ఈనాడు - గల్పిక- హాస్యం - వ్యంగ్యం ఓటేసి చెబుతాను రచన-కర్లపాలెం హమమంతరావు ( ఈనాడు - ప్రచురితం - 26 - 04 - 2009 )

ఈనాడు - గల్పిక- హాస్యం - వ్యంగ్యం 

ఓటేసి చెబుతాను

రచన-కర్లపాలెం హమమంతరావు 

( ఈనాడు - ప్రచురితం - 26 - 04 - 2009 ) 

గదిలో ఎవరూ లేరు... కవి, కాగితమూ కలమూ తప్ప.. '

' మన స్వాతంత్య్రం గొంగళి వయస్సు అరవై రెండేళ్లు.  శిశువుకు దక్కని స్తన్యంలాగా ప్రవహిస్తున్నాయి నీళ్లు.  బద్దలైన గుండెల్లాగా బీటలు వేశాయి పొలాలు. ఎన్నికలొస్తే చాలు ఎన్నెన్ని కొత్త కొత్త నినాదాలు ! ఉపన్యాసాలూ .. ఉపవాసాలూ .. కండువాలూ .. కేకలూ! అంతా గజీతగాళ్లే ! అయినా  అరగజం పురోగమనం లేదు' ... కవి రాసుకుపోతున్నాడు కసి  కసిగా . 

నవ్వు .. 

ఆ అలికిడికి కలం ఆగింది . తలెత్తి చూశాడు కవి. ఎదురుగా అద్దంలో కవి ప్రతిబింబం.

'ఎవరు నువ్వు? ' అడిగాడు  కవి 

'పాత సినిమాలలో  కథానాయకపాత్ర బాధపడుతుంటే బైటకొచ్చి నిలబడుతుందే, అలాంటి నీ అంతరాత్మను' అని ఇప్పటి సీఎంలాగా చప్పుడు లేని నవ్వు మళ్లీ నవ్వింది అంతరాత్మ. 

'నాతో నీకేంపని? నేను రమ్మని పిలవలేదే!  నా మానాన 'నన్ను రాసుకోనీయ్! ' గసిరాడు కవి విసుగ్గా. 

' నువ్వు పిలిస్తేనే రావటానికి నువ్వేమన్నా నా ఢిల్లీ హైకమాండువా? నువ్విలా వూరికే లోలోపల ఉడు క్కుంటుంటే ఆ ఉక్కపోతకు తట్టుకోలేక బైటికొచ్చాను. ఒక్కముక్క చెబుతాను. విను!'

' చెప్పింది వినకపోతే చెప్పులు విసిరే కాలం కదా! చెప్పు! ' 

' కవి అంటే ఎవరు? కట్టేసి వినిపించేవాడా?' 

' కాదు. కష్టజీవికి ముందూ వెనకా ఉండేవాడని అన్నాడు యుగకవి శ్రీశ్రీ' 

' కదా! కదిలేది కదిలించేది . . మారేది  మార్పించేది.. పెను నిద్దర వదిలించేది..  మునుముందుకు సాగించేది.. పరిపూర్ణపు  బ్రతుకిచ్చేది..  కావాలోయ్ నవకవనానికి | అని అన్నది  కూడా ఆయనేకదా మరి ? నవీన విశ్వవిద్యాలయాల్లో పురాణ పఠనం మాదిరి నీ ఈ రాతలేమిటి? అన్యాపదేశంగానో, అర్ధాంతరన్యాసంగానో నీ సొంత కోపాలేవిటో పెట్టుకుని రాజకీయనేతల్లాగా ఎవరెవరినో ఇందులో ఇరికించాలనుకోవడం భావ్యమా? బొమ్మలాంతరు పేరు విన్నాదా? ' 

' గ్యాస్ స్టౌ తెలుసు గానీ- ఈ బొమ్మలాంతరు తెలీదు.' 

'గ్యాస్ ని మరిచిపోరు గదా మీ కవులు ? పేకాటలో ముందు పంచిన ఓకుల్లో  పొడిముక్కలు. . తప్ప ఒక్క బొమ్మయినా  లేక పోతే ' బొమ్మ లాంతరు' అంటారు. ఆ ముక్కలు చెల్లవు. మళ్ళీ ఆడాలి. అట్లాగే ఎన్ని కల్లో గెలిచినవాళ్ళు అంతా పొడిముక్కల్లాంటి  వాళ్ళే అయితే, మళ్లీ బొమ్మల కోసం ఆడేందుకు అయిదేళ్ళకోసారి అవకాశం వస్తుంది గదా! మరిదేనికోసమీ అలజడి, ఆందోళన కళారవీ.. పవీ.. కవీ! ' 

కవి నిశబ్దంతో వక్త అంతరాత్మ ముదిరి ప్రవక్తగా మారింది . 

