  ముచ్చెమట్ల  ముచ్చట! ఇహ అల్లుళ్ల 'నాతి చరామి' అంటారా? హామీ  నిజమే.. కానీ స్వామీ! మాంగార్లిచ్చే  మాగాణీ భూముల మీదొచ్చే రాబడి   బట్టే ఆ మాటలకుండే చెల్లుబడి!

కల్లాకపటమేం లేకుండా పిల్ల మాడునింత  జీలకర్ర, బెల్లముక్క అద్ది  చల్లంగా ఇంటికి తోలుకెళ్తే.. మామ చేతిలో ఆడే తోలుబొమ్మంటుందయ్యా అల్లుణ్ని పోసుకోలు  లోకం. మాంగారి పరువు నిలపడం కోసమే బాబూ.. మాంగారి పరువు తీసే  కోరికలు  పెద్ద మనసుతో  కోరుకోడం అసలైన పెద్దమనుషులు!

వరకట్న నిషేధమనే మిషన్తో కంగారు పెట్టయకండయ్యా బాబూ పాపం  ఆ పెద్దమనుషుల్ని! భూమి గుండ్రంగా ఉండదన్నా 'ఊఁ' కొట్టేసి ముందర్జంటుగా  ఓ సంఘం పెట్టేసే తుగ్లక్కులు తుక్కు తుక్కుగా ఉన్న భూమి  ఈ  దేశం! ‘వరకట్న నిషేధ బాధితులు’ అనే హ్యాష్  ట్యాగ్ పెట్టేసి ఓ ట్వట్టర్ ఎక్కౌంటు గానీ ఓపెన్ చేసేస్తే గంటలో ఆ రాహుల్ బాబు రికార్డు బద్దలయ్యే రీ ట్వీటుల వచ్చి పడిపోతాయ్!

పెట్రోలు ఉత్పత్తులకు మల్లే వరకట్నం సొమ్ముమీదా జి ఎస్ టీ వద్దు! అదనపు కట్న కానుకల మీద అదనపు సేవా పన్నులు గట్రా తక్షణమే రద్దు. మనీ, ల్యాండు.. గట్రా ఏదైనా మామల నుంచి  లాఘవంగా  రాబట్టుకొన్న సొమ్ము.. మనీ ల్యాండరింగు యాక్టు నుంచి మినహాయింపు! చిటికెడు ఓపికా.. టైమూ తగలడాలే కానీ సర్కార్లను ఇరుకున పెట్టేసే చిటుకులు తట్టలు తట్టలు పుట్టించెయ్యచ్చు! తస్మాత్ జాగ్రత్త  పిల్లనిచ్చిన మాంగార్లూ.. అల్లుళ్లెన్నుకున్న సర్కార్లూ! కొరియా'కిమ్' అయినా తయారు చెయ్యలేని అణుబాంబు బాబూ అల్లుడుబాబు!

ఏ జన్మలో చేసిన పాపమో.. ఈ జన్మలో ఆడపిల్లలకు 'పాపా'లుగా పుట్టడం! మామల ఆజన్మ జరా దుఃఖ పాతకాదులన్నీ పూరా పరిహరించే హరిమూర్తి అవతారులయ్యా శ్రీ అల్లుళ్ళు! గుళ్లు కట్టించుడు.. మొక్కుడు ఎలాగూ లేదు! నిలువు దోపిడీలయినా ఇచ్చుకోండయ్యా.. చాలు!  కేవలం    లవ్వుల్తోనే పిల్లల కాపురాలు ఎల్లకాలం నిలవ్వు!

వరకట్నం ఆడబిడ్డల్ని కన్న వారికి భగవంతుడిచ్చిన గొప్ప వరం! పరిశోధనలు చేసి మరీ పాఠ్యాంశాల్లో చేర్చిందయ్యా ఈ మధ్యన  మన బెంగుళూరు సెయింట్ జోసెఫ్ కళాశాల సామాజిక శాస్త్ర విభాగం! నమ్మకుంటే ఆ నోట్సు జిరాక్సు కాపీ లొకసారి  తెప్పించుకొని చదువుకోవాలి ఆడబిడ్డల్ని కన్న    అదృష్టవంతులంతా!

అందంగా లేని ఆడపిల్లకు తొందరగా పెళ్లిళ్లయే గోసాయి చిటుకు. బిడ్డ భారీగా ఉన్నా లారీడు సొమ్ము డౌరీగా పోస్తే చాలు.. పుస్తె కట్టే  వస్తాదులు వరసలో నిలబడతారు మెగాస్టార్ బ్లాక్ బస్టర్ ఫస్టాటాడే హాలు బైటకు మించి!  కట్న కానుకలు వంకతో ఏ అడ్డగాడిద కాళ్లు కడిగి నీళ్లు నెత్తిన చల్లుకున్నా మన ఆడపిల్లకు అత్తారింట్లో  అదానీ కోడలు హోదా ప్లస్ జడ్ ప్లస్ సెక్యూర్టీ! మన బిడ్డకు మనమే స్వయం పోషక శక్తి  ఇంచక్కా కల్పించేసుకొనే యుక్తి. 

బ్రీఫ్ కేసుల్తో తప్ప  పోలీసు కేసుల్తో ఏ సన్నిన్లా కేసులూ  చరిత్రలో సాల్వయింది లేదిప్పటి వరకు.  దామాద్ అంటే అత్తారింటి  దావూద్  ఇబ్రహీం! అయితేనేం? కోరినంత కట్నం కోరినప్పుడు  విసిరి పారేస్తుంటే అతగాడే అమ్మాయి పాలిట రాం అండ్  రహీం! అన్నీ సుమతీ శతకం నూరి పొయ్యదు!

'డౌరీ.. డౌన్! డౌన్!' ఊబిలో దిగి పోవద్దు.  ఏ ఇండియన్ పీనల్ కోడూ పిల్లనిచ్చిన మాంగార్ల గోడును తీర్చింది లేదు! కట్నమెప్పటికీ భూతం కానే   కాదు. అమ్మాయి బంగారు భవిష్యత్తుకు అదే పెద్ద ఊతం. ఉన్నంతలో ఇచ్చుకోడం పాతకాలం ఉదారం.  ఉన్నదంతా ఊడ్చి  అచ్చుకోడం కొత్త  వరకట్నపు ఆచారం.

కార్పొరేటు యుగం! ప్రద్దానికీ ఓ రేటుండటం సహజం. అమూల్యమైన ఓటే ఎన్నికల టైంలో ఎన్నో రెట్లు ధర పెరుగుతుంది కదా!

