నమస్కారం! కర్లపాలెం హనుమంత రావు- ఈనాడు ప్రచురితం

 

'నమస్తే'లోనే ఉంది సమస్తం.

నమస్తే అంటే న మస్తే..  తల లేని తంతు అని  వెటకారం కొంతమందికి. బతకడం చేత రాక చేతుల్ని తిట్టిపోయడమే అదంతా. జాలి పడాలి ఆ సంతుని చూసి .. అంతే!

తెల్లారగట్టే వచ్చి తలగడ దగ్గర ఎంత పడిగాపులు పడ్డా దుర్యోధనుడికి రవంత కార్యలాభం కలగింది కాదు భారతంలో. అదే  ఆలస్యంగా వచ్చీ రాగానే సమస్కార రాగాలతో ఇచ్చకాలు పోయిన అర్జునుడికో! ఊహించని మోతాదులో కృష్ణానుగ్రహ లాభం. నిండు సభామధ్యంలో ఇలా దండకం  అందుకోగానే  ఆయనగారి అర్థాంగిగారికీ  పరమాత్ముడి అండ దొరికింది. దండాలా మజాకా!

రామాయణంలో మాత్రం! ఎత్తిన రెండు చేతులూ దించకుండా జీవితాంతం ఒక పట్టున అలా అంజలితో నెట్టుకొచ్చాడు కాబట్టే కోతి జాతిలో పుట్టినా ముక్కోటి దేవతలకైనా  దక్కని అపురూప గౌరవం ఆంజనేయుడికి దక్కింది..  చూశారా! ఉన్న ఒక్క తొండంతోనే  చేతనైనంత వరకూ దాసోహపడిపోయి  ఆపదల నుంచి గట్టెక్కింది  గడుసుపిండం గజేంద్రం.

ఆ చాయలో పోయే ఒకానొకప్పుడు మన పక్క రాష్ట్రం పన్నీరు సెల్వం సారూ అమ్మవారి అనుగ్రహం సొమ్ముచేసుకున్నారు. ఆమెగారు సర్కారువారి సత్కార గృహానికి వేంచేసినప్పుడల్లా పన్నీరుగారే ముఖ్యమంత్రి పీఠానికి కుక్కకాపలా గదా! ఆ అధికారలాభానికి   ప్రణామతంత్రం  ప్రధాన కారణం కాదంటే అవుననగలమా!

స్వామివారు కంటబడగానే స్వాభిమానలేవీ పెట్టుకోకుండా 'నమో.. నమః' అంటూ సాష్టాంగ నమస్కారాలు ఆచరించకపోతే ఆనక ఇదిగో ఇప్పుడు చంద్రబాబుకు మల్లే ఘొల్లుమనాలి. యడ్యూరప్ప కథే నమస్కార పురాణాలకు గొప్ప  ఉదాహరణ. 

పది తలకాయలున్నాయి.. ఏం లాభం? ఉన్న రెండు చేతుల్నీ వేళకి సద్వినియోగం చేసుకోవడం రాక   అంత లావు రావణాసురుడూ   రాముడి ముందు  కూలిపోయాడు. హిరణ్యకశిపుడు, హిరణ్యాక్షుళ్ళ పతనానికి  ముఖ్య కారణమూ  ఈ దాసోహ రాజకీయాలు  వంటబట్టక పోవడమే సుమా! రాక్షసులకు  తెలీని నమస్కార రాజకీయం మన రాజకీయ నాయకులు కాచివడబోసారీ కలికాలంలో.

కడుపులో ఎంత కంటు ఐనా ఉండనీయండి.. బైట ఓదార్పుయాత్ర కంటూ బైలుదేరాక   దేవుడిచ్చిన రెండు చేతులూ  అలా గోజుతో అతికించినట్లు కరిపించుకునే ఉన్నాడు మన జగన్ బాబు.  జైలుకెళుతూ వస్తూ కూడా మన  అయన గారి బృందం పడే ఆ పాట్లు  చూస్తూ  ఇంకా  అంజలి మాహాత్మ్యంమీద అం  అపనమ్మకం తగునా?

షడ్రషోపచారాల్లో ముఖ్యమైనది తైత్తరీయం సైతం ప్రస్తావించిందీ  నమస్కార తంత్రం. అయితే దండాలన్నీ ఒకేలా ఉండవు. చంద్రబాబుగారిది  భిన్నమైన శైలి. చేతులకు బదులు వేళ్లను వడుపుగా వాడటం ఆ మాజీ సి.యం వదిలిపెట్టని నియమం. మారిన రాజకీయాలలో ఓటరేం చేస్తాడు.. పాపం! ఎన్నికైన నేత వేళ్ళకు బదులు  గోళ్ళు  చూపించినా అదే  గోల్డెన్ హ్యాండుగా భావించి సర్దుకుపోవడం తప్పించి. 

