కామన్ సైన్స్ - కర్లపాలెం హనుమంతరావు- చిన్న కథ - చతుర

 

చిన్న కథ : 

కామన్ సైన్స్ 

- కర్లపాలెం హనుమంతరావు

( చతుర- ఫిబ్రవరి  - 2010 - ప్రచురితం ) 

ఓ కోటీశ్వర్రావుగారు ఇంటికి కాపలా కాసే వాచ్మన్ కోసం ఇంటర్వ్యూలు చేస్తున్నారు. 

చివరి వడపోతలో ఇద్దరు కేండిడేట్లు మిగిలారు. 

కోటీశ్వర్రావుగారు “గిన్నెలో నెయ్యిపోసి ఎండలో బెడితే ఏమవుతుంది?" అనడిగాడు ఇద్ద రినీ కలిపి కూర్చోబెట్టి.

"సూర్య కిరణాలు సోకి ఆ వేడికి నెయ్యి కరి గిపోతుంది సార్!" అన్నాడు మొదటివాడు కాన్ఫిడెంటుగా, 

"కుక్క గిన్నె ఎత్తుకుపోతుంది సార్!" అన్నాడు మొదటివాడికన్నా వయసులో కాస్త ఎక్కువ ఉన్నవాడు వినయంగా.

"మీ ప్రశ్నకు సైంటిఫిక్ గా, చక్కగా సమాధానం చెప్పిన మొదటి అబ్బాయికే న్యాయంగా ఉద్యోగం దక్కాలి కదా!" అంది అక్కడే ఉన్న కోటీశ్వర్రావుగారి

"వాచ్మనుకు  ఉండాల్సింది సైన్సు కాదమ్మా! కామన్ సెన్సు" అంటూ రెండోవాడికి ఉద్యోగం ఇచ్చేశాడు కోటీశ్వ రావుగారు.

ఆరోజు రాత్రి పడగ్గదిలో భార్య కోటీశ్వర్రావుగారిని నిలదీసింది. "మీ సెలెక్షన్ బాగా లేదని అమ్మాయి ఒహటే గుణుస్తుంది పొద్దుట్నుంచీ . దాని చూపంతా ఆ మొదటబ్బాయి మీదే ఉందండీ!"

" అందుకనే పిచ్చి మొద్దూ.. రెండోవాడిని సెలెక్టు చేసిందీ! చెప్పాగా ఎవరికైనా సైన్సుకన్నా కామన్ సెన్సే ముఖ్యమనీ" అన్నాడు కోటీశ్వర్రా వుగారు తాపీగా . 

- కర్లపాలెం హనుమంతరావు

( చతుర- ఫిబ్రవరి  - 2010 - ప్రచురితం ) 

తేనీటి సంజీవని - ఈనాడు - సంపాదకీయం - కర్లపాలెం హనుమంతరావు

 ఈనాడు- ఆదివారం- సంపాదకీయం 

తేనీటి  సంజీవని 

-     కర్లపాలెం హనుమంతరావు 

(ఈనాడు- ఆదివారం సాహిత్య సంపాదకీయఁం - 26, జూన్, 2011) 

 

లోకంలో నీరు తరువాత తేనీరే అధికంగా వినియోగమయే ద్రవం. కప్పు కాఫీనో, తేనీరో పడకపోతే పడక దిగడానికి పెద్దలే పస్తాయిస్తున్న కాలం ప్రస్తుతం నడుస్తున్నది. ఓ ఆధునిక తేనీటి ప్రియుడువాపోయినట్లు 'కిటికీలోంవి వానా ఉరుములూ  వినిపిస్తున్నప్పుడు/ శవంలా ఒరిగున్న నీరసం/ నిప్పుల పులిలా లేచినుంచోవాలంటే' కావలసింది ఓ కప్పుడు చాయ్. ఒకప్పుడే కాదు ఇప్పుడూ ఆ కవి చాయాలపన  నూటికి నూరు శాతం వాస్తవమే! ఎంతలా వేధించకపోతే పోకూరి కాశీపతి వంటి ఉద్దండ పండితులు కూడా దండకాలు చదువుతూ ఈ కాఫీ టీల ముందు సాష్టాంగ ప్రణామాలకు పాల్పడివుంటారు! 'శ్రీ మన్మహాదేవీ! లోకేశ్వరీ! కాళికా సన్నిబాకరణీ! .. అంబా కాఫీ జగన్మోహినీ!' అంటూ ఏకరువు  పెట్టిన గుణగణాలన్నీ పేరుకే కాఫీకి కానీ తేనీటి వంటి అన్ని ఉత్సాహ ప్రసాద తీర్థాలన్నింటికీ అక్షరాలా వర్తించే స్తుతిమాలలే వాస్తవానికి!  'శ్రీకృష్ణుడా స్వర్గమున్ జేరి ఊతంబునే పారిజాతంబున్ దెచ్చియున్ నాతికిన్ బ్రీతిగ నిచ్చు కాలంబు నందా సుమంబునందునం గల్గు బీజంబు లుర్విస్థలిన్ రాలి' ఏ కాఫీ చెట్టుగానో, తేయాకు మొక్కగానో పుట్టుకొచ్చిందన్నంత దాకా ఆ అవధాని ముదిరిపోయిందంటే ఆ దోషం వారి పాండిత్యంలో లేదు. కాఫీ టీలకు కవులూ కళాకారులకూ మధ్య ఉన్న బంధం అంత బలమైందిగాఅర్థంచేసుకోవాలి. 'కాఫీ టీ లయినా సర/ దాకైనా మందొ కింత తాగరు సిగిరె/ ట్టూ కాల్చరు మరి వారె/ ట్లీ కవులైరొ తెలియనగునా!' అంటూ కోవెలవారు ఓ శతావధానంలో ఆదే పనిగాఆబ్బురపడిపోతారు! 'సరదాకే' అని కవిగారన్నా  కాఫీ టీ లు కేవలం కవుల సరదాకేనా?

'తింటే గారెలు తినాలి.. వింటే భారతం వినాలి' అనే నానుడి బహుశా వేడి వేడి కాఫీ టీలు వాడకంలోకి రాని కాలం నాటివై ఉందాలి. గారెలు తినగ తినగ చేదు. కాఫీ చాయిలకు ఆ దోషం లేదు. తెల్లవారగానే తేనీటికి వెంపర్లాడే బుద్ధి తెల్లవాడు వచ్చి మనకు మప్పినన కాలానికి  ముందు పుట్టబట్టే అల్లసానివారు సత్కృతులకుఅవసరమైన సరంజామాలో అల్లం టీ ని కలపలేదు. కాఫీ టీల యుగంలోనే గాని ఆ కవితాపితామహుడు ప్రభవించుండి ఉంటే 'రా! నడిచే నగరంలానో / నిద్రించే పల్లెలాలో వచ్చి/ నా ముఖం మీద దుప్పటి లాగిపారెయ్/ బోర్లించుకున్న రాత్రిళ్లూ/ పొర్లించుకున్న పాటలూ/ నిరామయప్రపంచాలూ చెరిసగం పంచుకుందాం ఇరానీ కప్పులో.. గోర్వెచ్చగా' వంటి ఈ నాటి కవితలకు దీటైన 'టీ కవితలు' టీకా తాత్పర్యాలతో సహా రాసుండేవారు. నాయుడుబావ ప్రేమ కోసం నండూరివారి వెంకి అట్లా గుత్తొంకాయ కూలుర, పూరీలు, పాయసాలు చేసి అంతలా హైరానాపడింది కానీ -చారెడు ఏలకులు గుండ కొట్టి కలిపిన తేనీటీని ఓ కంచు లోటాకు నిండుగా పోసిచ్చి ఉంతే జుర్రుకుంటూ తాగి వెర్రిత్తిపోయుండేవాడా ప్రియుడు. 'దిగిరానుదిగిరాను దివి నుండి భువికి' అంటో భావకవి కృష్ణశాస్త్రి అన్నేసి మారాములుచేయడానికి 'మసాలా చాయి' రుచి పరిచయం కాకపోవడమే కారణం కావచ్చును. 'క్షీరసాగర మధనంలో సాధించిన సుధ  జగన్మోహిని దేవ దానవులకు పంచే వేళ  ఒలికిపడ్డ ఓ రెండు మూడు  చుక్కలే  భూమ్మీద మొలకెత్తిన ఈ తేయాకు మొక్కలు' అన్నది గురజాడ గిరీశంగారికి అన్నలాంటి మేదావి తీసిన థియరీ! భగీరథుడు అంతలా పరిశ్రమ చేసి భూమ్మీదకు సురగంగను పారించింది ఎందుకైనా ..   లాబం అందుతున్నది మాత్రం ఈనాటి మన తరాలకే సుమా!గంగ పారే నేల సారం, గంగ వీచే గాలి తరంగం భారతీయుల  తేయాకుకు అందుకే అంతలా బంగారపు రంగు, సుగంధాల రుచి.. వెరసి విశ్వవిపణిలోవిపరీతమైన గిరాకీ!  చైనాకు చాయ్ ఒకఔషధమయితే, జపానుకు అదే 'ఛదో' అనే ఓ కళ.  భారతీయులకు మాత్రం అన్నివేళలా అవసరమయే ఓ నిత్యావసర పానీయం. పేటెంట్ హక్కుల కోసమై  తమిళనాట సుదీర్థకాలంగా సాగిన న్యాయ వ్యాజ్యమేతేయాకు మీద భారతీయులకున్న అవ్యాజప్రేమాభిమానాలకు నిదర్శనం.

