‘బండ’ చదువులు- ఆంధ్రప్రభ- సరదా కాలమ్- సుత్తి.. మెత్తంగా

చంద్రన్నో.. కే సీ ఆరన్నో.. కేకేసి మరీ కానుకలు కుక్కేసి  పండగ పండక్కీ పంచేసే సంచీలు అంటే పబ్లిక్కి ఎప్పుడూ  మా లావు కిక్కే. బళ్లకెళ్లే పిల్ల బుడంకాయలకే  బ్యాగులంటే  భుజాలమీద ఏళ్లాడే బేతాళుల్ల లెక్క! ఒక్కో బుక్కులబ్యాగు పది గాడిదలు  కల్సి ముక్కి మూలిగినా  లాగలేనంత  తుక్కు బరువని ఒకటి. సమాధానం తెల్సి చెప్పినా.. తెలీక గమ్మునున్నా తల వెయ్యి వక్కలయ్యే భూతాల యవ్వారమని.. ఇంకోటి! అన్నీ పితలాటకాలే!

బ్రహ్మదేవయ్యకు బద్ధకం బలిసిందో.. చదువులమ్మకే చతుర్లెక్కువయ్యాయో? తెలుగు రాష్ట్రాలు రెండింటిలో బడి బుడతలిప్పుడు స్కూలుబుక్కు బ్యాగుల్ని చూస్తే చాలు..  గబుక్కుమని జడుసుకుని జొరాలు  తెచ్చేసుకుంటున్నరు!

తొమ్మిది, పది తరగతుల  సంచీల బరువు ఆరు కిలోలకి మించి  ఉండద్దన్నది కదా సర్కారు సార్ల హుకూం! అయినా లిఫ్టు లేకుండా మూడో అంతస్తు తరగతి కొండకు  రోజూ మాదిరి గేసుబండ బరువుండే పుస్తకాల సంచి మోసుకుంటూ ఎదురు దేకలేక .. పాపం.. ఓ లేత  ప్రాణానికి నిండా నూరేళ్లు నిండినాయంట!

అడ్డమైనోళ్ల మైల కుప్పలు.. రెండు పూటలా రేవులకీ మోసే ఓపిక లేక ‘ఓఁ..ఓఁ..’అంటా ఓండ్ర పెట్టే   అడ్డగాడిద లిప్పుడు.. పేరు గొప్ప ప్రయివేటు బళ్ల పిల్లకాయల రొప్పులు వినీ వినీ  కన్నీళ్లు  తెగ కార్చేస్తున్నయి! ‘అడ్డగాడిదలుగానైనా పుట్టుడుకు రడీనే! బాబ్బాబూ.. ఆ తెలుగు రాష్ట్రాల్ల బడిపిల్లకాయలకు మల్లే మాత్రం పుట్టించి మమ్మల్ని శిక్షించకండి మహాప్రభో!’ అంటా  సృష్టికర్త కాళ్లా వేళ్లా పడి తలలు మోదుకుంటున్నాయంట.. బ్రహ్మలోకం  టాకు!

సత్యకాలం కాబట్టి హిరణ్యాక్షుడు భూగోళం మొత్తాన్ని చాపలా చంకలో చుట్టేసి చులాగ్గా తారుకున్నాడు. ఈ కలికాలంలో ఆ ఘనకార్యం రిపీట్ చేసి చూపించమనండి! బుడ్డ వామనుడు తొక్కేసిన బలిదేవుడికి మల్లే పాతాళం అడుక్కి  అణిగి పోవుడు ఖాయం!

పేటకో కార్పొ’రేటు’ బడి. బడికో పాతిక తరగతులు. తరగతికో వంద బెంచీలు. బెంచీకో పదిమంది మందమతులు. మతులెంత మందంగా ఉంటేనేమి స్వామీ.. వీపున మోసే పుస్తకాలు మాత్రం వందకు ఒక్కటి తగ్గినా డొక్కచీరుడు ఖాయం. చూసి రాసే బుక్కయినా సరే.. వీశకు వీసమెత్తు  తక్కువ తూగినా..  మోసే బిడ్డడి   వీపు మీద విమానం మోత మోగుడు ఖాయం! ‘మోత’ మోగుళ్ళుంటేనే చదువులు మోతెక్కేలా సాగుతున్నట్లు కన్నవారిక్కూడా అదో దిక్కుమాలిన లెక్కయిపోయిందిప్పుడు.. పిల్లకాయల ఖర్మ!

 డబ్బు బళ్లు, ఉబ్బు బుక్కులూ ఉనికిలో లేవు కాబట్టే ఆదికాలంలో ఆ అట్లాసు రాక్షసుడు ఎట్లాగో ముక్కుతూ మూలుగుతూ  భూగోళాన్ని మోయగలిగాడు! అదే ఈ కలికాలంలో? గోళం మొత్తం అఖ్కర్లే! మొదటి గ్రేడు బుడతడి బేక్-బ్యాగు ఎత్తి వీప్మీద పెట్టుకు నడ్డిమీద స్టడీగా నిలబడమనండి! చడ్డి  తడుపుకోకపోతే .. నేరుగా ఒలంపిక్సు  వెయిట్ లిఫ్టింగుకి పంపేసెయ్యచ్చు! వేరే శిక్షణెందుకు? మనీ వేస్టు!

వేదాలు ఏవో నాలుగు కవిల కట్టలు కాబట్టి.. నీట్లో బుడుంగున పడ్డా.. ముట్టెతో ఎత్తి వరాహావతారం పరువు నిలిపాడు హరి నారాయణుడు.  అదే ఇప్పటి ఏ ప్రీ-ఎల్కేజీ పిలగాడి పుస్తకాల సంచీ అయితేనో?    పది కాదు మాష్టారూ.. మరో పది అవతారాలెత్తినా  బ్యాగోద్ధరణ ఆ భగవంతుడి శక్తి సామర్థ్యాలకి మించిన   పెద్ద అగ్నిపరీక్షయుండేది నిశ్చయంగా!  

అప్పట్లా అష్టాంగ పంచాంగాలు.. అష్టాదశ పురాణాలా అత్యంత  సునాయాసంగా అవపోసన పట్టేసేందుకు లేదు.  ఇప్పటి ఫస్టు గ్రేడు సైన్సు గైడైనా చూడండి.. మంచుకొండను మించి బరువుంటుంది!   రావణాసురుడికి.. పాపం.. ఏ ప్రయివేటు బడి  పుస్తకాలూ మోసే అలవాటు లేదు. కాబట్టే సీతా స్వయంవరంలో ఆ పాత పడ్డ శివధనుస్సును సైతం రెండు చేతులు వాడినా ఇంచైనా  కదల్చ లేక  కుదేలయిండు. నిండా పదహారేళ్లయినా పండని  పసి బాలుడు రాముడు. అయితేనేమి? ఆ సామి  భారీ శివధనస్సును ఎలా అంత చులాగ్గా ఎత్తి  పుసుక్కని ఇలా నడిమికి విరిచేసాడంటారూ? బాల రాముడిది విశ్వామిత్రుడి కార్పొరేట్  స్కూలింగు మరి! 

