... బతుకంతా ... దేశానిది - ఈనాడు - సంపాదకీయం

 

ఈనాడు - సంపాదకీయం

... బతుకంతా .. . దేశానిది ! 

కర్లపాలెం హనుమంతరావు 

( ఈనాడు - సంపాదకీయం - 12 - 04 2009 ) 

దుర్మార్గులైన పాలకులను పుట్టిస్తున్నాడని బ్రహ్మదేవుడిమీద ధూర్జటి మహాకవికి ఒకసారి చాలా కోపం వచ్చింది. సృష్టికర్తను తూలనాడటం తప్పేగాని, తనకది తప్పడం లేదంటూ నిరసన ప్రకటించాడు. 'ఈ లోకంలో ఆయన విద్వాంసులను ఎందుకు సృష్టించాలి? పోనీ బుద్ధి వైభవంతో పుట్టించాడు సరే, వారికి ఆకలిదప్పుల బాధను ఎందుకు అంటగట్టాలి? వారి ఇబ్బందులను ఈతిబాధలను పట్టించుకోని ప్రభు వులను, తమ రాజ్యంలోని విద్వాంసులను సజ్జనులను నిర్లక్ష్యంచేసే దుర్మార్గులైన పరిపాలకులను పనిగట్టుకుని మరీ పుట్టించవలసిన అవసరం ప్రజాపతికి ఎందుకు కలిగింది? ' అని ధూర్జటి నిలదీశాడు. పుట్టి నప్పుడు ఉత్తములుగా పుట్టి, నడమంత్రపు సిరి మూలంగా నరులు చెడిపోయినట్లు- అధికారం దక్కగానే చాలామంది ఎందుకు పతనమ వుతున్నారనీ వితర్కించాడు. 'కృపయు ధర్మంబు ఆభిజాత్యము విద్యా జాతక్షమ సత్యభాషణము విద్వన్మిత్ర సంరక్షణయున్ సౌజన్యంబు కృతంబు నెరుంగుటయున్ విశ్వాసంబు...' అంటూ సజ్జనగుణ పరంపరను ఏకరువు పెట్టాడు. ఇలాంటి సద్గుణాలు మొదట్లో ఉండవచ్చు. సముద్రుణ్ని చేరిన తీయని నదీజలాలు తమ మాధుర్య లక్షణాలను పోగొట్టుకున్నట్లుగా అధికారం దగ్గరయ్యేసరికి మంచివాళ్లూ చెడిపోతు న్నారని మధనపడ్డాడు. ఆ మధనంలో ఒక సత్యం స్పురించింది. పాలకుల ధనవ్యామోహమే ఈ దుస్థితికి ముఖ్య కారణంగా తోచింది. రాజు అర్థాతురుడైనచో ఎచట ధర్మంబుండు? ఏ రీతి నానాజాతి క్రియలు ఏర్పడున్' గుణము మాన్యశ్రేణికి ఎట్లు అబ్బు? అని కల వరపడ్డాడు. అలా అని రాజులను ఆశ్రయించడం ధూర్జటికి తప్పలేదు.

సరిగ్గా ఇవాళ ప్రజల పరిస్థితీ అంతే. వ్యక్తుల్లో మంచి గుణాలు, మాటల్లోంచి తొంగిచూసిన ఆదర్శాలు నమ్మి, వారిని ఎన్నుకుని ప్రజలు అందలాలెక్కిస్తారు. అధికారం రుచి మరిగిన తరువాత వారిలో చాలా మంది దుర్మార్గులుగా మారిపోతారు. దానివల్ల విద్వాంసులు నిర్లక్ష్యానికి గురి అవుతారు. ప్రజాపాలన పెడదారి పడుతుంది. ప్రజలు తీవ్రంగా నష్టపోతారు. అలా రాజ్యంలో ప్రగతి కుంటువడినప్పుడు, పరిపాలన దారి తప్పినప్పుడు విద్వాంసులు నిర్వహించే పాత్ర అమోఘమై నది. వారు రాజుకు మార్గదర్శకత్వం వహిస్తారు. రాజ్యానికి మేలు జరి గేలా చూస్తారు. ప్రజల పక్షాన నిలుస్తారు. ప్రభువులను నిలదీస్తారు. ఈ పాత్రను పురాణకాలంలో రుషులు నిర్వహించేవారు. ప్రజాస్వామ్యయుగంలో ఈ బాధ్యత మేధావులది! విద్వాంసుల విష యంలో ఏ కాలంలో అయినా పరిపాలకులు గౌరవాన్ని పాటించవల సిందే! విద్వాంసులు విడిచిన రాజ్యంలో నీతి, ధర్మం నశిస్తాయనీ, దేశం చెడిపోతుందనీ హితోపదేశం చెబుతుంది. రోగానికి సేవించే ఔషధం చేదుగా ఉన్నా- గుణం కలగాలంటే దాన్ని సేవించక తప్పదు. అలాగే విద్వాంసులు బోధించే అంశాలు రుచించకపోయినా వాటిని వినక తప్పదు. ఆచరించకా తప్పదు. విదురుడు చెప్పే మాటలు ధృత రాష్ట్రుడికి నచ్చేవికావు. అయినా వినక తప్పలేదు. ఎందుకంటే అవి సూనృత వాక్యాలు కనుక అన్నీ విన్నాక ఆయన వాటిని ఆచరణలో పెట్టకపోయేసరికి చివరికి ఏ గతి పట్టిందో భారతం వివరించింది. విశ్వామిత్రుడు రాజుగా ఉన్నప్పుడు ఆయనకు హితం బోధించవలసిన అగత్యం బ్రహ్మర్షి అయిన వసిష్ఠుడికి ఏర్పడింది. విశ్వామిత్రుడు