నీల్ ఆమ్ స్ట్రాంగ్ చంద్రమండలం మీద పాదం మోపిన మరుక్షణమే 'హుర్రే! పరాయి గ్రహం మీద కాలుపెట్టిన మొదటిమొనగాడిని నేనే!' అని ఓ వెర్రికేక వేయబోతే..'అంతొద్దు! నీకు టీ.. కాఫీలుఅందించేందుకు ముందుగానే ఓ అయ్యర్ ను అక్కడ దింపి ఉంచాం' అంటూ భూ కేంద్ర నుంచి సందేశం అందిదని.. ఓ జోక్! కాఫీ.. చాయ్ లు దొరకని స్థలి భువన భాండవములో ఎక్కడా ఉండదు' అన్నదే ఈ ఛలోక్తి సారాంశం. మూడు వేల రకాల 'టీ'లను పదిహేను దేశాలవారు రోజుకుమూడు కప్పులకు తగ్గకుండా తాగుతున్నారంటే తేనీటి మహిమను ఏ నోటితో ఎంతని పొగడాలి? రుచికి ఆరోగ్యంతో పొసగదని కదా సామాన్య సూత్రం! కాకర చేదు. కరకరలాడే కారబ్బూంది గుండెకు ఇబ్బంది. మద్యంతో అందేది పెగ్గుల కొద్దీ అనారోగ్యమే! తేనీటిలోనూ చూపుకుదొరకని రోగకారకాలుంటాయని అనే వైద్యనిపుణులు కద్దు. ఆరోగ్యానికి అమరదయినా సరే  కాఫీ చాయిల వంటి అమృత పానీయాల పైన  మనిషి చాపల్యం అమరం.   'కడుపులోకి  ప్రవేశించాక/ కరెంటు లావాలా ఉరకలు వేస్తుంది/  ఆ వేడి నీటిపూల నీరు కాటుకు గుండె కంట్రోల్ టవర్ నుంచి / తల వెంట్రుకలు కూడా ఫిలమెంటులవుతాయం'టూ మానేపల్లివారు వినిపించిన గిటారు సంగీతం కఫీ గురించే కావచ్చునేమో కానీ.. నిజానికి ఇరాన్ నుంచి దక్కన్ దాకా ఏ రకం చాయ్ కప్పు చేతికి తీసుకున్నా అంతకు మించి మరపురాన్ని ఉత్తేజాన్నిస్తుంది. ఉత్త ఉత్తేజమే కాదు.. వాషింగ్ టన్ అంతర్జాతీయ ఆరోగ్యనిపుణుల తీర్మానం ప్రకారం తేనీరు ప్రాణాంతక వ్యాధులను నిరోధించే దివ్యౌషధం కూడా! ఒక కప్పు చాయ్ కిలో కాయగూరల సారాన్నిప్రసాదిస్తుందన్నది ఆరోగ్యశాస్ర నిర్ధారణ. చురుకుదనం, జ్ఞాపకశక్తి, రేడియేషన్ కువిరుగుడు, కంటికి చలువ- వంటి ప్రయోజనాలు ఎన్నో జనాలకు! అధిక రక్తపోటుకు, నరాల నిస్సత్తువకు, రక్తనాళాలలో అధికమయ్యే కొవ్వు పదార్థాలకు, పంటి చిగుళ్ల సమస్యలకు..తేనీరు ఓ సంజీవనీ ఔషధం. బ్లాక్ టీ లోని థియాఫ్లావిన్-2 కేన్సర్ కణాల సంహరణకే కాక ఆ ధర్మం నిర్వర్తించే జన్యుకణాల క్రియాశీలతకూ తిరుగులేని మందులా పనిచేస్తుందని అమెరికా విస్వవిద్యాలయ పరిశోధనల్లో తాజాగా తేలింది. కేన్సర్ వ్యాప్తికి కారణమైన సివో ఎక్స్ -2 నీ నిర్వీర్యం చేసే చాయ్ సంజీవని. చెయ్యెత్తి  ఆ తేనేటికి 'జై' కొట్టకుండా  ఎట్లా ఉండగలం?

-కర్లపాలెం హనుమంతరావు

(ఈనాడు- ఆదివారం సాహిత్య సంపాదకీయఁం - 26, జూన్, 2011

శివ పురాణం

గల్పిక: 

శివపురాణం 

- కర్లపాలెం హనుమంతరావు 

( ఈనాడు దినపత్రిక - 18/04/04- నాటి సపాదక పుట గల్పిక) 

శివరాత్రి కదా! జాగారం చేద్దామని మా కాలనీలోని మొగాళ్లు నలుగురం  డాబా  మీద  కబుర్ల కచేరీ పెట్టాం . 

కింద ఆడవాళ్లు  టీవీలో సినిమాలేవో చూస్తున్నారు. దూరం నుంచి గుళ్లో భజనలు వినపడుతున్నాయి. 

ఉన్నట్టుండి ఊడిపడ్డ కమారావు- మన పురాణాల నిండా  బోలెడన్ని పాలిటిక్స్ . . భాయ్ అన్నాడు . 

ఎన్నికల సీజన్..ఆ వేడిమీద ఉన్నాడులే అనుకున్నాం. 

ఎవ్వరం పటించుకోకపోవటం చూసి వాడికి ఒళ్లు మండినట్టుంది. '  కావలిస్తే మీచేతే ఒప్పిస్తాను చూడండి' అంటూ మొదలుపెట్టాడు. 

'ఉదాహ రణకు... మన శివపురాణాన్నే తీసుకోండి! శివలింగమే నేటి పాలిటిక్సుకు పెద్ద సింబాలిజం' అనేశాడు.

' అదెలాగా? ' అనడిగాడు నా పక్కనున్న భాస్కర్రావు అమాయకంగా.  అంతే .. ఇంక కన కారావును ఆపటం ఎవరి తరమూ కాలేదు. 

' శివలింగానికి ఆదీ అంతూ  లేవుకదా. మన పాలిటిక్సూ  డిటో  డిటో .  త్రిమూర్తుల్లోని ద్విమూర్తులు .. విష్ణవు  ,   బ్రహ్మ శివలింగం   బిగినింగ్  అండ్ ఎండింగ్ . ఐ  మీన్ ఆదీ తుదీ  అంతు చూద్దామని పంచెలెగకట్టి మరీ పందెం  కాసుకున్నారు. ఏమైంది?.. 

పరువుకోసం బ్రహ్మగారు ఆవు చేతా , పూవూ చేతా  అబద్ధపు సాక్ష్యాలు  చెప్పించారు . అంటే ఏంటిట ? గెలుపుకోసం గాడ్ అయినా తప్పుడు చెయ్యడం  తప్పుకాదనేగా  దారి చూపించింది.  ఓటరుకు మల్లే సాధు  జంతువని మనం పుస్తకాల్లో చఅకే  ఆవు కూడా గడుసుదే సుమండీ!  బ్రహ్మతరపున వకాల్తా పుచ్చుకునే సందర్భంలో అవు తల్లి చల్లంగుండా ..  తలతో నిలువుగా తోకలో అడ్డంగా ఊపి  మన పొలిటీషియన్లకు  ప్రెస్ మీట్లలో ఎట్లా మసులుకోవాలో మార్గం చూపించింది. అవునా?   తవ్వినకొద్దీ ఇట్లాగే బోలెడు బొచ్చెడు  ట్రిక్కులు  బైటపడతాయి. ' అని ఓ అరక్షణం ఊపిరి కోసం ఆగాడు కనకారావు . 

