'కోతో'పనిషత్ - ఈనాడు గల్పిక -కర్లపాలెం హనుమంతరావు -(ఈనాడు- దినపత్రిక - సంపాదకీయ పుట -23 -10 =2002 ప్రచురితం)

 

 

ఏంవోయ్.. మైడియర్ వెంకటేశం.. మొహం వేలవేసినావ్?

పరీక్ష పోయింది. పాఠం చెప్పమంటే ఎప్పుడూ కోతలు కోయడవేఁ కానీ ఒక్క నాడన్నా పాఠం చెప్పిన పాపానపోయారూ!

డ్యామిట్.. ఇది బేసిక్ ఇన్ గ్రాటిట్యూడ్! నీ తెలివితక్కువతనం చూస్తుంటే నాకు నవ్వొస్తోంది. నాతో మాట్లాడ్డవేఁ ఓ ఎడ్యుకేషన్! మీ నులక అగ్నిహోత్రావధాన్లు నాతో రాతకోతలు చేయించుకోవాలన్న  దుర్బుద్ధితోనే కదా .. మీ ఇంట్లో ఉండనిస్తున్నదీ! రాతల సంగతెట్లా ఉన్నా మన కోతలకు ఢోకా లేదన్న సంగతి పసిగట్టబట్టే మనకీ సదుపాయం దక్కింది. దేర్ ఈజ్ నాట్ ఎన్ ఆబ్జెక్ట్ వుచ్ డజ్ నాట్ సర్వ్ యూజ్ ఫుల్ పర్పస్. కోతల యొక్క మజా నీకింకా బోధపడకపోవడం నాకు ఆశ్చర్యం వేస్తున్నది. పూనా డక్కన్ కాలేజీలో నేను చదువుతున్నప్పుడు 'ది మిలియన్ ఫేజెస్ అఫ్ బ్రాగింగ్' ను గూర్చి  ఒక్క బిగిన మూడు ఘ్ఘంటలు లెక్చరిచ్చేసరికి  అక్కడి ప్రొఫెసర్లే డంగైపోయుంటిరి. గాడ్స్ క్రియేషన్లో ఆవులూ చేగోడీలు విధవలూ కన్నా కోతలూ అనే పదార్థం ఉందే అది ప్రధమ స్థానంలో ఉంది. 

 ప్రపంచమందుండే అన్ని వస్తువులలోకీ ముఖ్యమైనవి విధవలు అని  మీరే కదా ఇంతకు ముందు అన్నారు?

ఒపీనియన్సు అప్పుడప్పుడూ ఛేంజ్ చేస్తుంటే గానీ పొలిటీషియన్ కానేరడు. గాడ్స్ వర్క్స్ లో ఈ 'కోత' అనే పదార్థం ఉంది చూసావూ.. అది ఒక ఉత్తమోత్తమమైన సృష్టి. చిత్రం! నీ పేరులోనే ఓ కోత ఉంది గమనించావా!

అదెలాగండీ?

వెంకటేశం అనగా వెంకట్ ప్లస్ ఈశం. 'కట్' అంటే 'కోత' అనే కదా అర్థం! ఇంకా విను! కోతలు కోయడం చేతకాకపోయుంటే భారతంలోని ఉత్తర కుమారుడు ఉత్తకుమారుడుగానే మిగిలిపోయుండేవాడు. అవునా కాదా?చెప్పు! టెల్ మాన్!

మీకేమీ ఎన్నైనా చెబుతారు. పరీక్ష పాసుకాలేదని మా తండ్రిగారికి తెలిస్తే 'ఊచకోత' కోస్తాడు.

దట్సిట్! అనగా మీ నాయన కూడా కోతలు కోస్తాడన్న మాట! కోతల పురాణం విప్పామంటే ఎంత ఎంత మైరావణుడయ్యేదీ గోతిలో పడాల్సిందేనని బృహన్నారదీయంలోని నాలుగో ఆశ్వాసం చెబుతోంది! సావకాశంగా కూచుంటే కోతలు కూడా మంచివేనని నీతోనే ఒప్పిస్తాను.

చెప్పండి!

కోత అనుకుంటే ఏమనుకుంటున్నావో ముందు అది చెప్పు నువ్వు.

కోత అనుకుంటే ఎవరైనా అనుకునేది ఏముంటుంది గురువుగారూ? కరెంట్ కోతా.. రేషన్ కోతా.. కరువు భత్యం కోతా.. ఇలాంటివే ఇంకా ఏవేవో కోతలు

ఆట్టే.. ఆట్టే.. ఆగక్కడ! కరెంటు కోతల్ని గురించి ఒక్కముక్క చెప్పనీయ్ నన్ను! ఇప్పుడంటే ఇట్లా ఇరగదీయడాలు కానీ, మొన్నటి ఎన్నికల ముందు దాకా.. ప్రచారంలో ప్రతీ పార్టీవోడికి ఇరవై నాలుగ్గంటల కరెంటే.. ప్రధానమైన 'కోత'! ఆ ఇచ్చేదేదో ఉచితంగానే ఇచ్చేస్తామని ఎదుటోడి పార్టీ  పై కోత! మా మొదటి సంతకం 'హోదా' మీద అని ఓ పార్టీ కోత కోస్తే.. సంతకం కాదు అంగూఠా అనాలి. ఎదుటోళ్ల  అడ్డుకోత. ఈ తరహా కోతలు ఎన్నికలు ముందు కొన్ని వందలు!

ఎన్నికలైనాక ఇందాక నేనన్నానే అసలైన కోతలు.. అవే కదా గురూగారూ?

చూశావా! నీ బుద్ధి ఎలా వికసిస్తుందో ఒకే ఒక్క కోత ఉదాహరణతో! ఇలా తర్ఫీదుగానీ అయిపోతివా వెంకటేశం.. నువ్వూ తొందర్లోనే  ఏ ఇండియాకు రాజువో.. ఇంగ్లాండు రాణీకి మొగుడువో అయిపోవడం ఖాయం.

అనగా పొలిటీయన్లందరు విధిగా కోతలు కోయవలయును అని కదా నీతి గురువుగారూ!

అందుకు సందేహవేముందీ! కోయడం రానివాడు ఒక్క పాలిటిక్సుకనేమిటీ.. పేకాటకైనా పనికిరాడు. కోతకు పైకోత కోయగలవాడే అంతిమ విజేత. పొలిటికల్ పార్టీల మేనిఫెస్టోలన్నీ 'నథింగ్ బట్ మేనిఫెస్టేషాన్ ఆఫ్ బ్రాగింగ్' అని  బెర్ట్రాండ్ రస్సెల్ అనే దొరవారు ఏనాడో  సెలవిచ్చేరు! ఏటా కోటి ఉద్యోగాలంటే భీమునిపట్నానికి పాలసముద్రం తేవడం లాంటి కోత. ఫెలిసిటేషన్స్.. అనగా సన్మానాలు  ఈ  కోతల కేటగిరీలోకే వస్తాయి.. కానీ వీటిక్కొద్దిగా పురాణాల లిటరేచర్ టచప్ అవసరం. ఒక్క ముక్క నిజం పొక్కినా  సన్మానితుడి క్యారెక్టర్ వెలితిపడి సన్మానపత్రం కళ తప్పిపోతుంది.. బోయ్!

భలే!

అప్పుడే ఏం చూశావు! వివిధ రంగాలలోని కోతల్ని పరిశీలించి వాటి తాలూకు ఎస్సెన్సును నిగ్గు తీసి ఆ సారాంశంతో ఓ థీరీ తయారు చేశానోయ్ ! నోటు బుక్ తీసి రాసుకో బోయ్! కోత అనేది సాంఘిక సాంస్కృతిక సంక్షేమ సౌభాగ్యాలకు సంబంధించిన వ్యవహారమని  నా థీరీ! దిసీజ్ మై ఫస్ట్ పాయింట్!

అలాగెలాగ గురూజీ?

పేషన్స్! కొసాకి విను! కోతల్లేకపోతే కుటుంబనియంత్రణకి ఆస్కారం ఏదీ? సంక్షేమానికి అవకాశం ఎక్కడ? పంటలు కోస్తుంటేనే కదా ధాన్యం దిగుబడి! అన్నదాత ఎంత కోత కోస్తే దేశానికి అంత సమృద్ధి  చేకూర్తుందని లెక్క. ఇహ సెన్సారువాళ్ల కోతలు సరిగ్గా లేకనే సమాచార కాలుష్యం పెరిగి సమాజంలో  శుద్ధి తరుగుతున్నదని నాలాంటి బుద్ధిజీవులం మొదట్నుంచీ మొత్తుకుంటూన్నది.

కోతలకింత కథుంది కాబట్టే..  కోడి కూదా ఘడియ ఘడియకూ 'కొక్కొరోకో! కొక్కొరోకో!' అని కూస్తుంటుంది గొంతెంత నొప్పెడుతున్నా! కొక్కొరోకో' అంటే ఏంటంట? 'కొద్దిక్కొద్దిగా రోజంతా కోతలుకోస్తూనే ఉండడహో!' అని దాని దండోరా అన్న మాట! ఇది ఒహ డిస్కవరీ!

సూపర్ డిస్కవరీ గురూజీ!

