కర్లపాలెం హనుమంతరావు ( ఈనాడు - ప్రచురితం - 10- 12-2009 ) అఖిల జంతువుల దినోత్సవం - కర్లపాలెం హనుమంతరావు ( ఈనాడు - ప్రచురితం - 10- 12 -2009 )

 

ఈనాడు - సంపాదకీయం 

కర్లపాలెం హనుమంతరావు

( ఈనాడు - ప్రచురితం - 10- 12-2009  )

అఖిల జంతువుల దినోత్సవం

- కర్లపాలెం హనుమంతరావు

( ఈనాడు - ప్రచురితం - 10- 12  -2009  ) 

  

చిలుక పలుకులంటూ మెచ్చుకుంటూనే మనిషి నన్ను పంజరంలో  బంధించి ఆనందిస్తున్నాడు. వేరే జాతివైన గోరుమంతలతో మాకు అక్రమ సంబంధాలు అంటగడుతున్నాడు - అంది చిలుక. 

అడ్డమైన చాకిరీ నాచేత చేయించుకుంటూ  'అడ్డగాడిదా '  అంటూ నన్నడ్డు పెట్టుకుని మనుషులు తిట్టుకుంటున్నారు. ఇది మాత్రం న్యాయంగా ఉందా? అంది గాడిద . 

మా పాలు తాగుతాడు. వట్టిపోతే మెడ నరికి కిలోల చొప్పున అమ్ముకుంటాడు' అంది మేక కసిగా. 'అవునవును' అంటూ వంతపాడాయి  ఆవు, గేదె. 

గొడ్డుగా పుట్టిన నేరానికి  మనిషి చేతిలో నానా యాతన పడని పశువెక్కడుంది గానీ , ఇంతకీ ఈ సభ ఎందుకో చెప్పారుకాదు- అంది ఎద్దు అసహనంగా. 

పశువుల్నేనా .. పక్షులూ చేపలూ క్రిములూ కీటకాలు వేటినీ  వదిలటం లేదీ సర్వభక్షకుడు మానవుడు . ఆకులూ అలమలూ దొరకని కరవు రోజుల్లో ఇంత కోసుకు తిన్నాడంటే అర్ధముంది. కడుపు నిండినీ  

వాడి వినోదానికి కోళ్లూ, గొర్రెలకు మధ్య కుమ్ములాటలు .. పైపెచ్చు మన చావుబతుకుల పైన పందేలు!  దారుణం ! వాళ్లు వాళ్లూ చేసుకోమనండి కుమ్మి సిద్ధాలు . మధ్యలో వాళ్ల చచ్చే బరువుఅని   మోసి కూడా మా ఘోడాలు.. హస్తీలు  ఎందుకుండీ  నలిగి చావాలి? ! ఆ యుద్ధాలు .. అవీ లేనప్పుడు పరుగు పందేలంటూ అఘోరిస్తాడు .. మా ప్రాణాలు తోడేస్తాడు . వీడిని భరించడం మహాకష్టంగా ఉంది బాబూ ' గుర్రుమంది  

గుర్రం.

'మా పులులు వాళ్లనేం చేశాయంట! మా మానాన మేం అడవుల్లో  దొరికిందింతతిని చింతలేకుండా బతుకుతున్నాం ; వేట పేరుతో వెంటాడి మరీ చంపేస్తున్నాడీ మానవ దుర్మార్గుడు- అని గర్రుమంది  పులి.  

ఎన్నన్నా. . మీ పులీ సింహమంటే మనిషికి  ఉలుకేలే! గౌరవం కూడాను . వాళ్లిచ్చి పుచ్చుకునే బిరుదులు గట్రాలన్నీ గాండ్రించే  పులులూ గర్జించే సింహాల మీదనే కదా! సినిమాలక్కూడా మీ పేర్లే.. బడాయిలకోసం!  మా రాబందుల్ని, గుడ్లగూబల్ని, గబ్బిలాల్ని, పందికొక్కుల్ని... ఇదిగో, ఈ గాడిదలకన్నా  ఘోరంగా చిత్రిస్తాడు. . వీడితాడు తెగ! ఒక్క  కుక్కతో తప్ప కుక్కల్ని తప్ప మన జంతుజాలం మొత్తంలో మనిషిగాడికి ఏ జీవంతో పడింది. . చెప్పండి! 

చివరికి ఎవరికి ఏ హానీ తలపెట్టని చీమల్ని కూడా బతకనీయడీ మానవుడు! 