మళ్ళీ అందుకుంటూ ' గణాధిపత్యం కోసం కుమారస్వామి వినాయకుల మధ్య పోటీ ఏర్పట్టం గుర్తుందా ? 

ముల్లోకాల్లోని తీర్ధాలలో  మునకలేసి  ముందొచ్చినవాడినే సమర్థుడిగా భావించాలని కదా మెయిన్ రూల్స్ బుక్కులా ముఖ్యమైన క్లాజు. ఆ ఒప్పందం మనం వినాయనుడి విషయంలో గంగలో కలిసింది.  పాపం, మురుగు స్వామిని అటు  చల్లంగా నెమలిమీద పోనిచ్చి..  వినాయక మహారాజా చేసిందేమిటి?  శ్రమలేకుండా అధిష్ఠానం చుట్టూతా  ప్రదక్షిణాలు చేసి  మరీ అధికారు సాధించాడు. అంటే ఏమిటిట? నియోజకవర్గాల్లో ఊరికే ఈ పండుగా , ఈ పండుగా  అంటూ తిరణాల డాగులా తిరగడం దండగరా అబ్బాయిలా! భాగ్యనగరం చుట్టూతా తిరిగో .. భాగమతీ నగరంలో తిష్ఠ వేసో ..    అధినాయకుల కరుణా కటాక్షాలు  రాబట్టిన జిడ్డుకే  ఆఖరికి అధికారం దక్కేది.  అదీ పురాణాలు మనకు నేర్పే పాఠాలు మిత్రులారా! 

మా కనకారావుది పండితవంశం లెండి.  వాడింట్లా తండ్రి  పురాణ పఠనం .. మా శుంఠ పక్క  విగకుండ  ఆ పాండిత్య శ్రవణం! 

మార్కండేయుడి కథ చెప్పుకొచ్చేడేసారి.   ఆ మునికుమారుడిది అర్థాయుష్షు గదా! డిటో ఏ క్షణంలో  పదవూడుతుందో   తెలీని  మంత్రిగారి పరిస్థితి.  యమదూతలొచ్చి పాశం వేసి లాక్కుపోతుంటే శివలింగాన్ని కావిటేసుకున్నాడు అచ్చంగా కుర్చీని వదల్లేని మొండి మంత్రుల్లా. ఆ ఉడుంపట్టుకు తన పునాదులే కదిలిపోతుంటే బెదిరిపోయిన అదిదేవుడు   మార్కండేయుణ్ణెలాగో పేరోల్ మీద  వదిలించుకున్నాడు. అట్లాంటి పట్టుంటే తప్ప పదవాట్టే రోజులు నిలవదనేదే మార్కెండేయుడి  మార్క్ సిద్ధాంతం . 

ఇంక   అంకిలుడి  కథ ఇంకా అన్యాయం .  ఉపిరున్నంత కాలం ఉచ్ఛనీచాలు మరిచిన నీచ్.. కమీనే! కానీ,  మనకు  పరమ పవిత్రమైన శివరాత్రి నాడే వాడి చరిత్ర మననం  చేసుకోక తప్పడంలేదు.  తెలిసో..  తెలీకో . . ఆ తెలివిమాలిన కుంక మాదిరి  జాగారం చేస్తేచాలు .. శివయ్య    గారి గుడ్  లుక్సులో పడ్డట్లే గురూ! అంకెలుడికి కైలాసం, మన అంకఛండాలులకు అమాత్య విలాసం! మన పాలిటిక్సు ఇంతర్ధ్వాన్నంగా ఉన్నాయని ఎంతేడిస్తే  ఏం లాభం.. కళ్లు వాయడం తప్ప. 

పదవున్నంత కాలం నువ్వెన్నైనా    పాడుపన్లు   చేసుకా!  ఎన్నికలప్పుడు మాత్రు అప్రమత్తంగా ఉంటే చాలు కేబినెట్లో సీటు ఖాయం. శివనామస్మరణకంటే  మినిమమ్   మన లోకంలో అయినా  కాస్తో, కూస్తో పుణ్యం.. పురుషార్థం. పాడుపాలిటిక్సు వల్లనే సైతానులకు సైతం సింహాసనాలు లభ్యం . 

శివరాత్రి నాడేంటీ. . ఈ యాంటీ  గాడ్ ప్రసంగాలు! కనకారావేమన్నా  కమ్యూనిస్టు ఫిలాసఫిష్టా? అంటూ డౌట్ రావచ్చు.  అతగాని ఆరోపణలన్నీ  మతంలోని లోసుగులపై కాదు. దేవుళ్ల  పేరు నడిపించే పాడు పాలిటిక్సు మీద. 

  

నిజానికి ఇప్పటి సంకటాలకే నాటి పురాణాలు పరిష్కారం చూపించాయి! క్రాంతదర్శకులని పట్టుకుని వంకర భాష్యాలు చెప్పటం కాదిది.  పిల్లనిచ్చిన అల్లుణ్ణి  పట్టించుకోనందుకే ప్రజాపతి పదవి పుసుక్కున పోయింది. పవరిచ్చిన ఓటర్ని పట్టించుకోని పక్షంలో ప్రజాపతినిధి   పదవికైనా అదే మూడుతుంది. చులకనగా చూసినందుకే ప్రజాపతికా పదవూడింది . పాలి టిక్స్ '  కుమార ' సంభావాల రచ్చ ఎంత చేసినా కంఠశోషే. కుమారుడినే  స్వామిగా ఎంచి  సాగిలపడ్డ గడుసుకే లాభం జాస్తి. విజయవిలాసం  చంద్రుడికి మల్లే  పైవాడి అనుగ్రహముంటే నెత్తినెక్కి కూర్చోడం..  వీరభద్రుడి అవతార మల్లే ఆగ్రగం చూపించినప్పుడు  కాళ్లు పట్టుకోడం .. పాలిటిక్సులో సైతం ప్రమోషనొచ్చే తంత్రం. పిల్లనిచ్చిన మామ ప్రజాపతి తలనడ్డంగా నరికి బ్రహ్మ కోరిక తీర్చడానికి  శివుడు మేక తలకు అతికించినట్లు శివపురాణం కథనం . కథనే కంచికైనా పంపించెయ్యచ్చు కానీ మేక తలలు  చూపించి అధికారం యాచించే పెద్దపులుల పట్లే ప్రజలప్రమత్తులవాలని అష్టాదశ  పురాణాల అంతిమ    ప్రబోధం' అన్న  కనకారావు ముక్తాయింపుతో అందరం ఏకీభవించాం.  

' అర్థమయింది సోదరా! నేటి నాయకుడు శివుడంతటి బోళాకాదు. పాలటిక్సు ఫీల్డు  శివపురాణానికి  మించి లోతు. .  ' అంటూండగానే శివాలయం నుంచి మహాదేవుడు మెచ్చికట్లు గంటలు గణ గణా  వినిపించాయి. 

జాగారం చేయించిన  ఫలం ఇలాగైనా దక్కించినందుకు  అందరం మా కనాకారావుకు ధన్యవాదాలు తెలుపుకుంటూ  డాబా కిందికి దిగివచ్చేసాం. 

- కర్లపాలెం హనుమంతరావు 

( ఈనాడు దినపత్రిక - 18/04/04- నాటి సపాదక పుట గల్పిక) 

దయ్యమా! .. నీకో దణ్లం! - కర్లపాలెం హనుమంతరావు - ఈనాడు - హాస్యం

 

ఈనాడు - హాస్యం 

దయ్యమా! i .. నీకో దణ్లం! 

- కర్లపాలెం హనుమంతరావు 

( ఈనాడు - దిన పత్రిక - సంపాదకీయపుట- 10 -02 - 2003 ' ప్రచురితం ) 

బాలామణీ నీ భక్తికి మెచ్చితిని. ఏదన్నా వరంకోరుకో... ఇచ్చిపోతాను' 

ఏం వరం కోరుకోమంటారండీ''

నీళ్లక్కరవుగా ఉందన్నావుగా... వాటర్ కావాలని కోరుకోవే.. అదీ నేనే చెప్పాలా? 

వాటర్ నావల్ల కాదు. కర్ణాటక వాళ్లెవరు చెప్పినా వినరు. కావేరీ, కృష్ణాల్లాంటివి కాకుండా వేరేవి ఏమైనా కోరుకోరాదూ!

కరెంటైనా కోతల్లేకుండా ఇప్పించే ఏర్పాటు చేయించండి స్వామీ!