మరేవఁనుకుంటున్నావ్ శిష్యా! నా మాట వింటే నిన్ను సురేంద్రనాథ్ బెనర్జీ అంతటి వాణ్ని చేసెయ్యనూ! పూజా పునస్కారాల్లేక బూజెక్కి వున్నాను కానీ, గ్లాడ్ స్టన్ లా దివాన్గిరీ చెలాయించవలసిన జాతకం కదటోయ్ మనది! ఇహ జాతీయ అంతర్జాతీయ విషయాలకు వచ్చేద్దాం. కులాతీత మతాతీత ప్రజాస్వామ్యమంటారు పద్దాకా మనది. అదే ఒహ పెద్ద జాతీయ కోతని నా ఉద్దేశం. ఏడాది పాలన అయిపోయిందని మొన్నామధ్యన మోదీగారు మీటింగెట్టి మరీ థణుకెగిరి పోయేటట్లు ఎన్ని కోతలు కోశారూ! శాంతి కోసం యుద్ధమని అమెరికనోడూ అస్తమానం అడిగినోడి దగ్గరా, ఆడగనోడి దగ్గరా సొరకాయలు తెగ్గోస్తుంటాడూ ! కోయగా కోయగా కోతలే నీతులవుతాయని గోబెల్సు మహానుభావుడు కాబోలు తీరిక చేసుకొనోసారి సెలవిచ్చాడు. వీటన్నిటికన్నా మన ఫార్టీ యియర్స్ ఇండస్ట్రీ బాబుగారి త్రీథౌజండ్ ట్వంటీ విజన్ ఉంది చూశావూ.. అది మహా పెద్ద ప్రాంతీయ కోత.  ఇహ సామాజిక రంగం విషయానికి వస్తే .. నూరు కోతలైనా కోసి ఓ పెళ్లి జరిపించెయ్యమని కదా అమరనిఘంటువా అదేదోమన బూదరాజుగారి బృహధ్గ్రంథం అఘోరిస్తున్నదీ! కళారంగంలో కోతలకున్న స్థానం అమోఘం. ఎంత మెగా పవరున్నా తెర మీద పిట్టలదొర టైపు కోతలు కోయనిదే ఏ హీరోగారికీ  చప్పట్లు రాలవు. అంతెందుకు శిష్యా.. బొడ్డు కోతతో మొదలయ్యే మానవ జీవితం మృత్యువాతకు ముందు ఆసుపత్రి వైద్యుడి కత్తి కోతతో గానీ అంతవమవదుకదా! ఈ రెండు కోతలకు మధ్య జీవికి అదనంగా కడుపు కోత.. రంపపు కోత.. జుత్తుకోత.. జేబుకోత.. ఇట్లా సవాలక్ష కోతలు! మనిషి జీవితంలో కోతలకింత ప్రాధాన్యత ఉంది కాబట్టే గీతకారుడు కూడా భగవద్కోతలో 'కోసేదీ నేనే.. కోయబడేదీ నేనే! నీవు కేవలం నిమిత్తమాత్రుడవు' అంటూ అర్జునుడి ముందు కోసిందే కోసి మతి పోగొట్టేడు. కోయడమనేది ఓ గొప్ప కళ. ఎడ్యుకేషన్ లేక, చాలక, తగినంత రీజన్ లేక, మీ మాష్టారు వంటి అభాజనులు నేను కోతల్రాయుడని కొక్కిరిస్తారు. కానీ, నన్ను మించిన కోతలరాయుళ్లు ఇవాళ అన్ని రంగాలలో అశేషమైన ప్రభతో వెలిగిపోతున్నారు నాయనా! నిన్నూ అంతటి స్థాయికి  తీసుకువెళ్లాలని తాపత్రయపడుతుంటే,

థేంక్ చెయ్యక నన్ను తప్పుపడుతున్నావూ!

తప్పయిపోయింది! క్షమించండి గురూగారూ!

డోంట్ సే దట్! ఒక ఉపనిషత్తులో శిష్యుడు ప్రశ్న అడుగుతుంటే గురువు సమాధానం చెబుతుంటాడు. ఆ గురువులాంటి గురువును నేను. ఆ శిష్యుడి వంటి శిష్యుడివి నీవూ! మన ప్రశ్నోత్తరాలు ఎవరైనా అచ్చొత్తిపారేశారంటే రెండొందల ఏళ్ల తర్వాత నచి'కోతో'పనిషత్తు అయితీరుతుంది.

గురూగారూ! ఇహ మంచం కింద నుంచి తమరు బైటికి వచ్చేయచ్చు! పూటకూళ్లమ్మ ఈ పూటకు గ్యారంటీగా రానట్లే!

థేంక్!

హ్హాహ్హాహ్హా

 ఈ చీవురేమిటీ ఇక్కడా? హమ్మా! ఈ ముండిప్పటిదాకా ఇక్కడే నక్కిందీ! వెంకటేశం! నన్నే బురిడీ కొట్టిస్తావుటోయ్! కలికాలం! తరం ముదిరింది! డ్యామిట్.. కథడ్డం తిరిగింది!

-కర్లపాలెం హనుమంతరావు

(ఈనాడు- దినపత్రిక - సంపాదకీయ పుట -23 -10 =2002 ప్రచురితం)

 

 

 

 

 

 

 

 

 

పశురాజ్యం పార్టీ వర్ధిల్లాలి! – సరదాకే -కర్లపాలెం హనుమంతరావు

 

'ఏ' ఫర్ 'ఏపిల్' ఏంటి..విడ్డూరంగా! 'ఏ' ఫర్ 'ఎనిమల్'..'బి' ఫర్ బఫెల్లో.. 'సి' ఫర్ కౌ..'డి' ఫర్ డాంకీ..ఇలా ఏవైనా జంతువుల పేర్లు పెట్టుకోవచ్చుగా ! తమరి ఆత్మ గౌరవానికి భంగమా?

అబ్బో! 'మ్యాన్ ఈజ్ ఏ సోషల్ ఏనిమల్' అని మళ్లీ మీరేగా లెక్చర్లు దంచేదీ! అంటే 'ఏనిమల్ ఈజ్ ఆల్సో  ఏ సోషల్ మ్యాన'నేగా అంతరార్థం?

ఎదుకో ఆ చిరాకూ? తమరు పడీ పడీ  దణ్ణాలూ దస్కాలూ పెట్టుకునే దేవుళ్ళందర్నీ వీపుల మీదెక్కించుకుని ఊరేగించే దెవరూ? మేం కాదూ! ఆదిదేవుడికి వాహనం మా మహానంది. ఆ నందిని బంగారంతో తాపడం చేసందిస్తే సరి.. మా షోగ్గా  షోకేసుల్లో దాచేసుకుని తెగ మురిసానందిస్తారు! నిజం నందిని మాత్రం పంది కన్నా హీనంగా ఇంటెనకాల గొడ్లచావిట్లో మురికి గుంటల మధ్య బందీ చేస్తారు. దాని నోటి కాడ గడ్డిని మీరు మేస్తారు. పేరు వినీ వినగానే తమరికి ముచ్చెమటలు పోస్తాయే.. ఆ  మృత్యు దేవత యమధర్మరాజా వారి వాహనం ఏదీ? ఎనుబోతు. కాలయముణ్ణి చూస్తే కాళ్ళు వణుకుడూనూ.. మా దున్నపోతును చూస్తే చిన్న చూపూనా! అందుకే  మీ  మనుషులందరిదీ ద్వంద్వ నీతనేది.

మీకన్నా మేమెందులో తీసిపోయామో! కులాలు, మతాలు, రంగులు, హంగులు అంటూ మీలో మీకే ఎన్న్ని అంట్లూ..సొంట్లు! పేరుకే మా నెత్తిమీదవి కొమ్ములు. అసలు కుమ్ముళ్లన్నీ రక రకాల  పార్టీల పేర్లతో  మీవి. పైపెచ్చు మీ రొచ్చు కీచులాటల మధ్యలోకి ఏ సొమ్మూ సంబధం లేకపోయినా 'ఎద్దులూ.. మొద్దులూ..దున్నపోతులూ.. గొడ్దుమోతులూ' అంటో  మా పేర్లు లాక్కొచ్చి  తిట్లూ.. శాపనార్థాలా!

మా సాయం లేకపోతే మీ వ్యవసాయం క్షణం ముందుకు సాగదు. మేం కాడిని వదిలేస్తే  మీ బండి గజం ముందుకు నడవదు. మా దూడల్ని  దూరంగా నెట్టేసి మా పాలు మీరు కాఫీలు టీనీళ్ళకు వాడేసుకుంటున్నా.. పోనీలే పాపం.. మీ పాపానికి మీరే పోతారని చూసీ చూడనట్లు పోతూ ఉంటే..  మా పోతులంటే మీకింత అలుసా?

 మా గొడ్డూ గోదా గాని రోడ్డు కడ్డం పడితే మీ బుల్లెట్ ప్రూఫులూ, బుగ్గ కార్లూ ఒక్కంగుళం ముందుకు జరగ్గలవా? తోక ముండిచిందాకానే మేం గంగి గోవులం.  లిక్కరు పాకెట్లకు .. చిల్లర నోట్లకు.. కుక్కల్లా తోకూపే మీ బక్క ఓటర్లం కాం మేం! చెత్తనేతల మీద విసుగెత్తున్న  జనం విసిరే పాత జోళ్లలోనుంచీ మా నిరసనలు  వినిపిస్తునే ఉంటాం.

అక్కరయిన దాకా మాకు దణ్నాలు దస్కాలు. అక్కర తీరినాక  గొడ్దుమోతులని ఎకసెక్కాలా? పుష్టిగా ఉన్నంత కాలం మా పుష్టభాగాల క్కూడా పూజలూ.. పునస్కారాలు. కాస్త ఈడిగిల పడితే చాలు కబేళాలకు ఈడ్చి పారేయడాలా?! మీ కడుపుకిన్ని తిండి గింజ లందించే అన్నదాతలమే.. మానోటి కాడి ఎండుగడ్డి కాడ క్కూడా పాలుమాలుతారా? నేతంటే మోతగా మేత మేసేవాడనేనా మీ అర్థం? మా కాలి గిట్టల్నుంచీ నెత్తిమీది కొమ్ముల్దాకా దేన్నీ వదిలి పెట్టరా  మీరు! అచ్చమైన  పచ్చి వ్యాపారానికి అచ్చుపోసిన శాల్తీలు మీరు.

సిగ్గు ఎగ్గు లేకుండా నడి బజారులో మీరు నిలబెట్టే  బడిత బొమ్మల మానం పేడముద్దల మాటున దాచి కాచి కాపాడే శ్రీకృష్ణ పరమాత్ములం మేం. మేం నోరు చేసుకోబట్టే  మీ వీధులు చెత్తకుండీల కన్నా మెరుగ్గా ఉంటున్నాయి. బ్రిటన్ మహారాణి విక్టోరియా మ్యాడం కన్నా ఎక్కువ గ్లామరున్న మూగ జీవాలం మేం. మీ అభిమాన నటవిరాట్టులు గ్రాఫిక్సుల్లోఎన్ని  కుప్పిగంతులు వేసినా రావడం లేదు హిట్లు. మేం మాత్రం ఇలా కాస్త తోకలు  కదిలించినా చాలు చప్పట్లే చప్పట్లు. కోట్లే కోట్లు.

మాతోనే మీకు  అక్కర తప్ప మీరు తిని పారేసిన అరటి తొక్కతో కూడా మాకు  అవసరం పడదు. ఎన్నికల్లో మీకు మేమే పార్టీ గుర్తులం. మీ ఎన్నికల  ప్రచారాల హోరుకీ  మళ్ళీ మేమే ఆసరా. మీరు బాదే డోళ్ళు చచ్చినాకా మాట్లాడే మా వంటి తోళ్ళ నోళ్ళే. మీ మీ అధిష్ఠానాల ముందు మీరు ఊదే బూరాలు మా కొమ్ములు విజయ గర్వంతో చేసే హాహాకారాలు. మీకూ  మాకూ తేడా ఏముంది?మీరు చేతుల్తో వీపులు తోముకో గలరు. మేం తోముకోలేం. మేం తోకల్తో ఈగలు తోలుకోగలం. మీరు  తోలుకొంటారా?

ప్రజాసేవలో మేము మీరెన్నుకున్న ప్రతినిథులకన్నా ఎన్నో రెట్లు మెరుగు జీవులం. దున్నేకాలంలో దూరం పోయి.. కాసే కాలంలో కోడవలి తెచ్చే భడవలం కాం మేం. మాతో మీకు వారసత్వం పేచీ రాదు. కుంభకోణాల గోల ఉండదు.