సాందీపని బడిచదువులకూ భారీ బరువుబ్యాగుల్తోనే పని! కాబట్టే గోవర్థన గిరినంత సులభంగా కొనగోటి పైన నిలబెట్ట గలిగిందా పశువుల కాపరి!

ఈ వెయిట్ లిఫ్టింగు స్టడీసుకి భయపడే  సత్యభామ అలా చిన్నబడికి పోవడానికి పాలుమాలింది  పోతన్నగారి భాగోతంలో. బాల్యంలో ఏ ఎల్కేజీ బడికి పోయున్నా  ఇంట్లో ఏ మూలనో ఆ పుస్తకాల సంచీ పడుండేది కదా? నగా నట్రాను మాత్రమే  నమ్ముకొన్న ఆ కొమ్మ పుస్తకాల బ్యాగు సమయానికి దగ్గర లేకే  అలా భంగపడింది. బుక్కుల బ్యాగ్గాని సిబ్బెలో పడేసి ఉంటే,, కొండనెత్తిన గోవిందుడైతేనేమి బండబ్యాగు బరువుకి పైకి తూగుండేవాడే. రుక్మిణమ్మ తులసాకూ   ఓ సాకనిపిస్తుంది. నిజానికది ఆ పట్టమహిషి చిన్నప్పటి బడి సంచి ఎందుక్కాకూడదూ?

అంత లావు గ్రామర్ నాలెడ్జి కెంత మందం రన్ అండ్ మార్టిన్లు అరగదీశిండో పాపం  ఆంజనేయుడు!  చిన్ని సంజీవని  మొక్క తెమ్మంటే మొత్తం కొండనే పెకిలించుకొచ్చాడా మహానుభావుదు. వృథా పోతుందా బాల్యమప్పటి   ఆ బండసంచులు మోసి నప్పటి అనుభవమంతా!

సతుకులెంత  పెద్దవైనా సతక్కో.. మంచిదే భయ్యా! కానీ  సంసారమంటూ ఒహటుండాలి.. తప్పదు గదా ఎంత లావు   సన్నాసికైనా! ఇప్పుడిట్లా ఎంతలా దెప్పి దెప్పి మాట్లాడుతున్నా.. ముందు ముందు ఎలాగూ గ్యాసు బండలు మోయక తప్పనప్పుడు.. ఇదిగో..  ఇంతప్పట్నుంచే ముందస్తుగా  స్కూలుబ్యాగుమోయుడు తరహా తర్ఫీదు లిప్పిస్తే మాత్రం తప్పేముంది తమ్ముడూ?

అందరికీ ‘ఆఛ్చే దిన్’ అందుబాటుకి  వచ్చే దిన్ .. సచ్చీ బోల్తే తోఁ.. సర్కార్ల నోట్నించే స్పష్టంగా వినబడనప్పుడు.. ముందు ముందు ఏ జీతగాడిగా  బతుకు ‘గాడీ’ నడపాలో ? ‘రేల్ గాడీ’ కాడ ఏ గాడిదగాడి  గబ్బుమూటలు పది రూపాయల కోసం పడీ పడీ మోయాలో? గాడిదమోత లెలాగూ తప్పేది లేనప్పుడు.. తమ్ముడూ!.. గ్రాండ్ లెవెల్లో ‘వెయిట్ లిఫ్టింగ్ స్కిల్స్’  కార్పొరేట్ స్టైల్లో ప్రాక్టికల్సుగ చేయిస్తే తప్పేందో చెప్పుదూ? ఒలంపిక్కు లెవెల్ వెయిట్-లిఫ్టింగు లిస్టుల్లో టెల్గూ పిల్లల్దే ఎప్పుడూ  టాప్ టెన్ ర్యాంకులు. వై? టెల్!  కమాన్! ఆ నైపుణ్యం మొత్తం  ప్రయివేట్ స్కూలుబ్యాగుల పుణ్యమే మ్యాన్! ఒప్పుకోవాలి ముందు.  అందుకే ఆడ బిడ్డలకైనా సరే ‘సిక్స్ పాక్’  కంపల్సరే కార్పొరేట్ బళ్లల్లో. ఆరు సబ్జెక్టులు.. ఇంగ్లీష్, టెల్గు, హిందీ, గణితం, సోషల్ అండ్ సైన్స్! ఒక్కో సబ్జెక్టుకి మళ్లా ఆరేసి  బుక్కులు.. టెక్స్ట్ బుక్, టెస్ట్ బుక్, నోట్ బుక్, గయిడ్, హోం వర్క్, క్లాస్ వర్క్. ఇళ్లకి హోం వర్క్,, బళ్లోకి క్లాస్ వర్క్!  బ్యాలెన్సు బుక్స్ .. తరగతి గది ఆరో అంతస్తులో ఉన్నా.. సన్న సన్నటి నున్నటి జారుడు మెట్లు ఎక్కి  దిగలేక బొక్క బోర్లా పడి ప్రాణాల మీదకి తెచ్చుకొన్నా.. అడుగు ముందుకే వేసే    ప్రాక్టీసు కోసం! పెద్దలకేనా.. పిల్లల చదువు బరువు బాధ్యతలూ? పిల్లలకూ తెలిసిరావాలి  చదువు ‘బరువు’ బాధ్యతలు. అందుకే  ‘బండ’ చదువులు!’

ఈ బండ చదువులు చల్లంగుండా!  పిల్లకాయల భారీ బడిసంచుల బారిన పడే భూగోళం తరచూ కక్ష్యనుంచి పక్కకు తూలుతున్నట్లు ఖగోళ శాస్త్రజ్ఞులు గోల పెడుతున్నరు. ఏదో ఒహటి  చేయాలి వెంటనే! లేకుంటే ఆ భూటాన్ భూకంపాలని మించి ఉత్పాతాలు భూలోకం  మొత్తాన్ని ముంచెత్తేసేయడం ఖాయం. శనిగ్రహమో.. గురు గ్రహమో.. ముందో కొత్త ఖాళీగ్రహం విశ్వాంతరాళాలలో ఎక్కడుందో కాస్త తొందరగా కనిపెట్టండయ్యా శాస్త్రజ్ఞులూ! ఈ భారీ చదువుబళ్లు ఎంత చెప్పినా తలొంచేట్లు లేవు.  ఇహ కట్ట కట్టెసి ఆ కొత్త గ్రహాలమీదకి తోసేయడ మొక్కటే మిగిలిన తొవ్వ! కావాలంటే అక్కడీ కార్పొరేట్ స్టైలు స్కూళ్లు ఎన్నంతస్తుల భవంతుల్లోనైనా లిఫ్ట్లు.. షిఫ్టుల్లేకుండా నిశ్చింతగా నడుపుకోవచ్చు. ఎన్నేసి రకాల ఫీజులైనా సక్రమంగానే వసూలు చేయాలన్న సర్కార్ల  స్ట్రిక్టు రూళ్లు  నిర్భయంగా అతిక్రమించుకోవచ్చు!

ముందీ ‘బండ’ చదువుల నుండి మన లేత బిడ్డల్ని కాపాడుకొందాం.. రండి!