'శివుడాజ్ఞ వంకతో కుట్టి కొద్ది కసైనా తీర్చుకునే అవకాశముందీ పిపీలానికి. 'గొర్రెల్ని కోసి ఊలు వాడుకుంటాడు. కోళ్ల గుడ్లు గుట్టుగా నొక్కేసి అట్లేసుకు తింటాడు.   భూసారం తన వంతుగా భావించే వానపాముల పైకి   పిల్లుల్నీ, పిల్లుల్ని తరిమి  కొట్టే దిక్కుమాలిన పనికి తోడేలు నోటి కాడ కూడై చావమని ఎన్ని జీవాలని తన ఎదాన  పెట్టుకుంటుంన్నాడో ఈ జిత్తులమారి ! 

నిజమే! జిత్తులన్నీ వాడివీ.. చెడ్డ పేరేమో నాకు! '  నక్క ఊళ . 

వేళ మించి పోతుంది . ఈ కథ కంచికి చేరక ముందే ఏం చెద్దామో చెప్పండందరూ! - అంది కోతి! 

' కానివ్వండి .. కానివ్వండి! ఈ జంతుదినోత్సవం తంతు మళ్లా ఏడాదిగ్గాని తగలడి చావదు! - లేడి లేచింది.  

చివరకు సింహం గొంతు జూలు సవరించుకుంటూ గంభీరంగా ప్రకటించింది. ' ఇవాళ ప్రపంచ జంతువుల హక్కుల దినం . సృష్టిలో బతకటానికి మనిషికి ఎంత హక్కుందో మనకీ అంతే హక్కుంది. దేవుడేదో వాడి బుర్రలో  కొద్దిగా  గుజ్జెక్కువ పెట్టాడని మనిషి మహా బడాయిలు పొతున్నాడు.  నోరులేని జీవాలను చేసి సృష్టి మొత్తంమీద పెత్తనం చలాయిస్తున్నాడు. చూస్తున్నాంగా.. చిత్తం వచ్చినట్లు మన అడవుల్ని నాశనం చేస్తున్నాడు. శాంతి వంకతో ఆకాశంలోకి పావురాలను ఎగరేసే ఈ మనిషి పావురాలకే మనశ్శాంతి లేకుండా చేస్తున్నప్పుడు .  . ఇక మనల్ని మాతం ప్రశాంతంగా ఎందుకు బతకనిస్తాడు?  

రొయ్యల మాదిరి వెనకకు ఈదటం రాదు. మన కప్పల్లెక్కన బండరాళ్ళ మధ్య ఏళ్ళ తరబడి ఏ తిండీ తిప్పలూ లేకుండా ఉండటమూ వచ్చి చావదు. 

గద్దలా  ఎగరలేని దద్దమ్మ . లేడిలా పరిగెత్తలేని లేకి వెధవ . గబ్బిలంలా తలకిందులుగా వేలాడమనండి .. తలకిందులుగా  తపస్సు చేసినా  పట్టుపడదు ఆ వడుపు .   మన నెమలికి మల్లే , కాకి తీరున  వాన రాకను ముందే కనిపెట్టటమను! రాక, అవేవో వాతావరణ కేంద్రాలంట .. శుంఠ , నానా రకాల ఆగాలకు తెగబడతాడు. తీరాబాతో ఆ గాలి వాన వాడనుకున్న టైముకు రాదు . వచ్చేటైము తెలీనివ్వదు. నవ్యకండి! చిర్రెత్తుకు రావాలి నిజానికి వీడి జిత్తులు చూస్తుంటే! హంసలా పాలను నీళ్ళనూ వేరుచేయటం రాదుగానీ పాలలో నీళ్ళు, బియ్యంలో రాళ్లు కలిపి సొమ్ము చేసుకోవటం మాత్రం   మా బాగా వచ్చు.  నూకలు జల్లి పావురాలను పట్టుకునే కంతిరితనమే ఎరవేసి చేపల్ని బుట్టలో వేసుకోడంలో చూపించేది. ఏనుగుల్ని  పడదోయడానికి నేర్చిన  గోతులు తీసే విద్య మాత్రం మా బాగా  ఉపయోగిస్తాడు గిట్టనోడి గొట్టం గాడిని పడతోసేందుకు! కోతుల్ని పట్టి ఆడిస్తాడు. చిలకల్ని జోస్యాల కోసం చిలకల్ని పీడిస్తాడు. వీడి  తాడు తెగ .. తోటివాడని కూడా చూడకుండా  సందు దొరకడం ఆలస్యం వీడు  మోసగిస్తాడు. వాడు బట్టలకు  పట్టుపురుగులు బలి! వాడి చెప్పులజతకు పొదుగిచ్చి ఎదగనిచ్చిన గేదె  బలి!   వీడి బరువులు మోసేందుకు , బళ్లను తోసేందుకు , భూములు దున్నేందుకేనా భగవంతుడు  దున్నలను కిందికి తోలింది! తన  నట్టింటి  ఫాటో ప్రేముల్లో చర్మం   అందంగా బిగించుకోనేందుకా     పులి!