దేవుళ్ళు కాబట్టి అల్లుళ్ల ఆరళ్లు  ముందే తెల్సుట. హడలి  అందుకే ఆ హరి హరులు సైతం అసలు  ఆడబిడ్డలకే కన్నతండ్రులు కాలేదుట! సెట్ రైటు చేసుకోడం  రాని  బుద్ధూలే.. దేవుళ్లలాంటి  అల్లుళ్ల మీద అన్నేసి సెటైర్లు అన్యాయంగా వేసేది!

పురిట్లోనో.. పుట్టక ముందో ఆడబిడ్డల్ని చంపే ఆ దురాగతాలు మనకొద్దు. మనిషి మనుగడ ఆడబిడ్డల భ్రూణ హత్యలు మీన్స్  వరకట్న పరిరక్షణకు దాపురించే తీరని నష్టం! ఉద్యోగాలు.. ఉపాధులు ఆట్టే దొరకని కరువు కాలం. వరకట్నాలు, అదనపు కట్న కానుకలేగా నిరుద్యోగ యువకులకు  ప్రస్తుతం అందుబాటులో ఉన్న ఆధరువులు.

అల్లుళ్లంటే వట్టి  'వెధవ'లంటూ తలంటే  మాంగార్లనలాగే పెరగనీయి భగవాన్! పెద్దల తిట్టు దీవెన పెట్టు.  'వె.ధ.వ' అంటే వెయ్యేళ్ళు ధనంతో వర్ధిల్లమని  కదా అంతరార్థం? అంతకు మించిన గొప్ప వరమూ ప్రస్తుతానికి మరేముంటుంది అస్తమానం మాంగార్లను గిల్లుకుంటూ బతుగ్గడిపే అల్లుళ్లందరికీ!

-కర్లపాలెం హనుమంతరావు

***

(ఆంధ్రప్రభ 28-10-2017 నాటి 'సుత్తి.. మెత్తంగా' కాలమ్ లో ప్రచురితం)

‘బండ’ చదువులు- ఆంధ్రప్రభ- సరదా కాలమ్- సుత్తి.. మెత్తంగా

చంద్రన్నో.. కే సీ ఆరన్నో.. కేకేసి మరీ కానుకలు కుక్కేసి  పండగ పండక్కీ పంచేసే సంచీలు అంటే పబ్లిక్కి ఎప్పుడూ  మా లావు కిక్కే. బళ్లకెళ్లే పిల్ల బుడంకాయలకే  బ్యాగులంటే  భుజాలమీద ఏళ్లాడే బేతాళుల్ల లెక్క! ఒక్కో బుక్కులబ్యాగు పది గాడిదలు  కల్సి ముక్కి మూలిగినా  లాగలేనంత  తుక్కు బరువని ఒకటి. సమాధానం తెల్సి చెప్పినా.. తెలీక గమ్మునున్నా తల వెయ్యి వక్కలయ్యే భూతాల యవ్వారమని.. ఇంకోటి! అన్నీ పితలాటకాలే!

బ్రహ్మదేవయ్యకు బద్ధకం బలిసిందో.. చదువులమ్మకే చతుర్లెక్కువయ్యాయో? తెలుగు రాష్ట్రాలు రెండింటిలో బడి బుడతలిప్పుడు స్కూలుబుక్కు బ్యాగుల్ని చూస్తే చాలు..  గబుక్కుమని జడుసుకుని జొరాలు  తెచ్చేసుకుంటున్నరు!

తొమ్మిది, పది తరగతుల  సంచీల బరువు ఆరు కిలోలకి మించి  ఉండద్దన్నది కదా సర్కారు సార్ల హుకూం! అయినా లిఫ్టు లేకుండా మూడో అంతస్తు తరగతి కొండకు  రోజూ మాదిరి గేసుబండ బరువుండే పుస్తకాల సంచి మోసుకుంటూ ఎదురు దేకలేక .. పాపం.. ఓ లేత  ప్రాణానికి నిండా నూరేళ్లు నిండినాయంట!

అడ్డమైనోళ్ల మైల కుప్పలు.. రెండు పూటలా రేవులకీ మోసే ఓపిక లేక ‘ఓఁ..ఓఁ..’అంటా ఓండ్ర పెట్టే   అడ్డగాడిద లిప్పుడు.. పేరు గొప్ప ప్రయివేటు బళ్ల పిల్లకాయల రొప్పులు వినీ వినీ  కన్నీళ్లు  తెగ కార్చేస్తున్నయి! ‘అడ్డగాడిదలుగానైనా పుట్టుడుకు రడీనే! బాబ్బాబూ.. ఆ తెలుగు రాష్ట్రాల్ల బడిపిల్లకాయలకు మల్లే మాత్రం పుట్టించి మమ్మల్ని శిక్షించకండి మహాప్రభో!’ అంటా  సృష్టికర్త కాళ్లా వేళ్లా పడి తలలు మోదుకుంటున్నాయంట.. బ్రహ్మలోకం  టాకు!

సత్యకాలం కాబట్టి హిరణ్యాక్షుడు భూగోళం మొత్తాన్ని చాపలా చంకలో చుట్టేసి చులాగ్గా తారుకున్నాడు. ఈ కలికాలంలో ఆ ఘనకార్యం రిపీట్ చేసి చూపించమనండి! బుడ్డ వామనుడు తొక్కేసిన బలిదేవుడికి మల్లే పాతాళం అడుక్కి  అణిగి పోవుడు ఖాయం!

పేటకో కార్పొ’రేటు’ బడి. బడికో పాతిక తరగతులు. తరగతికో వంద బెంచీలు. బెంచీకో పదిమంది మందమతులు. మతులెంత మందంగా ఉంటేనేమి స్వామీ.. వీపున మోసే పుస్తకాలు మాత్రం వందకు ఒక్కటి తగ్గినా డొక్కచీరుడు ఖాయం. చూసి రాసే బుక్కయినా సరే.. వీశకు వీసమెత్తు  తక్కువ తూగినా..  మోసే బిడ్డడి   వీపు మీద విమానం మోత మోగుడు ఖాయం! ‘మోత’ మోగుళ్ళుంటేనే చదువులు మోతెక్కేలా సాగుతున్నట్లు కన్నవారిక్కూడా అదో దిక్కుమాలిన లెక్కయిపోయిందిప్పుడు.. పిల్లకాయల ఖర్మ!

