ఈనాడు - గల్పిక- వ్యంగ్యం జైలు తల్లీ ! నీకు జేజేలు! రచన - కర్లపాలెం హనుమంతరావు ( ఈనాడు - గల్పిక- వ్యంగ్యం - 26-09-2002 ప్రచురితం)

 

ఈనాడు - గల్పిక- వ్యంగ్యం

జైలు తల్లీ ! నీకు జేజేలు! 

రచన - కర్లపాలెం హనుమంతరావు 

( ఈనాడు - గల్పిక- వ్యంగ్యం - 26-09-2002 ప్రచురితం) 

'ప్రపంచమొక నాటకరంగం. మనమంతా అందులోని పాత్రధారులం' అన్నాడు షేక్స్పియరు . 

' నాటకాలు రాసే టాయన కనక ఆయన అలాగన్నాడు కానీ...

నిజానికి.. ప్రపంచమొక బందిఖానా.. అందులోని బందీలం మనమందరం' అనాలని చంద్రస్వామిలాంటి సాధువొకాయన

సెలవిచ్చిన మాటే నిజం.' 

'ఎలా?'

'నాటి యాదవకుల సంజాతుడయిన శ్రీ కృష్ణ పరమాత్ముని జన్మవృత్తాంతం మొదలు, నేటి లల్లూ ప్రసాదు యాదవుగారి ఉదంతం వరకూ ఈ నిజం క్షణం క్షణం రుజువవుతూనే ఉంది కదా!'

' గ్రహచారం బావోలేక లాలూగారికి అలా కారాగారమయిందిగానీ, గడ్డి తినే ప్రతివాడికి చిప్పకూడే గతి అవుతుందా ఏందీ?' 

'చిప్పకూడు అనొద్దు. . ప్లీజ్! చిప్స్... కూడు అను . బిర్యానీ పొట్లాలూ, కోడి కూర పేకెట్లు మధ్య మధ్య మద్యం బొట్లు... ఆ భోగం అత్తారింటిని నిజంగానే గుర్తుకు తెస్తుంది గురూ!'

'బొక్కలో ఉంటే మాత్రం... బొక్కకూడ దని రూలుందా! తాలిబాను యుద్ధ ఖైదీ లను క్యూబా కేంపుల్లో కుళ్ళబొడుస్తున్నారని మానవ సంఘాల వాళ్లు గోల పెడుతున్నవేళ. ఆ అమెరికన్లు మనల్ని చూసి కొద్దిగా నైనా నేర్చుకోవాల్సింది ఉంది' 

' ఏంటది?'

'ఖైదీలనయినా మామూలు మానవులుగా చూడాలని మానవహక్కుల సంఘాల వాళ్లు మొత్తుకొంటుంటే కనీసం కొద్దిమంది ఖైదీలనయినా మనం మానవులుగా ఏం ఏకంగా దేవుళ్లకన్నా ఎక్కువగా చూసుకుంటూ, అన్నింటిలోనూ దైవాన్ని చూసే మన అతి విశాల హృదయ సంప్రదాయాన్ని సగర్వంగా కొనసాగిస్తున్నాం చూడూ.. అదీ' 

' అందుకనే కాబోలు చాలామందిప్పుడు బైట కన్నా జైలు పదిలమని కటకటాల పూచలు పట్టుకు వేలాడుతున్నది! ' 

ఫో. . ఫో వేల పొమ్మికన్' అని విదిలించి కొడు తున్నా వినడంలేదుట  '

'మరి సెల్లో  ఉన్న సేష్టీ , సెక్యూరిటీ బైట అంత ఫ్రీగా దొరకద్దూ! సెటిల్ మెంట్లూ పథకాలూ, వ్యూహరచనలూ... అన్నీ పద్ధతి ప్రకారం సజావుగా సాగే చోటిదేనని చాలామంది కనిపెట్టేశారు. అందుకే డిమాండు చేసి మరీ రిమాండులోకొస్తు న్నారు. సెల్ లైపు నడ్డుపెట్టి, సెల్ఫోన్లాపలేరు. ఖైదంటే విలాసమే గానీ, షేమే లేదని అందరికీ తెలిసింది  లాగుంది స్వామీ!'

ఇలాంటి విషయాలేవీ తెలియకనే . . పాపం, ముందు తరం వాళ్లు ప్రిజననగానే బెదిరిపోయి, మాయరోగాలు మీదకు తెచ్చు కుని, ఆసుపత్రుల్లో అనారోగ్య బాధలు నటించలేక అల్లాడేవాళ్లు . 

కడుపారా తిన లేక, కంటినిండా కునుకులేక, మనసారా మాట్లాడలేక, కరవుతీరా తిరగలేక... మంచాలకే కట్టిపడేసుంచే ఆసుపత్రులు వాళ్ల పాలిట జైళ్లే! ... ఈ తరం చెరల భోగం  వాళ్లకేవీ తెలీవు పాపం! ' 

' ఇంకా ముందుతరం నాయకులు మరీ అమాయకులు.  నెల్సన్ మండేలా సగం జీవితం జైల్లోనే సైలెంట్ గా  గడిపేశారు. గాంధీకయితే జైలయినా బయలయినా ఒకటేననుకో!  జైలనంగానే అన్నీ కట్టి పెట్టి పుస్తకాల దొంతర్లు ముందు పెట్టుకుని, చదువుకుంటూనో, రాసుకుంటూనో, గోడల మీద గోళ్లతో గీసుకుంటూనో ఏళ్ల తరబడి అలా కాలక్షేపం చేసేవాళ్లు పాపం ఆనాటి అమాయక నాయకులు . 

