ఈనాడు - హాస్యం - వ్యంగ్యం - గల్పిక మేకపురాణం రచన - కర్లపాలెం హనుమంతరావు ( ఈనాడు ప్రచురితం - 07-03-2003)

 

 ఈనాడు - హాస్యం - వ్యంగ్యం - గల్పిక 

మేకపురాణం 

రచన - కర్లపాలెం హనుమంతరావు 

( ఈనాడు ప్రచురితం - 07-03-2003) 

వ్యాసమహర్షుల వారు పురాణ ప్రవచనం చేస్తున్నారు. అష్టాదశ పురాణాల పఠనం పూర్తయిన తరువాత స్వస్తి చెప్పే తరుణంలో 'ఆగండాగండి. ఇంకో పురాణం మిగిలుంది ' అంటూ  ఎక్కణ్ణుందో రొప్పుమంటు వచ్చిపడింది ఆ జీవి . అయినా మహర్షుల  వారు మంగళం పాడేశారు. 

***

నైమిశారణ్యం. 

 'సూత మహర్షి శౌనకాది మునులకు గురుప్రవచిత పురాణాల సారాన్ని కోరిక మేరకు తిరిగి చెబుతున్నాడు. పజ్జెనిమిది  పురాణాలు పూర్తయి 'ఏవం పురాణ పఠనమ్ సమాప్తమ్' అని ముగించబోతుండగా మళ్ళీ ఆ జీవే ఎక్కణ్ణుంచి ఊడిపడిందో పంథొమ్మిదో  పురాణం కూడా ఉందిగా' అంటూ వెంటబడింది. మునులం దరూ మౌనంగా చాపలు చుట్టేసుకుని నిష్క్రమించారు. 

***

భువన విజయం భువన మనోహరంగా సాగుతోంది. పొరుగుదేశం కవిగారొకాయను పొగరుగా ' పద్యం చదువుతా... అర్ధం చెప్పండి ' అంటూ ' భావ భవభోగ సత్కళా భావములను..' అనే పాదాన్ని పదేపదే చదివేసరికి కృష్ణదేవరాయలవారితో సహా దిగ్గజాల వంటి కవి అష్టదిగ్గజాలూ తికమకపడిపోయారు. తెనాలి రామకృష్ణుడు తెలివిగా 'మేకతోక తోకకు మేక తోకమేక ' అంటూ ఎదురుదాడికి దిగేసరికి ఆ కవిగారు అదే పోత. రామకృష్ణుని మేకపద్యాన్ని అందరూ అభినందించేవేళ సభ మధ్యలోకి దూసుకొ చ్చిందా జీవి. 

' పద్యమే ఏం ఖర్మ .. ఏకంగా పురాణమే చెబుతాను' అంటూ అరుపులకు దిగిపోయింది . 

సభ అర్థాంతరంగా ముగిసిపోయింది.

***

విసిగి ప్రాణం తీసుకుందామని కొండ కొమ్ము మీదకెక్కిన ఆ జీవిని వెనక్కి లాగారెవరో. 

తిరిగి చూస్తే.. ఓ  వింత ఆకారం ! తల సింహానిది. . బాడీ మేకది!  తోక మాత్రం డ్రాగన్ గ్రీకు దేవుడో..  రోమన్ దయ్యమో! 

 'బిమెరా  , అంటార్లే నన్ను.  నేటివిటీకి సూటుకాకపోయినా నిన్నెందుకో రక్షించాలని పించింది. ఛీ! ప్రాణాలు తీసుకొంటున్నావేంటి ? అనడిగిందా ఆకారం.