పశువులనీ.. మనుషులనీ విభజించి చూస్తున్నారు చూడండీ..అదే సబబైన పద్దతి కాదన్నదే మా ఆవేదన. జనాభా లెక్కలు తీసినప్పుడల్లా 'ఓహో వందా పాతిక కోట్లు దాటేసిందండోయి  దేశ జనాభా'అంటో  ఒహటే దండోరా. అందులో అందరూ మనుషులే ఉన్నారా? నిజాయితీగా లెక్కలు తీసి చూడండి! మెజారిటీ మా పశువుల జాతిదే!  మీ మందల్ల్ల్లో మా పశువులెన్ని కలిసున్నాయో లెక్క లు తేలాలి ముందు. మా పోరాటం ఆ దిశగా సాగేందుకే ఈ మా కొత్త పార్టీ. దేశ జనాభాలో మెజార్టీ మా పశువులే అయినప్పుడు మీ  పాడు మనుషులకేల ఊడిగం చేయాలన్నది మా వాదన.

ఒకప్పటి ఉత్తర ప్రదేశ్ అమాత్యవర్యులు అజం ఖాన్ గారి రాంపూర్  బందిల దొడ్దినుంచి ఈ మధ్యనే స్వేచ్చా ప్రపంచంలోకొచ్చి పోయాయి  ఏడు ఎనుబోతులు. ఆ చైతన్యమూర్తులు స్ఫూర్తితోనే  మేమూ అర్జంటుగా ఓ ఫ్రంటును కట్టే ఏర్పాట్లలో ఉన్నాం. దేశ జనాభాలో   దామాషా ప్రకారం చూసుకున్నా అధికార పీఠం మా పశుజాతికే దక్కడం న్యాయం. శతాబ్దాలు గడిచి పోతున్నా మా పశుభాషకు ఇంకా అధికార హోదానే దక్క లేదు. 

ఏ సేవలూ అందించకుండానే ఎన్నికల్లో నిలబడి ఎందరో  ప్రజానాయకులుగా తయార వుతున్నారు. మేం మాత్రం ప్రజాసేవలో  ఎవరికి తీసి పోయాం?  తేనీరు అమ్మే మనిషి ప్రధాని పదవికి పోటీ పడుతుండగా లేనిది.. తేనీటిలోకి పాలందించే పశువులం అధికారంలో మా పాలు కోరుకోవడంలో తప్పేముంది? రాబోయే ఎన్నికల్లో మా  పశుజాతి అదృష్టాన్ని పరీక్షించుకోవడానికి ఇదే తగిన అదనని అభిప్రాయ పడుతున్నాం.

ఇప్పుడున్నవన్నీ నకిలీ పశుప్రభుత్వాలు.అసలైనపశువుల పాలనెలా ఉంటుందో ఒక అవకాశమొస్తే రుచి చూపిస్తాం.

ఇల్లంతా యథేచ్చగా  కలాపులు చల్లుకోవడానికి  గోమయం ఉచితంగా సరఫరా చేస్తాం. ఏడాదికి వంద పిడకలు సబ్సిడీ ధరలో ఆడపడుచులకు అంద చేస్తాం. పిల్లా జెల్లాకు నీళ్లు కలపని పాలు గొడ్లు ఇళ్లముందే  పిదికిచ్చి పోయే ఉచిత  పథకాలు ప్రవేశ పెడతాం. ఇంటింటికీ ఒక 'స్టేటాఫ్ ఆర్ట్' గొడ్ల చావిడి.. పండగ రోజుల్లో పుణ్య సంపాదనకు భక్తుల సన్నిధానికే సుష్టైన పుష్టభాగాలున్న గోదేవతల తరలింపు ఇవీ మాకు మాత్రమే సాధ్యమయిన సేవా పథకాలు. గద్దె నెక్కే ఒక్క అవకాశం ఇచ్చి చూడండి! మా గొడ్డు గోదా నుంచి వీలైనంత సహకారం రాబట్టి ప్రజాసేవను ఇంకెన్ని విధాల మెరుగు పరచాలో పశుప్రేమికులనుంచి సూచనలు కోరి అమలు చేసే  దిశగా మరింత అంకితభావంతో మా వంతు ప్రయత్నాలు విధిగా చేస్తాం.

చెత్త నేతల పాలనతో విసుగెత్తి ఉన్న ఓటరు మహాశయులారా! 'ఏమో.. దున్న ఎగరా వచ్చు!' అన్న ఒకే  ఒక్క నమ్మకంతో   మాకూ ‘ఒక  అవకాశం’ ఇచ్చి చూడమని ప్రార్తన!

అంబే.. పశు రాజ్యం పార్టీ!  అంబే.. అంబే!

 దున్నపోతుల ప్రభుత్వం! అంబే.. అంబే .

ఎనుబోతుల నాయకత్వం! అంబే..అంబే!

-కర్లపాలెం హనుమంతరావు

(ఈనాడు- దినపత్రిక సంపాదకీయ పుట ప్రచురితం)

విచ్చలవిడితనానికా పచ్చలపతకాలు! -వ్యంగ్యం -కర్లపాలెం హనుమంతరావు

 

 

‘రామా!’ అన్నా ‘రా.. అమ్మా!’ లాగా అవిపిస్తోందీ మధ్యన మరీను! రాజకీయాలల్లో  సూత పురాణాలెలాగూ వినిపించడం లేదిప్పుడు.. బూతు పురాణాలే ఎక్కువై పోయాయి.. ఖర్మ! ‘బూత్’ స్థాయినుంచీ ఎదిగొచ్చే నేతలు బూతులు కాక నీతులు వల్లిస్తారా? అని ఎదురడిగే బుద్ధిమంతులకో పెద్ద నమస్కారం.

 జాతికి నీతులు చెప్పే రామాయణమే వాల్మీకులవారి వ్యాకులం నుంచి పుట్టిందంటారా! పరమ శాంత గంభీర మూర్తి రామచంద్రుడి పక్కనున్నదే సాక్షాత్తు పోతపోసిన కోపమూర్తి లక్ష్మణుడని దబాయింపా! మరో నమస్కారం!

 కంసుడి హింస లేకుంటే కృష్ణావతార కష్టం విష్ణుమూర్తికి తప్పుండేది కదా? సత్యభామ పువ్వుకోసం అలా అలక్క పోయుంటే కృష్ణభక్తి ప్రకటనకి  ఆస్కారముండేదా? అని వాదమా? తమరి వితండానికో దండం!

 అలుగుటయే యెరుంగని  ఆ మహామహితాత్ముడు ధర్మరాజే అలా అలవోగ్గా అలగ్గా లేనిది ఉప్పు కారాలు పప్పుబెల్లాల్లా మెక్కే నోళ్ళను మన మాజీ ప్రధాని మన్మోహన్ గారి స్టైల్లో మౌనంగా పడుండమనడం న్యాయమా? అని దబాయించే వారికైతే జవాబే లేదింక.

భగవంతుణ్ణి చేరేందుకు భక్తి కన్నా వైరమే దగ్గరి దారని గదా సుందోపసుందులలా రాక్షస మార్గం ఎంచుకుంది? పదవంటే దైవం కన్నా మిన్నగా భావించే  నేతలు ఎందరో. మరా రాక్షసతాతల అడుగుజాడల్లో నడిచినా ఆగడమేనా? అని గదమాయించేవారి నోరు మూయించే కన్నా మన  చెప్పుతో  మన చెంపల్నే మొత్తుకోవడం ఉత్తమం.

కోపతాపాలివాళే ఏమన్నా కొత్తగా పుటుకొచ్చాయా? తారకాసురుణ్ణి చంపే వీరకుమారుడి కోసం మారుడు పాపం ఎంత చేసాడూ? వట్టినే కాలుడి కంటిమంటకు కాలి బూడిదై పోలేదూ? సీతా స్వయంవరణమేంటి? మూలనున్న శివధనుస్సుకు మూడటం ఏమిటి?

కాలికి గుచ్చుకున్న ముల్లుకేమన్నా ప్రాణముందనా.. కసిగా కాల్చి మరీ కోకోకోలా మాదిరి  చాణక్యుడలా కడుపులో పోసుకుందీ? బోజనాలకి సరిగ్గా పిలవలేదని ఒహళ్ళూ, దండిగా సంభావనలు అందలేదని ఒహళ్ళు.. ఒళ్ళూ పై తెలీకుండా సిల్లీ కారణాలతో  పిల్లినో పిచ్చుకనో అడ్డం పెట్టుకుని  అడ్డమైన   శాపానర్థాలు పెట్టిన పుణ్యమూర్తులు పుట్టలు కొద్దీ ఉన్న గడ్డా కాదా మనది? అని గుడ్లెర్ర చేసే పెద్దలకు బుద్దులేం చెబుతాం?

దూర్వాసులు, పరశు రాములు, కన్నబిడ్డలని కూడా చూడకుండా అడుక్కు తినమని తిట్టిపోసిన విశ్వామిత్రులు.. వీళ్ళంతా.. అంటే కళ్ళు పోతాయేమో గానీ.. అవతార పురుషులు.. మహర్షులూనా? అవసరార్థం ఏదో రాజకీయంగా పట్టుకోసం తిట్టిపోసుకునే మేం తుంటరి మూకలమూనా? అని హంటర్తో కొట్టినట్లు మరీ గదమాయిస్తుంటే మన  కంటివెంట నీళ్ళెలా రాకుండా ఉంటాయి చెప్పండి!

అమృతంకోసం పాలసముద్రం చిలికితే హాలాహలం పుట్టింది ముందా పై లోకంలోనే. ఆ గరళం గొంతులో వంపుకోడానికి  గంగాధరుడున్నాడు అప్పట్లో. ఇప్పటి ఈ శబ్దకాలకూటాన్ని మింగి ఆ హరుడైనా ఎంతవరకు  హరాయించుకోగలడో అనుమానమే మరి!

శిశుపాలుడు  గోపాలుణ్ణి తిట్టిపోసాడంటే అర్థం చేసుకోవచ్చు. మరి గుడి కట్టి గొప్ప రామదాసుణ్ణని చెప్పుకొన్న కంచెర్ల గోపన్నా పడతిట్లనే ఎందుకు నమ్ముకున్నట్లో? కీర్తినిందలు పడని ఒక్క దేవుడైనా తెలుగునాడుల్లో ఉన్నాడా? పరమాత్ముడంటే గుళ్ళో విగ్రహంమల్లే ఏవీ చెవిబెట్టుకోడు. మనిషి పాపాత్ముడే! రెండు చెవులు దొప్పల్లా విచ్చుకుని చచ్చాయే! కాబట్టే సీసం కోసం ఈ వెదుకులాట! చెవుల్లో పోసుకుని ప్రశాంతంగా రోజులు వెళ్ళబుచ్చేకన్నా గొప్ప అదృష్టం లేదు ప్రస్తుతం.