కాంగ్రెస్సోళ్లు  పవర్లోకొస్తే కంటిన్యువస్ గా కరెంటిస్తామంటున్నారుగా... ఇంతలోనే కంగారెందుకూ?

వెంటనే ఇప్పిస్తేనే బాగుంటుంది 

తథాస్తు 

ఠక్కున్  కరెంటు పోయింది! ప్రొబేషన్లో ఉన్న దేవుడా ఏందీ?! 

ఇదేంటి స్వామీ! ఇలాగయింది? ... మీ వరానికి ' పవర్ ' ఇచ్చే  పవరున్నట్లు లేదే '

ఏపీలో ఫుల్ పవరంటే దేవుడి తరం కూడా కాదు గానీ... ఇంకేదైనా కోరుకో భక్తమగడా! 

భక్తమగడా.. అంటే? 

నువ్వు డైరెక్టుగా నా డివోటీవీ కావు గదా! నా భక్తరాలైన బాలామణికి ఘోస్టువి . అందుకే అలా పిలిచింది. తొందరగా ఏదో ఒహటి తెమిలిస్తే ఇచ్చేసి వెళ్ళిపోతాను. ఇప్పుడే డ్యూటీ  ఎక్కింది. ఇంకా ఎన్నో అప్పాయింట్ మెంట్లున్నాయి

పోనీ దగ్గరున్నదేదో మా మొహాన పారేసి పోరాదా స్వామీ!

గ్రాంటెడ్ నా దగ్గరో కోటి రూపాయల అప్పుంది మానవా ! ఈ క్షణం నుంచీ దాన్ని తీర్చే బాధ్యత నీకే అప్పగిస్తున్నాను.. తీసుకో. ఫో! 

దేవుళ్ల దగ్గర ఆదాయముంటుందిగానీ.. అప్పుంటుందా ఎక్కడైనా! దేవాదాయ శాఖ వారి దయవల్ల ముడుపులన్నీ నీ హుండీ నుంచి పెద్దల  హుండీల్లోకి బదిలీ అవుతున్నాయా దేవా?'

కావచ్చు.. కానీ... ఫర్ యువర్ ఇన్ఫ రేషన్... నేను దేవుడిని దయ్యాన్ని. క

ద... దయ్యమా? దగా! .. మోసం! నిన్నెవరు రమ్మన్నారయ్యా ఇక్కడి కసలు ? అప్పనంగా అప్పులంటగట్టి పోవటానికొచ్చావులాగుంది. ఆ.. ఆ.. తొండి. నేనొప్పుకోను.

మీ ఆవిడే కదయ్యా... నాకిప్పుడంత భక్తిగా పూజ చేసిందీ. థింక్ ఆఫ్ డెవిల్ . తలుచుకోగానే ప్రత్యక్షమయితేనే దయ్యం. దేవుళ్లలాగా మేం తాత్సారం చెయ్యం

దేవుడి పటమనుకుని ఆ మేక్కి తగిలించిన మా బాబీగాడి హాలోవిన్‌  'దయ్యం మాస్కు'కి చెంపలేసుకుని కొంపముంచింది గదా బాలా మణి ! పెళ్ళిలో తలంబ్రాలు పురోహితుడి మీద పోసినప్పుడే కనిపెట్టాను.. మా ఆవిడకు చూపు తక్కువ" ఆత్రం ఎక్కువని. మూడుముళ్లు పడంగానే  మూడు జోళ్లు కొని పెట్టిందందుకే.  ఒకటి దగ్గరిది వెతుక్కోటానికి.. రెండోది దూరానివి వెతుక్కోటా నికి.. మూడోది రెండుజోళ్లూ వెతుక్కోటా నికి.  గ్లామరు తక్కువైపోతుందని ఒక్కటీ  వాడిచావటం లేదు. ఇప్పుడు కొంపముని గింది. 

దయ్యంగారి ముందు చెంపలేసు కుంటూ 'దయచేసి మా ఆవిడ పూజ కేన్సిలు చేసుకోండి... మీరిచ్చిన వరం వాపస్ తీసు కోండి' అని వేడుకున్నా.

కుదరదు. మానవుల్లాగా మాట తప్పటం మాకు అవమానము. అందుకే చెప్పింది చేయకమానము 

మొండికేసిందా దయ్యం . ఇంతలో సెల్లోకి కాల్‌ వచ్చింది. .

దయ్యాలకు సెల్లెందుకో? 

అప్పులాళ్లందరూ కలిసి కొనిచ్చారు బ్రతికున్నప్పుడు' అంది దయ్యం కాల్ కట్ చేస్తూ

అర్ధమయ్యింది. అప్పులు తీర్చలేక ఆత్మ హత్య చేసుకున్న ఏపీ రైతు తాలూకు దయ్యంలాగుందిది.

కాదు. నీకు లాగా నిత్యంధూమపానం చేసిన పాపిని. అందుకే దయ్యమైపోయాను నాయనా! 

చైన్ స్మోకర్వా?  గుడ్.ఒక్క సిగరెట్టు ఇలా కొట్టు! 

ఇప్పుడు తాగటం మానేశాను. స్మోకింగ్ ఈజ్ ఇన్జ్యూరియస్ టు హెల్త్ కదా!

' మీకన్నా ఈ దయ్యం నయం. దీన్ని చూసన్నా బుద్ధి తెచ్చుకోండి! ' అని సతాయిం చటం మొదలు పెట్టింది బాలామణి. .  సందు దొరికిందికదా అని.

ఇంత కాలానికి నన్నభిమానించే ఒక భక్తురాలు దొరికింది. మళ్ళీ వచ్చి కలుస్తా!  అవతల అర్జంటుగా పార్టీ మీటింగుంది

దయ్యాలకూ పార్టీనా! 

'కులానికో పార్టీ... మతానికో పార్టీ వున్న ప్పుడు.. మా భూతాలకి మాత్రం పార్టీ ఎందుకుండకూడదూ? ఈసారి ఎన్నికల్లో మా పార్టీదే అంతిమ విజయం

అంత ఖాయంగా ఎలా చెప్పగలవూ? 

సెన్సెస్ సరిగ్గా తీస్తే జనాభాలో సగానికి పైగా దయ్యాలే ఉన్నాయని తేల్తుంది. ఢిల్లీ నుంచి గల్లీ దాకా... పల్లె నుంచి పట్నం దాకా... భూతలం మీద భూతాలు తిరగాడనిచోటు సెంటైనా దొరకదని సెంట్పర్సెంటు గ్యారంటీగా చెపుతున్నా. ఇంత భూత సంతతిలా ఇలాతలంపై దినదిన ప్రవర్ధమానమవుతున్నా. . దయ్యాలకి తగినంత ప్రాతినిధ్యం లేదనేదే మా ఆవేదన. అందుకే ముందు భూతాలను ప్రత్యేక జాబితాలో చేర్చాలి . జనాభా దామాషా ప్రకారం అధికారంలో వాటా మాకు దక్కాలి. లేకపోతే అన్ని పార్టీలలోనూ  అసంఖ్యాకంగా వున్న మా భూత, ప్రేత, పిశాచాలనన్నింటినీ సంఘటిత పరిచి ప్రత్యేక హక్కులకోసం పోరాడతాం. విప్లవం వర్ధిల్లాలి! 

ఇంట్రెస్టింగ్... మీ దయ్యాలు అధికారం లోకొస్తే ఏం చేస్తాయీ? 

మరిన్ని శృశానాల్ని సృష్టిస్తాం. హత్యల్నీ, ఆత్మహత్యల్నీ ప్రోత్సహిస్తాం. మతకలహాలు, ముఠా రాజకీయాలకి మావంతు కృషి చేస్తాం. అత్యాచారాలు, అఘాయిత్యాలు చేసే వారికి ప్రత్యేక రాయితీలు ప్రకటిస్తాం. మధుపానం, ధూమపానం, పేకాట, జూదం, వ్యభిచారం, గుర్రప్పందాల్లాంటి వాటిని పరిశ్రమలుగా గుర్తించి, వాటిలో విదేశీ భూతాల పెట్టుబడుల కోసం పాటుబడతాం. బళ్లలో చేతబళ్లు కోర్సులుగా పెడతాం. బాణామతిలాంటి వాటికి బహుమతులిస్తాం. 

ఎడ తెగకుండా స్కాములు చేసే స్వాములను గుర్తించి ఏటేటా 'దయ్యాల దినం రోజు'  ఘనంగా సత్కరించుకుంటాం. రేపటెన్ని కల్లోపు మా పార్టీని బలోపేతం చేసేందుకు సభ్యత్వ సంఖ్యను కోటికి చేర్చాలని లక్ష్యం  పెట్టుకుని అగౌరవయాత్రలకు బైలుదేరాం.