'అదో పెద్ద ఫ్లాష్ బ్యాక్ ...! ' 

'అయితే వద్దులే ! వినే ఓపిక లేదు' '

'అదే ప్రాబ్లం... నా ప్రారబ్దం! పద్దెనిమిది పురాణాలను  కూడా ఓపిగ్గా వినేవాళ్లు నాదాకా వచ్చేసరికి తెగ చిరాకు పడిపోతున్నారు.  ఎన్ని వేల తరాలు మారినా నా తలరాత మారే దారి దొరకటం  లేదు. ఇక

నాకు మోక్షం దొరికేదెప్పుడు? ' అంటూ నుదురు బాదుకుందా వింత జీవి.

' నీ కథకీ . . మోక్షానికీ  కనెక్షనేంటీ ?' ఒన్ లైన్‌ ఆర్డర్లో  చెబుతానంటే  వింటా' అంది బిమెరా  జాలిగా. 

'ఓకే! మా అదిదేవుడు శ్రీమహావిష్ణువు యోగనిద్రలో ఉన్నప్పుడు శంఖం జారి ప్రళయజలాలలో పడిపోయింది . ఆ శంఖంలో నుంచి ఒక

జెయింట్ పుట్టుకొచ్చాడు. వాడికి ఒకాసురుడి అబ్బ ఆకలి . బ్రహ్మ చేతిలోని వేదాలని కాస్తా కాజాలు అనుకొని మింగేశాడు. విష్ణుమూర్తి చేపలాగా వచ్చి రాక్ష సుడి పొట్టలో చొచ్చి వేదాలు లాక్కోవటంలో లోపల ఒకటి మిగిలిపోయింది. అది కూడా కక్కేస్తే గాని ఆ జెయింట్  గాడికి  మోక్షం లేదు. 

'అర్థమయింది. ఆ జెయింటు గాడివి నువ్వేనన్నమాట' 

'ఇండలిజెంట్! ఇట్టే పసిగట్టేశావ్ ! మిగిలిన ఆ ఒక్క పురాణాన్ని కక్కేద్దామని  వ్యాసులవారి టైం నుంచీ ట్రై చేస్తూనే ఉన్నా! నా  వాసన భరించలేక దగ్గరికే రానివ్వటంలేదసలెవరూ నన్ను! '  అందా జెయింట్ జీవి విషాదంగా. 

' మధ్యలో ఈ ఆకలొకటి ! ఎన్ని తిన్నా తీరిచావడంలేదు . మోక్షమెప్పుడొస్తుందో తెలీటం లేదు' 

' పోనీ! ఆ పురాణాన్ని నవలగా రాసి ఏ తొక్కలో  పత్రిక్కో  తోసెయ్యకపోయావా ?' 

' న్యూస్ ప్రింట్ వేస్టని తిరుగు టపాలో తిప్పికొట్టారు. ' 

 ' సినిమా వాళ్ళకు వినిపించాల్సింది. బాగుంటే ఏ కొత్తహీరోనో పెట్టి  బొమ్మగా లాగించుండేవాళ్లు' 

' మేనకలాంటి గ్లామర్ రోలుండే  ఒకే గానీ, మేకతో అయితే మునిగిపోతాం' అని కొట్టేశారు. ఈ పురాణంలో మేకదే  గదా మెయిన్ రోల్! 

' ఓహో! మేక పురాణమన్నమాట. టి.వీ సీరియల్ గా కూడా పనికిరాదే! ' 

' అవును. మేకేం ఏడుస్తుంది. ఏడుపు లేకుండా ఎన్ని ఎపిసోడ్లని ఎవరైనా సాగతీస్తారు?  కనీసం నువ్వయినా వింటే నాకీ కడుపుబ్బు తప్పుతుంది.' అంది ఆ జీవి ప్రాధేయపడుతూ. 

'అమ్మో! అవతల రోమ్ లో  నాకర్జంటు పనులు చచ్చేటన్నున్నాయ్ అన్నాయ్! పోనీ... ఒక పని చెయ్!  ఇక్కడే ఏవో సమావేశావా .... అవీ జరుగుతున్నాయని విన్నాను. అక్కడ ట్రైచేయకపోయావా?