-కర్లపాలెం హనుమంతరావు

(ఆంధ్రప్రభ- సుత్తి.. మెత్తంగా- కాలమ్- 21-10-2017- ప్రచురితం)

 ***

 

వానా వానా వొద్దప్పా- సరదా గల్పిక- సుత్తి మెత్తంగా- ఆంధ్రప్రభ కాలమ్

వర్షాలు దంచి కొడుతున్నాయ్! ఓ రకంగా ఓ.కే నే గానీ తడి బట్టలో పట్టాన ఆరవు. వడియాలెంతకీ  ఎండి చావవు. ఒన్ డే క్రికెట్లు ఓ పట్టాన ‘ఎన్డ్’ అవనే అవవు.

వానాకాలం చదువులని వూరకే వాక్కుంటాం గానీ.. ఈ ఈ-కాలం చదువులకి ఈ ఈడ్చి కొట్టే గాలివానలు  చేసే కీడేముందసలు? జరిగే చెరుపంతా  యజ్ఞాలకి, యాగాలకి, రాజకీయ పార్టీల బహిరంగ సభలకి.   

అతి సర్వత్ర వర్జయేత్! నిజమే కానీ.. ఆ రాజనీతి  అమిత్ షాకి మల్లే  వరుణ దేవుడికీ  వక పట్టాన గుర్తుకు రాదల్లే ఉంది! ఉగ్రవాదుల దాడులన్నా ముందే పసి గట్టుడవుతుందేమో గానీ..  ఉన్నట్లుండి ఆకాశం నుండి నట్లూడి పడినట్లు ఫెటిల్లు.. ఫెటిల్లు మంటూ విరుచుకు  పడే పెద్దోళ్ల  ప్రెస్ మీట్ల మాదిరి బాబూ  ఈ ఉరుములు, మెరుపులు! ఈ ఫెళఫెళారావాల ఆర్భాటాలను ఏ అర్భక జీవులు తట్టుకోగలవు?

ప్రాణం పోకడ్ని ముందస్తుగా పసిగట్టే పరిజ్ఞానం మంచిగా అభివృద్ధయింది. మంచిదే గానబ్బీ..  వాన రాకడ్ని కూడా  ముందే వాసన పట్టే వైనమూ   తెలిసుండాలి కదా! ఇష్టం లేని నియోజక వర్గాల పర్యటనలకని పై నుంచి ఆదేశాకు వస్తుంటాయెప్పుడూ!  ఏ వానపూటో చూసి ఆ ప్రయాణం పెట్టేసుకొంటే.. ఆనకో ‘సారీ’ తో   నిర్భయంగా వాయిదా వేసుకొని  మిగతా సొంత పన్లన్నీ నిశ్చింతగా చక్కబెట్టేసుకోవచ్చు!  

పిడుగు లెక్కడ ఎప్పుడు  పడతాయో ఆ చప్పుళ్లవీ   ముందస్తుగా కనిపెట్టడంలో లేదప్పా   గొప్పతనమంతా! ఎవరు  ఎందుకు  ఎప్పుడూ అట్లా పిడుగుకుట్రలు   పన్నుతున్నారో  పసి గట్టగలిగే సోయి కావాలి ముందు. గాలి వాలును ఎడ్వాన్సుగా వాసన పట్టే మోతగాడేనయ్యా  ఏ ఎదురుగాలి జడివానకైనా ఎదురొడ్డి గొడుగు పట్టి నిలబడగలిగే మొనగాడూ!  

మోదీజీ విదేశీ పర్యటనల్ని మించి, మన ముఖ్యమంత్రుల వరాల జల్లుల్ని మించి  దంచి కొడుతున్నాయిప్పుడు రెండు రాష్ట్రాల్లో పాడు  జడివానలు!  ఈ అర్థాంతర వర్షాల అంతరార్థమేంటో ముందుగా కనిపెట్టాలి. చంద్రబాబు వీడియో  కాన్ఫరెన్సులన్నా వీకెండ్లలో కాస్తంత  వీకవుతున్నాయేమో కానీ.. ఈ విడ్డూరపు వానలకు మాత్రం ఓ శనివారం లేదు.. ఆదివారం లేదు! శనిలా పట్టుకొని సతాయిస్తున్నాయి ప్రతిపక్షాలోళ్ల పిచ్చారోపణల్లాగా!

వాన దేవుడి కింత హఠాత్తుగా ఓవర్ టైమ్మీదెందుకు  గాలి  మళ్లిందో.. ఆ దేవుడికే తెలియాలి! ఎన్నికల జాతర   అయిందనిపించాక  మళ్లీ  మొహాలే  చూపించని ప్రజాప్రతినిధుల తంతే కదా వానదేవుడి తంతు  కూడా! మధ్యంతరం ముప్పు ముంచుకొస్తుందని ఉప్పందిన నేతల మాదిరి ఇప్పుడీ  వానదేవుడిగారి జడివాన దడదడలేవిఁటీ?  ఈ అకాల వరుణ కృపా కారుణ్యాల వెనకాల ఎవరి కక్షా కార్పణ్యాలు దాగున్నాయో!  ఎక్కడో తంతా ఉందే!

నగరంలో తొందర్లో అంతర్జాతీయ స్థాయి  వ్యాపార సమ్మిటేదో జరగబోతుట.. టాకు! ట్రంప్ మురిపాల కూతురు ఇవాంకా ముందుగానీ మన కంపు బైట పెట్టాలన్న కుట్రయితే కాదు కదా!

జగన్మోహన్ రెడ్డి పాదయాత్రలు పెట్టుకొన్నాడొక వంక. జనసేనాని పవన్ కళ్యాణూ పర్యాటనలకని బైల్దేరుతున్నాడింకో వంక. తెదేపా శ్రేణులు తెల్లారగట్టనుంచే కంటబడ్డ ప్రతీ కొంప తలుపు తడుతున్నారు! గిట్టని శక్తులేవఁన్నా కుట్రలూ కుతంత్రాలకు పాల్పడ్డం లేదు కదా కుండపోతల వంకన?

మన నగరాలెప్పుడూ సీమ దొరలకు ‘చీఁ’ అనిపిస్తాయంట! అమెరికా  వాళ్లకంటే ఆ మెరక మీద  హావాయి  దీవులవీ ఇవీ ఉన్నాయని మహా బడాయి!  తెలుగువాడి పరువు నిలువునా  పడిపోతుందన్న సింపతీ ఏమో పాపం..  వరుణ దేవుడుగారు  ఒకింత ఓవర్ కరుణా కటాక్షాలతో  ఏడాదికి సరిపడా నీటి వనర్లను ఒక్క వారం లోపే దిమ్మరించేస్తున్నాడు నగరం నెత్తి మీదిట్లా కుంభవృష్టిలా! అలా గరంగరమయి పోతే ఎట్లా! ఇప్పుడు కాస్కోండి! భాగ్యనగరం మొత్తం హుస్సేన్ సాగరం. షేక్ పేట టు అమీర్ పేట..  ఏ పేటకు టూరేసినా  టోటల్గా  గండిపేట చెరువే! అమెరికాకున్నది  ఆ ఒక్క బోడి  హవాయి దీవే. అదే మరి మన దగ్గరో! బోటు షికార్లు కొట్టే సర్దాలుండాలే గానీ బోర్బండా టు గోల్కొండా తక్ అన్నీ దాల్ సరస్సులే దాదా! బళ్లు ఓడలవడమంటే ఏంటో హైడ్రాబేడుకే వచ్చి చూడాలింక మరి! ఏ వాడ కెళ్లినా లైవ్ లో ఫ్లోరిడా ఇర్మాను మించి.. ఫుల్ ఎంజాయ్  మెంటు గ్యారంటీనయ్యా దొరబాబులూ!