'జైల్లో పడేస్తేనేగాని ఇండియాను డిస్క వర్ చేయలేకపోయారు జవహర్లాల్ నెహ్రూ.  జైల్లో ఉంటూనే అంతా 'కవర్ చేయగల పవర్ సంపాదించుకుంటున్నాడు ఎంత  ఛోటా నాయకుడైనా ఈ నాడు ...' 

' ఇంకా ముందు తరం భక్తుడొకాయనైతే మంది సొమ్ము 'గుడికోసం ఖర్చు పెట్టి  ఖైదు పాలయింతరువాతనేగా, అలా ' ఎందు కయ్యా ఉంచినావూ.... బందిఖానాలో ' అని అల్లాడుతూ  గొప్ప గొప్ప సంకీర్త నలకీ అల్లేసిందీ  !'

' అందుకేనా.. ఇప్పుడు కొంతమంది 'గుడి' సొమ్మును మందికి మళ్ళీద్దామని ముందుగా తమ వాటా కింద అందినంత జమ చేసుకునేదీ !'

'దమ్ముంటే వాళ్లను పట్టుకోవాలి ముందు' 

'పడక్కుర్చీలో చేరగిలబడి  అలా ప్రపంచాన్నూరికే  పడతిడితే ఊరుకోం ! '  అని వార్నింగిచ్చాడీ మధ్యనే ఓ పెద్దాఫీసరు  . 

పిస్తోళ్లు బొడ్డులో దోపుకుని పట్టపగలే బహిరంగంగా  తిరిగే గూండాగాళ్లని, తుప్పు తుపాకుల్తో ఎట్లా అదుపు చేస్తారు ఎంత పేరు గొప్ప పోలీసులైతే మాత్రం ? కనిస్టేబులో  మనలాంటి మానవుడే గదా! ' 

' నిజం .  ఈ అస్తవ్యస్త వ్యవస్థలో వాళ్ల అవస్థలు వాళ్లవి. 

' సమాజహితం... జనాభిమతం' అని ఎన్నన్నా గన్లు పట్టుకునే వాళ్ల స్లోగన్లు స్లోగా నైనా  జనం మీద పనిచేయవు . 

సహకారం కోరి మైత్రీసంఘాలని పేరేదో పెట్టినా సహజంగానే అవి దళారుల మయమనే జనం నమ్మకం.  పరువు పైరవీకారుల పరం చేసి ఇప్పుడు బీరాలు పలికినా ఫలం శూన్యం . ' 

' ఈ - కాప్స్' కేప్షన్తో ఈ మధ్య కంప్యూటర్ పద్ధతోటి  మొదలు పెట్టారు . కానీ, కాట్రిడ్జిలు కొనటా నిక్కూడా కాపర్సుకు కరువు! ' 

' పాపం, ప్రపంచం మొత్తంలోనే అతి పెద్ద బీద రక్షకభట వర్గం మన భారతదేశానిదే. ' 

' ఆ ఆపప్రధ పోగొట్టుకొనేందుకేనా ఏకంగా ఒక ప్రయివేట్ బ్యాంకునే మెయింటైన్ చెయ్యగల సూపర్నింట్లను తయారు చేస్తున్నారిప్పుడు .. అందుకే ' 

' ప్రయివేటుగా ఎన్ని కోట్లున్నా. . పబ్లిగ్గా వాడుకొనే వెసులుబాటు ఉండదు కదా!'

ఠాణాల్లో  న్యాయానికి రఠికాణాలేదని పేపర్ల వాళ్లు రాసి రంపాక పెట్టేస్తోంటే, ప్రయివేటుగానన్నా ఇన్ఫార్మర్లని పెట్టుకుని రీఫార్మస్ తెద్దామని పాపం పోలీసులు తెగ ఆయాసపడిపోతున్నారు. అదర్థం చేసుకోరూ!   'ఉన్నవాడికి దండాలు, లేనివాడికి అరదండాలు' అంటూ మళ్ళీ దండయాత్రలు మాతం  మొదలు ! 

'పేపర్లో రాసింది నమ్మకపోతే సొంతంగా  పోయి ' ఆసాంతం ' చెకింగ్ ' చేసుకోవచ్చుగా? '

'అమ్మో! ఖైదీల తాలూకు  చెక్ - ఇన్ లు తప్ప.. తతిమ్మా  చెకింగ్ లేవీ సహించేది లేదని  ఒక కనిపించని మూడా సింహం గాండ్రించిం తరువాత కూడానా!  నువు కూడా పొరపడి.. త్వరపడి  అటు వేపుకు పోకు సుమా! రెండు రెళ్లు నాలుగని కుండ బద్దలేసే మొండితనం నీది .   ఏ గూండా యాక్టు కిందో నిన్ను బుక్కు చేసి  బొక్కలు తొక్కేస్తే .. ' 

' బైలుక్కూడా ట్రై చెయ్యను . బైట బోలెడన్ని బాకీలు! కాబూలీల నుంచి కామన్ మేనుకు రక్షణ  ప్రస్తుతానికి కారాగారాలే! కాబట్టి ' జైలు తల్లీ నీకు జైజైలు' అని ఇంచక్క పాడుకుంటూ కులాసాగా చక్కీ పిసుక్కుంటూ కాలం గడిపేస్తానూ! ' 

- కర్లపాలెం హనుమంతరావు 

( ఈనాడు - గల్పిక- వ్యంగ్యం - 26-09-2002 ప్రచురితం)