స్పందన ఎలాగుంది? 

అపూర్వం. కోటి దయ్యాల టార్గెట్ మొదటి రోజే పూర్తయిపోయింది. బురిడీ బ్యాంకులు పెద్ద డిపాజిట్లు పట్టి బోర్డులు తిప్పేసిన బడాబాబులు, పరీక్షల్లో పేపర్లు లీకు చేసే ముఠారాయుళ్లు , ఉద్యోగాల పేరిట నిరుద్యోగుల్ని వల్లో వేసుకొనే ఫోర్ ట్వంటీగాళ్లు, సీరియల్సు పేరిట జనాలు చీదరించుకుంటున్నా చూరుపట్టుకు వేలాడే టీవీ ముక్కు చీదుడుగాళ్లు ... అబ్బో.. చెప్పేందుకు టైము లేదుగానీ.. ఇలా చాలా కేటగిరీలుమా పార్టీలో చోటుకోసం పోటీలు పడుతు న్నాయి. టైం ఐో పోయింది . మళ్ళీ కలుస్తా!  అంటూ ఠంగ్‌ మంటూ  మాయమై పో  యిందా దయ్యం.

- కర్లపాలెం హనుమంతరావు 

( ఈనాడు - దిన పత్రిక - సంపాదకీయపుట- 10 -02 - 2003 ' ప్రచురితం ) 

ఒక రొచ్చి అడగాలా? - ఈనాడు వ్యంగ్యం

 వ్యంగం - ఈనాడు 

ఒకరొచ్చి అడగాలా? 

- కర్లపాలెం హనుమంతరావు 

( ఈనాడు దిన పత్రిక సంపాదకీయ పుట సరదా గల్పిక) 

' మనది కర్మభూమి.  దేశం ఈ మాత్ర మైనా సుభిక్షంగా ఉన్నదంటే, అందుకు పాలకుల దక్షత కారణం కాదు. న్యాయస్థా నాల దీక్ష అంతకన్నా కాదు. అంతా ఆ భగవంతుడి సంకల్పం ' అన్నాడయ్యా ఈమధ్య ఓ న్యాయాధీశుడు'

'ముత్యంలాంటి మాటన్నా! కానీ, ఈ సంకల్పం నెరవే

ర్చడంలో దేవుళ్లూ ఎన్ని పరీక్షలు ఎదుర్కొంటున్నారో? ' 

' దేవుళ్లకు అవేమైనా  కొత్తా?  సత్యభామ అలక వహించినప్పుడు ఆమె కోపతాపాల మధ్య శ్రీకృష్ణుడెంత సంఘర్షణ చెంది ఉంటాడో? '

' నిజమే, నువ్వు అంటుంటే గుర్తుకొస్తోంది. సుగ్రీవుడికి ఇచ్చిన మాటకోసం చెట్టు చాటునుంచి వాలిని  సంహరించేటప్పుడు శ్రీరాముడికీ అలాంటి సంకటమే ఎదురై ఉంటుంది. కదా ?' 

' పురాణాల కేంగానీ .. ఇప్పుడు ఎన్నికల్లో సామాన్యుడి పరిస్థితీ అలాగే ఉంది. వడగళ్ల వానలా వచ్చి పడుతున్న ఎన్నికల్లో సరైన నిర్ణయం తీసుకోవడానికి సామాన్యుడు ఎంతగా నలిగిపోతున్నాడో! వీడి గోడు ఎవరూ పట్టించుకోవడంలేదు'

'నిజమే, మన నేతలు ఈ మధ్య మరీ తెలివి మీరిపోయారు. చలాయించినంత కాలం రాజ్యం చలాయించి, చెల్లుబాటు కావడంలేదని తెలిసిన తరువాత ఇప్పుడు గోడ దూకడానికి సిద్ధపడిపోతున్నారు. ముందే లెక్కలేసుకుని, బేరాలు మాట్లాడుకుని, బయటకు అంతా కార్యకర్తల నిర్ణయం మేరకే నడచుకుంటున్నామని బుకాయిస్తు న్నారు. ప్రజల గోడు మాత్రం ఎవరూ పట్టించుకో వడమే లేదు.' 

' నిజమే కానీ, ముందు నా...?

'నీ మాటే వినాలంటావు. నా మాట వినే అవసరం నీ కెంత మాత్రం లేదంటావు? అలా అనుకున్న పెద్ద పెద్దవాళ్లకు ఇప్పుడే ఖర్మ పట్టిందో చూడు!'

'సరే, ముందు నువ్వే చెప్పరా బాబూ!' 

' ఇప్పడందరూ నన్ను ఏవేవో అడుగుతున్నారు. కానీ, అసలు నన్నడిగే వీళ్లు ఇన్నిన్ని లక్షల కోట్ల కుంభకోణాలు  చేశారా? నన్ను సంప్రతించే నేరగాళ్లను జైలుగోడల వెనకనుంచి మళ్ళీ జనంలోకి మళ్ళించారా? నన్నడిగే ఆ ఊరేగింపులూ  గట్రా చేసుకోవడానికి ఏర్పాట్లు చేశారా? 

'అసలు జనఘోషకు, చట్టసభ సభ్యుల చిద్విలాసాలకు పొంతనే లేదన్నా!'

' అవును మరి... ఎంపీలు, ఎమ్మెల్యేలు తమ జీతభత్యాలను అనేక రెట్లు పెంచుకున్నారు. వంటగ్యాస్ బండ ధరను ప్రజల మెడకు గుదిబండగా మార్చేశారు. బజారులో ధరలు అగ్గిపెట్టకుండానే మండిపోతున్నాయంటూ గగ్గోలు పెడుతుంటే పట్టించుకోకుండా కార్ల ధరలు మాత్రం తగ్గించి చంకలెగరేస్తారా? ' 

' అయిపోయిందా?' 

' ఎక్కడైపోయింది పేదోడి ఘోష! రాజ్యాంగంలో రాసుండబట్టి అయిదేళ్లకోసారి ఎన్నికల సమయంలో వచ్చి కనపడుతున్నారు కానీ, లేకపోతే నేనంటూ ఒకణ్ని ఇక్కడ భూమ్మీద కష్టాలతో అల్లాడిపోతున్న సంగతి పెద్దోళ్ల బుర్రకు పట్టిఉండేదా?' 

' నువ్వుచెప్పేది నిజమేనన్నా! కరెంటు బిల్లులు పెంచబోమన్నారు. గద్దెనెక్కిన తరువాత ఛార్జీలు ఎడా పెడా పెంచి షాకులు మీద షాకులిచ్చారు. ఆధార్ కార్డులకోసం మండుటెండలో క్యూలో నిల బెట్టించి పోలీసులతో కొట్టించారు. నడిరోడ్డుపై ఆడ కూతుళ్లు నడవలేని పరిస్థితులు దాపురించాయి. అత్యాచా రాలు ప్రబలిపోయాయి!'

'అంతేకాదు... రైతుల పరిస్థితి మరీ దుర్భరంగా తయారైంది. వానలు కురుస్తున్నా పంటలు వేసుకోలేని దుస్థితి దాపురించింది. అన్నదాతలు అడిగే మద్దతు ధరలకు బ్యాంకు రుణాలకు దిక్కూదివాణం లేదుగానీ, రైతేదో గడ్డం పుచ్చుకొని తెగ బతిమాలినట్లు నకిలీ విత్తనాలు, కల్తీ ఎరువులు, కరెంటు కోతలు మాత్రం దండిగా ప్రసాదిస్తున్నారు మహా ప్రభువులు. వీరు పెట్టిన కష్టాలు ఇన్నీ అన్నీ కావు!' 

' ఒప్పుకొంటారా బాబూ ! నువ్వు అడగకపోయినా పెట్రోలు ధర పెంచేశారు. ఉప్పులూ పప్పుల్లో రాళ్లు కలిపేశారు. ఆటోమీటర్ల మీద అదనంగా వసూలు చేస్తున్నారు. బెల్టుషాపులు పెట్టి మరీ మద్యం దంచేస్తున్నారు. కాకి ఈక పడితే కూలే ఇళ్ళు కట్టించి అంట గడుతున్నారు. జీవితం ఇప్పుడు అలా తగలడింది'

'అయితే, ఇప్పుడు మనం ఏం చేద్దామన్నా!'