' నీ చిన్నతనం గుర్తుందా? మీ దొడ్డమ్మ   పొంగరాలు   పోస్తూ ఉంటే నువ్వు ఆమె దగ్గర కూర్చుని తినేందుకు  ధ్యానం చేస్తూ ఉండేవాడివి.  కొన్ని చెడిపోయేవి. కొన్ని రుచిగా ఉండేవి. ఎప్పు డోగాని అసలైన పొంగరం  కుదిరేది కాదు . సిసలైన నాయకుడు రావటం కూడా అసలైన పొంగరం కుదరడం లాంటిదే. మంచి పొంగరం రాలేదని నువ్వు పొయ్యి దగ్గర నుంచీ లేచిపోయావా? లేదు కదా? అట్లాగే మంచి నాయకుడు వచ్చిన దాకా ఓపికగా ఉండాలా .. వద్దా ? కెరటాలు ఆగినదాకా సముద్రంలో స్నానం చేయనంటే నష్టం ఎవరికి?  ఈత నేర్చుకోవటానికి దుస్సాహసమొకటే మార్గం . చెట్టును చూడు .. నిశ్చలంగా ఉన్నట్లే ఉంటుంది. వేళ్ళతో బండరాళ్ళను బద్దలు చేసుకుని పెరుగుతుంది. మనిషీ  చెట్టు మల్లేనే  ఉండాలి. బండలాగా పడి ఉండద్దని  నీలాంటివాడు చెప్పొద్దా?' 

కవికి మండింది . ఎదురు దాడికి దిగాడు.

'లోపల కూర్చుని నా లోపాలు చూపటంకాదు. బైటికి వెళ్ళి చూడు!  విలువలను ఎలా పాతరేస్తున్నారో తెలుస్తుంది.' 

' మంచిదేగా! వానపడితే బోలెడంత పంట! ' 

' ఎన్నికలు జనాలకు టైఫాయిడ్ జ్వరంలాగా పట్టు కొన్నాయి' 

' శుభం ! జ్వరం తగ్గితే కొత్త శక్తి వస్తుంది. ఇది సంధి కాలం అని సరిపెట్టుకోరాదా మేధావీ ! ' 

'అంటే పార్టీలు అధికారం  కోసం సంధి చేసుకొనే కాలమనా!

'అదే. ఆ వెటకారమే వద్దనేది! సమాజం దారులు మారే కూడలి దగ్గర నిలబడిందని నా అర్ధం ! దిక్కూ మొక్కూలేని వాడు కూడా దిగ్గజాల్లాంటి వాళ్ళకు దిక్కయి వాళ్లకు మొక్కే కాలం ఇది కవీ! అతి సామాన్యుడిలో కూడా కదలిక వచ్చే సమయం సుమా!'

'ఔను నిజం ! నీవన్నది నిజం .. నిజం ! అన్ని సభలకూ ఆ సామాన్యుడినే కదా కదిలిస్తున్నది ! 

కవి ఆలోచనలో పడ్డాడు.

అదనుచూసి అంతరాత్మ చెలరేగిపోయిందీ సారి మరింతగా.

కాలం అమూల్యమైన ఆస్తి. వినియోగానికి మనిషికి అమమతి పరిమితమే  . దిగాలుపడుతూ కూర్చుంటే తరవాతి తరాల తలరాత కూడా మారదు. ఓటు వేయటం రెండో ఎక్క మంత తేలికే కానీ, మంచివాడిని ఎంచుకొని వేయటం రెండో ప్రపంచయుద్ధమంత కష్టం. సెలవురోజైనా ' రజనీ' సినిమా విడుదలవుతున్నా, ఎన్ని పనులున్నా ఎన్నికల రోజున ఓ గంట క్యూలో నిలబడి ఓటు వేయి  ! ' అని రాయి! అదీ కవిగా నీధర్మం!  కవీ ఈ విసుర్లు విసరటం ఇక మానేయి' అంది అంతరాత్మ.

కవి కాగితం చించి  కొత్త కాగితం అందుకొన్నాడు.  పౌరుడిగా నా బాధ్యత నెరవేరుస్తానని ఒట్టేసి చెప్పను . ఓటేసి చెబుతాను' అన్నాడు. 

అంతరాత్మ సంతోషంగా  స్వస్థలం కవి గుండెల్లోకి వెళ్లి పోయింది. 

ప్రజాస్వామ్యం కథ కొత్త దిశకు మళ్లనున్నది. 

రచన-కర్లపాలెం హమమంతరావు 

( ఈనాడు - ప్రచురితం - 26 - 04 - 2009 )