 డబ్బు బళ్లు, ఉబ్బు బుక్కులూ ఉనికిలో లేవు కాబట్టే ఆదికాలంలో ఆ అట్లాసు రాక్షసుడు ఎట్లాగో ముక్కుతూ మూలుగుతూ  భూగోళాన్ని మోయగలిగాడు! అదే ఈ కలికాలంలో? గోళం మొత్తం అఖ్కర్లే! మొదటి గ్రేడు బుడతడి బేక్-బ్యాగు ఎత్తి వీప్మీద పెట్టుకు నడ్డిమీద స్టడీగా నిలబడమనండి! చడ్డి  తడుపుకోకపోతే .. నేరుగా ఒలంపిక్సు  వెయిట్ లిఫ్టింగుకి పంపేసెయ్యచ్చు! వేరే శిక్షణెందుకు? మనీ వేస్టు!

వేదాలు ఏవో నాలుగు కవిల కట్టలు కాబట్టి.. నీట్లో బుడుంగున పడ్డా.. ముట్టెతో ఎత్తి వరాహావతారం పరువు నిలిపాడు హరి నారాయణుడు.  అదే ఇప్పటి ఏ ప్రీ-ఎల్కేజీ పిలగాడి పుస్తకాల సంచీ అయితేనో?    పది కాదు మాష్టారూ.. మరో పది అవతారాలెత్తినా  బ్యాగోద్ధరణ ఆ భగవంతుడి శక్తి సామర్థ్యాలకి మించిన   పెద్ద అగ్నిపరీక్షయుండేది నిశ్చయంగా!  

అప్పట్లా అష్టాంగ పంచాంగాలు.. అష్టాదశ పురాణాలా అత్యంత  సునాయాసంగా అవపోసన పట్టేసేందుకు లేదు.  ఇప్పటి ఫస్టు గ్రేడు సైన్సు గైడైనా చూడండి.. మంచుకొండను మించి బరువుంటుంది!   రావణాసురుడికి.. పాపం.. ఏ ప్రయివేటు బడి  పుస్తకాలూ మోసే అలవాటు లేదు. కాబట్టే సీతా స్వయంవరంలో ఆ పాత పడ్డ శివధనుస్సును సైతం రెండు చేతులు వాడినా ఇంచైనా  కదల్చ లేక  కుదేలయిండు. నిండా పదహారేళ్లయినా పండని  పసి బాలుడు రాముడు. అయితేనేమి? ఆ సామి  భారీ శివధనస్సును ఎలా అంత చులాగ్గా ఎత్తి  పుసుక్కని ఇలా నడిమికి విరిచేసాడంటారూ? బాల రాముడిది విశ్వామిత్రుడి కార్పొరేట్  స్కూలింగు మరి! 

సాందీపని బడిచదువులకూ భారీ బరువుబ్యాగుల్తోనే పని! కాబట్టే గోవర్థన గిరినంత సులభంగా కొనగోటి పైన నిలబెట్ట గలిగిందా పశువుల కాపరి!

ఈ వెయిట్ లిఫ్టింగు స్టడీసుకి భయపడే  సత్యభామ అలా చిన్నబడికి పోవడానికి పాలుమాలింది  పోతన్నగారి భాగోతంలో. బాల్యంలో ఏ ఎల్కేజీ బడికి పోయున్నా  ఇంట్లో ఏ మూలనో ఆ పుస్తకాల సంచీ పడుండేది కదా? నగా నట్రాను మాత్రమే  నమ్ముకొన్న ఆ కొమ్మ పుస్తకాల బ్యాగు సమయానికి దగ్గర లేకే  అలా భంగపడింది. బుక్కుల బ్యాగ్గాని సిబ్బెలో పడేసి ఉంటే,, కొండనెత్తిన గోవిందుడైతేనేమి బండబ్యాగు బరువుకి పైకి తూగుండేవాడే. రుక్మిణమ్మ తులసాకూ   ఓ సాకనిపిస్తుంది. నిజానికది ఆ పట్టమహిషి చిన్నప్పటి బడి సంచి ఎందుక్కాకూడదూ?

అంత లావు గ్రామర్ నాలెడ్జి కెంత మందం రన్ అండ్ మార్టిన్లు అరగదీశిండో పాపం  ఆంజనేయుడు!  చిన్ని సంజీవని  మొక్క తెమ్మంటే మొత్తం కొండనే పెకిలించుకొచ్చాడా మహానుభావుదు. వృథా పోతుందా బాల్యమప్పటి   ఆ బండసంచులు మోసి నప్పటి అనుభవమంతా!

సతుకులెంత  పెద్దవైనా సతక్కో.. మంచిదే భయ్యా! కానీ  సంసారమంటూ ఒహటుండాలి.. తప్పదు గదా ఎంత లావు   సన్నాసికైనా! ఇప్పుడిట్లా ఎంతలా దెప్పి దెప్పి మాట్లాడుతున్నా.. ముందు ముందు ఎలాగూ గ్యాసు బండలు మోయక తప్పనప్పుడు.. ఇదిగో..  ఇంతప్పట్నుంచే ముందస్తుగా  స్కూలుబ్యాగుమోయుడు తరహా తర్ఫీదు లిప్పిస్తే మాత్రం తప్పేముంది తమ్ముడూ?