సంబడమే కానీ.. తెరిపి లేకుండా కురిసే ఈ పాడు వర్షాలు రాబోయే ఏ సంక్షోభానికో సంకేతాలయితే కాదు గదా? తెర చాటుగా ఏమన్నా కుక్కలకీ నక్కలకీ మధ్య పొత్తుల కుదుర్తున్నాయో ఏమో కొంపదీసి? ఖర్మ కాలి కప్పల కాళ్ళు కర్ర ముక్కలుక్కట్టేసి ఊళ్లెంట గిట్టనోళ్లెవరూ వూర్కే  తిప్పేయడం లేదు గదా? గాడిదలక్కూడా కార్యాలూ గట్రా జరిపించినా చాలంట..   ఆగకుండా అదే పనిగా కుండపోతలు కురుస్తాయంట! అట్లాంటి  అఘాయిత్యాలకే   తుంటరి మూకలో పాల్పడ్డం లేదు కదా!

శరవేగంతో జరిగే అభివృద్ధిని చూసి ఓర్వలేని వార్గాలేవైనా సిగ్గూ శరం లేకుండా ఏ రాంగు రూట్నుంచో ఋష్యశృంగుడి వారసుల్ని వారాసిగూడా కూడల్లో  దింపి పోయినా చాలు..  దుంప తెంపే వాన తిప్పలు  తప్పవు. తక్షణమే కేసొకటి బుక్ చేసేసి ఏ ఏ.సి.బి కో సి.బి.సిఐ.డి కో అప్పగించేసెయ్యాలి అర్జంటుగా ముందు! కాళ్లకిందకు నీళ్లొచ్చిందాకా ఆగి.. ఆనక కన్నీళ్లు కార్చుకుంటే మాత్రం ఒరిగేదేముంది? ఎవడొచ్చి తుడిచినా కొట్టుకు పోయిన కుర్చీ మళ్లీ ఎంత కొట్టుకు చచ్చినా ఛస్తే తిరిగి రాదు.

వాతావరణ శాఖంటూ పేరుకొకటున్నా.. తడి బట్టలెప్పుడు మేడమీద ఆరేసుకోవాలో  చెప్పేందుకు తప్ప దాంతో  ప్రయోజనం సున్నా. బెస్తోళ్ళని  సముద్రంలో కెళ్లొద్దని చెప్పేందుకే అన్నేసి లక్షలు   వేతనాలుగా జనం డబ్బు  దొబ్బ బెట్టాల్నా!  ఎప్పుడు ఎన్నో నెంబరు జెండా  ఎక్కడెట్లా ఎగరేయాలో చెప్పేందుక్కూడా దానికున్న పరిజ్ఞానం సందేహమే సుమా! లాజికల్గా చూస్తే  అసలు మెటీరియోలాజికల్ డిపార్టుమెంటుకున్న హక్కే ప్రశ్నార్థకం! ఏ  మెట్టుగూడా వార్డు మెంబర్ని చాటుగా గోకినా చాలయ్యా..  చటుక్కున చెప్పేస్తాడు వాలు చూసి  జెండా మార్చేసే చమత్కారాలను గురించి.. చాట భారతమంత!

వరద వురవడిలో  పడి కొట్టుకు పోయే సగటు జీవుల్లో ఎట్టి గడ్డు పరిస్థితుల్లోనైనా పార్టీని గట్టెక్కించే  గట్టి ఓట్లు  తట్టెడుంటాయి. ఎన్నికల వరకైనా ఈ వానలు, వరదల నాపుకోలేకపోతే అన్ని పార్టీలకి ఒకే రకంగా   తట్టుకోలేనంత నష్టం. ఒక్కో శాల్తీకి రెండేసి ఓట్లు రాయించున్న పార్టీలకైతే ఆ ట్రబుల్.. డబుల్!   

కాకపోతే గమనించారో లేదో..   ప్రతీ కారుమబ్బుకీ ఓ మెరిసే వెండి అంచూ తప్పకుండా ఉంటుందంటారు. ఈ అతివృష్టులెంతలా  బీభత్సాలు  సృష్టించినా .. ఆ ప్రకృతి విపత్తు నుంచీ  'విత్తూ' మొలకెత్తే అదృష్టం కద్దు.  నష్టనివారణ నిమిత్తం  కేంద్రం విదిల్చే చిల్లర నిధులు పార్టీ చిల్లరకేడర్ టెంపర్మెంటు  జబ్బుకి టెంపరవరీగా మంచి మందు!  

కుండపోతలు ఆగకుండా పడే చమత్కారాలు  యాగాల నిండా  బోలెడున్నాయ్.! సడే గానీ..  పడే పడే ఈ తరహా కుంభవృష్టుల్ని అలాగే ఆపేసే మంత్రాలు  ఏ తాంత్రిక శాస్త్రాల్లో  దాక్కునున్నాయో.. ముందా తంత్రాలన్నీ   తొందరగా  తెమల్చండయ్యా పంతుళ్లూ!  అందాకా ఈ జలప్రళయాన్నెలాగో ఆపద్ధర్మంగానైనా ఆపేయించుకోచాలి ముందు. ఏ కోర్టు గుమ్మం ముందు  వేళ్లాట్టానికైనా గవర్నమెంటు ప్లీడర్లు సిద్ద్గంగా  ఉండాలి!

నేరుగా ప్రభుత్వాలే  వ్యాజ్యాలు వేస్తుంటే న్యాయస్థానాలకు అదేదో నేరంలా తోస్తోందయ్యా ఈ మధ్య మరీను! పొలం, పుట్ర..  కొంపా గోడూ సర్వం కొట్టుకు పోయిన ఏ సన్నాసి అన్నదాత అడ్రసో వెదికి పట్టుకోండి! అలగాగాళ్లని అడ్డు పెట్టుకొనైనా సరే  అడ్డూ ఆపూ లేకుండా  అతివృష్టి సృష్టించే ఈ  వరుణ దేవుడి మీదో దావా పడేయాలి ముందు! ‘స్టే’ తెచ్చుకుంటే తప్ప ఎంత గొప్ప సుపరిపాలనైనా స్టేబుల్ గా ఉండలేని దౌర్భాగ్యంరా ద్యావుఁడా ఈ దేశంలో!

మధ్యంతర ఎన్నికలు ముంచుకొచ్చేస్తున్నాయ్! జమిలి ఎన్నికలూ అందరి  ఆలోచనల్లో తెగ  నలుగుతున్నాయ్! నోట్ల రద్దు ఫటింగు, జి.ఎస్.టి ఫిటింగు, సీనియర్ల సపరేట్ మీటింగు,  నల్ల డబ్బు దేశాల్దాటింగు, కాలుష్యాల కాటింగు, అమెరికనుద్యోగాల కటింగు .. కుల మతాల మధ్య ఫైటింగు!  కొంప కొల్లేరయిపోక  ముందే ప్రజల  ఓట్ల ప్రవాహాన్ని పార్టీలు పంటమళ్లకి మళ్లించుకోవాలి ముందు. ఓట్లేసే క్రౌడ్ క్రోధం క్లౌడ్స్ మీదకు అలాగే  మళ్లుండాలంటే.. అందుకో పాట!