 ఎండకూ వానకూ  చలికీ తట్టుకుని గంటలకొద్దీ ఓపిగ్గా వరసలో నిలబడి  ఓట్లేసి మన మాటగా నేతల్ని చట్టసభలకు  పంపిస్తున్నది ఓ పనై పోతుందిలెమ్మనైతే కాదు గదా! జనం మంచి చెడు, కష్టం సుఖం వివరంగా చర్చించి.. బతుకులు సుఖంగా వెళ్ళమారే దారులేవో కనిపెడతారనేగా దొరలు! 

 చేజేతులా చెడ్డపేరు తెచ్చుకుంటున్నారని జనం ఇప్పటికే  చెవులు కొరుక్కుంటున్నారు. కొరుకుళ్ళు పెరక్క ముందే పెద్దలు నోళ్ళు అదుపులో పెట్టుకోవడం  వాళ్లకే మంచిది.  ముక్కుమీద కోపం మగువల ముఖాలకైతే   అందమేమో గానీ.. ప్రజాపతినిధులకు మాత్రం ప్రతిబంధకమే.

 తన కోపమే తన శత్రువు. చిన్నపిల్లలకేనా.. ప్రజాస్వామ్యాన్ని చిన్నబుచ్చే  పెద్దలకూ పనికివచ్చే నీతి సూత్రం బాబూ ఇది!  ఆవేశంలో ఉన్నప్పుడేవీ  కనిపించడు గాని అవకాశం దొరికినప్పుడు మాత్రం చావు దెబ్బ కొట్టకమానడా శత్రువు.

 ప్రతిపక్షమంటే ప్రజల తరుఫున చట్టసభలకొచ్చే చుట్టం. అధికార పక్షమంటే జనామోదం పరీక్ష నెగ్గిన పట్టం . ఎంత పునీతయి అగ్ని పరీక్షలు ఎదుర్కొన్నా  సీతమ్మవారు  ఓ తాగుబోతు మనిషి మతిలేని మాటలవల్ల అంతఃపురానికి దూరమయింది. ప్రజాస్వామ్యంలో కనీసం ఎన్నికల సమయంలోనైనా జనమే స్వామీ స్వాములింకా మన దేశంలో. జనం ఘోష పట్టించుకోని భాషతో ఏం సాధిద్దామణొ పెద్దల ఉద్దేశం?

ఎప్పుడో తీరికున్నప్పుడు కాశీకి పోయి గంగలో వదిలేసి వచ్చే ఇష్ట పదార్థం కాదు క్రోధం. ప్రజాక్షేత్రమే  సదా పునీతంగా సేవించుకోవలసిన కాశీ,  ప్రయాగలు రాజకీయ నాయకులకు.

ప్రజాస్వామ్య నాటకంలో గయుడంటే ఓటేసి పెద్దలను గద్దెనిక్కించిన సామాన్యుడు. కృష్ణార్జునుల మధ్య యుద్ధం పద్యాల్లాగా వినేటంత వరకే వినోదం. గయుడికే గతి పట్టించారా పెద్దలంతా కలసి  చివరికి? అన్నదే ప్రదర్శన విజయానికి నిదర్శనం.

 కొత్త ఏడాది ప్రారంభమయినందుకైనా  నేతలు పాత కక్షలు మర్చిపోతే మంచిదనుకున్నాం. ఒక చెంపమీద కొడితే మరో చెంప చూపిస్తే .. మంచిదే కానీ.. దాం దుంప తెగనంపిరి.. అసలు చెంపలు బాదుకోడానికా మనం ప్రజా ప్రతినిధులను చట్టసభలకు పంపిటం!

 కుప్పించి లంఘించిన కుండలాల కాంతి పోతన భాగవత పద్యం వరకైతే హృద్యమే కానీ.. కుప్పిగంతులతో రాజకీయాన్ని చిందు భాగోతంగా మారిస్తే ముర్దాబాదులతో మోతెక్కిస్తారు ఎన్నికల్లో మోసిన జనమే!

 క్రికెట్ లో ‘నో బాల్’ వివాదం ప్రపంచ కప్పు  వరకే పరిమితం. ‘డాటర్సాఫ్ ఇండియా’ ..  ఓ రెండు దేశాల విదేశాంగ విధానాలమీదే ప్రధానంగా సర్దుబాటు.

రాజ్యాంగంమీదో.. దేవుడిమీదో  ప్రమాణం చేసి మరీ జనంకోసమని  చట్టసభల్లోకొచ్చి కూర్చున్న పెద్దలకు మరి మనం నచ్చచెప్పేదేముంది? కుబేరుడొచ్చి బడ్జెట్ సమర్పించినా  కుంటి సాకులు వెదికితే నైజం జనం క్షమించి వదిలేస్తారనే? పడ్డవాడెప్పుడూ చెడ్డవాడు కాదన్న ఓర్పు ప్రభుత్వ పక్షానికి ఉంటేనే ప్రజా తీర్పు శిరసావహించినట్లవర్షాలు లేకపోతే ఎలాగో తట్టుకోవచ్చు. తిట్ల వర్షాల పోటెత్తుతుంటే జనం ఎంతకాలమని తట్టుకోగలరు? విచ్చలవిడితనానికి మెచ్చి అధినేతలు కప్పే శాలువలకోసం ముచ్చట పడద్దు!  ముచ్చెమటలు పట్టించే ఎన్నికల పండగలు ముందున్నాయి..  ఆ ముసళ్ళ నోళ్ళలో పడద్దు!  నేతలకు నోళ్ళున్నది లేనోళ్ళ నోళ్ళుగా పలకేందుకు! గుర్తుంచుకోవాలి.

-కర్లపాలెం హనుమంతరావు

 

స్వర్గం- నరకం- కథానిక రచనః కర్లపాలెం హనుమంతరావు -సరదాకేః

 

 

ఎన్నికలైపోయాయి. ఓట్ల కౌంటింగుకి ఇంకా వారం రోజుల గడువుంది. ఎక్కడ చూసినా టెన్షన్.. టెన్షన్! ఎవరినోటవిన్నా రాబోయే ఫలితాలను గూర్చి చర్చలే చర్చలు!

ఓటు వేసినవాడే ఇంత టెన్షన్లో ఉంటే.. ఓట్లు వేయించుకున్నవాడు ఇంకెంత వత్తిడిలో ఉండాలి! రాంభద్రయ్యగారు ఓట్లేయించుకుని ఫలితాల కోసం నరాలుతెగే ఉత్కంఠతో ఎదురుచూసే వేలాదిమంది అభ్యర్థుల్లో ఒకరు.

అందరి గుండెలూ ఒకేలా ఉండవు. కొందరు వత్తిళ్ళను తట్టుకుని నిలబడగలిగితే.. కొందరు ఆ వత్తిడికి లొంగి బక్కెట తన్నేస్తారు. రాంభద్రయ్యగారు ఆ సారి అదే పని చేసి సరాసరి స్వర్గ నరక మార్గాలు చీలే కూడలి దగ్గర తేలారు.

ఆ సరికే అక్కడో మంగళగిరి చేంతాండంత క్యూ!  ఆమ్ ఆద్మీలకంటే ఈ మాదిరి చేంతాళ్ళు అలవాటే గాని.. జనవరి ఒకటి, శనివారం కలిసొచ్చే రోజైనా  తిరుమల శ్రీవారి సుప్రభాతసేవ దర్శనానిక్కూడా క్యూలో నిలబడే అగత్యం లేని బడేసాబ్ రాంభద్రయ్యగారిలాంటివారికీ క్యూ వరసలు పరమ చిరాకు పుట్టించే నరకాలు.

ఇదేమీ భూలోకం కాదు. లాబీయింగుకు ఇక్కడ బొత్తిగా అవకాశం లేదు. తన వంతుకోసం ఎదురుచూడడం  రాంభద్రయ్యగారికేమో అలవాటు లేని యవ్వారం. అక్కడికీ ఎవరూ చూడకుండా స్వర్గం క్యూలో చొరబడబోయి కింకరుడి కంట్లో పడిపోయారు పాపం.

'ఇదేం మీ భూలోకం కాదు. మీ చట్టసభల్లో మాదిరి ఇష్టారాజ్యంగా గెంతడాలు కుదరవు.  ముందక్కడ ప్రవేశ పరీక్షకు హాజరవ్వాలి. ఆ ఫలితాన్నిబట్టే నీకు స్వర్గమో.. నరకమో తేలేది. నువ్వొచ్చి యేడాదికూడా కాలేదు. అప్పుడే అంత అపసోపాలా బాబయ్యా? నీ నియోజకవర్గంలో జనం పింఛను కోసం, జీతం కోసం, రేషన్ కోసం, గ్యాసుబండల కోసం, అధికారుల  దర్శనం కోసం.. ఎన్నేసి రోజులు నిలువుకాళ్ళ కొలువు చేస్తారో నీకేమైనా అవగాహన ఉందా?' అని గదమాయించాడు దే.దదూత (దేవుడు, దయ్యం కలగలసిన అంశ- దే.దదూత)

'ఆ భూలోక రాజకీయాలు ఇప్పుడంతవసరమా దూతయ్యా? వెనకెంత క్యూ ఉందో చూసావా?ముందు నా స్వర్గం సంగతి తెముల్చు!' పాయింటు లేనప్పుడు టాపిక్కుని పక్కదారి పట్టించే పాతజన్మ చిట్కా ప్రయోగించారు రాంభద్రయ్యగారు.

చిత్రగుప్తుడి దగ్గరకొచ్చింది కేసు.

సెల్లో ఆయనగారెవర్నో కాంటాక్టు చేసినట్లున్నాడు.. రాంభద్రయ్యగారిని చూసి అన్నాడు 'ఓకే పెద్దాయనా! మీరేమో రాజకీయనేతలు! కనక ప్రత్యేక పరీక్ష పెడుతున్నాం. మామూలు ఓటర్లకు మల్లే  మీకు పాత జీవితం తాలూకు  పాప పుణ్యాలతో నిమిత్తం లేదు. ప్రజాస్వామ్యయుతంగా మీకు మీరే స్వర్గమో.. నరకమో ఎన్నుకోవచ్చు..'

'నాకు స్వర్గమే కావాలయ్యా!'

'ఆ తొందరే వద్దు. ఆసాంతం వినాలి ముందు. ఎన్నుకోవడానికి ముందు ఒకరోజు నరకంలో.. ఒకరోజు స్వర్గంలో గడపాలి..'

'ఐతే ముందు నన్ను స్వర్గానికే పంపండయ్యా!'