రాష్ట్రుడికి నచ్చేవికావు . విశ్వామిత్రుడు చిన్నాడు కాదు.  వసిష్ఠుడికి ఎదురు తిరిగాడు. యుద్ధం ప్రకటించాడు. ఒక్క రుషి చేతిలో విశ్వామిత్రుడి సమస్త సైన్యమూ సర్వనాశనమైపో యింది. విద్వాంసుడి బలం ముందు రాజు నిలవలేడని వసిష్ఠుడు ఘంటాపథంగా రుజువు చేశాడు. పాలకుడు అవివేకియై తమ సూచనలను పెడచెవిన పెడుతుంటే ఇక ఆ రాజ్యంతో విద్వాంసులకు పని ఏముందని భోజరాజీయం ప్రశ్నించింది.

మేధావుల పాత్ర ఎలాంటిదో తెలుసుకోవాలంటే 1975 ఆత్యయిక స్థితిలో జయప్రకాశ్ నారాయణ్ చేపట్టిన ప్రజాస్వామ్య పరిరక్షణ ఉద్య మాన్ని గుర్తు చేసుకోవాలి. పుటక నీది చావు నీది బ్రతుకంతా దేశా నిది' అంటూ ఆయనకు కవి కాళోజీ నివాళులర్పించారు. మేధావులు బతుకు దేశానిది! ఈ విషయాన్ని విస్మరించడంవల్లనే దేశానికి దుర్గతిపడుతోంది. ప్రజల పక్షాన నిలిచి పాలకులను నిలదీయడమే కాదు, ప్రలోభాలకు లోనయ్యే ప్రజలను సంస్కరించవలసిన అవసరం కూడా మేధావులకు ఉంది. అలాగే, దుర్మార్గులను గద్దె దించే విషయంలో ప్రజలు చూపించే కసిని - సన్మార్గులను ఎక్కించేటప్పుడు తీసుకోవలసిన జాగ్రత్తగా మలిచే బాధ్యత ముమ్మాటికీ మేధావులదే! 'ఓట్ల డబ్బాకు గర్భస్రావం జరుగుతుంది. ప్రజాస్వామ్య శిశువు ప్రసవం ఎన్నడూ జర గదు' అని శేషేంద్ర చింతించడానికి కారణం మేధావుల అలసత్వమే! ప్రజలపట్లే కాదు, ఓటింగ్ పట్లా  మేధావులు నిర్లిప్తత పాటించడం పరిపాటి అయింది. 'మంచి పౌరులు, మేధావులు ఓటు విషయంలో చూపించే నిర్లక్ష్యం మూలంగా ఒకోసారి చెడ్డ నాయకులు విజయాలు సాధిస్తారు' అనేది ఒక అంచనా. ఒక తారక మేల్కాంచెను... ఒక వీరుడు కనువిచ్చెను... ఒక మెళుకువ... ఒక్క వెలుగు... నవ జగతీ యువనేతలు భవిష్యత్తుకధినేతలు మహాక్రాంతి... మహాక్రాంతి... ' అంటూ సోమసుందర్ ఝళిపించిన 'వజ్రాయుధం' మెరుపు వెలుగుల్లో తళుక్కున మెరిసే భావి నేతలను మేధావులు గుర్తుపట్టాలి;  భుజం తట్టాలి..  సానపట్టాలి. నవభారత నిర్మాణానికి గణనీయమైన పాత్ర పోషించేందుకై నడుం కట్టాలి..  మనసు పెట్టాలి..  'మడి' కట్టాలి. మరో వైపు ప్రజలను జాగృతం చేసేందుకు కృషిచేయాలి. వారికీ వీరికీ మధ్య వారధులై నిలవాలి .. సారథులై నడపాలి..  సమరంలో గెలవాలి. ' నదులు కనే కలలు ఫలిస్తాయి పొలాల్లో... కవులు కనే కలలు ఫలిస్తాయి. మనుషుల్లో' అన్నారు శేషేంద్ర. మేధావుల కలలు ఫలించాలి. దేశంలో! అవును! ధనాన్ని కాదు జనాన్ని గెలిపించాలి. జనం గెలవాలి మేధావుల సాయంతో!

- కర్లపాలెం హనుమంతరావు 

( ఈనాడు - సంపాదకీయం - 12 - 04 2009 )