అందరికీ ‘ఆఛ్చే దిన్’ అందుబాటుకి  వచ్చే దిన్ .. సచ్చీ బోల్తే తోఁ.. సర్కార్ల నోట్నించే స్పష్టంగా వినబడనప్పుడు.. ముందు ముందు ఏ జీతగాడిగా  బతుకు ‘గాడీ’ నడపాలో ? ‘రేల్ గాడీ’ కాడ ఏ గాడిదగాడి  గబ్బుమూటలు పది రూపాయల కోసం పడీ పడీ మోయాలో? గాడిదమోత లెలాగూ తప్పేది లేనప్పుడు.. తమ్ముడూ!.. గ్రాండ్ లెవెల్లో ‘వెయిట్ లిఫ్టింగ్ స్కిల్స్’  కార్పొరేట్ స్టైల్లో ప్రాక్టికల్సుగ చేయిస్తే తప్పేందో చెప్పుదూ? ఒలంపిక్కు లెవెల్ వెయిట్-లిఫ్టింగు లిస్టుల్లో టెల్గూ పిల్లల్దే ఎప్పుడూ  టాప్ టెన్ ర్యాంకులు. వై? టెల్!  కమాన్! ఆ నైపుణ్యం మొత్తం  ప్రయివేట్ స్కూలుబ్యాగుల పుణ్యమే మ్యాన్! ఒప్పుకోవాలి ముందు.  అందుకే ఆడ బిడ్డలకైనా సరే ‘సిక్స్ పాక్’  కంపల్సరే కార్పొరేట్ బళ్లల్లో. ఆరు సబ్జెక్టులు.. ఇంగ్లీష్, టెల్గు, హిందీ, గణితం, సోషల్ అండ్ సైన్స్! ఒక్కో సబ్జెక్టుకి మళ్లా ఆరేసి  బుక్కులు.. టెక్స్ట్ బుక్, టెస్ట్ బుక్, నోట్ బుక్, గయిడ్, హోం వర్క్, క్లాస్ వర్క్. ఇళ్లకి హోం వర్క్,, బళ్లోకి క్లాస్ వర్క్!  బ్యాలెన్సు బుక్స్ .. తరగతి గది ఆరో అంతస్తులో ఉన్నా.. సన్న సన్నటి నున్నటి జారుడు మెట్లు ఎక్కి  దిగలేక బొక్క బోర్లా పడి ప్రాణాల మీదకి తెచ్చుకొన్నా.. అడుగు ముందుకే వేసే    ప్రాక్టీసు కోసం! పెద్దలకేనా.. పిల్లల చదువు బరువు బాధ్యతలూ? పిల్లలకూ తెలిసిరావాలి  చదువు ‘బరువు’ బాధ్యతలు. అందుకే  ‘బండ’ చదువులు!’

ఈ బండ చదువులు చల్లంగుండా!  పిల్లకాయల భారీ బడిసంచుల బారిన పడే భూగోళం తరచూ కక్ష్యనుంచి పక్కకు తూలుతున్నట్లు ఖగోళ శాస్త్రజ్ఞులు గోల పెడుతున్నరు. ఏదో ఒహటి  చేయాలి వెంటనే! లేకుంటే ఆ భూటాన్ భూకంపాలని మించి ఉత్పాతాలు భూలోకం  మొత్తాన్ని ముంచెత్తేసేయడం ఖాయం. శనిగ్రహమో.. గురు గ్రహమో.. ముందో కొత్త ఖాళీగ్రహం విశ్వాంతరాళాలలో ఎక్కడుందో కాస్త తొందరగా కనిపెట్టండయ్యా శాస్త్రజ్ఞులూ! ఈ భారీ చదువుబళ్లు ఎంత చెప్పినా తలొంచేట్లు లేవు.  ఇహ కట్ట కట్టెసి ఆ కొత్త గ్రహాలమీదకి తోసేయడ మొక్కటే మిగిలిన తొవ్వ! కావాలంటే అక్కడీ కార్పొరేట్ స్టైలు స్కూళ్లు ఎన్నంతస్తుల భవంతుల్లోనైనా లిఫ్ట్లు.. షిఫ్టుల్లేకుండా నిశ్చింతగా నడుపుకోవచ్చు. ఎన్నేసి రకాల ఫీజులైనా సక్రమంగానే వసూలు చేయాలన్న సర్కార్ల  స్ట్రిక్టు రూళ్లు  నిర్భయంగా అతిక్రమించుకోవచ్చు!

ముందీ ‘బండ’ చదువుల నుండి మన లేత బిడ్డల్ని కాపాడుకొందాం.. రండి!

-కర్లపాలెం హనుమంతరావు

(ఆంధ్రప్రభ- సుత్తి.. మెత్తంగా- కాలమ్- 21-10-2017- ప్రచురితం)

 ***

 

వానా వానా వొద్దప్పా- సరదా గల్పిక- సుత్తి మెత్తంగా- ఆంధ్రప్రభ కాలమ్

వర్షాలు దంచి కొడుతున్నాయ్! ఓ రకంగా ఓ.కే నే గానీ తడి బట్టలో పట్టాన ఆరవు. వడియాలెంతకీ  ఎండి చావవు. ఒన్ డే క్రికెట్లు ఓ పట్టాన ‘ఎన్డ్’ అవనే అవవు.

వానాకాలం చదువులని వూరకే వాక్కుంటాం గానీ.. ఈ ఈ-కాలం చదువులకి ఈ ఈడ్చి కొట్టే గాలివానలు  చేసే కీడేముందసలు? జరిగే చెరుపంతా  యజ్ఞాలకి, యాగాలకి, రాజకీయ పార్టీల బహిరంగ సభలకి.   

అతి సర్వత్ర వర్జయేత్! నిజమే కానీ.. ఆ రాజనీతి  అమిత్ షాకి మల్లే  వరుణ దేవుడికీ  వక పట్టాన గుర్తుకు రాదల్లే ఉంది! ఉగ్రవాదుల దాడులన్నా ముందే పసి గట్టుడవుతుందేమో గానీ..  ఉన్నట్లుండి ఆకాశం నుండి నట్లూడి పడినట్లు ఫెటిల్లు.. ఫెటిల్లు మంటూ విరుచుకు  పడే పెద్దోళ్ల  ప్రెస్ మీట్ల మాదిరి బాబూ  ఈ ఉరుములు, మెరుపులు! ఈ ఫెళఫెళారావాల ఆర్భాటాలను ఏ అర్భక జీవులు తట్టుకోగలవు?

ప్రాణం పోకడ్ని ముందస్తుగా పసిగట్టే పరిజ్ఞానం మంచిగా అభివృద్ధయింది. మంచిదే గానబ్బీ..  వాన రాకడ్ని కూడా  ముందే వాసన పట్టే వైనమూ   తెలిసుండాలి కదా! ఇష్టం లేని నియోజక వర్గాల పర్యటనలకని పై నుంచి ఆదేశాకు వస్తుంటాయెప్పుడూ!  ఏ వానపూటో చూసి ఆ ప్రయాణం పెట్టేసుకొంటే.. ఆనకో ‘సారీ’ తో   నిర్భయంగా వాయిదా వేసుకొని  మిగతా సొంత పన్లన్నీ నిశ్చింతగా చక్కబెట్టేసుకోవచ్చు!  