'సారీ! రూల్సు ఒప్పుకోవు. ముందుగా నరకానికి వెళ్ళి రావాలి.. ఆనక స్వర్గం' అని దే.దదూత  వంక సాభిప్రాయంగా చూసాడు చిత్రగుప్తుడు. అర్థమైందన్నట్లు రామచంద్రయ్యగారి భుజం మీద చెయ్యేసి బలంగా కిందికి నొక్కాడు దేదదూత.

కనురెప్పపడి లేచేంతలో కంటి ముందు.. నరకం!

నరకం నరకంలా లేదు! స్వర్గంలా వెలిగిపోతోంది. మెగాస్టార్ చిత్రం ఫస్ట్ షో సందడంతా అక్కడే ఉంది. మిరిమిట్లు గొలిపే రంగురంగుల లైట్లు. మనస్సును ఆహ్లాదపరిచే బాలీవుడ్ మిక్సుడ్ టాలీవుడ్ మ్యూజిక్కు! ఎటు చూసినా పచ్చలు,  మణిమాణిక్యాలతో  నిర్మితమైన  రమ్యహార్మ్యాలు! హరితశోభతో అలరారే సుందర ఉద్యానవనాలు! మనోహరమైన పూలసౌరభాలతో వాతావరణమంతా గానాబజానా వాతావరణంతో మత్తెక్కిపోతోంది. మరింత కిక్కెంకించే రంభా ఊర్వశి మేనక తీలోత్తమాదుల  అంగాంగ  శృంగార నాట్యభంగిమలు!

పాతమిత్రులందర్నీ అక్కడే చూసి అవాక్కయిపోయారు రాంభద్రయ్యగారు. అక్రమార్జన చేసి కోట్లు వెనకేసిన  స్వార్థపరులు, వయసుతో నిమిత్తం లేకుండా ఆడది కంటపడితే చాలు వెంటాడైనా సరే  కోరిక తీర్చుకునే కీచకాధములు, అధికారంకోసం మనిషుల ప్రాణాల్ని  తృణప్రాయంగా తీసే పదవీలాలసులు, ఉద్యోగాలు.. ఉన్నతకళాశాలల్లో సీట్లకు బేరం పెట్టి కోట్లు కొట్టేసి ఆనక  బోర్డ్లు తిరగేసే ఫోర్ ట్వంటీలు, పాస్ పోర్టులు,  సర్టిఫికేట్లు, కరెన్సీ నోట్లు, మందులు, సరుకులు వేటికైనా చిటికెలో నకిలీలు తీసి మార్కెటుచేసే మాయగాళ్ళు, నీరు, గాలి, ఇసుక, భూమిలాంటి సహజ వనరులపైనా అబ్బసొత్తులాగా  దర్జాగా కర్రపెత్తనం చేసే దళారులు..  అంతా ఆ అందాలలోకంలో ఆనందంగా తింటూ, తాగుతూ, తూలుతూ, పేలుతూ  యధేచ్చగా చిందులేయడం చూసి రాంభద్రయ్యగారికి మతిపోయినంత పనయింది. సొంత ఇంటికి వచ్చినట్లుంది. అన్నిటికన్నా అబ్బురమనిపించింది.. తెలుగుచిత్రాల్లో పరమ వెకిలిగా చూపించే యమకింకరులుకూడా చాలా ఫ్రెండ్లీగా కలగలిసిపోయి వాళ్ల మధ్య కలతిరుగుతుండటం!

అతిథుల భుజాలమీద ఆప్యాయంగా  చేతులేసి,  బలవంతంగా సుర లోటాలు లోటాలు తాగించడం.. మిడ్ నైట్ మసాలా జోకులేస్తూ జనాలను అదే పనిగా నవ్వించడం.. ఎన్ని జన్మలెత్తినా మరువలేనిదా ఆతిథ్యం. కడుపు నింపుకునేందుకు అన్ని రుచికరమైన పదార్థాలు సృష్టిలో ఉంటాయని అప్పటివరకు రాంభద్రయ్యగారికి తెలియనే తెలియదు. రోజంతా ఎంతానందంగా గడిచిందో .. రోజుచివర్లో.. చీకట్లో ఏకాంతంలో అతిలోకసుందరులెందరో   బరితెగించి మరీ  ఇచ్చిన సౌందర్య ఆతిథ్యం ఎన్ని జన్మలెత్తినా మరువలేనిది.

ఆ క్షణంలోనే నిర్ణయించేసుకున్నారు రాంభద్రయ్యగారు ఏదేమైనా సరే  ఈ నరకాన్ని  చచ్చినా వదులుకోరాదని.

కానీ.. షరతు ప్రకారం మర్నాడంతా స్వర్గంలోనే గడపాల్సొచ్చింది పాపం రాంభద్రయ్యగారికి. స్వర్గం మరీ ఇంత తెలుగు ఆర్టు ఫిలింలా డల్ గా ఉంటుందని అస్సలు అనుకోలేదు. మనశ్శాంతికోసం సాంత్వనసంగీతమంటే   ఏదో ఒక ఐదారు నిమిషాలు  ఓకేగానీ..  మరీ   రోజుల తరబడి ఆకాశవాణి నిలయవిద్వాంసుల కచేరీ తరహా అంటే.. మాజీ ప్రధాని మన్మోహజ్ జీ సారుకయినా తిరగబడాలనిపించదా? ఒక వంక కడుపులో పేగులు కరకరమంటుంటే ఆ ఆకలిమంటను చల్లార్చడానికి ఏ  ప్యారడైజ్ బిర్యానీనో పడుతుంటే మజాగానీ .. అజీర్తి రోగి మాదిరి అసలాకలే లేని హఠయోగమంటే.. ఎంత స్వర్గంలో ఉన్నా నరకంతో సమానమే గదా! దప్పికతో నిమిత్తం లేకుండా ఏ   బాగ్ పైపరో.. ఆఫీసర్సు ఛాయస్సో.. స్థాయినిబట్టి ఆరగా ఆరగా ద్రవం గొంతులోకి చల్లగా జారుతుంటే కదూ.. స్వర్గం జానా  బెత్తెడు దూరంలోనే ఉన్నట్లండేది!  ఎంత అతి మధురామృతమైనా ఒక బొట్టు మొదట్లో అంటే మర్యాదకోసం’ చీర్స్’ కొట్టచ్చుగానీ.. అదే పనిగా అస్తమానం లోటాల్లో పోసి గుటకేయాల్సిందేనంటే.. ‘ఛీ!’ అంతకన్నా నరకం మరోటుంటుందా? ఆకలిదప్పులు, నిద్రానిప్పులు, మంచిచెడ్డలు, ఆరాటాలు.. పోరాటాలేవీ లేకుండా పద్దస్తమానం తెలిమబ్బులమీదలా తేలుతూ పారవశ్యం నటించాలంటే రాంభద్రయ్యలాంటి ఆసులో కండెలకు అసలు అయే పనేనా?

'ఎవర్నుద్దరించేందుకు, ఏం సాధించేందుకు స్వర్గసామ్రాజ్యంలో.. జన్మరాహిత్యం.. కోరుకోవాలి బాబూ? రమణీయ విలాసాలు, రసికజన వినోదాలు, రత్నఖచితాడంబరాలు.. యధేఛ్చావిహారాలు.. రుచికరాహారాలు, రసరమ్య పానీయాలు,. స్వర్గంలో దొరుకుతాయన్న మాట వట్టిబూటకమేనని ఒక్క రోజులోనే  తేలిపోయింది.  వాస్తవానికి ఇవన్నీ పుష్కలంగా దొరికే చోటు నరకమే అయినప్పుడు ఆ నరకంలోనే స్థిరనివాసం ఏర్పరుచుకోవడమే తెలివైన పని.

మర్నాడు   చిత్రగుప్తుడిముందు ప్రవేశపెట్టబడినప్పుడు మరో ఆలోచన  లేకుండా నరకానికే ఓటేసేసారు రాంభద్రయ్యగారు.

ఫార్మాలిటీసన్నీ పూర్తి చేసుకుని అధికారిక పత్రాలతో సహా నరకంలోకి అడుగు పెట్టిన రాంభద్రయ్యగారికి కళ్ళు బైర్లుకమ్మే దృశ్యం కంటబడిందీసారి.

నరకం మునుపటి స్వర్గంలాగా లేదు. నరకంలాగేనే ఉంది. మూసీ వడ్డునున్న  మురికివాడకు నకలుగా ఉంది.  మొన్నటి వాతావరణానికి ఇప్పటి వాతావరణానికి బొత్తిగా సాపత్యమే లేదు.

మొదటి దృశ్యం- డొనాల్డ్ ట్రంప్ భారతావనికి వచ్చేముందు తీర్చిదిద్దిన అహమ్మదాబాదునగరం.

రెండో దృశ్యం- కొత్త ప్రభుత్వం గద్దె ఎక్కిన మర్నాటి  అమరావతినగరం.

పైనుంచీ ఆగకుండా అదే పనిగా వర్షిస్తున్నది చెత్తా చెదారం. ఆగకుండా ఆ చెత్తను  ఎతిపోస్తున్నది  వేలాదిమంది కూలీజనం. నిజానికి  వాళ్లంతా మొన్నరాంభద్రయ్యగారు  సందర్శనార్థం విచ్చేసినప్పుడు-  పిలిచి ఆతిథ్యమిచ్చిన నరక గేస్తులు! భూలోక నేస్తులు! వాళ్ల వంటిమీదిప్పుడు  వేళ్లాడుతున్నవి  అప్పటికి మల్లే  చీని చీనాంబరాలు కాదు. చివికి, చిరిగి, చీలకలైన మసి పేలికలు! చేతుల్లో పెద్ద పెద్ద చెత్తబుట్టలున్న ఆ పెద్దమనుషులంతా  భూమ్మీద పెద్ద పెద్ద పదవులు వెలగబెట్టిన వి.వి.వి.వి.ఐ.పి లు! పనిలో ఒక్క సెకను అలసత్వం చూపించినా చాలు వాళ్ల వీపులమీద కొరడా దెబ్బలు ఛళ్ళుమని  పడుతున్నాయి. ఆ కొరడాధరులంతా మొన్న ఇదే చోట శిబిని, అంబరీషుణ్ణి మరిపించిన ఆతిథిమర్యాదలతో రాంభద్రయ్యగారిని మురిపించిన  యమకింకరులే!

నోటమాట రాకా మాన్పడిపోయిన రాంభద్రయ్యగారి చేతిలో ఓ పెద్ద చెత్తబుట్ట పెట్టి ముందుకు తోసాడో కింకరాధముడు. ఆగ్రహం పట్టలేక నరాలు చిట్లేటంత బిగ్గరగా గావుకేక వేసారు రాంభధ్రయ్యగారు 'మోసం!.. దగా! మొన్న నరకానికి స్వర్గధామంగా విపరీతమైన కలరింగిచ్చి.. ఇవాళీ నరకంలో పారేయడం నమ్మక ద్రోహం.. కుట్ర!'