 'ఎవరడినా అడగకున్నా ఓపిక చేసుకొని పోలింగు బూత్ దాకా వెళ్లాలి. ఉన్నవాళ్లలో మంచివాడు అనుకున్నవాడికి ఓటేసెయ్యాలి. శ్రీకృష్ణ సత్యభామలది సంసార సమస్య.  రాముడు, వాలి మధ్య వైరం సుగ్రీ వుడితో పొత్తుల సమస్య. ఇప్పుడొస్తున్న ఎన్నికలు మాత్రం మన సొంత సమస్య... మన ఊరి సమస్య. ' 

'అవునన్నా! చెడ్డ నాయకులకు గేట్లు మూసే ఆయుధం ఓటే! ఒక రొచ్చి బొట్టు పెట్టి పది రూపాయలిచ్చి మద్యం పంచి స్వర్గం అరచేతిలో పెడతామని మాటివ్వాలా? ఉచిత బహుమానాల మార్పిడికి ఓటేమీ మన చేతికొచ్చిన ఉచిత ఓచర్ కాదు కదా? .. ఈ సారి ఎన్నికలు రానీ! పేదోడి పవరేంటో  బూత్ దాకా వెళ్లి రుచి చూపిస్తా! ' 

***

- కర్లపాలెం హనుమంతరావు 

( ఈనాడు దిన పత్రిక సంపాదకీయ పుట సరదా గల్పిక) 

కవిత: అసత్ సుందరాచారి సేకరణ : కర్లపాలెం హనుమంతరావు

 కవిత: అసత్ 

సుందరాచారి 

సేకరణ : కర్లపాలెం హనుమంతరావు 

నల్ల రాతికి కలతల యిల్లు గట్టి, జారు కన్నీటి ధారల జలకమార్చి, వేడి నిట్టూర్పు సెకలలో వేల్చి మనసు, ముందు పెట్టితి వై వేద్యమునకు సయ్యు.

అధరపుటములు కదలించి, మధుర మనుచు

ఆరగించెను నా స్వామి; ఆరగించి,

కడుపు నిండకపోయిన కారణమున

కండలూడ్చెను నాలోన కత్తిదూసి, ఎముక లొకకొన్ని మిగులగా నేర్చి పేర్చి, నరములన్నియు నారగా సరులు గూర్చి, పచ్చి నెత్తురు పళ్లెంబు పట్టి పాడి ‘అమరుడైయుండు మోస్వామి!' యంటి నంత.

నిలువు మాసిన దేశాని కలతయేమొ వెలియనేలేదు, గాలిలో కలవరించె, కడుపుచల్లనివానిని కదలనీక కాళ్లు చుట్టును పెనగుచు కలవరించె.

పేద గుండియ పేలగా పీల్చినట్టి రుధిరమదిరమ్ము కడుపులో రొదలు నేయ, మండుగొంతుక తడుపగా మంచినీళ్ళ కరవులోబడి నాస్వామి కలవరించె.

కనకపీఠము ముంగల కప్పురంపు ప్రభలు వెలుగొంద, అగరుధూపాల నెత్తి, మంచిపన్నీటిపాదాలు ముంచి కడుగ పిలుచుచుండియు కలవారు, వెలికిరాడు.

ఏడులోకాల కనుసన్న నేలువాడు ఇరుకు చీకటి గుడిలోన మరగినాడు. నాకు లేనట్టి దేవుడు లోకములకు లేదు, లే డింక పిలిచినా రాడు, రాడు.

- సుందరాచారి 

( సేకరణ : కర్లపాలెం హనుమంతరావు ) 

01-01-2021 

సరదా గల్పిక అన్నమో.. రామచంద్రా! : - కర్లపాలెం హనుమంతరావు - ఈనాడు

 

కొత్త వధూవరులపై అక్షతలు చల్లుదామన్నా బియ్యం ధర చూసిబేజారయిపోతోంది. వెర్రిపిల్ల వెంకికి   నాయుడుగారి మీద  వలపెంత  ఉండి ఏంలాభం... కూరలో కూరి పెడదామంటే వంకాయలు  కిలో పాతిక రూపాయలు! గంగి పాలు గరిటెడైనా చాలన్నాడుగానీ మన వేమన, ఇప్పుడు చుక్క పాలు కొనాలన్నా చుక్కలు చూడాల్సిన  పరిస్థితి!

ఆ కమ్యూనిష్టు కారయత్ గారికి మన చేపల వేపుడు కరకరమంటూ  మహారుచికరంగా ఉండవచ్చేమోగానీ, ఇక్కడ రెండు రూపాయలు పెట్టినా కరివేపాకు కాడ ఒకటి కూడా రావటంలేదు! పెట్రోలు గట్రా -రేట్లు  పేట్రేగిపోతున్నాయని ప్రజా సేవకులు అలా ఎడ్లబండ ఊరేగింపుల్లో మస్తు  మజా ఉడాయిస్తున్నారు. కానీ,  ఎడ్లు తినే ఎండు గడ్డి పరకలైనా పాతికా పరక్కొస్తు న్నాయా? భారతదేశం ఇప్పుడు చక్కని పాడి యావు కానేకాదు. వట్టి వట్టిపోయిన గొడ్డు. ఇంకా సూటిగా చెప్పాలంటే ఆబాలగోపాలం ఇవాళిక్కడ వరవిక్రయంలోని సింగరాజు లింగరాజులే. ఉప్పులూ పప్పులూ తులాల చొప్పున తూచి తింటేగాని బతకలేని దుర్భర పరిస్థితి!

వేళకు వానలు రాకపోవటం సర్కారు లోపమంటావుట్రా ? కరవు మొత్తానికీ  క్యాబినెట్టే కార ణమా ఏంట్రా ? వరదలకు గట్లు తెగటం కూడా గవర్నమెంటు కుట్రేననేటట్న్నావు! ఉప్పు రేటుకీ, ఎండీయే రెండో హయాముకి సంబంధంమేంటి చెప్పు! ఎస్మాలూ, తస్మాత్ జాగ్రత్త అని బెదిరించటాలూ తప్ప పాపం మోదీజీ  సర్కారు మాత్రం చేయగలిగిందేముంది చెప్పు? అదుపు చేసేటందుకు గాదెకింది పందికొక్కులు- పార్టీలోని కిందిస్థాయి కార్యకర్తలా? అక్కడికీ ధరల రెక్కలు కత్తిరించడానికి అందరూ పాపం... ఎంతగా కత్తెర్లు పట్టుకు వెదుకుతున్నారు! ఆకాశంలో అపరాలు అప్సరసలా ఏ మునీశ్వరుల తపస్సులు మంటలో కలిపేందుకు దిగిరావడానికి! 

రెక్కలు ముక్కలు చేసుకుంటున్నారా! పార్లమెంటు స్తంభిస్తే పాతధరలు దిగుతాయా బాబాయ్? ధర్నాలకు ధనియాల ధరలు, గోబ్యాకులకు గోధుమల రేట్లు బెదిరే కాలమా ఇది? పిడికెడు అన్నం కూడా పెట్టలేని ఈ పీడీయస్ ఎందుకు? చీమలా అయినా పుట్టలేదు, మధ్యతరగతిలో పుట్టిచావడమే మన నోసట రాసిపెట్టిన ఖర్మ! 

ఆపరా ఆ  ట్రోలింగూ ! తెగ రెచ్చిపోతున్నావు వింటున్న కొద్దీ. ఆఫ్ ట్రాల్  ఆమాద్మీగాడివి నువ్వెంత? కొరియాలో పుట్టుంటే తెలిసొచ్చేది . . ఇరవై ఏళ్ళ బట్టీ  అక్కడ రెండంకెల ఆహార ద్రవ్యో ల్బణం రంకెలేస్తుంది. మన ప్రధాని పాపం ఒక్క అంకె ద్రవ్యోల్బణం కోసం ఒంటికాలి మీద ఎంతకాలంనుంచీ జపం చేస్తున్నారో చూడు! జాతీయ స్థాయిలో జాలి పడాల్సిన మేటరు! సెటైరు అవసరమా కటకటలప్పుడు కూడా! 

సింగినాదం . . జీలకర్ర అనాలన్నా అదురుపుడుతోందిక్కడ ఆ కర్ర ధర కల్లో కొచ్చి . డబుల్ ఫ్లాట్ అమ్ముకున్నా సింగిలిడ్లీ రానప్పుడు . . అరటి పండు లేని  తొక్కలా  ఈ లెక్క లెందుకంట! 

