హాయ్! నా పేరు నాలుక. పేరు పలకడం తేలిక. కానీ, నాతో పలికించే మాట నిలుపుకోవడమే కష్టం. గత్తర పడి నోరు జారి, ఆనక తత్తరపడి నన్ను కరుచుకున్న నేతలు చరిత్రలో కోకొల్లలు.
నోటిలో నేనే లేకపోతే నోటా లెక్కల్లో కూడా ఎక్కలేని అర్భకులు నేతలంటూ ఆర్భాటం చేసే అస్తవ్యస్త ప్రజాస్వామ్యం నాయనా నేడు నడుస్తున్నది! ప్రజల బాగు ప్రణాళికలకు బదులు, జనాలపై రువాబు చేసే నాలుకలకే నేటి రాజకీయం మీఠా పాన్. మాట దూకుడు ఓ దశ దాకా ‘అదుర్స్’ అంటూ కిక్కే ఇస్తుంది! ఆ దురుసుతనం ముదిరితేనే ఇబ్బందేమిటో తెలుస్తుంది! నోట్లో నాలుక లేకపోతేనేమి, ఓటరు అసహనం పెచ్చు మీరితే వాచాల నేత పరిస్థితి వాటర్లూ యుద్ధంలో నెపోలియన్ సామెతే!
నరం లేదనే కదా మా నాలుకలంటే చాలా మందికి అంత చులకన! పని చులాగ్గా అవుతుందని మహాశయా ప్రకృతి మాకిచ్చిందా వరం! ఈ మిడిమేళపు నేతలదే కావరం! మా బలాన్ని బలహీనంగా మార్చేస్తున్నది ఈ దౌర్భాగ్య నేతాగణమే. బలహీనులను , అమాయకులను , నీతివంతులను, నిరపరాధులను, నిష్కల్మషులను, జంతుజాతిని, ఆడవారిని.. అందరినీ మాచేత అసందర్భంగా అల్లరి చేయించడమే! జనం తలరాతలతోనే ఈ తరహా నేతల పిచ్చికూతల ప్రేలాపన! రోత! గతంలో వాతానికి విరుగుడుగా నాలుక పై వాతలేసేవారు! ప్రజావళే మళ్లీ ఆ తరహా మొరటు తరహా వైద్యానికి పూనుకోవాలి! నాలుక జాతి పక్షాన చెబుతున్నా! మాకు నో ప్రాబ్లం! పజల బాగు కోసం బాధ ఎంతదైనా భరించేందుకు సిద్ధం. దుష్టులతో జట్టు కట్టినందుకు మాలోని కొన్ని నాలుకలు ఆ మాత్రం శిక్ష అనుభవించక తప్పదు !
నలుగురిలో మంచోడన్న గురి కుదరడానికైనా నాలుక చేత ఇష్టంగా పనిచేయించుకోవడం. . అదో కళ నాయనా! నా పనితనం మీదనే నేతల పెత్తనం ఎంత కాలమో తేలేది. జనంలో చీలికలు తేచ్చే నీచత్వం నేతలదే! ప్లీజ్.. మా నాలుకలకు మాత్రం ఆ పాపం అంటగట్టవద్దని ప్రార్థన!
అడ్డమైన గడ్డీ గాదానికి అశపడేది ఈ నాయకుల బానకడుపులు . అవి కుతి తీరా మెక్కి అరగనప్పుడు అజీర్తిరోగం పట్టుకునేది మాత్రం మా నాలుకలుకు . కక్కుర్తి నేతల అజీర్తి రోగానికి వైద్యుడి ముందు ముందుగా మేమే బైటపడాలి. అప్పుడు చచ్చే సిగ్గేస్తుంది. ఛీఁ! చిల్లర నేతగాడి నోట్లో నాలుకలా పుట్టే కన్నా ఏ నల్లనాగు పడగలోనో చల్లంగా పడుంటడం మేలు!' అని నిట్టూర్పొస్తుంది. పుట్టించే నాథుడికే నన్ను పట్టించుకునే దయ లేదిప్పుడు. దుష్టనేత మీద ఘడియకో ఫిర్యాదాయ ! ఎన్నని సరిచేయగలడు ఎంత దేవుడయితే మాత్రం! పూరా డీలా పడిన ఆ దేవుడి దుస్థితి చూస్తే ‘ఓ.. మై.. గాడ్!’ అని బావురమనకుండా ఉండలేడు ఎవడూ!