తాపీగా సమాధానమిచ్చాడా యమకింకరుడు 'ద్రోహానికి.. కుట్రకి.. ఇదేం మీ భూలోకం కాదు మానవా!  నువ్వు నరకాన్ని చూసిన రోజు  మా స్వర్గ నరకాల ఎన్నికల ప్రచారం ఆఖరి రోజు. ఎలక్షన్లు  అయిపోయాయి. నువ్వు ఎన్నుకున్న నరకానికే కదా నిన్ను తరలించిందిప్పుడు? ఇందులో మోసం.. దగా ఉంటే.. మీ భూమ్మీద జనానికి మీరు చూపించే హామీలల్లోనూ మోసం.. దగా ఉన్నట్లే లెక్క! ముందే చెప్పాం గదా!  భూమ్మీద మీలాంటి నాయకులు నడిపిస్తున్న ప్రజాస్వామ్య విధానాలనే మేమూ ఇక్కడ మా లోకాల్లో అనుసరిస్తున్నామీ మధ్య' అన్నాడు కింకరుడు కొరడా రాంభద్రయ్యగారి వీపుమీద ఝళిపిస్తూ!

'అబ్బా!' అని రాంభద్రయ్యగారి పెడబొబ్బ. అది కొరడా దెబ్బో.. ప్రజాస్వామ్యం దెబ్బో ఎవరికి వారుగా  జనాలకు హామీలు గుప్పించి గద్దెనెక్కేవాళ్ళే అర్థంచేసుకోవాలబ్బా!

స్వస్తి!

కర్లపాలెం హనుమంతరావు

***

వీళ్ళు మారర్రా బాబూ! - సరదాకే - కర్లపాలెం హనుమంతరావు

 

 

‘అబద్ధాల శక్తి ఏంటో నాకు మించి తెలిసిన పురాణ పాత్ర మరోటి లేదు. ఇచ్చిన మాట నిలబెట్టుకునే బెట్టుసరికి పోతే మన శ్రీరామచంద్రమూర్తి బాటలోనే చెట్టు పుట్టలు .. ‘

రామయ్య ప్రస్తావనలు ఇప్పుడొద్దు హరిశ్చంద్రా! రోజులని బట్టి నడత మార్చే అవకాశవాది  అవసరం. విభీషణుడేమైనా మళ్లీ మన వైపుకు వస్తాడేమో.. ఓ ప్రయత్నం జరిగితే బావుణ్ణు ముందు!

నిండు సభలో కూడా పెద్దలంతా చూస్తుండంగా ఎంతో గుండెధైర్యంతో ఓ శీలవతిని ఈడ్చుకొచ్చాడే! అన్న చెప్పీ చెప్పగానే మరో దుశ్శంకకు పోకుండా.. తల్లిలాంటి శీలవతి  చీర మీదంత నిర్లజ్జగా చేయ్యేశాడే.. ఆ  దుశ్శాసనుణ్ణి మనం మళ్లీ మన  సలహాదారుల హోదాలోకి తిరిగి తెచ్చుకొనే పని చూసుకోవాల్సిందన్నాయ్!  

మంచి మాట! మంచి సలహాలిచ్చే విదురుళ్ల వంటి చెత్త సరుకుతో పార్టీ చెదలు పట్టిపోతుందేమోనని దిగులుగా ఉందబ్బీ! ఎంత కాలం ఒక్క నా దొంగ పాచికల మీదనే మహాభారతం ఆసాంతం నడిపించగలుగుతాం!

మామా! ఒక్క భారతాన్ని మాత్రమే పట్టుకు వేళ్లాడుతుంటే  మనకు అస్త్రాలు ఆట్టే దొరిగే అవకాశం లేదు. ఔటాఫ్ బాక్స్ థింకింగ్ అవసరం ప్రస్తుతం! అరాచకమైన ఆలోచనలు చేస్తే తప్ప విజయాలు సిద్ధించని దిక్కుమాలిన రోజులివి. జూదంలో మాయ చేసి ఏదో ఓ పథ్నాలుగేళ్లు జనం కళ్ల బదకుండా దూరంగా నెట్టేశాం గానీ, అ దాయాది పాండవులను. ఇచ్చిన గడువు ఇట్టే కరిగిపోయింది! ఈ సారి ఏ ఐదూళ్ల కోసమో దేబిరించి రాయబారాలు నడిపిస్తారనుకోడం మన భ్రమ.

నిజమే! వేగులవాళ్లు తెచ్చిన దుర్వార్తల ప్రకారం ధర్మారాజుక్కూడా అధర్మ వర్తనలో శిక్షణ ఇప్పిస్తుట్లు సమాచారం..

ఎవరూ? దొంగిలించి తినందే వెన్నైనా ముద్ద గొంతు దిగదనే ఆ కన్నయ నిర్వాకమేనా ఇదంతా!

అతగాడిని ఆడిపోసుకునీ ఉపయోగం ఏముందిలే? ఉత్తరకుమారులు నిజానికి ఆ పక్షంలో ఉన్నది ఏ ఒకరో ఇద్దరో! మన దగ్గరో?

ఇప్పుడెందుకులే మామా ఆ దిక్కుమాలిన లెక్కలన్నీ! కురుక్షేత్రం ఏ క్షణంలో అయినా రావచ్చనే వార్తలు వినవస్తున్నాయ్! దుష్ట శక్తులన్నింటినీ చేజేతులా దూరం చేసుకొనే వ్యూహం ఏమంత మేలని? ముందా సంగతి మీద కదా మన ధ్యసంతా ఉండాల్సిందీ!

అల్లుడూ! నీ అమాయకత్వం ఇట్లా అఘోరించబట్టే అవతల భీముడు అనుక్షణం అట్లా పెట్రేగిపోతున్నది. అర్జునుడు  ఆ  వాసుదేవుడి దగ్గరికి రాయబారం వెళుతున్నట్లు వార్త! అప్రమత్తం అవు ముందు!

చెప్పు మామా! పెద్దలందరూ ‘థూఁ.. ఛాఁ’ అంటున్నా.. నువ్ చెప్పినట్లే కదా.. తు. చ తప్పకుండా అందరం ఆచరిస్తోందిక్కడ. అడవులకు తరిమి కొట్టమన్నావ్! లక్క ఇళ్లు తగలెట్టమన్నావ్! ఎక్కడ దాక్కున్నారో బైటపడ్డానికి గోవుల గ్రహణం పేరుతో విరాటరాజు మీదకు విరుచుకుపడమన్నావ్! మరిప్పుడే అఘాయిత్యం చెయ్యమన్నావో.. అదీ నువ్వె చెప్పు!

లోపలికొస్తే మళ్లీ బైటకు వెళ్లలేనంత పకడ్బందీగా పద్మవ్యూహం ఉంది. దాన్ని గురించి ఆలోచించల్లుడూ! బుద్ధిమంతులైన పెద్దలు చాలా మంది ఇంకా ధర్మరాజుకే విజయం దక్కాలని మనసులో ప్రార్థిస్తున్నారు. వాళ్లందరి నెత్తి మీదా ఇప్పట్నుంచే గెలిచే బాధ్యతలు రుద్ధిపెట్టు ముందు. దర్మాన్ని గురించి మీమాంస పడేందుకు క్షణమైనా ఖాళీగా కూర్చోనివ్వద్దా ముసలి మొద్దులను. నీ గుడ్డి తండ్రి నీ వైపే ఉన్నా.. ఒక్క బాబాయ్ విదురుడు చాలు బాబా అస్తమానం ఆయన చెవులో నీతుల వంకన ఓఁ అంటూ  రొద పెట్టడానికి. నీ ఒక్కగా నొక్క స్నేహితుడు కర్ణుడు మీద మాత్రమే భరోసా పెట్టుకుంటే కథ నడవదు. నేర్చిన విద్యలన్నీ సమయానికి మరిచే జబ్బున్నప్పుడు ఎంత మహారథి అయితే మాత్రమేంటి సాధించేదేముంది? నీ వంద మంది తమ్ముళ్ల పేర్లే నీకు సరిగ్గా గుర్తుకొచ్చి చావవు! అయినా వాళ్లందరికి మాత్రం నువ్వే ప్రత్యక్ష దైవం. చూసి రమ్మని కూడా నువ్వు చెప్పనక్కర్లేదయ్యా!.. కాల్చి రావడంలో మహా ఉత్సాహం చూపిస్తారందరూ! అదేదో బోడి రాజసూయయాగంలో కృష్ణుడికి ముత్తెమంత పెత్తనమిచ్చినందుకే శశిపాలుడు తిట్టిన తిట్టు తిట్టకుండా తిట్టిపోశాడని వింటున్నాం! అట్లాంటి తిట్ల గుంపు నంతా మన వైపుకు తిప్పుకో  ముందు!

శకుని అల్లుడు దుర్యోధనుణ్ణి కూర్చో బెట్టుకుని  దుర్బోధలు చేస్తున్నాడు యధాశక్తి.. చుట్టు పక్కల ఏం జరుగుతుందో కూడా చూసుకొనే ధ్యాస లేకుండా. సర్వాంతర్యామి  రావడం ఎవరూ గుర్తించలేదు.

'ఏం జరుగుతోందిక్కడ?' గద్దించాడు దేవుడు. శకుని దుర్యోధనులిద్దరూ నోరు మెదపలేదు.

అయినా సర్వేశ్వరుడికి ఒకరు చెప్పాలా? 'బోలెడంత భారతం సృష్టించి వచ్చారు ఈ లోకాలకు. గడ్డాలు పట్టుకు బతిమాలితే.. పోనీలే.. ఏదో ఒక అవకాశం ఇచ్చి చూద్దాం.. ఎంతటి కర్కోట నాయకుడైనాఅ మంచిగా  మారితే.. జనాలకే కదా ప్రయోజనం అన్న ప్రజాప్రయోజనం దృష్ట్యా దయతలచి కొంతకాల బెయిలిచ్చా. అభాగ్యులను సేవించుకుంటానని మాట ఇస్తేనే  ఒక అవకాశం ఇచ్చా! బెయిలులో ఉండీ మీ బుద్ధి పోనించుకుంటున్నారు కాదిద్దారూ! చేసిన తప్పులు సరిదిద్దుకొనే బదులు గిట్టనోళ్లను మట్టుపెట్టేందుకు మళ్లీ మరో కురుక్షేత్రం బాపతు  కుట్రకు తెర తీయబోతున్నారు! అదీ నా  స్వర్గం నుంచే! ఛీఁ! రసాతలమే మీ పులుసు తీసే సరయిన స్థలం.. ఎవరక్కడ.. ' అంటూ బిగ్గరగా కింకరుల కోసమై చప్పట్లు కొట్టాడు దేవుడు పరమ చిరాగ్గా.