పిడుగు లెక్కడ ఎప్పుడు  పడతాయో ఆ చప్పుళ్లవీ   ముందస్తుగా కనిపెట్టడంలో లేదప్పా   గొప్పతనమంతా! ఎవరు  ఎందుకు  ఎప్పుడూ అట్లా పిడుగుకుట్రలు   పన్నుతున్నారో  పసి గట్టగలిగే సోయి కావాలి ముందు. గాలి వాలును ఎడ్వాన్సుగా వాసన పట్టే మోతగాడేనయ్యా  ఏ ఎదురుగాలి జడివానకైనా ఎదురొడ్డి గొడుగు పట్టి నిలబడగలిగే మొనగాడూ!  

మోదీజీ విదేశీ పర్యటనల్ని మించి, మన ముఖ్యమంత్రుల వరాల జల్లుల్ని మించి  దంచి కొడుతున్నాయిప్పుడు రెండు రాష్ట్రాల్లో పాడు  జడివానలు!  ఈ అర్థాంతర వర్షాల అంతరార్థమేంటో ముందుగా కనిపెట్టాలి. చంద్రబాబు వీడియో  కాన్ఫరెన్సులన్నా వీకెండ్లలో కాస్తంత  వీకవుతున్నాయేమో కానీ.. ఈ విడ్డూరపు వానలకు మాత్రం ఓ శనివారం లేదు.. ఆదివారం లేదు! శనిలా పట్టుకొని సతాయిస్తున్నాయి ప్రతిపక్షాలోళ్ల పిచ్చారోపణల్లాగా!

వాన దేవుడి కింత హఠాత్తుగా ఓవర్ టైమ్మీదెందుకు  గాలి  మళ్లిందో.. ఆ దేవుడికే తెలియాలి! ఎన్నికల జాతర   అయిందనిపించాక  మళ్లీ  మొహాలే  చూపించని ప్రజాప్రతినిధుల తంతే కదా వానదేవుడి తంతు  కూడా! మధ్యంతరం ముప్పు ముంచుకొస్తుందని ఉప్పందిన నేతల మాదిరి ఇప్పుడీ  వానదేవుడిగారి జడివాన దడదడలేవిఁటీ?  ఈ అకాల వరుణ కృపా కారుణ్యాల వెనకాల ఎవరి కక్షా కార్పణ్యాలు దాగున్నాయో!  ఎక్కడో తంతా ఉందే!

నగరంలో తొందర్లో అంతర్జాతీయ స్థాయి  వ్యాపార సమ్మిటేదో జరగబోతుట.. టాకు! ట్రంప్ మురిపాల కూతురు ఇవాంకా ముందుగానీ మన కంపు బైట పెట్టాలన్న కుట్రయితే కాదు కదా!

జగన్మోహన్ రెడ్డి పాదయాత్రలు పెట్టుకొన్నాడొక వంక. జనసేనాని పవన్ కళ్యాణూ పర్యాటనలకని బైల్దేరుతున్నాడింకో వంక. తెదేపా శ్రేణులు తెల్లారగట్టనుంచే కంటబడ్డ ప్రతీ కొంప తలుపు తడుతున్నారు! గిట్టని శక్తులేవఁన్నా కుట్రలూ కుతంత్రాలకు పాల్పడ్డం లేదు కదా కుండపోతల వంకన?

మన నగరాలెప్పుడూ సీమ దొరలకు ‘చీఁ’ అనిపిస్తాయంట! అమెరికా  వాళ్లకంటే ఆ మెరక మీద  హావాయి  దీవులవీ ఇవీ ఉన్నాయని మహా బడాయి!  తెలుగువాడి పరువు నిలువునా  పడిపోతుందన్న సింపతీ ఏమో పాపం..  వరుణ దేవుడుగారు  ఒకింత ఓవర్ కరుణా కటాక్షాలతో  ఏడాదికి సరిపడా నీటి వనర్లను ఒక్క వారం లోపే దిమ్మరించేస్తున్నాడు నగరం నెత్తి మీదిట్లా కుంభవృష్టిలా! అలా గరంగరమయి పోతే ఎట్లా! ఇప్పుడు కాస్కోండి! భాగ్యనగరం మొత్తం హుస్సేన్ సాగరం. షేక్ పేట టు అమీర్ పేట..  ఏ పేటకు టూరేసినా  టోటల్గా  గండిపేట చెరువే! అమెరికాకున్నది  ఆ ఒక్క బోడి  హవాయి దీవే. అదే మరి మన దగ్గరో! బోటు షికార్లు కొట్టే సర్దాలుండాలే గానీ బోర్బండా టు గోల్కొండా తక్ అన్నీ దాల్ సరస్సులే దాదా! బళ్లు ఓడలవడమంటే ఏంటో హైడ్రాబేడుకే వచ్చి చూడాలింక మరి! ఏ వాడ కెళ్లినా లైవ్ లో ఫ్లోరిడా ఇర్మాను మించి.. ఫుల్ ఎంజాయ్  మెంటు గ్యారంటీనయ్యా దొరబాబులూ!

సంబడమే కానీ.. తెరిపి లేకుండా కురిసే ఈ పాడు వర్షాలు రాబోయే ఏ సంక్షోభానికో సంకేతాలయితే కాదు గదా? తెర చాటుగా ఏమన్నా కుక్కలకీ నక్కలకీ మధ్య పొత్తుల కుదుర్తున్నాయో ఏమో కొంపదీసి? ఖర్మ కాలి కప్పల కాళ్ళు కర్ర ముక్కలుక్కట్టేసి ఊళ్లెంట గిట్టనోళ్లెవరూ వూర్కే  తిప్పేయడం లేదు గదా? గాడిదలక్కూడా కార్యాలూ గట్రా జరిపించినా చాలంట..   ఆగకుండా అదే పనిగా కుండపోతలు కురుస్తాయంట! అట్లాంటి  అఘాయిత్యాలకే   తుంటరి మూకలో పాల్పడ్డం లేదు కదా!

శరవేగంతో జరిగే అభివృద్ధిని చూసి ఓర్వలేని వార్గాలేవైనా సిగ్గూ శరం లేకుండా ఏ రాంగు రూట్నుంచో ఋష్యశృంగుడి వారసుల్ని వారాసిగూడా కూడల్లో  దింపి పోయినా చాలు..  దుంప తెంపే వాన తిప్పలు  తప్పవు. తక్షణమే కేసొకటి బుక్ చేసేసి ఏ ఏ.సి.బి కో సి.బి.సిఐ.డి కో అప్పగించేసెయ్యాలి అర్జంటుగా ముందు! కాళ్లకిందకు నీళ్లొచ్చిందాకా ఆగి.. ఆనక కన్నీళ్లు కార్చుకుంటే మాత్రం ఒరిగేదేముంది? ఎవడొచ్చి తుడిచినా కొట్టుకు పోయిన కుర్చీ మళ్లీ ఎంత కొట్టుకు చచ్చినా ఛస్తే తిరిగి రాదు.