ఎంత సేపూ దేశం నా భోజనంలోకి ఏమిచ్చిందన్న యావే తప్పించి దేశానికి నువ్వేమిచ్చావని చెక్ చేసుకోవా .. కనీసం ఒన్ టైం సెటిల్ మెంటుగా అయినా?     అండికి తిప్పలు పడే కడుపుకు ఇప్పుడు నీ కడుపుమంట అంతవసరమా  . . చెప్పు! అయినా అడిగావు కాబట్టి అతిచిన్న చిట్కాలు రెండో , మూడో నీ చెవిలో పడేస్తా! చెవుడు నటించక ! చక్కా విని ఇంచక్కా ఆచరించుకో! ఆ కోపమన్నా కొద్దిగా చప్పబడిపోతుంది! 

చప్పున చెప్పు .. చెప్పు బాబాయ్!  

కంచం ముందు కూర్చున్నప్పుడు మర్చిపోక ..  మాయాబజారు సినిమా ఘటోత్కచుడి భోజనం పాట పెట్టుకో! కడుపు నిండినట్లు కచ్చితంగా ఫీలింగు కలుగుతుంది. అయినా కడుపు ఆ ఫీలింగు కలక్కపోతే  ఆట్టే ఫీలయిపోకు! అసలే పీల కుంకవి ఈసారి కాశీకి పోయినట్లు ఊహించుకో!  అనే అనే కంచాన్ని  గంగలోకి విసిరేసెయ్ ! కంచం ఖర్చే తప్పించి .. మరో ప్రయోజనం కనిపించదనకో! దిగులుపడమాక!  నీ చ్నిప్పుడు మీ అమ్మ నిన్ను ఆడించిన ఉత్తుత్తి అన్నాలాటని  మీ చిన్నారులతో కలసి  మళ్ళీ ఆడించటం  నేర్చుకో! పిల్లమూక ముందు పిల్ల చేష్టలేంటని అట్లా చిన్నబోకురా సన్నాసీ! సీను మార్చు ఈసారి.  బ్రహ్మాండమైన చిట్కా!  చిటికలేసుకుంటూ పప్పు పెట్టి, పాయసం పెట్టి, అన్నం పెట్టి- అంటూ ముద్దుచేసి మరీ కాణీ ఖర్చు లేకుండా ఎన్ని ముద్దలైనా ప్రేమగా పెట్టేయొచ్చు మీ బుడ్డోళ్లకు. అమ్మలా ఆడినట్లూ ఉంటుంది కమ్మకా పిల్లల ఖాళీ కడుపులో నిండినట్లుంటుంది.  ఆపైన చక్కి లిగింతలు కూడా పెట్టేసావనుకో .. కడుపు నిండటమేం కర్మరా బాబూ! కళ్ళెంటనీళ్ళు కూడా వచ్చేస్తాయి ధారగా...'

ఇంకొద్దు బాబాయ్! ఇప్పటికే కన్నీళ్ళు కుండలకొద్దీ కారిపోతున్నాయి?' '

అదేంట్రా.... అలా తల గోడకేసి బాదుకుంటున్నావూ! ఒకసారి తల మోదుకుంటే గంటకు నూటయాభయ్ కేలరీలు వేస్టవుతాయిట. తెలుసా! వెస్టు సైడు పరిశోధకులు టెస్టు చేసి మరీ తేల్చిన మేటరు. 'భోజనకాలే గోవింద నామస్మరణ' అంటారుచూడు! అలా తల కొట్టుకుంటుంటే భోజనానికి ముందే నువ్వు గోవిందా అయిపోయేవు. భద్రం! భద్రం ! ముందు ఆ బాదుడు ఆపరా బాబూ: 

'ఎందుకున్నా... ముందుముందు మన ప్రజానాయకులకు జై జైలు, జిందాబాదులు.. బాదేందుకా! భారత్ బంద్ కాదు .. భరతదేశమంతా విందులు కాకపోయినా .. కనీసం గంజి కుడిచే మందులేమన్నా  ముందు కనిపెట్టండిరా  ప్రభువులూ! 

- కర్లపాలెం హనుమంతరావు

( ఈనాడు దినపత్రిక  సంపాదకీయ పుట సరదా గల్పిక ) 

 

కవిత : 

ఆ సాష్ట్ వేర్ వేరు .. ఈ సాఫ్టువేరు వేరు 

-కర్లపాలెం హనుమంతరావు 

01 - 01-2021 

ఇంటెడు చాకిరి చేసి చేసి బండబారిన చేతులతో - అమ్మ

తలస్నానం చేయిస్తూ కళ్ళ మీద పడ్డ సబ్బు నురుగుల్ని సుతారంగా తుడిచేసే స్పర్శ

అక్షరాభ్యాసంలో ఓనమాలు దిద్దిస్తూ పలకమీద నా వెళ్ళను నడిపించిన నాన్న గుప్పెట పట్టు

అద్దె సైకిలు తొక్కుతూ పడి

మోకాలు చిప్పలు చెక్కుకున్నప్పుడు 

తుపుక్కుమని ఇంత ఉమ్మి  

నా ఎరుపు గాయానికి పులిమిన అన్న 

అరచెయ్యి వెచ్చనిదనం

ఎక్కాలు వప్పచెబుతూ వరస తప్పించినందుకు

గుడ్లింత  చేసుకొని నొప్పి  లేకుండా చెవితమ్మలు అక్క  నొక్కిన వైనం

ఎన్ని ఇంటర్నెట్లు  వుంటే ఏంటి

ఆ సాఫ్ట్ వేర్ వేరు 

ఈ సాఫ్టు వేరు వేరు 

రెండూ వేరు - వేరు 

 - కర్లపాలెం హనుమంతరావు 

01- 01- 2021 

జుట్టు పట్టు - కర్లపాలెం హనుమంతరావు ( ఈనాడు దినపత్రిక - సంపాదకీయ పుటగల్పిక )

 

జుట్టు పట్టు 

- కర్లపాలెం హనుమంతరావు 

 ( ఈనాడు దినపత్రిక - సంపాదకీయ పుటగల్పిక ) 

'సీబీఐ చిలక నాలుక మడతపడిందనా నీ మధన, దానికి జుట్టు పీక్కుంటే లాభ మేమిట్రా? 

కరెంటు బిల్లుగాని వచ్చి చచ్చిందా  ఏమిటి? షాక్కొట్టి మతి భ్రమిస్తేనే ఇట్లాంటి పిచ్చి వేషాలు మొదలయ్యేది!

చెల్లాయి కూరగాయల మార్కెట్టుకుగానీ పంపిందా, నువ్వు

జుట్టు పీక్కుంటే మాత్రం ధరలు దిగొస్తాయట్రా? 

ఇప్పటికైనా ఆ జుట్టు పీక్కోవడం ఆపు ! చెప్పేది నీకే, చెవికెక్కటం లేదా? 

నీ సినిమా పిచ్చి దొంగలెత్తుకుపోనూ? అభిమాన కథా నాయకుడి సినిమా పైరసీ పాలైతే జుట్టు పీక్కోవాల్సింది నిర్మాత గదరా?  నీకెందుకీ తంటా?

నీ బోడిగుండు చూస్తే చెల్లాయి తట్టుకోలేదేమోరా... ముందు సంసారం సంగతి చూసుకోరా సన్నాసీ! ప్రతి దానికీ ఇంత ఆవేశం అవసరమా? పాజిటివ్ ఆలోచనలు చెయ్యరా కొంచెం! 

పెట్రోలు ధర ఇప్పట్లో పెరగదంటున్నారు. మెట్రో రైలు కూతవేటు దూరంలో ఉందాయ . కడుపు మంటతో ఎవరూ చచ్చిపోకుండా ఇంచక్కా  'ఆహార భద్రత' వచ్చేసింది. ఉచితంగా సెల్ఫోన్లు, పిల్లలకు కంప్యూటర్లు దొరికే బంగారు కాలం తొందర్లోనే రానుంది. అందుకు ఎగిరి గంతేయాలి. కానీ, ఈ పిచ్చి గంతులు ఏమిటి?

ప్రధాని ఆఫీసులో చోరీనా? అయితేనేం, మీ ఇంట్లో పడలేదుగా ఆ దొంగలెవ్వరూ! బొగ్గు దస్త్రాలనే కాపాడలేనివాడు ఈ దేశాన్ని ఏ రకంగా రక్షిస్తాడనా? చెప్పుకోవడానికి, చప్పట్లు కొట్టించుకోవడానికి గొప్పగా ఉంటాయి గాని, నిజానికి పెద్దాయనకు ఇంకేమీ పనులు లేవా ఏమిట్రా ... బొగ్గు దస్త్రాలమీద శేషశయనుడి మాదిరిగా అస్తమానం పడుక్కుని కునకడానికి?