-కర్లపాలెం హనుమంతరావు

12, మార్చి, 2021

***

 

కోప ప్రకోపాలు - ఈనాడు - వ్యంగ్యం - జనవరి, 22, 2009

ఈనాడు-  హాస్యం-  వ్యంగ్యం 

కోప ప్రకోపాలు

రచన - కర్లపాలెం హనుమంతరావు

22-01-2004

మొన్నామధ్య జరిగిన స్థానిక ఎన్ని కల్లో పార్టీ ఓడిందని రాజీనామాలి చ్చిన మంత్రుల్లో ఒకాయన సీయం గారిని కలిసి సంజాయిషీ ఇచ్చి బయటకొచ్చాడు. 'ముఖ్యమంత్రిగారే మన్నారూ? అనడిగాడు ఒక విలేకరి. 'బూతులు తిట్టేడయ్యా' అన్నాట్ట ఆ మాజీ. 'బూతులు వదిలేసి ఇంకేమన్నారో చెప్పండి సార్!' 'ఇంకేమీ అనలేదు' అని వెళ్ళిపోయాట్టా పెద్దమనిషి.

'కోషనరం తెగిపోయిన సీయమ్మే ఇలా కనబడి నవాళ్ళను కడిగేస్తుంటే- ఆర్టాఫ్ లాఫింగ్ అస్సలు పట్టని మాజీ సీయం ఎవరినైనా వేలుచూపించి బెదిరించటంలో తప్పేముంది! పాలిటిక్సులో కోపా లపాలు కాస్తంత ఎక్కువే అయినట్లుంది. కదండీ! రోడ్డు మీదా ఇదే రొదగా ఉంది ప్పుడు' 'గతంలో ఆగ్రహాలకు ప్రత్యేక కోపగృ హాలుండేవి. నిన్నటిదాకా మన నాయకులు నిప్పులు కక్కుకునేందుకు ఓ వేదిక సౌక ర్యంగా ఉండేది. దాని సమావేశాన్ని కుదిం చారు కదా! సభ్యుల కడుపుబ్బరాలు మరెలా తీరాలయ్యా? ఉప్పూకారం తినే మనుషులకే కాదు, కుక్కలకూ కోప తాపా లెక్కువని కొత్తగా పరిశోధనల్లో తేలింది. నిత్యం నలుగురి మధ్య నలిగే నాయకుడికి రవ్వంత బీపీ పెరిగి రోడ్డుమీద రౌడీ తరహా భాషలో రెండుమూడనుకొంటేనే ఇంత రాద్ధాంతమా! ధరలు పెరిగి ఆర్థిక మాంద్యంతో సతమతమయ్యే సగటు ఓటరుకేదో ఉచితంగా వినోదం పంచటానికి తొడలు కొడుతు న్నారనో, మీసం మెలిపెడుతున్నారనో సరిపెట్టుకో వచ్చుగదా!

అసలీ కోపాలు ఇప్పుడు కొత్తగా పుట్టినవా! క్రీస్తు పుట్టకముందు నుంచీ ఉన్నవేగా! శూర్పణఖ కోపం రామాయణమైంది. శివుడి మూడో కంటిమీద బోలెడు కథలున్నాయి. పరశురాముడిది కోపావతా రమేగా! సమస్తేంద్రియాలను జయించిన దుర్వాసు డికే తుస్సుమంటే కోపం వస్తుందిట! చాణక్యుడు కోపం చేతకాదూ నందుల దుంపతెంపిందీ! రామాంజనేయుల్లాంటి వాళ్ళమధ్యే యుద్ధాలు తప్ప లేదు.

రామదాసు కడుపుమండికదూ ఎవడబ్బా సొమ్మాని కులుకుతూ తిరిగేవు' అని శ్రీరామ చంద్రుణ్ని కీర్తనల్లో తిట్టిపోసింది! 'తన కోపమే తన శత్రువ'ని సుమతి శతకకారుడు ఎంత మొత్తు కున్నా లోక్సత్తావాళ్లు తప్ప లోకంలో ఇంకెవరూ ఆర్టిఫిలిం భాషను పట్టుకుని వేలాడటం లేదయ్యా ఇప్పుడు గాంధీగారికి సత్యాగ్రహం రాబట్టే గదా దేశానికి స్వాతంత్ర్యం తెచ్చింది! ఇందిరమ్మ అలగబట్టే గదా యమర్జన్సీ వచ్చింది. బుష్క కోపం లేక పోతే ఇరాక్ యుద్ధం వచ్చేదా? బుష్ మీదెంత కాలకపోతే ఆ పాత్రికేయుడు కాలిబూటు విసురు తాడు! ఒక్కోరి కోపం ఒక్కో రూపంలో ఉంటుంది. కేసీఆర్కి కోపంవస్తే 'దద్దమ్మ'లని చెడతిడతాడు. మారప్పకు మండిందంటే సీమ కవిత్వం కడతాడు. జానాకి కోపంలో వాక్యం తెగదు. రాజశేఖర్ కి పదం కుదరదు. రాఘవులికి నవ్వు చెదరదు. నారాయణ కోపమైతే- ఎప్పుడు ఏ తీరం దాటు తుందో తెలీని వాయుగుండం! కోస్తా' భవాని శ్లేషలో తిడుతుంది. చిత్తూరు రోజా దృష్టప్పుడూ బారుమీదో, దర్బారు మీదో పెడుతుంది. ఆ మధ్య చిరంజీవి తమ్ముడు పంచెకట్టుపై పడ్డాడు. తెలుగు

సాహిత్యంలో ప్రత్యేకంగా తిట్ల కవిత్వం ఉంది. తెలుసో లేదో သ మహామహాకవులే కడుపు మండితే కందాల్లో కొట్టుకునే వాళ్లు. ఇప్పటి పార్టీలకు ఓపికా, తీరికా లేక కార్టూన్లేసే వాళ్లమీద రాళ్లేస్తు న్నారు. వార్తలు రాసేవాళ్లమీదా కేసులేస్తున్నారు. "అసలు మనిషికి పశువుకీ తేడా తిట్లే కదయ్యా.

పిట్టలు తిట్టగలవా? తిట్టినా తిట్టించుకొన్నా సృష్టిలో మనిషికొకడికే సాధ్యం. ఈ ప్రత్యేకతను ఓ కళగా భావించాలిగానీ... కళవళపడితే ఎలా? బయటకు అనువుగానీ నీకూ బంగి అనంతయ్య దసరా వేషాలూ, గద్దరు గజ్జకట్టి పాడుతూ వేసే చిందులూ, పవన్ కల్యాణ్, షబ్బీర్ అలీ నిందాస్త్రాలపైనే మోజు. కర్కశంగా మాట్లా డేవాడు తరవాతి జన్మలో పిల్లిగా పుడతా డని గరుడపురాణం ఎంత బెదిరించినా ప్ర ప్రతినిధులవడానికే ప్రాధాన్యం ఇస్తారు. ఇలాంటి కార్యకర్తలు ఉన్నంత కాలం ఈ పురాణ పారాయణాలూ ఇలా కొనసాగాల్సిందే. జపానువాడు కోపంవస్తే విరామం లేకుండా పనిచేస్తాడని విన్నాము. మనం కూడా ఈ తిట్టు వాఙ్మయాన్ని తిట్టుకుంటూ కూర్చోకుండా ప్రాచీన భాషగా గుర్తించాలి. అధికార భాషగా ఆమోదిం చాలి. ముందుతరాల కోసం ఈ పదకోశం విస్తృతమయ్యే దిశగా తెలుగు అకాడమీ కృషిచేయాలి. శాసనసభ్యుల సౌకర్యార్థం సమా వేశ కాలాన్ని పొడిగించి ప్రత్యేకంగా కాలాన్ని కేటా యించాలి. నీ వంతు కృషిగా నిన్నెవరన్నా తిడితే తిరిగి తిట్టదు. గాంధీగిరీ మాదిరి ఇంకో నలుగు రిని తిట్టుకుంటూపో అన్నట్లు, ఇది ఎన్నికల సంవత్సరం ఆక్షేపణలని, అధిక్షేపణలని ఆపటం ఎవరితరమూ కాదు. ఈ ఏడాదిని అధిక్షేప నామ వత్సరంగా పేరు మారిస్తే సముచితంగా వుంటుంది. ఇన్ని చేసినా నీ కోపం ఇంకా తీరక పోతే ఓటరుగా నీ ప్రతాపం చూపించు అదొక్కటే నీ బాధకు మందు.

-

రచన - కర్లపాలెం హనుమంతరావు

22-01-2004

 

కొత్త రాజకీయాలకు సరికొత్త అవతారం -సరదా వ్యాఖ్య -కర్లపాలెం హనుమంతరావు

 

పాడు రాజకీయాలని పద్దాకా చీదరించుకోడం మనకో పెద్ద ఫ్యాషనై పోయిందికానీ.. పాలిటిక్సువల్ల ఎన్ని లాభాలో పట్టించుకోకుండా ఉన్నాం.

 ముక్కుసూటిగా వెళితే రాజకీయాలు వికటిస్తాయని మనకో యాంటీ సెంటిమెంటు. ముక్కునిలా లైట్ గా నేలకు రాసేస్తే చాలు ఎక్కడెక్కడి పాపాలూ జనాలు ఇట్టే క్షమించేస్తారని కనిపెట్టేసింది రాజకీయాలే. త్రేతాయుగంనాటికి ఈ తెలివితేటలు అభివృద్ధి చెందకే  పాపం సీతమ్మవారు అంత అమానుషమైన అగ్నిపరీక్షకు గురయింది!

' అనను.. కనను..వినను' అంటూ వున్న నోరూ, కన్నూ, చెవులూ వృథాచేసుకునే చాదస్త రాజకీయాలు కాదన్నా ప్రస్తుతం నడుస్తున్నవి. గతంలో మన యువనేత ఒకాయన అంగరక్షకుడి వీపుని మైకుసెట్టు పెట్టుకునే బల్లగా మార్చే షార్ప్ నెస్ చూపించాడు..  మరి గుర్తుందో లేదో షార్ట్ మెమొరీ ఎక్కువుండే మెజార్టీ ఓటరయ్యలకు. సైంటిస్టులు ఏళ్ళ తరబడి కోట్లు ఖర్చుపెట్టినా సాధించలేని ప్రయోజనాలెన్నో పొలిటీషియన్లు ఇట్టే పసిగట్టి ప్రచారంలో పెట్టేస్తున్నారు పరమ చురుగ్గా.

ఏళ్ల చరిత్రున్న  ఓ జాతీయపార్టీకి గుర్తింపు తెచ్చింది  ఆఫ్ట్రాల్ ఒక అరచెయ్యి. చేతులనేవే లేకపోతే ప్రజాస్వామ్యానికి చేష్టలుడిగినట్లనేగా మీనింగ్? లోక్ పాల్ బిల్ ఎంత గొప్పదైతేనేమి?  చట్టసభల్లో మెజారిటీ సభ్యులు చేతులెత్తిం తరువాతే గదా ఆ బండి ముందుకు కదిలింది!

