ఈనాడు ; వ్యంగ్యం పండుగ వైరాగ్యం ( ఈనాడు - 14 - 01.2011 )

 

ఈనాడు ; వ్యంగ్యం 

పండుగ వైరాగ్యం 

( ఈనాడు - 14 - 01.2011 ) 

'పండక్కి పిల్లలకు పిండివంటలు చేసిపెడదామని బజారులో సరకుల కోసమెళ్ళిన పెద్దాయన కిరాణా ధరలు విని ధడాలని దుకాణం ముందే కుప్పకూలిపోయాడట పాపం... విన్నావా అబ్బాయ్? '

' పో  బాబాయ్! పండగ రోజుల్లోనూ నువ్విలా వెటకారాలాడటం ఏ బాగాలేదు. ఈ గడ్డమీద పుట్టడానికి ఎన్ని జన్మల్లోనో పుణ్యం చేసుకుని ఉండాలని ఒబామానుంచి జియబావో దాకా అందరూ పొగిడిపోతే ప్రతిపక్షాలకు నకలుగా  ఏవేవో వంకలు పెడుతున్నావ్"

''మరే! ఆ మేరా భారత్ మహాన్' అంటున్న బ్యాచిని  ఒక్కపూట వరదలో మునిగిన పేదోడి  పూరిగుడిసె పైకప్పు ఎక్కించి, పులిహోర పొట్లాలు అందకుండా చూడాలి. అప్పుడుగాని తెలిసిరాదు. పండుగనాడు పిల్లల నోరు తీపిచెయ్యలేని పాడుబతుపోయింది. ఎరువుల సబ్సిడీ మళ్ళీ తగ్గించేశారు. వర్షాలు వచ్చి ఊడ్చుకెళ్లినా, పాత కరవు నష్టపరిహారం అయినా చేతికి అందలేదు. గాదెలు నిండకపోతే మానె తడిసిన ధాన్యాలైనా  కొనే నాథుడు కరవయ్యాడు. ఏం చూసి, చేసుకోవాలి రైతాంగం  పెద్ద పండుగ? ' 

' హు.. .. ' 

' ఏంటా మూలుగుళ్లు ? నేరాల పట్టిక ఏమన్నా తగ్గుముఖం పట్టిందా అంటే అదీ లేదు. అవే కుంభకోణాలు, అఘాయిత్యాలు, హత్యలు, అత్యాచారాలూను ! పెద్దపెద్ద నేరాల సంగతి పక్కన పెట్టు!  బస్టాండుల్లో గొలుసులు లాగే కేసులకూ విరామం లేదు. చదువుకని బస్తీకెళ్ళిన కొడుకు ఏ కేసులో ఇరుక్కుంటాడో, ఎదిగిన ఆడబిడ్డ మీద ఏ క్షణాన ఏ బడుద్దాయ్ దాడి చేస్తాడో, ఏ క్షణాన ఏ పాడు జబ్బు ఇంటిల్లపాదినీ మంచమెక్కిస్తుందో, ఏ సెజ్జు రాత్రికి రాత్రే పుట్టుకొచ్చి కొంపాగోడును కొండచిలువలా మింగేస్తుందోనని అనుక్షణం దిగాలుపడుతూ పడుండేవారికి ఇంకేం పండుగ రోజులురా ఇవి? పండగ శోభంటే- పాలన వ్యవహారాల్లోని పారదర్శకత మాదిరి బ్రహ్మపదార్థమైపోయింది. ప్రధానినుంచి ప్రధాన ప్రతిపక్షందాకా అందరూ అవినీతిమీద శివ తాండవం చేస్తామని బెదిరించేవారే!  అయినా, లంచం లేకుండా పింఛను కాగితాలైనా అంగుళం ముందుకు కదలని

పరిస్థితుల్లో మార్పు ఏమైనా వచ్చిందా?' 

'పండగకే ఈ రొటీన్ సినిమా కష్టాలకి సంబంధం ఏంటంట ? ఆవు వ్యాసం లాగా  అన్నిటికి ధరల్ని, అవినీతిని ఏకరువు పెడుతున్నావు.  కాబట్టే వినేవాడికి అవి పట్టించుకో వాల్సిన సమస్యలుగా అనిపించటంలేదు... తెలుసా! '