నేతలకీ నమస్కారాలకీ అసలంత లింకెందుకో తెలుసా? హామీలు, వాగ్దానాలకున్న కాలపరిమితి బెడద నమస్కారానికి  లేదు. నగదు బదిలీ.. రుణమాఫీలకంటే   మూటా ముల్లెలతో పని. నవ్వుతూ నమస్కార్ అనేందుకు ఏ శిస్తు వసూళ్లు లేవు.  ఎన్నికల సంఘం  అదుపూ.. అజమాయిషీ ల్లేకుండా హాయిగా పిక్కల్లో   ఓపికున్నంత వరకు వాడి వదిలేసే సౌకర్యం ఈ చే  జోడింపులో ఉన్నంతగా మరే ప్రజాకర్షక పథకంలోనూ లేదు.

 

ఎన్నికలు ఎప్పుడొచ్చి పడినా మోదీకి కలిసొచే అంశాల్లో ముఖ్యమైనది ఆయన గారి హ్రస్వ నామధేయం పేరులోనే 'నమో' ఉన్న నేత కదా ఆయన! ఓ వంక చెడ తిట్టి పోస్తూనే మరో వంక నుంచి 'నమో..నమో' అంటూ  మోదీ నామస్మరణ చేయక తప్పని సంకట స్థితి.. మమతా బెనర్జీ వంటి ఎంతటి ఎనర్జీ నేతకైనా!  

పబ్లిగ్గా పడ తిట్టిపోసుకున్న అసలు శాల్తీ  కంటబడ్డప్పుడు సంకోచమేంఈ లేకుడా  ఓ 'నమస్తే' ముద్ర.. కల్తీది అయినా ప్రయోగిస్తే చాలు..  సగం చిక్కులు వాటంతటవే తొలగు! ప్రధాని మోదీ ప్రధమ పదవీ ప్రమాణ స్వీకారోత్సవంలో సార్క్ దేశాధిపతులంతా మూకుమ్మడిగా  కలసి వచ్చిసాధించిందేమిటీ?  ఎవరి బాణీలో వాళ్ళో  నమస్కార బాణం సంధించుకోవడం. ఆ తరువాతనే కదా సంధి రాజకీయాలు రసకందాయంలో పడటం!

జపాను పో.. చైనా పో.. అమెరికాతో సహా పోలండ్ వరకు ఏ గడ్డ పై  కాలు పడ్డా .. చేతుల్ని మాత్రమే  నమ్ముకున్నాడు కనకనే మన ప్రధానికిప్పుడు అంత  హవా.మస్కా మార్కు ట్రంపయినా  తప్పించుకోలేని ప్రయోగం నమస్కారానిది. నమో..  ప్రభంజనం  కళ్లారా  చూస్తూ ప్రణామ ప్రయోజనాలపై అనుమానాలు వదలకుంటే.. మిత్రమా తమకో నమస్కారం!

ఆరోగ్యాన్నిచ్చి, అన్ని పనులూ ఇంచక్కా చక్కపెడతాడనే కదా ప్రత్యక్ష నారాయణుడుగా సూర్యభగవానుణ్ణి భావించి 'ఓం..హాం..మిత్రాయ' అంటూ రెండు పూటలా సూర్యనమస్కారాలు ఆచరించేదీ! అర్హతలతో నిమిత్తం లేకుండా  అందలం ఎక్కించి పదిమందిలో మంచి గుర్తింపు తెచ్చే  ప్రణామయోగానికి 'లోకబాంధవ' యోగం కల్పిస్తే తప్పేమిటి? 

అదృష్టం. అరబ్బులాగానో  పుట్టాం కాదు.   ఖర్మ కాలి ఏ ఒసామా లాడెనో  ఎదురైవుంటే బుగ్గకు బుగ్గ రాసుకోవాలి. 'దేవుడా! నన్నీ 'నమస్తే'ల ఖండంలో పుట్టించినందుకు నీకఖండ కోటి నమస్కారాలు! 

నమస్కారమంటే తుస్కారం వద్దు.

ఎవరి బాణీలో వాళ్లని  నమస్కారాలు పెట్టుకోనీయండి.  ప్రజాహితంగా పని చేయకుంటే పెట్టటానికి మన చేతిలోనూ వాటంగా ఉంచుకుందాం  పెద్ద నమస్కారం!

-కర్లపాలెం హనుమంతరావు

(ఈనాడు సంపాదకీయపుట ప్రచురణ)