‘వానా వానా వల్లప్పా!

నీకూ నాకూ చెల్లప్పా!’

-కర్లపాలెం హనుమంతరావు

*** 

(ఆంధ్రప్రభ- సుత్తి మెత్తంగా కాలమ్- 14, అక్టోబర్, 2017 సంపాదక పుట ప్రచురితం)

  

దోమాకలాపం - వ్యంగ్యం- సుత్తి మెత్తంగా- ఆంధ్రప్రభ కాలమ్-

'దేశంలోని దోమలన్నింటినీ వెంటనే నిర్మూలించాలి. ఆ దిశగా  సత్వరం  చర్యలు చేపట్టాలి. అలా అని కేంద్రాన్నిప్పుడే  ఆదేశించాలి!’

‘బాగుందిరా బాబూ నీ దోమాకలాపం! ఈ మధ్యో  పనిలేని  పెద్దమనిషి.. దినేష్ లోష్ ధన్ అనుకుంటా ఆ మహాశయుడి నామధేయం..  సర్వోన్నత న్యాయస్థానాన్నిలాగే ఆశ్రయించాడు.. అదేం మాయ రోగం? రోగ పరీక్షల వంకతో రోజూ  డయాగ్నస్టిక్ సెంటర్లెన్ని డ్రమ్ముల్తో  జనాల  నెత్తుర్లలా తోడిబోస్తున్నాయో! వాటి నడ్డుకునే నోరెవరికీ లేదు గానీ.. పాపం.. నోరూ వాయా లేవని కాబోలు.. ఈ పిచ్చి దోమల మీద మాత్ర మీ  పైత్యకారీ దాడులు! ఒక్క దోమ పీక పిసికినా దేశాని కెంతరిష్టమో.. తెలిసిడిస్తేగా మన తెలివి తక్కువ బుర్రలకీ!'

'దోమలు రకరకాల రోగ కారకాలు బాబాయ్! వాట్ని చంపవతల పారేయక చట్నీలు.. సాంబార్లూ.. చేసుకుని ఇడ్డెన్లు, దోశల్లో  నంచుకు  తినమంటావా ఏందీ..  విడ్డూరంగా!'

'దోమల్లోదీ మన నెత్తురేరా బాబీ! వాట్ని చంపేయటమంటే మనల్ని మనం చంపేసుకోవడమే కదా!’

'ఓహో.. అదా నీ బాధా? దోమలెంత వృధ్ధయితే మనమంత అభివృద్ధయిన్నట్లు  లెక్కా? భలే!'

'ఆ తిక్క కూతలే వద్దనేది! లోపలుంటే మన వంట్లో.. బైటుంటే దోమల వంట్లో!  అలాగుండాలబ్బీ దోమల్తో మన  రక్తబంధాల్లెక్క! నోట్లకట్ట లెన్ని వేలైనా పారేయ్.. వెల కట్టలేనిదిరా మన ఒంటి రక్తబ్బొట్టు!  రక్తాలతో లెటర్లు  రాస్తే తప్ప ఏ లైలా లవ్ రాస్తాలకు లైను క్లియరివ్వడం లేదని లబ్బుమంటున్నార్రా మీ తుంటరి  మజ్నూలు! ఆ బాహుబలి మార్కు  వీర తిలకం సీన్లు తిలకించు! బొటనేలు తెగ్గోసి బొటబొటా కారే  రక్తాల్తో నుదుట బొట్లు దిద్దినప్పుడే కదబ్బీ.. ఆ అబలా ప్రేక్షకులలా లబలబలాడేస్తూ కరుణ రసం సీన్లంత భీకరంగా పండించిందీ?   అవన్నీ ఒహెత్తు.. రాజకీయాల్లోని రక్తం చుక్కొహెత్తు! మాటకు ముందు..  'ఆఖరి  బొట్టు వరకూ జనం  కోసవేఁ నా నెత్తురు యావత్తూ   ధారపోసేదం'టూ వత్తి వత్తి మరీ రక్తం సీన్లు   రక్తి కట్టిస్తేనే కదా .. పెద్దాళ్లకో నాలుగోట్లు పక్కోళ్ల కన్నా ఎక్కువ ఓట్ల పెట్టెల్లో రాలిపడేది? మనుషులకంత ప్రియమైన బ్లడ్డు మరి మస్క్విటోలకు మాత్రం లడ్డూ కాకుండా.. గడ్డు జాంకాయవుతుందేవిఁట్రా ఎర్రి నాగన్నా? ప్రాణాంతకాలని తెలిసీ మళ్లా  మళ్లా ఉగ్రవాదులకు మల్లే మన బాడీల మీదన్ని సార్లు దాడులెందుకు  చేస్తాయో.. పాపం.. దోమలు! కొద్దిగానైనా  దయాదాక్షిణ్యాలు చూపించద్దా..  బుద్ధి తక్కువ మనుషులు!'

'నిర్దాక్షిణ్యంగా కుట్టి చంపే దోమల మీదనా బాబాయ్ దయా దాక్షిణ్యాలు!'

'కాస్త నిర్మాణాత్మకంగా కూడా ఆలోచించండిరా కంగారు పడకుండా! మశకాలకేమన్నా మనకులాగా మెగా స్టార్ చిరంజీవి టైపు  బ్లడ్డుబ్యాంకు డోనర్లున్నారా? నిర్మూలించేసెయ్యాలన్న యావే తప్ప.. పిచ్చి దోమల మూలకంగా వచ్చి పడే లాభాల సంగతెవరూ ఆలోచించరా? దోమా.. గీమా కుడుతుండబట్టే ఇన్నేసి రోగాలూ రొప్పులు! వాటి నిదానం  కోసం ఆసుపత్రులు! అవి కట్టుకోడం కోసం బ్యాంకప్పుల తిప్పలు. కట్టించినాక   సిబ్బందితో ఇబ్బందులు.. జీతభత్యాలు.. కరువు భత్యాలు చాల్టంలేదు.. పెంచాల్సిందేనంటూ ఆందోళనలు!   అందు కోసంగానూ ఏర్పాటయ్యే పోటా పోటీ  సంఘాలు! గుర్తింపు కోసం వాటి  మధ్య పోట్లాటలు! ప్రభుత్వాలతో నిత్యం కాట్లాటలు! పోలీసులొచ్చి వేసే లాఠీ పోట్లు! చివరాఖర్న కదా  సర్కారు పెద్దలతో భేటీలు! ముఖ్యమంత్రులే మిగతా ముఖ్యమైన పన్లన్నీ పక్కన పారేసి  రంగ ప్రవేశం చేస్తే తప్ప.. '

'ఉండుండు బాబాయ్.. ఊపిరాడ్డంలా ఇక్కడ!  బోడి దోమ కుట్టుళ్ల వెనకాల ఇంత మెగా మూవీ స్క్రీప్టుంటుంటుందా? అయ్య బాబోయ్..'

