ఈనాడు - సంపాదకీయం జీవనం ఓ మైత్రీవనం రచన - కర్లపాలెం హనుమంతరావు ( ఈనాడు - సంపాదకీయం - ప్రచురణ తేదీ - 07 -08 -2011 )

 ఈనాడు - సంపాదకీయం

జీవనం ఓ మైత్రీవనం

రచన - కర్లపాలెం హనుమంతరావు

( ఈనాడు - సంపాదకీయం - ప్రచురణ తేదీ - 07 -08 -2011 ) 

 ఈనాడు - సంపాదకీయం 

జీవనం ఓ మైత్రీవనం

రచన - కర్లపాలెం హనుమంతరావు 

( ఈనాడు - సంపాదకీయం - ప్రచురణ తేదీ - 07 -08 -2011 ) 

ప్రకృతి మన వేళ్లమధ్య సందుల్ని ఎందుకు వదిలింది? ఓ శిష్యుడి ఈ సందేహానికి గురువు ఇచ్చిన బదులుకు మించిన మంచి వివరణ స్నేహానికి మరేదీ లేదు. వేళ్లసందులతో మరో వేళ్ల సందులను సంధానించడానికన్నది ఆ జ్ఞాని సమాధానం.  పెద్దలు ప్రవచించిన  సప్త సుగుణాలలో  స్నేహ సౌఖ్యం ప్రముఖమైనది. మనసుతో మనసు, రహస్యంతో రహస్యం, ప్రజ్ఞతో ప్రజ్ఞ క్షీరనీర న్యాయంగా కలగలసి పోవడమే స్నేహం- అని శ్రీసుభాషిత రత్నావళి సూక్తి.  ఆదిశంక రులు ప్రబోధించిన ముక్తిమార్గమూ సజ్జన సాంగత్య సోపాన నిర్మి తమే. లౌకిక పరంగా  చూసుకున్నా మనిషి దుర్భాగ్యాన్ని మాపగలిగే ముఖ్యమైన నాలుగు సాధనాలలో  సన్మిత్ర సాహచర్యం ప్రధానమైదని భర్తృహరి భావన.  మనిషి సంఘజీవి. 'చివరికి మిగిలేది'లో బుచ్చిబాబు తర్కించుకొన్న విధంగా - లోకంతో సంపర్కం లేకుండా ఏకాం తంలో మనం సాధించిన జీవిత రహస్యమే యధార్ధమని నమ్మి సమాధానపరచుకోవడం మనిషన్న వాడికి సాధ్యమా? పద్యపాదం చక్కటి నడకకు యతిమైత్రి ఎలాగో.. జీవితం మంచి నడతకు సన్నితుడి తోడు. అలాగ ప్రేమతో విత్తనాలు వేసుకోవడానికి, కృత జ్ఞతతో పంట కోసుకోవడానికి పనికివచ్చే మన పొలంలాంటివాడు నిజమైన మిత్రుడు- అంటాడు ఖలీల్ జిబ్రాన్. ధన సాధన సంపత్తి లేనివారైనా బుద్ధిమంతులు పరస్పర మైత్రి సంపాదించుకొని స్వకార్యం సాధించుకుంటారన్నది పంచతంత్రంలో మిత్రలాభం మొదటి కధ చెప్పే నీతి. పొరుగువాడితో స్నేహపూర్వకంగా మసలుకోవడమే భూలోకవాసానికి మనమిచ్చే సరైన కిరాయి-  అన్న అ లనాటి బాక్సింగ్ యోధుడు మహమ్మదాలీ వాదం నిజమేకదా! ప్రేమభావంతో చూస్తే జీవనం సర్వస్వం మైత్రీవనమే.

మిత్రుడు అంటే సూర్యుడని మరో అర్ధం. ఏ లాభాపేక్ష లేకుం డానే తన చుట్టూ పరిభ్రమించే భూగోళాదిగ్రహాలకు ఉదారంగా వెలుగురేకలు పంచిపెట్టే ప్రభాకరుడు నిజంగా సార్ధక నామధే యుడే. ' మేఘుడు బుద్ధికి బోయి జలంబులు దెచ్చి యీయడే /వాస సమస్త జీవులకు వాంఛిత 