 నీకు సంబంధంలేని సంగతుల గురించి అదేపనిగా ఆలోచించకు. మనసు పాడుచేసుకొని క్రాపు చెడగొట్టుకోకు. ఇందుకేనా మా చెల్లాయిని నీకిచ్చి చేసిందీ? నీ భార్య కోసమన్నా నాలుగు వెంట్రుకలు అట్టే పెట్టుకో... ఎందుకు చెబుతున్నానో అర్ధం చేసుకో! 

ఏమిటీ, రూపాయికి దమ్మిడీ విలువ లేకుండా పోయిందా! 

వానలు ఎక్కువై దోమల పీడా పెరిగిందా! దానికా  ఈ జుట్టు పీక్కోడాలూ! 

ఏటీఎంలలో దొంగ నోట్లొస్తు న్నాయా? చలామణీ ముఖ్యంగానీ ఏ నోట్లయితే ఏమిట్రా? అసలు నోటుకు ఏమన్నా కొసరు బంగారం దొరుకుతుందా ఎక్కడైనా? ఎందుకట్లా పీక్కోడం జుట్టు ! ఆపిక! 

సచివాలయంలో తెలుగువా డటం లేదని, ప్రతి సాయంకాలం ఖైరతాబాదు జంక్షన్ కిక్కిరిసిపోతోందని, అర్హత లేనివాళ్లకే అకాడమీలు అవార్డులు ప్రదానం చేస్తున్నాయనీ... ఇవంట్రా నీ దిగుళ్లు? చెప్పి చెప్పి నాకలుపోస్తోంది . ఇక ఆపరా బాబూ ఆ స్వచ్ఛంద క్షవర కళ్యాణం! 

పొంతనలేని సంగతులన్నీ ఇలా ఒకేచోట పోగేసి సమస్యకో గుప్పెడు చొప్పున జుట్టు పీక్కుంటూపోతే బోడిగుండు ఒక్కటే చివరకు మిగిలేది! 

బాబ్బాబూ 1 ముందా స్వయం ముండన పథకం పక్కన పెట్టు. రోజులూ ఆట్టే బాగాలేవు. నీ అవతారం చూసి ఏ తీవ్రవాదో అనుకుని కేసైనా  లేకుండా మూసేసే  పోలీసు పటాలం ఉంది. ఎందుకు చెబుతున్నానో అర్ధం చేసుకో! 

ఆధార్ కార్డు సమస్యా? అరె, నువ్వేమన్నా మహారా వ్యలో ఉన్నావా పెళ్ళి ధ్రువపత్రం దొరకదనుకోవడానికి! బీహారులో ఉన్నావా మీ నాయన  పింఛను  బిగుసుకుపోడానికి! నికి! మధ్యప్రదేశు లో కూడా లేవు గ్యాసుబండ కష్టమనుకో వడానికి! 

ఇది ఆంధ్రప్రదేశ్! మహా అయితే పిల్లలకు ఉప కార వేతనాలు కూస్తంత  ఆలస్యమవుతాయి. ఏడవడానికి ఇంకేం సమస్యలే తోచలేదుట్రా బాబూ నీకు? జుట్టుమీద పడితే సమస్యలు తీరుతాయా? 

ఎవరికి లేవబ్బీ ఇబ్బందులు? ప్రజా ప్రతినిధులే భవిత్తుండదేమోనని బెంగడిపోతున్నారు. తెల్లకార్డుగాడివి నువ్వెంత? 

లక్షల కోట్లు దిగమింగినవారే దొరబాబుల్లా లక్షణంగా ఊరే గుతుంటే, నువ్వేమిట్రా దిగాలుగా ముఖం వేలాడేసుకుని ఈ మూల జుట్టు పీక్కుంటున్నావ్!

నీది ఆదాయానికి మించిన అప్పుల బాధ అయితే, ఇష్టంలేకున్నా రిటైరై పోయిన పోలీసు పెద్దాయనది ఆదా యానికి మించిన ఆస్తుల గోల. అందరూ నీలాగే జుట్టు మీద పడితే... చివరికి ఏమవుతుందో తెలుసా? నీళ్లలో, నేలపై ఎక్కడ చూసినా వెంట్రుకల కుప్పలే దర్శనమిస్తాయి. 

ప్లాస్టిక్ సంచులగోల చాలదన్నట్లు అదనంగా వెంట్రుకల కాలుష్యం తిప్పలెందుకు బాబూ ? అసలే ప్రభుత్వం డబ్బుల్లేక అల్లాడుతోంది. ప్రజాకర్షక పథకాల నిధులను ఇటు మళ్ళించాల్సొస్తుంది . ప్రజాప్ర తినిధులు ఆనక వాటిని దారి మళ్ళించాలి. గాలి, గడ్డి, తుక్కు, బొగ్గు స్కాములకు తోడుగా కొత్తగా వెంట్రుకల స్కామొకటి పుట్టుకొస్తుంది. అప్పుడు పీక్కోవటానికి ఒక్క వెంట్రుకైనా మిగలదు నీ గుండు బోడిదైనాక . ఉన్న ఆ రెండు వెంట్రుకలనైనా అట్లాగే ఉండనీయరా బాబూ .. నీకు పుణ్యముంటుంది . అసలింతకూ నీ సమస్య ఏమిటో నోరు విప్పి చెప్పరా!

'హమ్మయ్యా, ఇప్పటికైనా అవకాశం ఇచ్చినందుకు ధన్యవాదాలన్నా! ధరలు పెరగడం, సీబీఐ ధోరణి, కరెంటు షాకులు, సినిమా పైరసీ, పెట్రోలు ధరలు, మెట్రో గోల, ఆకలి చావులు, ప్రధాని తీరు, రూపాయి పతనం, అణు ఒప్పందం, దొంగనోట్లు, తెలుగు వాడకం, బిరుదుల బాగోతం, ట్రాఫిక్ కష్టాలు, ఆస్తులు అప్పులు... వీటి గురించి నా విలువైన జుట్టును వదులుకుంటానా? అరేయ్, నేను సగటు భారతీయుణ్ని రా, నా బాధ నిన్నటి పేపర్లో వచ్చిన వార్త చూసి... 

'ఏమిటా వార్త?

సుప్రీం ధర్మాసనం నేరగాళ్లను రాజకీయాల్లోకి రానీయకుండా చక్కటి తీర్పు ఇచ్చింది కదా కొన్నాళ్ల కిందట! దాన్ని నీరుగారుస్తూ హస్తం నాయ కత్వంలో అత్యవసరాదేశం వచ్చింది మొన్న. అంత వరకూ అర్ధం చేసుకోవచ్చు. నిన్నేమిట్రా అదే పార్టీ ఉపాధ్యక్షుడు ఒక్కసారిగా బాపూజీ వారసుడిలా మారిపోయి వట్టి 'నాన్సెన్స్' అంటూ ఆ కాగితాల కట్టనలా పరా పరా చించేస్తానంటాడు? రాజ్యాంగబద్ధంగా ఎన్నికైన మంత్రిమండలి తీర్మానం మేరకు చేసిన ఆర్డినెన్సు.  దాన్ని అదే పాలక పక్షానికి చెందిన నాయకుడు ఇట్లా కొట్టి పారేస్తే... చెల్లకుండా పోతుందంటావా ? ఈ రాజకీయం అర్థ కాకే ఈ జట్టు పీక్కోవడం!'

'దానికి నువ్వెందుకురా జట్టు పీక్కోవడం! నేర రాజకీ యాలు చేసే చోరశిఖామణులు కదా పీక్కోవాల్సింది! ఒక్కమాట చెప్పనా... ఏ సమస్య అయినా ఇట్లా జుట్టు పీక్కుంటూ కూర్చుంటే పరిష్కారం కాదు. 

ఎన్నికలొస్తు న్నాయి గదా! సమయం చూసి నేరగాళ్ల జుట్టు పీకితే అన్ని సమస్య లూ చిటికెలో పరిష్కారమయిపోతాయి. 

నేతాశ్రీల జట్టు ఓటరు చేతిలోకి వచ్చేది మన ప్రజాస్వామ్యంలో అయిదేళ్లకోసారి! అప్పుడు పట్టు... వాడి జుట్టు! ఓ పౌరుడిగా... అందుకు ముందుగా నడుం కట్టు! 

- కర్లపాలెం హనుమంతరావు

( ఈనాడు దినపత్రిక - సంపాదకీయ పుటగల్పిక )