'దిసీజ్ జస్ట్  ఫ్రం సంక్షోభం సైడ్.. మై బోయ్! అటు సంక్షేమం సైడూ చూడు! దోమలే లేకుంటే డెంగ్యూ లేదు. మలేరియా రాదు, మెదడు వాయదు. చలిజొరం.. నిమ్మోనియా.. ఫ్లూ.. ఎట్సెట్రా.. ఎట్సెట్రా రోగాల  ఇన్ఫ్లుయన్సులూ  ఉండి చావవు. ఏవీ ఉండనప్పుడు సర్కారు కొలువులూ ఉండవు. ఉన్న    కొలువులకూ  సిక్ లీవుల్లిస్టులు మరీ అంత  పొడుగుండవు. రోగం వంకతో  డుమ్మా కొట్టిసి ఏ క్రికెట్ ఒన్డేకో.. మహేష్ బాబు మ్యాట్నీషోకో.. వెళ్లే వీలసలే ఉండదు. 'ఆరోగ్యశ్రీ.. ఈ భోగశ్రీ' లంటూ  సిరి వచ్చి పడే  పథకాలనేకం ఒక దానెనకాల ఒకటి తరుముకొంటూ వచ్చి పడే అవకాశాలూ ఉండవు! వాటి బిల్లుల కింద రాలిపడే రాబళ్లు   రాబట్టే సౌకర్యా లసలుండవు. సర్కారు దొరలకు  చేతి నిండా పన్లుండవు. చేతుల్లో పడే పైసలుండవు.  పైసల్రాలని కొలువులు కంచి గరుడ సేవలే కదట్రా! మరింకెవరికిరా పిలగాడా ప్రజాసేవమీద ఇప్పటంత    ఇంట్రెస్టు?   కిరికిర్లవీ ఇవీ  చేసేసి కమీషన్లు దండుకునే దళారీ దండ్లు దిండ్లేసుకునలాగే ఆఫీసుల చిడీల మీద  కునికేస్తాయా చాదస్తం కాకపోతే!   తాయిలాలు దక్కే వేరే కార్యాలకు   వలస పోతాయ్! దళారీ దండ్ల దార్లన్నీ మూసుక పోయాక  పైవాళ్ల  పుట్టి నట్టేట   నిండా మునిగి నట్టేగా! సుపరి పాలనా కుదరక.. సుపారీ పాలనా కదలక.. శిలలా  ప్రజాస్వామ్యమలా  స్తభించి పోతే .. దాని బాగోగులు గట్రా చూసే మిగతా మూడు మూల స్తంభాలూ..  మూలుగుతో మూలబడాల్సిందే బాబీ.. ఖాయంగా!'

'అయ్య బాబోయ్! ఒక్క కుయ్యాఁ  దోమను చంపితేనే  ఇన్నిన్ని అనర్థాలా బాబాయ్ మన ప్రజాస్వామ్యానికీ? మంచి ముక్క చెవిలో వేసి మా  కళ్లు మా బాగా తెరిపించావ్! నయ్యం!  ఇంటి దయ్యం పోరు పడలేక ఇంకా ఏ గుడ్నైటో.. హిట్టో.. ఇంట్లో కొట్టాలని .. ఇదిగో.. ఇప్పుడే..    కొట్టుకు బైల్దేర్తున్నా!'

'ఒక దోమను తరిమితే  మరో దోమ రాదుట్రా పిచ్చి సన్నాసీ కుట్టి చంపేయడానికి?!   దోమలనేవే లేకుండా ప్రక్షాళన  చేసేస్తే ఈ హిట్లూ.. కిట్లూ గట్రాలమ్ముకొనే కొట్లన్నీ బజార్న పడిపోవతాయా.. లేదా? అసలే పెద్దనోట్ల రద్దుతో చితికి పోయున్నాయ్ చిన్నా చితకా వ్యాపారాలన్నీ!    నువ్వూ ఇప్పుడీ దోమల ప్రక్షాళనంటూ నూతన  సంస్కరణలగ్గానీ  తెర తీసేస్తే.. లేక్స్ అండ్ క్రోర్స్ పోసి  పెట్టారే పాపం    దోమ్మందుల  కంపెనీలు.. ఓవర్ నైటా సీమ దొరల బ్యాచంతా  దిక్కూ దివాణం లేకుండా కుప్పకూలిపోదుట్రా! దోమల మీదిట్లా  సర్జికల్ దాడులు పక్క పాకిస్తోనోడి కుట్రలేమో.. విచారించుకోండి ముందు!’

'ప్లీజ్.. ప్లీజ్.. ఆపు బాబాయ్! పాడు నిద్ర. రాత్రి కాకపోతే పగలు పోవచ్చు. ఆఫీసులో అయితే అస్సలు ఇస్యూనే కాదు. ఇంటి పట్టునున్నా ఇంటావిడ పోరు ముందు ఈ దోమల సంగీతమే వీనులకు విందు!’

'గుడ్ ఐడియా!  వార్తలు రోజూ చూస్తూనే ఉన్నావుగా?  రాత్రి రాబరీలు ఓ రేంజిలో పెరిగి పోతున్నాయ్!  దోమల్తో సావాసం సహనంతో చేసావా..  ఇంటి కాపలా సమస్యా సామరస్యంగా తీరిపోతుంది. ఈ రోజుల్లో కుక్కల్నీ.. గూర్ఖాల్నీ.. పోలీసోళ్ళ  పెట్రోలింగుల్నీ నమ్మేందుకు లేదబ్బీ! ఎవడి సొత్తుకు వాడే కావలి.  అందుకైనా  దోమల తోడు    కావాలి. పనిలో పని! దేశవాళీ  సంగీతంతో  పరిచయమూ పెరుగుతుంది.  కొన్ని దోమలు కుడితే కేన్సరు కూడా దరి చేరదంటున్నారా.. ఫారిన్  సైంటిస్టులు! ఏ దోమ కొండెలో ఏ మందు దాగుందో! కదలకుండా  బబ్బో..  అదేరా సుబ్బరమైన పని!'

'ఎట్లా బాబాయ్? చెవిలో ఒహటే సొద!'

'ఏడ్చావ్ లే! నీ  టీవీలు, సినిమాలు, రోడ్లమీది రొద బళ్ళూ, సభల్లో మన నేతాజీలు  కూసే  కుళ్ళు కూతల కన్నానా?! దోమల సంగీతంలో ఓ  అందమైన లయుంది నాయనా! వింటూ బబ్బున్నావా.. ఇట్టే తెల్లారుతుంది! అందాకా  ఇంద..  చిడతలు! త్యాగయ్యగారి  కీర్తనల ఆలాపనలందుకో! 'బంటు రీతి కొలువు ఈయవే .. రామా!'

‘రామా కాదు బాబాయ్! దోమా!  బంటు రీతి కొలువు ఈయవే.. దోమా!’

‘బాగుంది.. బాగుంది.. నీ దోమాకలాపం!’

