కొన్నిమొట్టు కవితలు-4

1

ప్రతి ఏడాదీ పోలింగ్ చుక్కలే

ఐనా పోలియో

మన ప్రజాసామ్యానికి!

2

బెల్టుబాంబుకు కొందరే!

బెల్టుషాపుకు

ఎందరో!

3
క్విడ్ ప్రో కో

పెద్దల

నగదు బదిలీ
పథకం

4

'గోవింద' రాజులకు

స్విస్ బ్యాంక్ లాకర్లే 

నేలమాళిగ ఆరోగది

5

యూరియా మెతుకు లేదు

యురేనియం సంపెంగ నూనె

                                 దేశం మీసాలకి!

6

చిన్న చినుక్కి ఎంత శక్తో!

చిటికెలో నగరం

హిందూమహాసాగరం

7

మీడియాలో మేధావులు

కిక్కిరిసిపోతున్నారు

తెనాలి రామలింగులూ

తెలారంగానే

జుత్తుకు తెల్లరంగుతో తయారు!

8
రాజులు డొక్కు బస్సుల్లో

బంట్లు బుగ్గ కార్లల్లో

భలే ప్రజాస్వామ్యం!

9

వేలు పట్టుకు నడిపించిన అమ్మా నాన్న

వేలు విడిచిన చుట్టాలయిపోయారా కన్నా!

వేలు సంపాదిస్తునావనా.. హన్నన్నా!

10

పిడుగు ముందూ

మెరుపు ఆనక..

ఆడపిల్ల చెంప దెబ్బ

11

ఆక్రోశాక్రోశ ఘోషంబై

వికట కఠోరాట్టహాసోద్భటంబై

వక్రభూవల్లరీ సంవలన భయదంబై

స్ఫారనిశ్వాస ధారా చక్రంబై..

                                కంగారొద్దు!

                                మా ఇంటి అటకమీది తాళపత్రాల

                                'తాటాకు చప్పుళ్ళ' గోల!

-కర్లపాలెం హనుమంతరావు