శ్వాస విశ్వరూపం- ఓ దృశ్యకావ్యం

శ్వాస- జీవించడానికి మాత్రమే సంకేతం కాదు. ఇది ఒక జీవన సౌందర్యం కూడా. నవ్వుకు మల్లే, హావభావాలకు మల్లే శ్వాసా ఒక ప్రాపంచిక భాష. ఒక్క ముక్క నోటిద్వారా బైటపెట్టడకుండానే అంతరంగ భావావేశాలను అత్యంత నిర్దుష్టంగా,  స్పష్టంగా  వెలిబుచ్చే అద్భుతమైన సమాచార ప్రతీక శ్వాసప్రక్రియ.

శ్వాసకు ఉన్న విస్తృత పరిధి ఆశ్చర్యం కలిగిస్తుంది.  కుల మత ప్రాంత దేశ వర్ణ లింగ జీవ వయో భేదాలకు అతీతంగా శ్వాస శాసించే అంతరంగ, బాహ్య ప్రపంచాన్ని తిలకిస్తే విస్తుబోక తప్పదు.

డేనియల్, కెటీనా భార్యా భర్తలే కాదు.. చిత్ర నిర్మాతలు కూడా. కేలిఫోర్నియాలో ఉండే ఈ దంపతులు మానవశ్వాస బహుముఖాలమీద తీసిన ఈ షార్టు ఫిల్ముని చూడండి. నిడివి మూడు నిమిషాలే అయినా.. మనిషి అన్నిరకాల మూడ్సుని సెల్యూలాయిడ్ మీద కేచ్ చేయడానికి చక్కగా ప్రయత్నించారు ఈ దంపతులు. అప్పుడే పుట్టిన పసిగుడ్డు కేరింతల మొదలు విశ్రాంతి తీసుకునేముందు  మనిషి వదిలే దీర్ఘ నిశ్వాసం వరకు శ్వాస విశ్వరూపాన్ని చక్కగా తెరకెక్కించిన జంటను మనస్ఫూర్తిగా అభినందించాల్సిందే!