' ఆహా ! అలాగైతే నీకు షాకు తగిలేలా, పండుగ సంద ర్యానికి తగ్గట్లు వాతలు పెట్టాలంటావు ! రావమ్మా మహా లక్ష్మీ రావమ్మా!' అంటూ హరిదాసులాగా అలా ఊరూరా చిడతలు కొట్టుకుంటూ తిరగటమేగానీ- ఆ మహాలక్ష్మి వాటాకు న్యాయంగా దక్కాల్సిన చట్టసభ సీట్ల బిల్లు రాజ్య సభ గడప దాటిరానీయటంలేదు  గదా మనం ! ' అంబపలుకు జగదంబ పలుకు' అంటూ బతిమాలుకుంటున్నామేగానీ హస్తినలో అధిష్టానమ్మ నోటిని మాత్రం తెరిపించలేకుండా  ఉన్నాం. 'అమ్మగారికి దండం పెట్టు, అయ్యగారికి దండం పెట్టూ' అంటూ బూరా ఊదుకునే గంగిరెద్దులవాడికైనా ఓ చింకి చీరో, పాతపంచో  దక్కుతుందేమో గానీ ... మన గౌరవ ప్రజాప్రతినిధుల సన్నాయి నొక్కులకు మాత్రం పది జనపథం'ముంగిట్లో ముసిముసినవ్వులనైనా ముష్టిగా విసిరే దయామములు  లేరు. 'గొప్ప చదువులూ గొప్పనౌకరీ తప్పవు తండ్రీ పండగనాడు' అంటూ ఊదరగొట్టడమే కనిపిస్తోంది గానీ.. వాస్తవానికి పిల్లకాయలకు క్రమంగా ఉపకారవేతనాలు, పనివాళ్ళకు సక్రమంగా

నెలసరి వేతనాలూ అందుతున్నదెక్కడ? ఇంట్లో పిల్లలు సజ్జు పండుగనాడు ' మా అన్నా బండీమీదా వస్తాడూ, మా బావా బస్సుమీదా వస్తాడూ' అంటూ సంబరపడిపోతున్నారే. గానీ నిజానికి ఏ బండి ఏ రాస్తారోకోలో చిక్కడిపోతుందో ఆ  దేవుడికే  తెలియాలి!  బయలుదేరినవారు క్షేమంగా ఇంటికి చేరడమే పర్వదినమై పోయిందిప్పుడు. కోటిలాభాలు కలగాలన్న కాశీ పండితుడి నోటివాక్యం నిజంగా ఫలించాలంటే ముక్కోటి దేవతలూ ఏకాభిప్రాయా నికి రావాల్సిన రోజులొచ్చాయి నాయనా! ఢిల్లీ పెద్దలు చెప్పిన దానికల్లా తలాడించుకొచ్చే డూడూ బసవ న్నలు దండిగా మనకు ఉన్నంతకాలం నిజమైన పండుగ జరుపుకొనేది నీలాంటి నాలాంటి తెల్లకార్డుల వాళ్ళు కాదురా అమాయకుడా! ' పండుగ దుస్తులు, పప్పు దప్పళాలు మెండుగ తీయని మిఠాయి పొట్లాల్' అంటూ ప్రాసలు తీస్తూ పాడుకోవడానికి హుషారుగానే ఉండొచ్చేమో గానీ - కనబడ్డ  ప్రతి వస్తువుపైనా 'వ్యాట్' వేటు వేయకుండా ఉండలేని పాలనలో, ఇదిగో ఇందాక నేను చెప్పానే... ఏ అపరాల దుకాణం ముందో గుట్టుచప్పుడు కాకుండా గుటుక్కు మనడంకన్నా పెద్దపండుగ ఇంకేమీ ఉండబోదురా పిచ్చినాయనా!  చలి కాచుకునేందుకు  భోగిమంటలే అక్కర్లేదిప్పుడు. ఏ రాజా, నాడియా వంట దొరలు, దొరసానం పేర్లు  తలచుకుం టేచాలు బుర్రలా  వేడెక్కడం ఖాయం.  నేతలు పోటీలుపడి వేస్తున్న పిల్లిమొగ్గల ముందు మన ఆడపిల్లలు వేస్తున్న ముగ్గులు బలాదూర్.  సర్కార్ల మనుగడే గాలిపటాల మాది రిగా మారినప్పుడు మళ్ళీ వేరే పతంగుల పండుగ మనం జరుపుకోవడం దండగ కదా! అట్లా బజారు దాకా  వెళ్లి చూడు. దీక్షాశిబిరాలు- బొమ్మల కొలువును మించి సందడిగా ఉన్నా యబ్బాయ్! జనాలకన్నా పోలీసులే ఎక్కువ తిరుగుతున్న నగరంలో ప్రస్తుతానికి ఇంటిపట్టునే ఉండి 'శుభ సంక్రాంతి' సంక్షిప్త సందేశాలు సెల్ఫోన్లో చదువుకోవటాన్ని మించిన పెద్ద పండుగ మరోటి లేనేలేదు...!' 

- కర్లపాలెం హనుమంతరావు

14 - 01 - 2011