-కర్లపాలెం హనుమంతరావు

***

హే.. గాంధీ!- ఆంధ్రప్రభ వార్తాపత్రిక వ్యంగ్యం

గాంధీజీ జయంతి సందర్భంగా

'హే.. గాంధీ!' పిలిచాడు రామచంద్రుడు. 'మహాత్మా! నువ్వు బతికున్నంత కాలం 'రఘుపతి.. రాఘవ.. రాజా.. రాం..' అంటూ పద్దాకా రాంకీర్తనలతో నా బుర్ర వూరకే తోమేవాడివి! సబ్ కో  సన్మతి ప్రసాదించమని సతాయించేవాడివి! ఆ రఘులు, రాఘవులు, రాజాలు, రాం వగైరాలంతా నీ రామరాజ్యం కలలకు ఎలా ‘రాం.. రాం’లు చెప్పే పనిలో విరామం లేకుండా శ్రమించేస్తున్నారో.. తెలుసా!’

 ‘నారాయణ.. నారయణ! అల్లా,, అల్లా! భగవంతుడి బిడ్డలమే మేమల్లా! అలా అనుకొని సర్దుకు పోరాదా సద్గుణాభిరామా!'

'ఆ అల్లా వచ్చి నచ్చి చెప్పినా మీ నారాయణా..  సత్యనారాయణలంతా  ఆవలి సంతలో చేరి పుల్లలు పెడుతున్నారు కదయ్యా కొల్లాయి బాపయ్యా!’

చింతనలో పడ్డాడు గాంధీజీ.

సందు చూసుకొని అందుకొన్నాడు ఆంజనేయుడు 'బాపూ! నాకూ నరలోకంనుంచి  సమాచారం ఉంది. తమరు సత్యంతో చనిపోయేదాకా చచ్చేటన్ని ప్రయోగాలు చేసి చూపించారా! తమరి  వారసులమని బీరాలు పోయే నేతలు  ఇప్పుడక్కడ ఆ సత్యాలన్నీవట్టివే.. వట్టి నేతిబీరకాయలేనని గట్టిగా నిరూపించే పనిలో బిజీగా ఉన్నారు! ఏది సత్యమో.. ఏదసత్యమో తెలీనంత అయోమయంగా అన్ని రంగాల్లో  ప్రయోగాలు సాగిపోతున్నాయి స్వామీ అక్కడ!’

‘అసత్యంతోనా ప్రయోగాలు?!'

‘మరే! ఎన్నికలలా తన్నుకు  రాగానే ముందు అసత్యమే సత్యం మేకప్పేసేసుకొని తైతెక్కలాడేస్తోంది! ఏ పార్టీల  ఎజెండాలయితేనేమి.. అన్నీశుద్ధబద్ధాల   

ప్రయోగశాలలుగా తయారవుతున్నాయి! ఎన్ని లక్షల కోట్లక్రమార్జనల ఆసామైనా .. ఎన్నికల సంఘం ముందు ఒక్క  డొక్కు   కారుకు  మాత్రమే ఓనరు!  ఆస్తి పాస్తులకన్నా.. అప్పులు, పన్నులు, పస్తులైనా ఉండి కట్టి చావాల్సిన శిస్తులే బొచ్చెడు!'

'మరంత కష్టంలో ఉండీ మరెందుకు స్వామీ కోట్లు దండిగా వదిలే ఆ పాడు ఎన్నికల్లో  పాల్గొనేదా ఆసామీ?!'

'ప్రజాసేవ యావ మహాత్మా! గ్రాము ఎత్తు జనంరుణమైనా తీర్చకోకుంటే  ప్రజాజీవితానికి అసలు పరమార్థమే లేదు పొమ్మని.. .  తవఁరే ఎప్పుడో  సేవాగ్రాములో సెలవిచ్చారంట కదా!’

'అనుమానం అవమానం సుమా! నిజంగానే ఆ ప్రజాసేవకులు  నా సిధ్ధాంతాలను నమ్మి ఎన్నికల్లో నిలబడుతున్నారేమో.. హనుమా?'

'మరే! వాళ్లంత ఉగ్ర సేవకులు కాబట్టే తమరు తాగద్దన్నారని ఉగ్గబట్టిన  కల్లు గట్రాలలా మురికి వాడలకొదిలేసారు.  ఫక్తు  సీమ సరుకుతో తాము  సర్దుకుపోతున్నారు. ఖరీదైన కరేబియన్ డ్రగ్గుల్తో సరిపుచ్చుకుంటూ..  సన్నకారు తాగుబోతులు పుచ్చుకునేందుకు వీలుగా  చీపు లిక్కరు బట్టీలు పెట్టి తంటాలు పడిపోతున్నారు’ అబ్కారీ వసూళ్ళే  ఇప్పటి బీద సర్కార్లక్కూడా నిక్కచ్చి ఆదాయం బాపూజీ! జనమూ జాతిపిత జ్ఞాపకాలను మర్చిపోలేక నలిగిపోతున్నారు, తవఁరి జయంతి, వర్ధంతుల రోజుల్లో కూడా మందు  దుకాణాలు  బందు పడున్నా ఏ సందులోని షట్టరు సందుల నుంచో పుడిసెడైనా పుచ్చుకొంటే గానీ  పునీతులైనట్లు అనిపించటంల్లేదెవ్వరికీ స్వామీ!’  

'రామ!.. రామ! రామరాజ్యం వస్తే జగమంతా తెగ  సుఖిస్తుందని  కదయ్యా హనుమా  నా  కల?’

‘సుఖపడే పాలన  యధేఛ్ఛగానే కొనసాగుతోంది లేవయ్యా స్వామీ కింది లోకంలో! పబ్బుల్లో రాసలీలల స్వేఛ్చకు పెద్దింబ్బందులేవీ లేవు. మోక్షమందించే బాబా డేరాలు వందలొందలుగా పెరిగి పోరూనే ఉన్నాయ్ గొంది గొందికీ! మాయా మర్మాలతో పలు రకాల ప్రయోగాలు సాక్షాత్తూ  న్యాయదేవత కళ్లముందే   సాఫీగా సాగిపోతున్నప్పుడు ఇహ మన   సుగుణాభిరాముడొచ్చి నేరుగా పాలనలో జోక్యం చేసుకొంటే,, ఏమంత బావుంటుంది చెప్పు బాపూజీ?’

‘ఆ కొంటెతనమే వద్దు! అక్కడికీ ‘చెడు- వినొద్దు.. కనొద్దు.. అనొద్ద’ని  చెవినిల్లు కట్టుకొని మరీ పోరి  పోరి వచ్చాను కదా బతికున్నంత కాలం! నా మొత్తుకోళ్ల ఫలితం నిల్లైనట్లేనా  మరి! హరి.. హరీ!’

'చెడు' అన్న పదం మాత్రం మా చెడ్డ ఇబ్బందిగా ఉన్నట్లుంది మహాశయా తమరి శిష్యబృందాలకి!ఆ ‘అనద్దు.. కనొద్దు.. వినద్దు’ అన్న  సూత్రం మాత్రం గట్టిగా పట్టుకొని  మా చెడ్డ నిబద్ధతతో పాటిస్తున్నార్లేవయ్యా నేతా.. జనతా!

'రామ.. రామ!'