మింపెన లార' అని భాస్కర శతక పద్యం: మేఘం చెట్టుకు చుట్టమా, పక్కమా? ఉసిరితొక్కును దానంచేసిన పేదగృహిణి ఇంట కనకధారలు కురిపించడానికి శంకరుణ్ని ప్రేరేపించింది పరోపకారమే పరమార్ధంగా ఉన్న స్నేహభా వమే. పెదవి విప్పి చెప్ప పనిలేదు. మౌనహృదయం లయను కూడా గుర్తించగలడు నిజమైన నేస్తం.  కలిమి లేములకు సంబంధం లేనిది చెలిమి .  కృష్ణ కువేల సంబంధమే దానికి ఉత్తమ ఉదాహరణ. రాధా మాధవుల మధ్య నెలకొన్నది ప్రేమభావానికి అతీతమైన స్నేహసౌందర్యమే.  స్థాయీ భేదాలతో నిమిత్తం లేనిది స్నేహం. నరనారాయణుల సాహచర్యమే దీనికి చక్కని తార్కాణం. శ్రీకృష్ణుని నిర్యాణానంతరం హస్తినకు తిరిగి వచ్చిన పార్ధుడు అన్నగారితో ఆవేదనగా పలికిన మాటలే చాలు నేస్తభావన  సంపూర్ణ నిర్వచనానికి.  స్నేహితుడు సన్నిహితుడు, సారధి, సచివుడు, వియ్యం, సఖుడు, బాంధవుడు, విభుడు, గురువు.. అన్నిటికీ మించి దేవర గజేంద్రమోక్షంలో కరిరాజు మొరపెట్టుకున్నట్లు ' పెంజీకటి కవ్వల నెవ్వడు /నేకాకృతి వెలుగునో, ఆ వెలుగే మన అంతరంగాన్ని వెలిగించే స్నేహదీపం. ఒంటరైనా ఓటమైనా... వెంట నడిచే నీడ నేస్తం. తడికన్నులను తుడిచే ఆ స్నేహహస్తం ఒడుదొడుకుల బతుకుబాటలో చివరివరకు తోడు దొరకటమే.... మనిషి జన్మ ఎత్తినందుకు మనం చేసుకునే అదృష్టం.

వేడితే గాని వరాలివ్వని దేవుడి కన్నా వేడుకలా మన జీవితంలోకి నడిచి వచ్చే నేస్తం ఎందులో తక్కువ? ఎక్కడుంటాడో తెలి యని దైవం కన్నా కష్టంలో సుఖంలో, ఎత్తులో పతనంలో... ఎన్నడూ చేయి విడవక పక్కనుండే సన్మిత్రుడి సన్నిధిని మించిన పెన్నిధి మరేముంటుంది? కృష్ణపరమాత్మను చెలికాడిగా పొందిన గోపబాలకుల జన్మే జన్మమని వ్యాస భగవానుడిలా మనమూ ఈసుపొందాల్సిన పనిలేదు. ఠాగోర్‌ చెప్పినట్లు మన హృదయ కవాటం తెరిచి ఉంచాలేగాని... చొచ్చుకుని వచ్చేందుకు ప్రేమవాటి కలో తచ్చాడే నెచ్చెలులు లక్షలు లక్షలు. తండ్రి బిడ్డకు స్నేహితుడు. భార్య భర్తకు సహచరి. ఇరుగిల్లు పొరుగిల్లుకు తోడు. లోకమే ఏకైక కుటుంబంగా మారిన ఈ కాలంలో స్నేహసామ్రాజ్యం విస్త రించుకోవడానికి కులాలు, మతాలు, ప్రాంతాలు, వయసు, స్థాయీ భేదాలు- అడ్డుకావు. అమృత సాధనకోసం దేవదానవులే ఒక్కటై శ్రమించారు. స్నేహామృత సాధనకోసం జాతి మతాలకు అతీతంగా అందరూ ఒకటి కావడానికి అడ్డుగోడల్ని పడగొట్టలేమా? సంకల్పం చెప్పుకొనే సందర్భం ఈ రోజు 'అంతర్జాతీయ స్నేహదినం. ఆస్ట్రియా సామాజిక శాస్త్రవేత్తల పరిశోధనల ప్రకారం- స్నేహబంధం కలిగించే ఆత్మసంతృప్తి మరే ఇతర బంధం కలిగించలేనంత బలమైనది. హృదయపూర్వకంగా స్నేహహస్తం చాచేవారికి హృద్రోగ సంబంధ రుగ్మతలూ అధికంగా రావంటున్నారు. మైత్రికి విలువి ఇచ్చే  వారి జీవితకాలం ఒంటరిజీవులకన్నా ఎక్కువనీ వారి పరిశోధనల సారం. ఆరుద్ర చెప్పినట్లు- ఎవరినీ ప్రేమించకపోవడం ఒక నేరం, ప్రేమ తెలియని జీవితం భూమికి భారం!

రచన - కర్లపాలెం హనుమంతరావు 

( ఈనాడు - సంపాదకీయం - ప్రచురణ తేదీ - 07 -08 -2011 )