వాతావరణ శాఖంటూ పేరుకొకటున్నా.. తడి బట్టలెప్పుడు మేడమీద ఆరేసుకోవాలో  చెప్పేందుకు తప్ప దాంతో  ప్రయోజనం సున్నా. బెస్తోళ్ళని  సముద్రంలో కెళ్లొద్దని చెప్పేందుకే అన్నేసి లక్షలు   వేతనాలుగా జనం డబ్బు  దొబ్బ బెట్టాల్నా!  ఎప్పుడు ఎన్నో నెంబరు జెండా  ఎక్కడెట్లా ఎగరేయాలో చెప్పేందుక్కూడా దానికున్న పరిజ్ఞానం సందేహమే సుమా! లాజికల్గా చూస్తే  అసలు మెటీరియోలాజికల్ డిపార్టుమెంటుకున్న హక్కే ప్రశ్నార్థకం! ఏ  మెట్టుగూడా వార్డు మెంబర్ని చాటుగా గోకినా చాలయ్యా..  చటుక్కున చెప్పేస్తాడు వాలు చూసి  జెండా మార్చేసే చమత్కారాలను గురించి.. చాట భారతమంత!

వరద వురవడిలో  పడి కొట్టుకు పోయే సగటు జీవుల్లో ఎట్టి గడ్డు పరిస్థితుల్లోనైనా పార్టీని గట్టెక్కించే  గట్టి ఓట్లు  తట్టెడుంటాయి. ఎన్నికల వరకైనా ఈ వానలు, వరదల నాపుకోలేకపోతే అన్ని పార్టీలకి ఒకే రకంగా   తట్టుకోలేనంత నష్టం. ఒక్కో శాల్తీకి రెండేసి ఓట్లు రాయించున్న పార్టీలకైతే ఆ ట్రబుల్.. డబుల్!   

కాకపోతే గమనించారో లేదో..   ప్రతీ కారుమబ్బుకీ ఓ మెరిసే వెండి అంచూ తప్పకుండా ఉంటుందంటారు. ఈ అతివృష్టులెంతలా  బీభత్సాలు  సృష్టించినా .. ఆ ప్రకృతి విపత్తు నుంచీ  'విత్తూ' మొలకెత్తే అదృష్టం కద్దు.  నష్టనివారణ నిమిత్తం  కేంద్రం విదిల్చే చిల్లర నిధులు పార్టీ చిల్లరకేడర్ టెంపర్మెంటు  జబ్బుకి టెంపరవరీగా మంచి మందు!  

కుండపోతలు ఆగకుండా పడే చమత్కారాలు  యాగాల నిండా  బోలెడున్నాయ్.! సడే గానీ..  పడే పడే ఈ తరహా కుంభవృష్టుల్ని అలాగే ఆపేసే మంత్రాలు  ఏ తాంత్రిక శాస్త్రాల్లో  దాక్కునున్నాయో.. ముందా తంత్రాలన్నీ   తొందరగా  తెమల్చండయ్యా పంతుళ్లూ!  అందాకా ఈ జలప్రళయాన్నెలాగో ఆపద్ధర్మంగానైనా ఆపేయించుకోచాలి ముందు. ఏ కోర్టు గుమ్మం ముందు  వేళ్లాట్టానికైనా గవర్నమెంటు ప్లీడర్లు సిద్ద్గంగా  ఉండాలి!

నేరుగా ప్రభుత్వాలే  వ్యాజ్యాలు వేస్తుంటే న్యాయస్థానాలకు అదేదో నేరంలా తోస్తోందయ్యా ఈ మధ్య మరీను! పొలం, పుట్ర..  కొంపా గోడూ సర్వం కొట్టుకు పోయిన ఏ సన్నాసి అన్నదాత అడ్రసో వెదికి పట్టుకోండి! అలగాగాళ్లని అడ్డు పెట్టుకొనైనా సరే  అడ్డూ ఆపూ లేకుండా  అతివృష్టి సృష్టించే ఈ  వరుణ దేవుడి మీదో దావా పడేయాలి ముందు! ‘స్టే’ తెచ్చుకుంటే తప్ప ఎంత గొప్ప సుపరిపాలనైనా స్టేబుల్ గా ఉండలేని దౌర్భాగ్యంరా ద్యావుఁడా ఈ దేశంలో!

మధ్యంతర ఎన్నికలు ముంచుకొచ్చేస్తున్నాయ్! జమిలి ఎన్నికలూ అందరి  ఆలోచనల్లో తెగ  నలుగుతున్నాయ్! నోట్ల రద్దు ఫటింగు, జి.ఎస్.టి ఫిటింగు, సీనియర్ల సపరేట్ మీటింగు,  నల్ల డబ్బు దేశాల్దాటింగు, కాలుష్యాల కాటింగు, అమెరికనుద్యోగాల కటింగు .. కుల మతాల మధ్య ఫైటింగు!  కొంప కొల్లేరయిపోక  ముందే ప్రజల  ఓట్ల ప్రవాహాన్ని పార్టీలు పంటమళ్లకి మళ్లించుకోవాలి ముందు. ఓట్లేసే క్రౌడ్ క్రోధం క్లౌడ్స్ మీదకు అలాగే  మళ్లుండాలంటే.. అందుకో పాట!

‘వానా వానా వల్లప్పా!

నీకూ నాకూ చెల్లప్పా!’

-కర్లపాలెం హనుమంతరావు

*** 

(ఆంధ్రప్రభ- సుత్తి మెత్తంగా కాలమ్- 14, అక్టోబర్, 2017 సంపాదక పుట ప్రచురితం)

  

దోమాకలాపం - వ్యంగ్యం- సుత్తి మెత్తంగా- ఆంధ్రప్రభ కాలమ్-

'దేశంలోని దోమలన్నింటినీ వెంటనే నిర్మూలించాలి. ఆ దిశగా  సత్వరం  చర్యలు చేపట్టాలి. అలా అని కేంద్రాన్నిప్పుడే  ఆదేశించాలి!’