'అలా ‘రామా.. రామా’ అంటు అల్లల్లాడినా బూతు మాటగా మారి అల్లరైపోతునదయ్యా కిందంతటా.  ఏ ప్రవచానానికి  ఎవరు ఏ పెడర్థం లాగి రాద్దాంతం చేస్తారో.. ఏ మేధావి ఎప్పుడే చచ్చు సిద్ధాంత పట్టుకుని పుస్తకంతో పరువు తీస్తాడో.. ఏ ముఖ పుస్తకం టపా ‘ఠపా’ల్మని పేలి ఎవరు ఎప్పుడు టపా కడతారో .. అంతా  గందరగోళంగా ఉంది కింద భూగోళంలో! జీవించే హక్కు..'

'హక్కనుకుంటామే గానీ.. జీవితం క్షణభంగురమే కదా చిరంజీవీ వాస్తవంగా చూస్తే!'

'నిజవేఁకానీ స్వామీ.. మరీ భంగుతాగిన  మాదిరి తక్కుతూ తారుతూ నా జీవించేదీ? ఎంత ఇబ్బందిగా ఉంటుందీ   అర్బకుడికి? తమరు స్వాతంత్ర్యం తెచ్చి డెబ్బై ఏళ్ళు దాటినా దెబ్బై పోతున్నాడయ్యా సామాన్యుడింకా కింది లోకంలో!’

‘అవును. హనుమ చెప్పినవన్నీ అక్షరాలా నిజమే బాపూజీ! మళ్లీ నువ్వే ఓ సారి నీ  భరత ఖండం వెళ్లి రావాలి?’  రామచంద్రుని స్వరం.

భక్తిగా లేచి నిలబడ్డాడు బాపూజీ.. సామాను సర్దుకుంటో!

'బొడ్దులో గడియారం, చేతిలో కర్ర, కొల్లాయి గుడ్డ, కళ్ల జోడు! బోసి నవ్వుతో ఇంత సజీవంగా వెళితే పిచ్చి నేతలతో ప్రమాదమేమో చూసుకో లోక నాయకా!’

'నడి రోడ్లమీద అడుగడుగునా నా విగ్రహలే కదా వెలిసున్నాయి  స్వామీ! మరి వాటికి లేని ప్రమాదం..?’

‘నోరు లేని విగ్రహాల కథ వేరయ్యా పిచ్చి బాపూజీ!  గల్లీ బుల్లి నాయకులు .. ఎన్నికలప్పుడు  కటౌట్లు గట్రా పడిపోకుండా నిలబెట్టుకోడానికి ఆ విగ్రహాలు పనికొస్తాయి! పండగలు,  పబ్బాలప్పుడు దండలవీ వేసి దండాలు దస్కాలు పెట్టుకునేందుకైనా నీ  బొమ్మ బండలు ఉండాలి.. తప్పదు! ఉన్నట్లుండి నువ్విలా ప్రాణాలతో వెళతానంటేనే  నాయకుల గుండెలు గుబ గుబ లాడేది’

‘పోండి స్వామీ మీరు మరీను! కొత్త రెండువేల నోటుమీదా నా మొహమే మళ్లి  ముద్రించారు తెలుసా మర్చిపోకుండా!’

‘కింద ‘మోహన్ దాస్ కరమ్ చంద్ గాంధీ’ అని రాయిస్తే  గానీ తవఁరెవఁరో ఈ నాటి జ్ఞానులకు తెలిసే అవకాశం లేదు స్వామీ! 'భలే తాత మన బాపూజీ' అంటూ బడిపిల్లల చేత మాత్రమే పాడిస్తున్నారంటేనే బడా నేతల తలల్లో ఏం దురాలోచనలున్నాయో తెల్సిపోతోంది.  పిల్లకాయలకి మాత్రమే నువ్వో రోల్ మోడలుకు! పెద్ద తలకాయల రీతి రివాజులకు నువ్వో రోడ్ రోలర్.’

‘హేఁ! రామ్!'

'చెవులిలా గట్టిగా మూసేసుకుని ఇక్కడ కుమిలిపోతూ కూర్చుంటే లోకం ఇంతకన్నా ఎక్కువగా కుళ్ళిపోతుందయ్యా అక్కడ బాపూజీ! ఎల్లుండే నీ జయంతి. ఎక్కడున్నా నీ వారసులమని చెప్పుకొనే వారంతా  ఆ రాజ్ ఘాటు  సంతకు  హాజరవుతారు ఖాయంగా. మంచి అదను. ఇది తప్పితే మళ్ళీ వర్ధంతి వరకు  నీకే దొర అప్పాయింటుమెంటూ  దొరికి చావదు'

'ఏం చెయ్యమని నీ సెలవు శ్రీరామచంద్రా?'

 'ఏం చేస్తావో.. ఎలా దారికి తెస్తావో.. నీ ఇష్టం! వారసులమని ఒకళ్లు.. జాతిపిత సిద్ధాంతాలకు తామే అసలు  కళ్లమని మరొహళ్లు! రాజకీయ స్రవంతిలోకి వరదలా వచ్చి పడుతున్నదయ్యా  బాపూ ఎక్కడా పనికిరాని మకిలి సరుకంతా! ప్రక్షాళనే తక్షణం చేప్పాట్టాల్సిన పెద్ద సంస్కరణ’

'చిత్తం స్వామీ! ఇదిగో  బైల్దేరుతున్నా!'/

'ఇలాగా! ఏ తెలుగు దేశం శివప్రసాదో మారు వేషంలో వచ్చాడని దులుపుకు పోతారయ్యా పెద్దలంతా!. వంటికి వెండి పూత దట్టంగా పట్టించు!  ఓ గంట ముందే వెళ్లి ఆ ఎండలో నీ రాజఘాటు గేటు బైట శిలావిగ్రహంలా నిలబడి పో! ఆషాఢభూతుల  చూపు నీ మీద పడ్డ తరువాత.... ఇహ నీ ఇష్టం'

ఆంజనేయుడు  దుడ్డుకర్ర అందించాడు.

కొల్లాయి గుడ్డ ఇంకాస్త గట్టిగా బిగించి ఛంగున ఛంగున ముందుకు దూకే ఆ   సత్యాగ్రహిని ఆపి ‘తాజా  ప్రధాని మోదీజీ కూడా  అక్కడ నువ్వు  ప్రబోధించిన   ప్రక్షాళనా కార్యక్రమాన్నే   మహా దీక్షగా కొనసాగిస్తున్నాడు. ఆ మహానుభావుడి రామరాజ్య స్థాపన పుణ్యకార్యానికి నువ్వూ  ఓ చెయ్యి వేయి మహాత్మా! జనం కలలు కనే సుపరిపాలన స్థాపనకి నువ్వే మళ్లీ వెళ్ళి ఓ ఇటుకరాయి వేసెయ్యి మహర్షీ!’ అంటూ ఆశీర్వదించాడు ఆ శ్రీరామచంద్రమూర్తి.

-కర్లపాలెం హనుమంతరావు

(ఆంధ్రప్రభ- దినపత్రిక- సెప్టెంబరు- 30- 2017 -సుత్తి మెత్తంగా కాలమ్)