ఎక్కడ ఎందుకు ఎట్లా ఏ తీరున మెలగాలో... ఆ తరహా మాటా-మంతీ నడిపే శిక్షణ శిబిరాలేవీ మా నాలుకలకు ఎవరూ ఏనాడూ నిర్వహించిన పాపాన పోలేదు ఎవరూ! అనుభవాన్ని బట్టి సమయజ్ఞత ప్రదర్శించే నైపుణ్యం మాకు ప్రకృతి ప్రసాదించిన పుణ్య౦. చట్టాన్ని కూడా తన పని తాను చేసుకుపోనీయని దుండగులు కొందరు దుష్ట నేతలు .. మా నాలుకలను మాత్రం మా మానాన ధర్మం మమ్మల్ని సక్రమంగా నిర్వహించుకోనిస్తారనేనా? కలలో మాట నాయనా! అక్కడికీ ఫిర్యాదు చేద్దామనే ఉద్దేశంతో న్యాయదేవత వద్దకు వెళ్లామా! హక్కుల నేతల నోటి నుంచి మా మొలర్ ఆలకించినా ఆ తల్లి మాత్రం ఏం చేయగలుగుతుంది? ఆమె నోటి నాలుక పరిస్థితి అంతకు మించిన దైన్య ౦! .. అంతా మా ఖర్మం!
ఒకరి నోటి నాలుకను ఒకడు తెగ్గోస్తామని ఎగురుడు! నోరు మొత్తాన్నే ఏకంగా మూయిస్తామని మరోడి మొరుగుడు! అన్ పార్లమెంటరీ భాషే ఇన్ పార్లమెంటును మించి చట్టసభలు జరిగే రెణ్ణాళ్లూ ఇంటా బైటా చెవులను దిమ్మెక్కిస్తుంటే.. తలెక్కడ పెట్టుకోవాలో తెలీనంత బాధ మా నాలుకలకు!
ఎవరి నోట్లో ఉంటే ఏమిటిట! అందరి పుట్టిల్లూ ఒకే అమ్మ కడుపు కదా! పార్టీ కో మాదిరి మాటలు మార్చేస్తామని మా మీదనే మళ్లీ అభియోగాలు! కుల మతాలు ఏమైతే ఏమి ? .. ఏ నాలుకకైనా చక్కని పలుకే అలంకారం. తెగల పేరుతో నాలుకలు తెగ్గోసుకొనే దశ మనిషి దాటి యుగాలయింది! అయినా లింగం, రంగు, నలుపు, తెలుపు అంటూ వీరంగాలా! ప్రతి శాల్తీలో కనిపించేది ఒకే రంగు నాలుక కాదా! పిచ్చి కూతల బాపతు నేతలకు అందుకే నోటిలోని నాలుక తెగ్గోసయినా ప్రజాస్వామ్యంరుచి చూపించాలి .
'ఎన్ని సార్లని మా మొత్తుకోళ్లు! ప్రాథమిక అవసరాలు మనుషలందరికీ ఒకేటేనుండీ ! జన్మ ఇచ్చిన అమ్మకు చెందినదే స్త్రీ జాతి. కనడం, పెంచడం, సహోదరిగా ప్రేమను పంచడం, సహచరిగా జీవితాంతం బరువు బాధ్యతలు పంచుకోవడం.. సుదతి ఎంత సహనంగా చేస్తో౦దో సృష్టి ఆరంభం నుండీ!ఆడజాతిని అట్లా 'అమ్మనా.. ' బాషలో చెండుకుతినడం దుర్మార్గం! దుశ్శాసనులు, కీచకులు, దుర్యోధనులు చచ్చారన్న మాట నిజం కాదేమో ! ఇప్పటి దుస్థితి అట్లాగే అనుమానం వస్తుంది !
మనిషి బల్లి కాదుగా ! నాలుకతో పురుగులనేరుకు తినడానికి! ప్రకృతి ప్రసాదించిన వరం నాలుక!కేవలం తపాలా బిళ్లలు అంటించుకోవడం కోసమేనా ? ఇలాతలంపై జనాల కిచ్చిన స్వర్గ లోక స్థాపన హామీ సైతం నేరవేర్చడం నాలుక బాధ్యత. తెలివి మీరిన నేతల నోళ్లు మూత పడే వరకు ఓటరు మహాశయా ఓపికగా నీ ప్రజాస్వామ్య ధర్మం నిర్వర్తించు! మనో వేదనతో మేం నాలుకలం చేసుకునే నివేదన ఆలకించు!
- కర్లపాలెం హనుమంతరావు
23 -12 -2020
బోథెల్, యూ.ఎస్.ఎ