‘బాగుందిరా బాబూ నీ దోమాకలాపం! ఈ మధ్యో  పనిలేని  పెద్దమనిషి.. దినేష్ లోష్ ధన్ అనుకుంటా ఆ మహాశయుడి నామధేయం..  సర్వోన్నత న్యాయస్థానాన్నిలాగే ఆశ్రయించాడు.. అదేం మాయ రోగం? రోగ పరీక్షల వంకతో రోజూ  డయాగ్నస్టిక్ సెంటర్లెన్ని డ్రమ్ముల్తో  జనాల  నెత్తుర్లలా తోడిబోస్తున్నాయో! వాటి నడ్డుకునే నోరెవరికీ లేదు గానీ.. పాపం.. నోరూ వాయా లేవని కాబోలు.. ఈ పిచ్చి దోమల మీద మాత్ర మీ  పైత్యకారీ దాడులు! ఒక్క దోమ పీక పిసికినా దేశాని కెంతరిష్టమో.. తెలిసిడిస్తేగా మన తెలివి తక్కువ బుర్రలకీ!'

'దోమలు రకరకాల రోగ కారకాలు బాబాయ్! వాట్ని చంపవతల పారేయక చట్నీలు.. సాంబార్లూ.. చేసుకుని ఇడ్డెన్లు, దోశల్లో  నంచుకు  తినమంటావా ఏందీ..  విడ్డూరంగా!'

'దోమల్లోదీ మన నెత్తురేరా బాబీ! వాట్ని చంపేయటమంటే మనల్ని మనం చంపేసుకోవడమే కదా!’

'ఓహో.. అదా నీ బాధా? దోమలెంత వృధ్ధయితే మనమంత అభివృద్ధయిన్నట్లు  లెక్కా? భలే!'

'ఆ తిక్క కూతలే వద్దనేది! లోపలుంటే మన వంట్లో.. బైటుంటే దోమల వంట్లో!  అలాగుండాలబ్బీ దోమల్తో మన  రక్తబంధాల్లెక్క! నోట్లకట్ట లెన్ని వేలైనా పారేయ్.. వెల కట్టలేనిదిరా మన ఒంటి రక్తబ్బొట్టు!  రక్తాలతో లెటర్లు  రాస్తే తప్ప ఏ లైలా లవ్ రాస్తాలకు లైను క్లియరివ్వడం లేదని లబ్బుమంటున్నార్రా మీ తుంటరి  మజ్నూలు! ఆ బాహుబలి మార్కు  వీర తిలకం సీన్లు తిలకించు! బొటనేలు తెగ్గోసి బొటబొటా కారే  రక్తాల్తో నుదుట బొట్లు దిద్దినప్పుడే కదబ్బీ.. ఆ అబలా ప్రేక్షకులలా లబలబలాడేస్తూ కరుణ రసం సీన్లంత భీకరంగా పండించిందీ?   అవన్నీ ఒహెత్తు.. రాజకీయాల్లోని రక్తం చుక్కొహెత్తు! మాటకు ముందు..  'ఆఖరి  బొట్టు వరకూ జనం  కోసవేఁ నా నెత్తురు యావత్తూ   ధారపోసేదం'టూ వత్తి వత్తి మరీ రక్తం సీన్లు   రక్తి కట్టిస్తేనే కదా .. పెద్దాళ్లకో నాలుగోట్లు పక్కోళ్ల కన్నా ఎక్కువ ఓట్ల పెట్టెల్లో రాలిపడేది? మనుషులకంత ప్రియమైన బ్లడ్డు మరి మస్క్విటోలకు మాత్రం లడ్డూ కాకుండా.. గడ్డు జాంకాయవుతుందేవిఁట్రా ఎర్రి నాగన్నా? ప్రాణాంతకాలని తెలిసీ మళ్లా  మళ్లా ఉగ్రవాదులకు మల్లే మన బాడీల మీదన్ని సార్లు దాడులెందుకు  చేస్తాయో.. పాపం.. దోమలు! కొద్దిగానైనా  దయాదాక్షిణ్యాలు చూపించద్దా..  బుద్ధి తక్కువ మనుషులు!'

'నిర్దాక్షిణ్యంగా కుట్టి చంపే దోమల మీదనా బాబాయ్ దయా దాక్షిణ్యాలు!'

'కాస్త నిర్మాణాత్మకంగా కూడా ఆలోచించండిరా కంగారు పడకుండా! మశకాలకేమన్నా మనకులాగా మెగా స్టార్ చిరంజీవి టైపు  బ్లడ్డుబ్యాంకు డోనర్లున్నారా? నిర్మూలించేసెయ్యాలన్న యావే తప్ప.. పిచ్చి దోమల మూలకంగా వచ్చి పడే లాభాల సంగతెవరూ ఆలోచించరా? దోమా.. గీమా కుడుతుండబట్టే ఇన్నేసి రోగాలూ రొప్పులు! వాటి నిదానం  కోసం ఆసుపత్రులు! అవి కట్టుకోడం కోసం బ్యాంకప్పుల తిప్పలు. కట్టించినాక   సిబ్బందితో ఇబ్బందులు.. జీతభత్యాలు.. కరువు భత్యాలు చాల్టంలేదు.. పెంచాల్సిందేనంటూ ఆందోళనలు!   అందు కోసంగానూ ఏర్పాటయ్యే పోటా పోటీ  సంఘాలు! గుర్తింపు కోసం వాటి  మధ్య పోట్లాటలు! ప్రభుత్వాలతో నిత్యం కాట్లాటలు! పోలీసులొచ్చి వేసే లాఠీ పోట్లు! చివరాఖర్న కదా  సర్కారు పెద్దలతో భేటీలు! ముఖ్యమంత్రులే మిగతా ముఖ్యమైన పన్లన్నీ పక్కన పారేసి  రంగ ప్రవేశం చేస్తే తప్ప.. '

'ఉండుండు బాబాయ్.. ఊపిరాడ్డంలా ఇక్కడ!  బోడి దోమ కుట్టుళ్ల వెనకాల ఇంత మెగా మూవీ స్క్రీప్టుంటుంటుందా? అయ్య బాబోయ్..'

