1
అమ్మ కాబూలీ!
అప్పు వసూలుకు
బిడ్డై తిష్టేసింది గుండె నట్టింట్లో!
2
శిశిరం బోసిచేసిపోతేనేమి
వసంతం వచ్చి పచ్చిసంతకం చేస్తుంది
చెట్టంత ఆశతో.. నువ్వుండాలిగానీ!
3
వేర్లు పాతాళంలోకి
కొమ్మలు ఆకాశంలోకి
పువ్వులు హృదయంలోకి!
4
రైలు ఊయలుకు
ప్రయాణీకులంతా
బుజ్జి పాపాయిలే!
5
రాయీ వెన్నముద్దే
విత్తు
కత్తయితే!
6
తెడ్డు.. తెరచాప.. లంగరు
పడవకైనా.. బతుక్కైనా
మూడు ముక్కల్లోనే కతంతా!
7
దాయని
దుఃఖదాయని
-ప్రేమవాహిని!
8
ఘటన క్షణికం
స్మరణ పురాణం
మనసు వ్యాసపీఠం
9
కన్నీరు ఉప్పన!
హృదయం
సముద్రం కదా!
10
పూలకోసం పాపాయి-
కింద
పాపాయికోసం పూలు- పైన
గాలివంతెన వంతే ఇంక మిగిలింది!
-కర్లపాలెం హనుమంతరావు
No comments:
Post a Comment