 బూతు కూతలు రాని నేతలకీ చేతులు చేసే సాయం అంతా ఇంతా  కాదు. ఎదుటి పక్షం మీద మర్యాదపూర్వకంగా దాడి చేయాలంటే ఎంతలావు  పెద్దమనిషైనా 'చేతులు తీసేస్తా.. నాలుక కోసేస్తా.. తోకలు పీకేస్తా' అంటూ  వంటి మీది భాగాలనే కదా మహా రోషంగా  వాడుకోవాల్సుంది..ఎమ్త మాజీ సీనియర్ నేతగా పేరు సంపాదించినప్పటికీ!

హస్తం పార్టీ మీద అస్తమానం పడి ఏడ్చే ఓ యువనేత తదభినయానికి అనుగుణంగా  వాడేదీ మరి స్వీయ హస్తాలనే! రుబ్బుడు రొట్లో పొత్రంలా అరచేతులు అలా గాలిలో తిరక్కపోతే నోటి నుంచొక్క ఓదార్పు ముక్కయినా పెగులుతుందా!

'కళ్ళు కైకలూరులో.. కాపురం డోకిపర్రులో' అని సామెత. ఆ  టైపు  పక్కచూపుల మీదెంత రచ్చవుతోందో తెలుసుగా ఈనాటి రాజకీయాలల్లో! హన్నన్నా!  నాయకులు  కళ్లకూ, కన్నీళ్ళకూ అద్దే  కొత్త కళలు మరి అన్నా..ఇన్నా!

శాల్తీలు గల్లంతై పోయి ఏళ్ళూ పూళ్ళూ గడిచిపోతున్నా ఓటరు కంటబడితే చాలు.. వాటర్ ఆఫ్ ఇండియా టైపు.. ఓ.. ఒహటే కన్నీళ్ళ ట్యాపులు పెనింగులు! ఎన్నడో పోయిన బామ్మా, బాపూల చావు శోకన్నాలతో తెప్పలు కట్టేసుకుని ఎన్నికల గోదారి ఈదాలనుకునే టైపు ప్రయోజనాలు రాజకీయవేత్తలకు తప్ప శాస్త్రవేత్తలకు తడతున్నాయా చెప్పండి! ఏళ్ల తరబడి కోట్లు తగలబెట్టినా సైంటిష్టులు సాధించలేని ఫలితాలను పొలిటీషియన్లు ఇట్టే  కనిపెట్టేస్తున్నారు. ఐనా  పాపం జనాల  తిట్లు, సాపనార్థాలు ప్రజాసేవకులకు తప్పడం లేదు. ఎంతన్యాయం!

సాదా  సీదా పేద జనాల పాదాలు.. మైళ్ళు మైళ్లు నడిచి ఏ మురిగ్గుంటల నీళ్ళో తోడితెచ్చుకోడానికో.. స్టాపుల్లో ఆగని బస్సులను వెంటాడి రొప్పడానికో తప్ప పనికిరావు.  అదే మరి ఏ మహామేధావి  అధినేతగారైతేనో? మర్చిపోయిన బోడి మల్లయ్యలను ఎన్నికల ముందు మళ్ళీ మాలిమి చేసుకోడానికి ఇంచక్కా వినియోగించుకుంటారు. పడీ పడీ ప్రసన్నం చేసుకొనేందుకు.. పడనప్పుడు  పట్టి పడదోయడానికి ఎదుటి శాల్తీ తాలుకు   పాదపద్మాలు  ఎంత ఉపయోగమో పాలిటిక్సువాళ్లకు తప్ప తతిమ్మా  వర్గాలెవరికన్నా తడుతున్నాయా?

నోరు అన్నది బడుగుజీవులకైతే పెను శాపం. కరవు రోజుల్లో దాన్ని మేపేందుకు సామాన్యుడు పడే పాట్లు అలివి కానివి. అదే నోరు మరి  మహారాజరాజశ్రీ  ఏ నేతాశ్రీగారికి ఐతేనో?ఎదుటి వర్గం మీద  చేసే దాడిలో తిరుగులేని వజ్రాయుధం.

నిర్భాగ్యులు నిర్వేదంతో చప్పరించుకోడానికి తప్ప పనికి రాని  నాలుక ఎన్నికల్లో హామీలు గుప్పించే వేళ  నాయకులకు ఎంతో కీలకం.  నాటకాంతాన ఇంచక్కా మడతేసి  మళ్ళా ఎన్నికల దాకా భద్రంగా దాచుకునే సాధనం.

ఆ నోరు ఒక్కోసారి అలవాటుగా జారి అల్లరయేటప్పుడు ఠప్పుమని 'సారీ' చెప్పించి 'స్వారీ' సౌకర్యం చేజారి పోకుండా జాగ్రత్త పరిచేవి చెవితమ్మలు. సృష్టించేటప్పుడు బ్రహ్మదేవుడికైనా ఈ కొత్త ప్రయోజనం తట్టిందో లేదో?  చెవితమ్మల్నిలా సుతారంగా  'టచ్'  చేసి వదిలేస్తే చాలు.. ఎంత నికృష్టుడైనా శ్రీకృష్ణ పరమాత్ముడంత వింతగా పునీతుడై పోయేది ఒక్క రాజకీయాలల్లోనే.

రెండు వేళ్లూ నోట్లోకి  తిన్నగా పోయే వెసులుబాటేమీ లేక వట్టిగాలి మాత్రం జనం భోంచేస్తుంటే.. ఆ వేళ్ళనే విక్టరీ సింబల్సుగా మలుచుకున్న ప్రయోజకులు  మన  నేతలూ.. వాళ్ల దూతలూ.

ఓటుబ్యాంకు రాజకీయాల్నే వదులుకోని నాయకులు..  ఉచితంగా వచ్చి పడ్డ  వంటిమీది పార్టులను వృథాగా పోనిస్తారా.. మన పిచ్చిగానీ! నీతిని నమ్మితే మోచేతి మీది బెల్లమే అధికార పదవి.

పై నుంచీ వచ్చిన పెద్దాయనొకాయన ఆ మధ్య  పద్దాకా ఓ యువనేత  డిఎన్ఏ ప్రస్తావన తీసుకొచ్చేవాడు. ఆ పెద్దాయన చెంపల రెండూ  వాయించమన్నాడు యువనేతగారు. నేతల రాజకీఆ యాత్రల్లో చూస్తున్న కథే కదా!  ఆడా మగా  చిన్నా పెద్దా తేడా కూడా చూడక  కంటబడ్ద ప్రతి ఓటరు రెండు చెంపల మీదా చేతులేసి నిమిరే  మా గొప్ప అలవాటు ఓ యువనేతగారిది. 'పంఖా' గుర్తు ఎందుకు ఖాయమైందో! కానీ నిజానికా  బాబుగారి రాజకీయాలకు 'చెంపలు' సరైన సింబల్.

 కొందరు బుర్రమీసాలు.. కొందరు తొడగొట్టుళ్ళ చూట్టూ రాజకీయాలు తిప్పేస్తుంటారు. వంటి భాగాలు  గుర్తుగా కూడదన్న షరతు  ఎన్నికల సంఘానికేదో ఉండుండబట్టి కానీ.. నిజానికి కొన్ని పార్టీలకు 'కడుపు' గుర్తు ఇస్తే ఓటరు ఇట్టే గుర్తుపట్టడం సులభమవుతుంది.

తొందరపాటులో ఏదో కూసి ఆనక చెవులు పట్టుకుని 'సారీ' చెప్పే ఆత్రగాళ్లకేమో చెవుల గుర్తు మోస్ట్ సూటబుల్. తడవ తడవకీ వేళ్లో, గోళ్ళో చూపించే పాడలవాటు పోని వాళ్లకు 'గోళ్ళు ఏపుగా పెరిగిన వేళ్ళు' గుర్తుగా ఖాయం చేస్తే అభిమానులు తగు దూరంలో తిరగేందుకు సులభం. తల్లి చంక దిగకుండా రాజకీయాలు చేసే చంటి బిడ్దలకు 'పాల పీక' లాంటిదేదో గుర్తుగా అందిస్తే పాలిటిక్సుతో ఆడుకుందుకు సరిపోతుంది. అస్తమానం సానుభూతి సెంటిమెంటు మీదనే ఆధారపడ్డ పార్టీలకు  'నీళ్లు నిండిన కళ్ల్ల'ను దయచేయిస్తే  నాలుగు ఓట్లేమన్నా అదనంగా కలిసొచ్చే వెసులుబాటు పెరుగుతుంది. నిండు సభలో, చట్టసభలో కూడా నిద్రాపుకోలేని కుంభకర్ణ  వారసులకు 'గురక మార్కు నోరు' గనక గుర్తుగా దయచేస్తే నిద్రమత్తు ఓటర్ల మద్దతైనా దొరక వచ్చేమో మరి! నీలి చిత్రాలతో తప్ప ఉత్తేజం పొందలేని నీచ నేతలకు 'ఏ'మార్కు బొమ్మలేమైనా సింబల్సుగా వాడుకునే సౌకర్యం ప్రత్యేకంగా కల్పిస్తే.. ఆ టైపు ఓటర్లంతా ఒకటయ్యే అవకాశం ఇచ్చినట్లవుతుంది.

తలాతోకా .. అని కాదు.. దేన్నైనా తళతళలాండించే కళ మరో పేరే రాజకీయం.

రాజ్యాంగ పెద్దల పుణ్యమా అని ఏదో ఐదేళ్లకోసారి వేలుకి చుక్క పొడిపించుకుని..  నచ్చిన మంచివాడికి ఓటేయ వచ్చనుకుంటుంటే.. మధ్యలో ఈ తిరకాసేమిటంటారా?

చెడ్దవాడికిచ్చే ఓటు తలారి చేతికిచ్చే తల్వారు వేటు వంటిది. పదేసి తలలతో  తలపడే రావణబ్రహ్మ ప్రాణాలు కూడా అరికాలి బొటన వేలులొనేగా పడి ఉండేది! ఎంతేసి వడ్డూ పొడుగున్న నేత ఆయుష్షైనా బ్యాలెట్టు పెట్టె బొడ్డు లోనేగా దాగుండేది! ఓటు గుండేసి చెడ్ద రాజాకీయాలను పేల్చేయాలి' అంటారా!  మీరు చల్లంగుండాలి.  అంతలా  మరి మిగతా ఓటర్లంతా ఆలోచించగలగితే  ఇన్నేసి కళలున్న రాజకీయానికి  అప్పుడే కొత్త అవతారం ఎత్తేది! బాడీలోని ఏ పార్ట్ కయినా వివేచన ఉన్న మెదడే అధినేత!

-కర్లపాలెం హనుమంతరావు

25 -02 -2021

***