'దిసీజ్ జస్ట్  ఫ్రం సంక్షోభం సైడ్.. మై బోయ్! అటు సంక్షేమం సైడూ చూడు! దోమలే లేకుంటే డెంగ్యూ లేదు. మలేరియా రాదు, మెదడు వాయదు. చలిజొరం.. నిమ్మోనియా.. ఫ్లూ.. ఎట్సెట్రా.. ఎట్సెట్రా రోగాల  ఇన్ఫ్లుయన్సులూ  ఉండి చావవు. ఏవీ ఉండనప్పుడు సర్కారు కొలువులూ ఉండవు. ఉన్న    కొలువులకూ  సిక్ లీవుల్లిస్టులు మరీ అంత  పొడుగుండవు. రోగం వంకతో  డుమ్మా కొట్టిసి ఏ క్రికెట్ ఒన్డేకో.. మహేష్ బాబు మ్యాట్నీషోకో.. వెళ్లే వీలసలే ఉండదు. 'ఆరోగ్యశ్రీ.. ఈ భోగశ్రీ' లంటూ  సిరి వచ్చి పడే  పథకాలనేకం ఒక దానెనకాల ఒకటి తరుముకొంటూ వచ్చి పడే అవకాశాలూ ఉండవు! వాటి బిల్లుల కింద రాలిపడే రాబళ్లు   రాబట్టే సౌకర్యా లసలుండవు. సర్కారు దొరలకు  చేతి నిండా పన్లుండవు. చేతుల్లో పడే పైసలుండవు.  పైసల్రాలని కొలువులు కంచి గరుడ సేవలే కదట్రా! మరింకెవరికిరా పిలగాడా ప్రజాసేవమీద ఇప్పటంత    ఇంట్రెస్టు?   కిరికిర్లవీ ఇవీ  చేసేసి కమీషన్లు దండుకునే దళారీ దండ్లు దిండ్లేసుకునలాగే ఆఫీసుల చిడీల మీద  కునికేస్తాయా చాదస్తం కాకపోతే!   తాయిలాలు దక్కే వేరే కార్యాలకు   వలస పోతాయ్! దళారీ దండ్ల దార్లన్నీ మూసుక పోయాక  పైవాళ్ల  పుట్టి నట్టేట   నిండా మునిగి నట్టేగా! సుపరి పాలనా కుదరక.. సుపారీ పాలనా కదలక.. శిలలా  ప్రజాస్వామ్యమలా  స్తభించి పోతే .. దాని బాగోగులు గట్రా చూసే మిగతా మూడు మూల స్తంభాలూ..  మూలుగుతో మూలబడాల్సిందే బాబీ.. ఖాయంగా!'

'అయ్య బాబోయ్! ఒక్క కుయ్యాఁ  దోమను చంపితేనే  ఇన్నిన్ని అనర్థాలా బాబాయ్ మన ప్రజాస్వామ్యానికీ? మంచి ముక్క చెవిలో వేసి మా  కళ్లు మా బాగా తెరిపించావ్! నయ్యం!  ఇంటి దయ్యం పోరు పడలేక ఇంకా ఏ గుడ్నైటో.. హిట్టో.. ఇంట్లో కొట్టాలని .. ఇదిగో.. ఇప్పుడే..    కొట్టుకు బైల్దేర్తున్నా!'

'ఒక దోమను తరిమితే  మరో దోమ రాదుట్రా పిచ్చి సన్నాసీ కుట్టి చంపేయడానికి?!   దోమలనేవే లేకుండా ప్రక్షాళన  చేసేస్తే ఈ హిట్లూ.. కిట్లూ గట్రాలమ్ముకొనే కొట్లన్నీ బజార్న పడిపోవతాయా.. లేదా? అసలే పెద్దనోట్ల రద్దుతో చితికి పోయున్నాయ్ చిన్నా చితకా వ్యాపారాలన్నీ!    నువ్వూ ఇప్పుడీ దోమల ప్రక్షాళనంటూ నూతన  సంస్కరణలగ్గానీ  తెర తీసేస్తే.. లేక్స్ అండ్ క్రోర్స్ పోసి  పెట్టారే పాపం    దోమ్మందుల  కంపెనీలు.. ఓవర్ నైటా సీమ దొరల బ్యాచంతా  దిక్కూ దివాణం లేకుండా కుప్పకూలిపోదుట్రా! దోమల మీదిట్లా  సర్జికల్ దాడులు పక్క పాకిస్తోనోడి కుట్రలేమో.. విచారించుకోండి ముందు!’

'ప్లీజ్.. ప్లీజ్.. ఆపు బాబాయ్! పాడు నిద్ర. రాత్రి కాకపోతే పగలు పోవచ్చు. ఆఫీసులో అయితే అస్సలు ఇస్యూనే కాదు. ఇంటి పట్టునున్నా ఇంటావిడ పోరు ముందు ఈ దోమల సంగీతమే వీనులకు విందు!’

'గుడ్ ఐడియా!  వార్తలు రోజూ చూస్తూనే ఉన్నావుగా?  రాత్రి రాబరీలు ఓ రేంజిలో పెరిగి పోతున్నాయ్!  దోమల్తో సావాసం సహనంతో చేసావా..  ఇంటి కాపలా సమస్యా సామరస్యంగా తీరిపోతుంది. ఈ రోజుల్లో కుక్కల్నీ.. గూర్ఖాల్నీ.. పోలీసోళ్ళ  పెట్రోలింగుల్నీ నమ్మేందుకు లేదబ్బీ! ఎవడి సొత్తుకు వాడే కావలి.  అందుకైనా  దోమల తోడు    కావాలి. పనిలో పని! దేశవాళీ  సంగీతంతో  పరిచయమూ పెరుగుతుంది.  కొన్ని దోమలు కుడితే కేన్సరు కూడా దరి చేరదంటున్నారా.. ఫారిన్  సైంటిస్టులు! ఏ దోమ కొండెలో ఏ మందు దాగుందో! కదలకుండా  బబ్బో..  అదేరా సుబ్బరమైన పని!'

'ఎట్లా బాబాయ్? చెవిలో ఒహటే సొద!'

'ఏడ్చావ్ లే! నీ  టీవీలు, సినిమాలు, రోడ్లమీది రొద బళ్ళూ, సభల్లో మన నేతాజీలు  కూసే  కుళ్ళు కూతల కన్నానా?! దోమల సంగీతంలో ఓ  అందమైన లయుంది నాయనా! వింటూ బబ్బున్నావా.. ఇట్టే తెల్లారుతుంది! అందాకా  ఇంద..  చిడతలు! త్యాగయ్యగారి  కీర్తనల ఆలాపనలందుకో! 'బంటు రీతి కొలువు ఈయవే .. రామా!'

‘రామా కాదు బాబాయ్! దోమా!  బంటు రీతి కొలువు ఈయవే.. దోమా!’

‘బాగుంది.. బాగుంది.. నీ దోమాకలాపం!’

-కర్లపాలెం హనుమంతరావు

***