' చేయొచ్చుకానీ ఇంత జెయింటుకు ఎంట్రీ ఎవడిస్తాడు? ' అందా జీవి నిరాశగా. 

 'మనసుంటే మార్గం ఉండకపోదు' మేక లాగా మేకప్పేసుకుని సంగారెడ్డి సంతకెళ్లు. బిల్ గేట్స్ భార్య గాని చూసిందంటే ముచ్చట పడ్డం ..  కొనటం ఖాయం ! ' 

' మేక వాసవ గదా! దొరసానులు కొంటారా? ' 

' మెలికంతా అక్కడే ఉందిసోదరా! కొన్న తరువాతగాని కంపు తెతీదు ఆ కపుల్సుకి .  బిల్ గేట్సా .. మజాకా?  మేక పక్కన పది నిమి షాలు కూర్చుంటే మిలియన్ డాలర్స్ బహు మతి అంటాడు.  ఎంట్రీ ఫీజు ఏ పది డాలర్లో పెడతాడు . పదికి మిలియన్ డాలర్లంటే ఎంత బుద్ధిమంతుడి పుర్రెనైనా  పురుగు కుట్టక మానదు. అందునా మనదేశంలో ! నూటికి వందమంది ఆ రకాలు! అధికారం పలుకుబడి  ఉంటే ఏకంగా 'పీ' లోనే నిలబడొచ్చు! 

'పీ ' అంటే? 

'క్యూ'  కన్నా ముందుండేది 'పి' నేగదా!  వెరైటీగా ఉంటుందని అలాగన్నాలే ! అది కాదు ముఖ్యం.  అవకాశాలు  గాని వస్తే  లటుక్కని  దొరకబుచ్చుకునే అవకాశం అందరికన్నా ముందుండేది దొరలకే  అని నా భావం . మేకతో అయినా  ఇంపైన వ్యాపారం చేయగల బిల్ గేట్స్ రోజుకో గోట్ ను  గదిలో కట్టేసుకుంటాడు గానీ,  కంపని వ్యాపారం మానుకోడు ' 

' దాంతో నా సమస్వెలా  సాల్వవుతుంది తమ్ముడూ ? ' 

'వాసన చూట్టానికే మాతం అవకాశం లేక కడుపు మండిన సభ్యులంతా మేక కోసం డిమాండు మొదలెట్టేస్తారు . దాంతో.. నీ ఎంట్రీ సులువవుతుందన్నాయీ! శాసన సభా సమావేశాలు సాగినంత  కాలం నీ పురాణ కాలక్షేపమే నిరాటంకంగా జరుగుతుంటుంది. ' 

' భలే... భలే.. సీజన్ ముగిసేలోగా నాకు మోక్షం ఖాయం' '

' అంతేకాదు సోదరా! నీ ఆకలి సమస్యా శా్యోతంగా తీరిపోతుంది.  సభాకాలం కన్నా విలువైనది తినటానికి నీకింకేం దొరుకుతుందింకెక్క డైనా..   చెప్పు'

' అంతా బాగానే ఉంది ! గానీ మాయ చేయటానికి బిల్ గేటుకైనా రోజుకో  ' బకరా' దొరకాలి కాదా? ' అని బిక్కమొగమే సిందాజీవి. 

పిచ్చివాడా! ఇక్కడ ఒకరాల కేం తక్కువ?  బారులుతీరి ఎలా పోతున్నాయో  చూడు; అంటూ కొండ కింద రోడ్డు మీద పోయే జనాన్ని చూపించింది బిమెరా.  ' మీ ప్రజాస్వామ్యం ఇలా సాగినంతకాలం  బకరాలకు ఏ మాత్రం లోఉండదు . బేగి సభను పో! మేక పురాణం వినిపించుకో ! అని మాయమైంది ఆ రోమన్ బెమరా!  

కర్లపాలెం హనుమంతరావు

( ఈనాడు ప్రచురితం - 07-03-2003 )