ఏనుగు దంతాల వేలంలో  దేవుడి పాటే వీడికి  లక్షల్తో  మొదలు ;  మనిషిగాడు తాన వినోదార్ధం  మన జంతు తంతులన్నిటినీ నడి బజారు ముడిసరుకుగా మార్చేసి గారడీ చేస్తున్నాడు. 

 ఏం తప్పు చేశాం మనం?  ఎందుకు మనిషికి మనమీదింత కక్ష? స్వేచ్ఛేగా అడుగుతున్నాం దేవుణ్ణైనా!  జంతువుల హక్కులను తొక్కి పారేసే పోకిరీలకు తక్షణం పడే శిక్షల అవసరం చాలా 

ఉంది ' అంది రాజమృగం. 

' పదండి ! ఆ దేవుడి ముందే ముందు మున డిమాండ్లు పెట్టి నిలదీద్దాం ' అంది నక్క  ఉత్సహంగా. 

'గాడ్ మనిషిగాడి సైడ్! మొండికేస్తే ?' అడిగింది వరాహం. 

'   ఉద్యమానికి దిగుదాం. నో డిమాండ్స్ కు . . నో వర్క్ . ఆవు పాలివ్వదు. ఎద్దు పొలం దున్నదు.  గాడిద బరువులు మొయ్యదు . గుర్రం బండినీడ్చదు . కోడి కూతలు  కుయ్యదు . ఎలుక పామును పట్టదు. పిల్లిఎలుకతో  .. కుక్క పిల్లితో .. కయ్యాలకు  దిగవు . . 

మనిషి డోంట్ కేర్ అంటేనో?! 

ఛాన్స్.. లేదు. మనవరాహం వర్క్ బంద్ చేస్తే ఊరంతా .. 

అన్ని జంతువులూ ఠక్కునముక్కలు మూసుకున్నాయి. 

ముక్కు లేని పాము జాలిపడింది ' పాపం! మనిషి! మనకు పాపం చుట్టుకోదూ ' 

' మరే! అప్పనంగా అప్పులివ్యటం  లేదని కక్ష కొద్దీ బ్యాంకులోళ్ల గుమ్మాల  ముందు ఈ మధ్య ఈ దరిద్రపు మనుషులే చెత్తా కుమ్మరించిపొతున్నారు . వాళ్లకు లేని పాపం మనకు మాత్రం ఎందుకు చుట్టుకుంటుందో! ' అంది జిత్తులమారి నక్క . 

' అఖిల జంతువులపై దౌర్జన్యం నశించాలి !' 

' జంతువుల హక్కులు పరిరక్షించాలి!  ' 

చప్పట్లు బాదుకుంటో .. నినాదాలు చేసుకుంటో జంతువులన్నీ దేవుడి దగ్గరకు  బైలుదేరాయి . 

'మరో ముఖ్యమైన మాట మృగరాజా! మనిషి సంగతి నాకు మహ బాగా తెలుసు. వాడు పరిసరాల్లో పోగేసే చెత్తాచెదారాన్ని ఏదో వంకతో మన జంతుజాలాలు హరాయించకపోతే ఈపా టికి భూగోళం... అదిగో- ఆ గ్రేటర్ హైదరాబాద్ మున్సిపా లిటీ చెత్తకుండీ మాదిరి అయిపోయుండేది.. ఈ లోకంలోనే మనిషికి నరకం కనపడి ఉండేది అంది వరాహం.

'వాడితో మనకింక కుదరదు గానీ, జంతుజాలం నిర్భయంగా జీవించడానికి

మనుషుల బెడదలేని ప్రశాంతవనం కావాలని జంతువుల హక్కుల దినోత్సవ

సందర్భంగా తీర్మానం చేద్దాం' అంది సింహం.

అన్ని జంతువులూ చప్పట్లు కొట్టాయి. 

కర్లపాలెం హనుమంతరావు

( ఈనాడు - ప్రచురితం - 10/12/2009 )